Zita Rinoita Kuti Uve Nokutenda Kwechokwadi

“HAMUTENDI muna Jesu nomuropa rake rinodzikinura,” akadaro mumwe mukadzi kuchimwe Chapupu chaJehovha. Mumwe murume akati nechivimbo: “Munozviti Zvapupu zvaJehovha, asi ini ndiri chapupu chaJesu.”

Kufunga kwokuti Zvapupu zvaJehovha hazvitendi muna Jesu kana kuti hazvimukwidziridzi zvakaringana kwakapararira zvikuru. Asi chokwadi ndechipi?

Ichokwadi kuti Zvapupu zvaJehovha zvinoomerera pazita raMwari, rokuti Jehovha.a Itamar, chimwe Chapupu chiri muBrazil, anoyeuka kuti: “Kuchinja kukuru muupenyu hwangu kwakaitika pandakaziva zita raMwari. Pandakarirava kekutanga, zvakanga zvakaita sokunge ndakanga ndamuka muhope huru. Zita rokuti Jehovha rakandinyandura uye rakandiita kuti ndiite chimwe chinhu; rakabaya mukatikati memweya wangu.” Zvisinei, anowedzera kuti; “Mwoyo wangu unopfachukirawo nokuda Jesu.”

Hungu, Zvapupu zvaJehovha zvinoziva kuti, kuti zviwane upenyu husingaperi, zvinofanira kutenda “kuzita roMwanakomana waMwari,” Jesu. (1 Johane 5:13) Asi mashoko okuti ‘muzita raJesu’ anorevei?

Zvinomirirwa Nezita raJesu

Mashoko okuti “nezita raJesu” nemamwe akafanana anowanikwa muMagwaro echiGiriki echiKristu ose, kana kuti “Testamente Itsva.” Chaizvoizvo, shoko rokuti “zita” richishandiswa kutaura nezvebasa raJesu rinooneka kanopfuura ka80, kanenge ka30 mubhuku raMabasa moga. VaKristu vomuzana rokutanga remakore vaibhabhatidza muzita raJesu, vairapa muzita rake, vaidzidzisa muzita rake, vaidana pazita rake, vakatambura nokuda kwezita rake, uye vakarumbidza zita rake.—Mabasa 2:38; 3:16; 5:28; 9:14, 16; 19:17.

Maererano nerimwe duramashoko reBhaibheri, shoko rechiGiriki nokuda kwe“zita” rinowanzoshandiswa muBhaibheri “nokuda kwezvose zvinoreva zita, chiremera, munhu, nzvimbo yebasa, uchangamire, simba, kunaka zvikuru, nezvimwewo, zvechinhu chose chinorehwa nezita.” Naizvozvo, zita raJesu rinomirira chiremera chine simba uye chikuru zvikuru chaakaronzeswa naJehovha Mwari. Jesu pachake akati: “Ndakapiwa simba rose kudenga napanyika.” (Mateo 28:18) Petro naJohane pavakanga varapa murume aikamhina, vatungamiriri vechitendero chechiJudha vakabvunza kuti: “Makazviita izvozvi nesimba rei, kana nezita ripiko?” Ipapo Petro akataura asingatyi kutenda kwake muchiremera nesimba zvinomirirwa nezita raJesu paakaita kuti zvizivikanwe kuti zvaiva “nezita raJesu Kristu weNazareta, . . . nezita iri munhu uyu umire pano pamberi penyu apora.”—Mabasa 3:1-10; 4:5-10.

Kutenda Muna Jesu Here Kana Kuti Muna Kesari?

Zvisinei, kutaura kuti unotenda zvakadaro muzita raJesu, kwaisazova kuri nyore. Sezvakanga zvafanotaurwa naJesu, vadzidzi vake vaizo‘vengwa namarudzi ose nokuda kwezita rake.’ (Mateo 24:9) Neiko? Nokuti zita raJesu rinomirira nzvimbo yake soMutongi akagadzwa waMwari, Mambo wamadzimambo, marudzi ose anofanira kukotamira kwaari mukuzviisa pasi, chiri chimwe chinhu chavasina kugadzirira kana kuti chavasingadi kuita.—Pisarema 2:1-7.

