Kuparidza Kunotisiyanisa
1 Vanhu vakawanda vanobvunza kuti, “Chii chinoita kuti Zvapupu zvaJehovha zvisiyane nezvimwe zvitendero?” Ungapindura sei? Ungatsanangura zvimwe zvezvatinodavira zvakavakirwa paBhaibheri. Asi wakambofungawo here nezvekuratidza kuti ushumiri hwedu hwapachena hunotisiyanisa zvakadini nezvimwe zvitendero?—Mat. 24:14; 28:19, 20.
2 Nhasi, vanhu vashomanana vechitendero vanonzwa vachida kugovana nevamwe zvavanodavira. Vangafunga kuti zvakakwana kuteerera mitemo yaKesari, kurarama upenyu hune tsika dzakanaka, kana kuti kuitira vamwe mabasa emutsa. Zvisinei, havanzwi vane musengwa wokubetsera vamwe kudzidza zvinotaura Bhaibheri pamusoro pokuponeswa. Takasiyana sei?
3 Ushumiri hwedu hwokushingaira hwakanyatsosiyana nezvinoitwa nezvimwe zvitendero. Kwemakore anopfuura 100, Zvapupu zvamazuva ano zvaparidza nokushingairira mashoko akanaka kusvika kumigumo yepasi, mukutevedzera vaKristu vapakutanga. Vavariro yedu yekuita izvi ndeyokubetsera vanhu vakawanda sevanobvira kuti vawiriranise upenyu hwavo nokuda kwaMwari.—1 Tim. 2:4; 2 Pet. 3:9.
4 Une Mukurumbira Wakadii? Unozivikanwa semuparidzi anoshingaira weShoko raMwari here? (Mabasa 17:2, 3; 18:25) Nemhaka yebasa rako rokuparidza, vavakidzani vako vanoona zviri nyore musiyano uri pakati pechitendero chavo nechako here? Unozivikanwa semunhu anoda zvikuru kugovana tariro yake nevamwe here? Une muitiro wenguva dzose wokuitawo ushumiri here? Yeuka kuti tinozvisiyanisa kwete bedzi nezita redu asiwo nekuita kwedu zvinotsanangurwa nezita iroro—kupupura nezvaJehovha.—Isa. 43:10.
5 Kuda Mwari nemuvakidzani kunotiita kuti tiitewo basa rokuparidza. (Mat. 22:37-39) Ndokusaka isu, saJesu nevaapostora, tichida kushandisa mukana uri wose wokugovana mashoko eUmambo nevamwe. Ngatirambe tichiparidza mashoko akanaka nokushingaira kuna avo vanoda kuteerera. Kuita kudaro kuchabetsera vane mwoyo yakatendeseka ku“ona kusiyana . . . kwounoshumira Mwari nousingamushumiri.”—Mar. 3:18.