Tinoudza Vamwe Tariro Yedu yoUmambo
1 Mumazuva ano okupedzisira akaoma, vakawanda vari munyika havana tariro. (VaEf. 2:12) Vamwe nokusachenjera vakavimba nepfuma, nevatongi, nesayenzi, nezvimwewo. Chokwadi tinofara kuti tine tariro yeramangwana ‘inotsigisa mweya, yechokwadi uye yakasimba’!—VaH. 6:19.
2 Pasi rose richava paradhiso kana Umambo hwaMwari hwava kutonga. Hama dzedu dzakafa dzichamutswa. (Mab. 24:15) Urombo, kusaruramisira, zvirwere, kuchembera uye rufu zvichange zvisisipo. (Pis. 9:18; Mat. 12:20, 21; Zvak. 21:3, 4) Izvi ndezvimwe zvezvipikirwa zvaJehovha zvaachazadzisa munguva pfupi. Pazvinhu izvi ndechipi chaunonyanya kutarisira?
3 Zivisa Mashoko Akanaka: Tinofanira kuudzawo vamwe nezvetariro yoUmambo. Kuda Mwari uye vavakidzani vedu kunoita kuti titevedzere Jesu uye ‘tizivise mashoko akanaka kuvarombo, tiparidze kusunungurwa kunhapwa uye tiparidze kuti mapofu aone, tiite kuti vakadzvinyirirwa vaende vakasununguka.’ (Ruka 4:18) Muapostora Pauro akaparidza mashoko akanaka mumisika uye kwose kwaaiwana vanhu. Akabatikana kwazvo noushumiri. (Mab. 18:5) Kutevedzera muenzaniso wake wokushingaira muushumiri kuchaita kuti tariro yedu yechiKristu isadzimwa no“kuzvidya mwoyo nezvinhu zvomumamiriro ezvinhu epanguva ino nesimba rinonyengera repfuma.”—Mako 4:19.
4 Tariro yedu yoUmambo haifaniri kupedzwa nevanhu vatinosangana navo vasingakendengi, vasingafariri shoko roUmambo, kana kuti vanotishora zviri pachena. ‘Tinobatisisa mukana wokuzivisa tariro yedu pachena tisingazununguki.’ (VaH. 10:23) Hati“nyari nemashoko akanaka.” (VaR. 1:16) Chivimbo chatinoratidza uye kutsungirira kwatinoita zvingaita kuti vamwe vagume vateerera.
5 Kunyange zvazvo zvakakodzera kuti titaure nezvemamiriro ezvinhu ari kuramba achiipa munyika anozadzika uprofita hweBhaibheri, hatisi vaparidzi vezvinhu zvakaipa. Asi ushumiri hwedu hunotaura nezvetariro yedu yoUmambo, mashoko akanaka oUmambo hwaMwari. Ngatiparidzei aya mashoko akanaka nechivimbo uye tichishingaira ‘kuti tive nechivimbo chizere chetariro kusvikira kumugumo.’—VaH. 6:11.