“Rutongeso Rwokuongorora”—Idzidziso yemuBhaibheri Here?

OCTOBER 22, 1844, raiva zuva retarisiro huru nokuda kwevanhu vanenge 50 000 vaiva kuMhenderekedzo Yegungwa Yekumabvazuva yeUnited States. Mutungamiriri wavo womudzimu, William Miller, akanga ataura kuti Jesu Kristu aizodzoka nezuva iroro chairo. VaMillerite, sokudanwa kwavakaitwa, vakamirira munzvimbo dzavo dzokusangana kusvikira ava manheru. Ipapo zuva rakatevera rakavamba, asi Ishe akanga asina kuuya. Vaodzwa mwoyo, vakadzokera kumusha uye pashure pezvo vakayeuka zuva racho se“Kuodzwa Mwoyo Kukuru.”

Bva, kuodzwa mwoyo kwakakurumidza kuunza tariro. Imwe mhandara yainzi Ellen Harmon yakapwisa rimwe boka duku revaMillerite kuti Mwari akanga azivisa muzviono kuti kuverenga nguva kwavo kwakanga kwakarurama. Yaidavira kuti chiitiko chinokosha chakanga chaitika pazuva iroro—Kristu akanga apinda mu“nzvimbo tsvene-tsvene yokudenga.”

Anopfuura makore gumi gare gare, muparidzi weAdventist James White (uyo akanga aroora Ellen Harmon) akafunga nezvemashoko okurondedzera rudzi rwebasa raKristu kubvira muna October 1844. MuReview and Herald yaJanuary 29, 1857, White akataura kuti Jesu akanga avamba “rutongeso rwekuongorora.” Uye ichochi chakaramba chiri chitendero chinokosha pakati pemamiriyoni manomwe anozviti maSeventh-Day Adventist.

Zvisinei, dzimwe nyanzvi dzinoremekedzwa muChechi yeSeventh-Day Adventist (SDA) dzave dzichishamiswa kana “rutongeso rwokuongorora” iri dzidziso yemuBhaibheri. Nei vari kumutsa mubvunzo pamusoro parwo? Kudai wakanga uri muSeventh-Day Adventist, mubvunzo iwoyu waizokunetsa. Kutanga, kunyange zvakadaro, chii chinonzi “rutongeso rwokuongorora”?

Chii?

Rugwaro runokosha rwakanokorwa kutsigira dzidziso iyoyi ndiDhanieri 8:14. Inoti: “Akati kwandiri, Pashure pemazuva ane zviuru zviviri namazana matatu; nzvimbo tsvene ichacheneswa.” (King James Version) Nemhaka yekutaura kwekuti “nzvimbo tsvene ichacheneswa,” vaAdventist vakawanda vanobatanidza ndima iyoyi naRevhitiko ganhuro 16. Inorondedzera kucheneswa kwenzvimbo tsvene nemuprista mukuru wechiJudha paZuva reYananiso. Vanobatanidzawo mashoko aDhanieri naVaHebheru ganhuro 9, iyo inorondedzera Jesu soMuprista Mukuru ari mudenga. Imwe nyanzvi yeSDA inotaura kuti uku kurangarira kwakavakirwa pamutoo we“rugwaro runobvumikisa.” Munhu anowana “shoko rakaita senzvimbo tsvene muna Dhan. 8:14, shoko rimwe chetero muna Revh. 16, shoko rimwe chetero muna VaH. 7, 8, 9” ndokugumisa “kuti ose ari kutaura pamusoro pechinhu chimwe.”

VaAdventist vanorangarira neiyi nzira: Vaprista vaIsraeri wakare vaiita ushumiri hwezuva nezuva muchikamu chetembere chainzi Nzvimbo Tsvene, zvichiguma nokukanganwirwa zvivi. Pazuva reYananiso, muprista mukuru aiita ushumiri hwegore negore muNzvimbo Tsvene-tsvene (kamuri romukati-kati retembere) izvo zvaiguma nokubviswa kwezvivi. Vanogumisa kuti ushumiri hwaKristu hweuprista mudenga hune zvikamu zviviri. Chokutanga chakavamba nokukwira kwake muzana ramakore rokutanga, chakaguma muna 1844, uye chakaguma nokukanganwirwa kwezvivi. Chechipiri, kana kuti “chikamu chorutongeso,” chakavamba nemusi waOctober 22, 1844, chichiri kupfuurira, uye chichaguma nokubviswa kwezvivi. Izvozvi zvinoitwa sei?

