Tsvaka Vakakodzera
1. Tinoratidza sei kuonga kwatinoita ropafadzo yokuenda muushumiri?
1 Muushumiri hwake, Jesu akaedza chaizvo kuudza vanyoro mashoko akanaka anonyaradza. (Isa. 61:1, 2) Senhume, uye vanhu vanomiririra Kristu, isu mazuva ano tine ropafadzo inokosha yokumutevedzera patinenge tichinyatsotsvaka vakakodzera vari mundima yedu tisinganeti.—Mat. 10:11; 2 VaK. 5:20.
2. Kuchinja-chinja kwaPauro kwakaratidzwa sei, uye kwakaguma nei?
2 Iva Anochinja-chinja: Muapostora Pauro akanga akajaira kutanga aenda kusinagogi kunoparidzira vaJudha nevemamwe marudzi vakanga vatendeuka. (Mab. 14:1) Asi muFiripi, iye naSirasi vakanotsvaka vanhu ‘kwavaifunga kuti kwaiva nenzvimbo yokunyengeterera.’ Vakatanga kupupurira boka revakadzi, uye mumwe wavo, Ridhiya, akakurumidza kugamuchira chokwadi.—Mab. 16:12-15.
3. Ndeipi mikana yokuita ushumiri yatingava nayo kuwedzera kundima yedu yatinoparidza paimba neimba?
3 Kuwedzera kundima yako yaunoparidza paimba neimba, ungaparidzirawo here vanhu vanowanika panokwirirwa mabhazi, mumapaki, mumahofisi anopinza vanhu basa, pamakona emigwagwa panenge paine vanhu vakawanda, munzvimbo dzebhizimisi, uye munzvimbo dzezvitoro dziri mundima yako? Zvimwe ungapupurira kune vaya vanogara munzvimbo dzine magedhi anenge akachengetedzwa uye vanogara muzvivako zvisingabvumirwi munhu wese wese kupindamo nokunyora tsamba kana kuti kuchaya runhare. Kungwarira kuona kuchinja kwezvinodiwa mundima yako wobva waita zvinoenderana nazvo kuchakubatsira kuva ne“zvizhinji zvokuita mubasa raShe.”—1 VaK. 15:58.
4. Kana ungano yedu iine ndima diki, ndezvipi zvimwe zvatingaita?
4 Vaparidzi vakawanda vakava nemukana wokuwedzera ushumiri hwavo nokutamira kune imwe ungano zvimwe iri munyika yavo kana kuti kune imwe nyika. Vamwe vakadzidza mutauro mutsva kuti vaparidzire vanhu vakabva kune imwe nyika.
5. Tinofanira kuona sei nguva yatiri kurarama mairi, uye tinofanira kutsunga kuitei?
5 Tose zvedu tinofanira kuyeuka kuti “munda inyika.” (Mat. 9:37; 13:38) Tichifunga nezvokuti kuguma kwemamiriro ezvinhu aripo iye zvino kwava pedyo, mumwe nomumwe anofanira kunyatsofunga nezvemamiriro ake ezvinhu, zvaanokwanisa kuita, uye mikana yaanayo yokuwedzera ushumiri hwake. Jehovha anotipikira kuti kana tikatanga kutsvaka zvinhu zvine chokuita noUmambo, achakomborera zvatinoedza kuita nemwoyo wose kuti tiwedzere ushumiri hwedu.—Mat. 6:33.