Chii Chakaitika Kukutendeseka?
ANOPFUURA zvishoma makore ane zana rimwe akapfuura, Barney Barnato, mutengesi wemadhaimani, akadzokera kuEngland achibva kuSouth Africa. Pakusvika kwake haana kubvumirana nenhau yomupepanhau yakanyorwa pamusoro pake. Naizvozvo akapa mupepeti wenhau zvakanyorwa noruoko nokuda kwenyaya yechipiri, “achingoruramisa zvinhu,” necheki yechitsama chikuru chemari.
Mupepeti wenhau, J. K. Jerome, akakandira zvakanyorwa zvacho mubhasikiti remarara ndokudzorera cheki yacho. Ashamiswa, Barnato akakurumidza kupa yakawanda nekaviri. Iyoyo yakarambwa nenzira yakafanana. “Munoda marii?” akabvunza kudaro. Achiyeuka chiitiko chacho, Jerome anoti: “Ndakamutsanangurira kuti zvakanga zvisingabvumirwi—kwete muLondon.” Kutendeseka kwake kwokupepeta nhau kwakanga kusingatengeswi chose chose.
“Kutendeseka” kwakarondedzerwa se“tsika dzakarurama; kuvimbika.” Munhu akatendeseka akafanirwa nokuvimbwa. Asi nhasi, kusarurama—kushayikwa kwokutendeseka—kuri kusekesa mamiriro ose ezvinhu oupenyu.
MuBritain zvinobudisa nhau zvakakurumbirisa shoko rokuti “zvenhando” kurondedzera kusatendeseka mutsika. Seizvo pepanhau rinonzi The Independent rakataura, zvenhando zvinofukidza “chinhu chiri chose kubva pazvokudanana uye kunyengedza kwehurumende yomunzvimbomo kusvikira kumari inobhadharwa zvisiri pamutemo yemaodha ezvinobuda kunze kwenyika.” Hapana nharaunda youpenyu inosiyiwa.
Mipimo Yokutendeseka iri Kuchinja
Kutendeseka, chokwadika, hakurevi kukwana, asi kunoratidzira vara rinokosha riri mumunhu. Munyika yedu inoda kukurumidza kupfuma, kutendeseka kungaonwa sechinodzivisa, kwete chakanaka. Somuenzaniso, kushandiswa kwemichina inonetsa kushandisa nevadzidzi kuti vakope bvunzo kuri kuwedzera, uye iyi michina mitsva inodokuva isingabviri kucherekedza. Mumwe purofesa weyunivhesiti yokuBritain anotaura kuti inopfuura hafu yevadzidzi vose veBritain yakakopa, uye Britain zvirokwazvo haisi yoga.
Isingafaniri kufuratirwa ikuvadziko kuvanhu vasina mhaka apo vanhu vasina kuvimbika vanoreva nhema uye vanonyengedza. Rangarira chiitiko chedhorobha rokuIndia reBhopal uko, muna 1984, gasi rine chepfu rakauraya varume, vakadzi, uye vana vanopfuura 2 500 ndokukuvadza mamwe mazana ezviuru. The Sunday Times yakashuma kuti: “Zvirongwa zvokuyamura kubetsera vananyajambwa zvinoshatiswa noushati. . . . Basa rokuongorora zviitiko zvakafanira rakaomeswa nezviuru zvezvikumbiro zvenhema, magwaro asiri echokwadi uye ufakazi hwokunyepera.” Somugumisiro, makore gumi gare gare isingasviki $35 000 000 ye$4 700 000 000 yokuripa zvakakuvadzwa yakanga yaparadzirwa kuavo vaishayiwa.
Zvakadiniko norudzidziso? Rwakaita sei muiyi nhau yokutendeseka? Nenzira inosuruvarisa, mipimo kazhinji kazhinji yakafanana neiyo yenyika. Rangarira somuenzaniso bhishopi weRoma Katurike Eamon Casey, uyo akareurura kuti ndibaba vomwanakomana asiri wapamutemo, zvino ava wechiduku. Mamiriro ezvinhu aCasey, seizvo pepanhau reBritain Guardian rakaratidza, akanga “asiri echienzi.” Mumurangariro wakafanana, The Times yakashuma kuti: “Chokwadi pamusoro pokunyadzisa kwaBhishopi Casey hachisi chokuti chiito chake chakaipa chakanga chiri chechienzi, asi kuti kunyengedza pamusoro pokusaroora hakusi kutsva kana kuti kwechienzi.” Ichitsigira iri gakava, The Glasgow Herald, Scotland, inotaura kuti 2 muzana bedzi vevafundisi veRoma Katurike muUnited States vakadzivisa zvose zviri zviviri vatano yevane mitezo yakafanana uye ungochane. Kunyange zvazvo iyi nhamba yakarurama kana kuti kwete, inoratidzira mukurumbira wevaprista veKaturike munhau younzenza.
Tatarisana nemienzaniso yakadaro, kunobvira here kuti munhu achengete kutendeseka mutsika? Kwakafanira here? Kungadei, uye ndedzipi dziri tuso dzokuita kudaro?