Kubvira muna 1844, Jesu anonzi ari kuongorora zvinyorwa zveupenyu zvavose vanotaura kuti vatendi (kutanga zvavakafa, tevere zvavapenyu) kuti asarudze kana vachikodzera upenyu husingagumi. Uku kunzvera kunonzi “rutongeso rwokuongorora.” Pashure pokunge vanhu vatongwa zvakadaro, zvivi zvavose vanokunda uyu muedzo zvinodzimwa muzvinyorwa. Asi, akatsanangura kudaro Ellen White, avo vasingakundi vacha‘dzimirwa mazita avo mubhuku roupenyu.’ Nokudaro, “nguva yemberi yavose ichave yasarudzwa nokuda kwoupenyu kana kuti rufu.” Panguva iyoyo, nzvimbo tsvene yokudenga inocheneswa uye Dhanieri 8:14 inozadzikwa. Ndizvo zvinodzidzisa vaSeventh-Day Adventist. Asi chimwe chinyorwa cheSDA chinonzi Adventist Review chinobvuma kuti: “Mashoko okuti rutongeso rwokuongorora haawaniki muBhaibheri.”

Kusawirirana Kwemitauro

Dzidziso iyi yakanetsa vamwe vaAdventist. “Nhau inoratidza,” anodaro mumwe mutsinhiri, “kuti vatungamiriri vedu vakavimbika vakatambura marwadzo emweya sezvavakarangarira dzidziso yedu yekare yerutongeso rwokuongorora.” Mumakore mashomanene apfuura, anowedzera kudaro, marwadzo akava kusava nechokwadi sezvo nyanzvi dzakavamba ku“sava nechokwadi nembiru dzakawanda dzemharidzo yedu pamusoro penzvimbo tsvene.” Zvino ngatinzverei mbiri dzacho.

Mbiru yokutanga: Dhanieri ganhuro 8 inobatanidzwa naRevhitiko ganhuro 16. Kutaura uku hakushandi nemhaka yezvinetso zviviri—mutauro nemashoko akapoteredza. Kutanga, rangarira mutauro. VaAdventist vanodavira kuti ‘nzvimbo tsvene yakacheneswa’ iri muna Dhanieri ganhuro 8 yaifananidzirwa ne‘nzvimbo tsvene yakacheneswa’ yaRevhitiko ganhuro 16. Iyi fanano yairatidzika kuva inogamuchirika kutozosvikira vashanduri vadzidza kuti “kucheneswa” kuri muKing James Version kushandurwa kusina kururama kwechiito chechiHebheru tsa·dhaqʹ (kureva “kururama”) chinoshandiswa pana Dhanieri 8:14. Purofesa wezverudzidziso Anthony A. Hoekema anoti: “Hazvifadzi kuti shoko rimwe chetero rakashandurwa kuti kucheneswa, sezvo chiito chechiHebheru chinowanzoshandurwa kunzi kucheneswa [ta·herʹ] chisingatomboshandiswi pano.”a Chinoshandiswa muna Revhitiko ganhuro 16 umo King James Version inoshandura zvimiro zveta·herʹ se“kuchenesa” uye “kuchena.” (Revhitiko 16:19, 30) Nokudaro, Dr. Hoekema vanogumisa nenzira yakarurama vachiti: “Kana Dhanieri aida kunongedzera kurudzi rwokuchenesa rwaiitwa paZuva reYananiso, angadai akashandisa taheer [ta·herʹ] panzvimbo petsadaq [tsa·dhaqʹ].” Bva, tsa·dhaqʹ hariwaniki muna Revhitiko, uye ta·herʹ hariwaniki muna Dhanieri. Mashoko acho haawirirane.

Mashoko Akapoteredza Anozivisei?