Vatungamiriri vechitendero vomuzuva raJesu vaisadawo kukotamira Jesu mukuzviisa pasi. Vakati: “Hatina mambo, asi Kesari chete,” nenzira iyoyo vachiramba Mwanakomana waMwari. (Johane 19:13-15) Panzvimbo pezvo, vakatenda muzita—simba nechiremera—zvaKesari nehurumende youmambo hwake. Vakatosarudza kuti Jesu anofanira kufa kuitira kuti vachengetedze basa ravo nenzvimbo.—Johane 11:47-53.

Mumazana amakore pashure pokunge Jesu afa, vazhinji vaavo vaizviti vaKristu vakatanga kufunga kwakafanana neuko kwevatungamiriri vechiJudha. Ava vainzi vaKristu vakatenda musimba nechiremera zveHurumende uye vakabatanidzwa mukurwa kwayo. Somuenzaniso, muzana ramakore rechi11, pashure pokunge chechi yaronga varwi vakanga vasingashandi kuva militia Christi, kana kuti varwi vechiKristu, “basa rokutungamirira hondo yakarurama rakabviswa pamasimba enyika echiKristudhomu ndokuitwa zvisinei, nechechi nokumumiririri wevarwi vayo vechiKristu.” (The Oxford History of Christianity) Nhau yacho inowedzera kuti zvimwe zvakaziviswa napapa zvakaita kuti vazhinji vevarwi vehondo dzechiKristu vadavire kuti nokurwawo hondo dzechiKristu, “vakanga vaita chibvumirano naMwari uye vakanga vazviita vane chokwadi chokuva nenzvimbo muParadhiso.”

Vamwe vangapikisa kuti zvinoita kuva vakavimbika kuna Jesu uye panguva imwe cheteyo kuitawo zvematongerwe enyika, pamwe chete nehondo dzenyika. Vangafunga kuti ibasa romuKristu kurwisa uipi kupi nokupi kwahungawanika uye kuti izvozvi zvinobatanidza kuzoguma varwa kana vachifanira. Asi vaKristu vepakutanga vakanga vachifungawo seizvi here?

“VaKristu vepakutanga-tanga havana kushanda mumauto,” inodaro imwe nyaya mumagazini inonzi The Christian Century. Inotsanangura kuti kusvikira kugumi remakore ra170-180 C.E., hapana kana uchapupu hwokuti vaKristu vakashanda muuto. Nyaya yacho inobva yawedzera kuti: “VaKristu vakazorega kudzivisa kwavo basa rehondo zvishoma nezvishoma.”

Zvakaguma nei? “Zvichida hapana chimwe chinhu chakazvidzisa chiKristu kupfuura muitiro wacho wokutsigira kusina kumbosiyana neuko kwevasiri vaKristu pakurwa hondo,” inodaro nyaya yeThe Christian Century. “Kuti vaKristu vanotsigira kutenda kweMuponesi munyoro nepowo vachitsigira zvikuru hondo dzezvitendero kana kuti dzenyika kwakuvadza zvikuru kutenda.”

Kutevedzera vaKristu Vepakutanga Nhasi

Zvinoita here kuti vaKristu nhasi vatevedzere muenzaniso wakaisvonaka wevaKristu vepakutanga? Zvapupu zvaJehovha muzana rino ramakore zvakaratidza kuti zvinoita. Achitaura pamusoro pazvo, munyori weHolocaust Educational Digest akati: “Hapana Chapupu chaJehovha chichambofa chakaenda kuhondo. . . . Kudai munhu wese munyika ari munzvimbo ine simba akanga ari weichi chitendero, [Hondo Yenyika II] ingadai isina kumboitika.”

