Karenda ya2011 Inotaura nezvoKunamata Kwemhuri

Kunamata Kwemhuri ndiyo nyaya ichasimbiswa muKarenda yeZvapupu zvaJehovha ya2011. Karenda yacho inoratidza mhuri dzemazuva ano uye mhuri dzinotaurwa muBhaibheri. Inoratidzawo vanhu vakaroorana uye vashumiri vaJehovha vasina kuroora kana kuroorwa vachidzidza Shoko rake.

Vanhu vanotaurwa muBhaibheri vanoratidzwa pakarenda yacho vaifarira mutemo waJehovha, uye izvi zvaikosha pakuvabatsira kutsungirira zvipingamupinyi zvakasiyana-siyana zvavaisangana nazvo. (Pis. 1:2, 3) Sezvatinoongorora mufananidzo mumwe nomumwe, tichayeuchidzwa nezvokukosha kweKunamata Kwemhuri, tingave tiine mhuri yakakura kana kuti duku, yakabatana mune zvokunamata kana kuti isina. Pakarenda yacho pane nzvimbo yakasiiwa yokuti munyore zuva rakasarudzwa nemhuri yenyu kuti muve noKunamata Kwemhuri. Makatonyora here?