Zvino rangarira mashoko akapoteredza. VaAdventist vanodavira kuti Dhanieri 8:14 “yakazvimirira,” isina chokuita nendima dziri kumashure. Asi unowana revo iyoyo paunoverenga Dhanieri 8:9-14 nebhokisi rakanzi “Mashoko Akapotedza aDhanieri 8:14” here? Ndima 9 inotaura nezvemudenhi, nyanga duku. Ndima 10-12 dzinozivisa kuti mudenhi uyu aizorwisa nzvimbo tsvene. Ndima 13 inobvunza kuti, ‘Kudenhwa uku kuchasvika rini?’ Uye ndima 14 inopindura kuti: “Kusvikira madekwana namagwanani ane zviuru zviviri namazana matatu; ipapo nzvimbo tsvene ichanatswa.” Nenzira yakajeka, ndima 13 inomutsa mubvunzo unopindurwa mundima 14. Nyanzvi yezverudzidziso Desmond Ford inoti: “Kusabatanidza Dhan. 8:14 nekudanidzira uku [“Zvichasvika rini?” ndima 13] kushaya tsigiro yekutsanangura.”b

Nei vaAdventist vachibvisa ndima 14 mumashoko akapoteredza? Kuti vadzivise mhedziso isingafadzi. Mashoko akapoteredza anoti nzvimbo tsvene, inodudzwa mundima 14, inosvibiswa nemibato yenyanga duku. Zvisinei, dzidziso yo“rutongeso rwokuongorora” inoti mibato yaKristu ndiyo inosvibisa nzvimbo tsvene. Anonzi anotamisira zvivi zvevatendi kunzvimbo tsvene yokudenga. Naizvozvo, chii chinoitika kana vaAdventist vakagamuchira zvose zviri zviviri dzidziso nemashoko akapoteredza? Dr. Raymond F. Cottrell, muSeventh-Day Adventist uye aichimbonyorawo SDA Bible Commentary, anonyora kuti: “Kuzvinyengera tichiti kududzira kweSDA kunonzvera Dhanieri 8:14 nemashoko ayo akapoteredza kungareva kuti Kristu ndiye nyanga duku.” Dr. Cottrell akabvuma nenzira yakarurama kuti: “Hatingavi nezvose zviri zviviri mashoko akapoteredza nekududzira kweAdventist.” Kana toreva nezve“rutongeso rwokuongorora,” naizvozvo, Chechi yeAdventist yaifanira kuita chisarudzo—kugamuchira dzidziso yacho kana kuti mashoko akapoteredzaaDhanieri 8:14. Nenzira isingafadzi, yakabvuma dzidziso ndokuramba mashoko akapoteredza. Hazvishamisi, anodaro Dr. Cottrell, kuti vadzidzi veBhaibheri vanoziva vanopomera vaAdventist “kunzvera vachipinza muMagwaro” zvinhu zvisingagoni “kuwanwa kubva muMagwaro”!

Muna 1967, Dr. Cottrell vakaita chidzidzo chechikoro chesabata pamusoro paDhanieri, iyo yakatumirwa kumachechi eSDA munyika yose. Vakadzidzisa kuti Dhanieri 8:14 yakabatana nemashoko ayo akapoteredza uye kuti ‘kucheneswa’ hakunongedzeri kuvatendi. Nenzira ine revo, chidzidzo chacho chinobvisa kududzwa kupi nokupi kwe“rutongeso rwokuongorora.”

Dzimwe Mhinduro Dzinoshamisa

VaAdventist vanoziva zvakakura sei kuti iyi mbiru haigoni kutsigira dzidziso ye“rutongeso rwokuongorora”? Dr. Cottrell vakabvunza vafundisi vakuru 27 veAdventist kuti, ‘Zvikonzeroi zvomutauro uye zvemashoko akapoteredza zvamunogona kupa nokuda kwokubatanidza Dhanieri ganhuro 8 naRevhitiko ganhuro 16?’ Mhinduro yavo?

