Zviyeuchidzo zveChirangaridzo

Gore rino Chirangaridzo chichachengetwa musi weSvondo, April 8. Vakuru vanofanira kufunga pamusoro pezvinhu zvinotevera:

◼ Pakuronga nguva yomusangano wacho, ivai nechokwadi chokuti zviratidzo hazvizopfuudzwi kusvikira zuva ranyura.

◼ Munhu wose, kusanganisira mukurukuri, anofanira kuziviswa nezvenguva chaiyo nenzvimbo yachichachengeterwa.

◼ Rudzi chairwo rwechingwa newaini zvinofanira kuwanikwa zvogara zvavapo.—Ona Nharireyomurindi yaFebruary 15, 1985, peji 17.

◼ Ndiro, magirazi, uye tafura yakakodzera nejira repatafura zvinofanira kuunzwa kuhoro zvogara zvaiswa panzvimbo yazvo.

◼ Horo yoUmambo kana kuti imwe nzvimbo yokupindira inofanira kucheneswa zvakakwana nguva isati yakwana.

◼ Varindiri nevafambisi vezviratidzo vanofanira kusarudzwa ndokugara varayiridzwa mabasa avo nenzira yakafanira yokuaita nayo.

◼ Panofanira kurongwa kuti kana pane vakazodzwa vasina kugwinya uye vasingakwanisi kuvapo vazopiwa chingwa newaini.

◼ Kana ungano dzinopfuura imwe dzakarongwa kuti dzishandise Horo yoUmambo imwe chete, ungano dzacho dzinofanira kushandira pamwe zvakanaka kuti vanhu vasazowandisa pachivanze, pamisuo kana pokupaka motokari.