Zvakafanana zvinogona kutaurwa nezvekurwisana kwazvino uno kwomunzvimbomo, souko kwakapisa zvikuru muNorthern Ireland. Makore akati akapfuura, chimwe Chapupu chaJehovha chakanga chichiparidza pamba nemba munharaunda yeProtestant muguta reBelfast. Mumwe saimba, aziva kuti Chapupu chacho chaimbova muKaturike, akabvunza kuti: “Pamaiva muKaturike maitsigira IRA [Irish Republican Army] here?” Chapupu chacho chakaziva kuti murume wacho aigona kuita zvechisimba nokuti akanga avharirwa pashure pokubatwa ane pfuti achienda kunouraya muKaturike uye akanga achangobva kuburitswa. Saka Chapupu chacho chakapindura kuti: “Handisi muKaturike zvino. Ndiri Chapupu chaJehovha. SemuKristu wechokwadi, handingambourayi upi noupi nokuda kwehurumende ipi neipi kana kuti munhu upi zvake.” Zvadaro saimba wacho akamugwinha ruoko ndokuti: “Kuuraya kwose kwakaipa. Vanhu imi muri kuita basa rakanaka. Rambai muchidaro.”

Zvinoreva Kutenda Muzita raJesu

Zvisinei, kutenda muzita raJesu, kunoreva zvinopfuura kungorega hondo. Kunoreva kuteerera mirayiro yose yaKristu. Pashure pezvose, Jesu akati: “Imi muri hama dzangu, kana muchiita zvandinokurayirai ini,” uye mumwe wemirayiro yake ndewokuti ti“dane.” (Johane 15:14, 17) Rudo runotsvaka kuitira vamwe zvakanaka. Runobvisa rusaruro rwose rwerudzi, rwechitendero, uye rwenzanga. Jesu akaratidza kuti zvinoitwa sei.

VaJudha vomuzuva raJesu vaisawirirana zvikuru nevaSamaria. Mukupesana, Jesu akataura nomukadzi wechiSamaria, uye somugumisiro, iye nevamwe vakawanda vakatenda muzita rake. (Johane 4:39) Jesu akataurawo kuti vadzidzi vake vaizova zvapupu zvake “paJerusarema, napaJudhea rose, napaSamaria, nokusvikira kumugumo wenyika.” (Mabasa 1:8) Shoko rake rinopa upenyu raisafanira kuganhurirwa kuvaJudha. Nenzira inowirirana, Petro akarayirwa kuti ashanyire mukuru weuto weRoma Kornerio. Kunyange zvakanga zvisingabvumirwi nomutemo kuti muJudha ashanyire mumwe munhu worumwe rudzi, Mwari akaratidza Petro kuti a“rege kuti munhu haana kunaka, kana kuti une tsvina.”—Mabasa 10:28.

Zvichitevedzera Jesu, Zvapupu zvaJehovha zvinoda kubetsera vanhu vose—pasinei hapo noupenyu hwavo hwekare mune zvorudzi, zvechitendero, kana kuti zveupfumi—kuti vadzidze nezveruponeso runouya nezita raJesu. Kutenda muzita raJesu kunozviita kuti zvi‘pupure pachena kuti Jesu ndiye Ishe.’ (VaRoma 10:8, 9) Tinokukurudzira kuti ubvume kubetserwa nazvo kuitira kuti iwewo udzidze kutenda muzita raJesu.

Zita raJesu rinofanira kuparira zvechokwadi kunzwa kwokukudza, kuremekedza, uye kuteerera. Muapostora Pauro akati: “Muzita raJesu mabvi ose apfugame, avari kudenga navari panyika, navari pasi penyika, kuti ndimi dzose dzibvumire dziti, Jesu Kristu ndiye [I]she, kuti Mwari, Baba, arumbidzwe.” (VaFiripi 2:10, 11) Kunyange vazhinji vevagari vepasi vangave vasingadi kuzviisa pasi pokutonga kwaJesu, Bhaibheri rinoratidza kuti nguva yava pedyo apo vanhu vose vachafanira kuita kudaro kana kuti kuparara. (2 VaTesaronika 1:6-9) Naizvozvo, zvino ndiyo nguva yokutenda muzita raJesu nokuramba tichichengeta mirayiro yake yose.

[Mashoko Omuzasi]

[Mufananidzo uri papeji 6]

Muzita raJesu, mamiriyoni akauraya uye akaurawa

[Mufananidzo uri papeji 7]

Jesu haana kuva nerusaruro rwerudzi. Unarwo here?