“Vose vari makumi maviri nevanomwe vakabvuma kusavapo kwezvikonzero zvipi nezvipi zvemutauro uye zvemashoko akapoteredza zvokushandisa Dhan. 8:14 kuzuva rakafananidzirwa rekuyananisa uye rutongeso rwokuongorora.” Akavabvunza kuti, ‘Mune zvimwe zvikonzero zvokubatanidza nenzira yakadaro here?’ Nyanzvi zhinjisa dzevaAdventist dzakataura kuti dzakanga dzisina zvimwe zvikonzero, vashanu vakapindura kuti vakabatanidza nenzira yakadaro nekuti Ellen White akanga aita kudaro, uye vaviri vakataura kuti vakanga vavakira dzidziso yavo pa“mhosho yakarurama” yekushandura. Nyanzvi yezverudzidziso Ford inotsinhira kuti: “Mhedziso dzakadaro dzinopiwa nenyanzvi dzedu dzinoreva chaizvo kuti dzidziso yedu yegamuchidzanwa pamusoro paDhan. 8:14 haishande.”

Pane Betsero Ipi Neipi Iri Muna VaHebheru Here?

Mbiru yechipiri: Dhanieri 8:14 inobatanidzwa naVaHebheru ganhuro 9. “Mabhuku edu ose apakuvamba anoshandisa zvikuru VaH. 9 pakutsanangura Dhan. 8:14,” anodaro mufundisi Ford. Batano iyoyi yakavamba pashure pe“Kuodzwa Mwoyo Kukuru” muna 1844. Achitsvaka nhungamiro, muMillerite Hiram Edson akadonhedzera Bhaibheri rake patafura kuti ridonhe rakavhurika. Mugumisiro wacho? VaHebheru maganhuro 8 ne9 akanga akamutarisa. Ford anoti: “Chii chingava chakakodzera zvikuru uye chinofananidzira chokutaura kwevaAdventist kwokuti maganhuro aya anoreva nezva1844 naDhan. 8:14!”

“Kutaura ikoko kwakaomera vaSeventh-Day Adventist,” anowedzera Dr. Ford mubhuku rake Daniel 8:14, the Day of Atonement, and the Investigative Judgment. “Muna VaH. 9 bedzi . . . ndimo munogona kuwanwa tsananguro ine udzame yerevo . . . yedzidziso yenzvimbo tsvene inokosha kwazvo kwatiri.” Hungu, VaHebheru ganhuro 9 ndiro ganhuro riri mu“Testamende Itsva” rinotsanangura revo youporofita yaRevhitiko ganhuro 16. Asi vaAdventist vanotaurawo kuti Dhanieri 8:14 ndiyo ndima iri mu“Testamende Yakare” inotaura kudaro. Kana kutaura kwose kuri kwechokwadi, kunofanira kuva nebatano pakati paVaHebheru ganhuro 9 naDhanieri ganhuro 8.

Desmond Ford anoti: “Zvimwe zvinhu zvakajeka nokukurumidza sezvo munhu anorava VaH. 9. Hapana kutaura kwakajeka kuri mubhuku raDhanieri, uye zvechokwadi hakuna pana Dhan. 8:14. . . . . Ganhuro racho rose rinoshandisa Revh. 16.” Anoti: “Dzidziso yedu yenzvimbo tsvene haigoni kuwanwa mubhuku rimwe chete reTestamende Itsva iyo inotaura nezverevo yemabasa enzvimbo tsvene. Izvozvi zvakabvumwa nevamwe vanyori veAdventist vanozivikanwa kupota nyika yose.” Naizvozvo, ipapo, mbiru yechipiri haigoniwo kutsigira dzidziso yacho ine chinetso.

Zvisinei, mhedziso iyoyi haisi itsva. Kwemakore akawanda, anodaro Dr. Cottrell, “Nyanzvi dzeBhaibheri dzechechi dzave dzichiziva zvikuru nezvezvinetso zvekutsanangura kududzira kwedu Dhanieri 8:14 naVaHebheru 9.” Makore 80 apfuura, muSeventh-Day Adventist anopesvedzera E. J. Waggoner akanyora kuti: “Dzidziso yeAdventist pamusoro penzvimbo tsvene, ne‘Rutongeso Rwokuongorora’ rwayo . . . , inodokuva kurambwa kweyananiso.” (Confession of Faith) Kwemakore anopfuura 30, zvinetso zvakadaro zvakapiwa Dare Guru, vatungamiriri veChechi yeSDA.

Zvinetso Nekupererwa Nezano

Dare Guru rakagadza “Dare Pamusoro peZvinetso Zviri Mubhuku raDhanieri.” Raifanira kuita mushumo pamusoro penzira yokupedza nayo zvinetso zvine chokuita naDhanieri 8:14. Mitezo 14 yedare yakanzvera mubvunzo wacho kwemakore mashanu asi yakakundikana kuwana mhinduro inoshanda. Muna 1980, mutezo wedare Cottrell akataura kuti mitezo mizhinjisa yedare yairangarira kuti kududzira kwevaAdventist Dhanieri 8:14 kwaigona “kuitwa nenzira inobudirira” ne“fungidziro” uye kuti zvinetso “zvinofanira kukanganwika.” Akawedzera kuti: “Yeukai, zita redare racho raiva Dare pamusoro peZvinetso Zviri Mubhuku raDhanieri, uye ruzhinji rwaikarakadza kuti tikanganwe zvinetso uye tisingatauri chinhu pamusoro pazvo.” Izvozvo zvingave zvakakonzera “kubvuma kuti takanga tisina mhinduro.” Naizvozvo vashomanene vakaramba kutsigira murangariro weveruzhinji, uye pakanga pasina mushumo wakarurama. Zvinetso zvedzidziso zvakaramba zvisina kugadziriswa.

Vachitsinhira pamusoro peichi chinetso, Dr. Cottrell vanoti: “Nhau yaDhanieri 8:14 tichinayo nemhaka yekuti tave tisingadi, pamwero mukuru, kutarisana neidi rokuti chinetso chacho chiriko. Nhau iyoyi haiperi chero bedzi tikaramba tichiita sokunge kuti hapana chinetso, chero bedzi tikaramba takagarira pfungwa, somunhu mumwe nomumwe kana kuti seboka, mumifungo yedu toga.—Spectrum, magazini yakabudiswa neAssociation of Adventist Forums.

Dr. Cottrell vanokurudzira vaAdventist “kunzverazve nokungwarira fungidziro huru nenheyo dzokutsanangura patakavakira kududzira kwedu—nokuda kwechiAdventist—chikamu cheRugwaro chinokosha.” Tingakurudzire vaAdventist kunzvera dzidziso ye“rutongeso rwokuongorora” kuti vaone kana mbiru dzayo dzakavakirwa zvakasimba muBhaibheri kana kuti dzichiwanikwa mumagamuchidzanwa asina paakavakirwa.c Muapostora Pauro akakurudzira nenzira yokuchenjera kuti: “Idzai zvinhu zvose; mubatisise zvakanaka.”—1 VaTesaronika 5:21.

[Mashoko Omuzasi]

[Bhokisi riri papeji 27]

Mashoko Akapoteredza aDhanieri 8:14

DHANIERI 8:9 “Uye pakati peimwe yadzo pakabuda imwe nyanga, duku, uye yakaramba ichikura zvikuru nechokumaodzanyemba uye nechokumabvazuva uye pedyo neNyika yakanaka. 10 Uye yakaramba ichikura kusvikira kuzvinhu zvokudenga, zvokuti yakaita kuti zvimwe zvacho nedzimwe nyeredzi zvidonhere pasi, uye yakapfuurira kuzvitsika-tsika. 11 Uye nzira yose kusvikira kuMuchinda wehondo yakashora, uye akatorerwa chibayiro chinopiwa nguva dzose, uye nzvimbo yakagadzwa yenzvimbo tsvene yake yakaparadzwa. 12 Uye hondo pachayo yakakundwa zvishoma nezvishoma, pamwe chete nechibayiro chenguva dzose, nemhaka yokudarika; uye chakaramba chichikanda chokwadi pasi, uye chakaita uye chakabudirira.

“13 Uye ndakanzwa mumwe munhu mutsvene achitaura, uye mumwe mutsvene akapfuurira kutaura kune akanga achitaura achiti: ‘Chiono chechibayiro chinopiwa nguva dzose nechekudarika chinokonzera kuparadzwa chichasvikira rini, kuzoita nzvimbo tsvene nehondo zvinhu zvokutsika?’ 14 Naizvozvo akati kwandiri: ‘Kusvikira manheru nemagwanani ane zviuru zviviri nemazana matatu; uye nzvimbo tsvene zvirokwazvo icharuramiswa.’”—New World Translation of the Holy Scriptures.