Kodzero Yokubvuma Uchiziva Inosimbiswazve
MUTONGO wemisi ichangobva kupfuura iyi wakataurwa noMutongi wePreliminary Investigations of the Court of Messina, Italy, wakasimbisazve kuti zvishuvo zvokurapwa zvomurwere akura zvinoshanda pana vanachiremba. Mutongo wacho wakapiwa mumhaka inobatanidza mumwe weZvapupu zvaJehovha.
Muna January 1994, Antonino Stellario Lentini, Chapupu chine makore 64 okukura aiva murwere wehemophilia, chakamhanyiswa kuchipatara muTaormina, Messina. Mudzimai waAntonino, Catena, akaonesa vashandi vomuchipatara chacho kuti seZvapupu zvaJehovha nomurume wake vakanga vasingazobvumi kurapwa nokuisirwa ropa. (Mabasa 15:20, 28, 29) Zvishuvo zvavo zvakaremekedzwa.
Zvisinei, mukati mokuendeswa kune imwe nzvimbo yokutarisirwa kwoutano, Antonino akanetseka nokufema ndokusvika ari mumamiriro ezvinhu akakomba. Nokukurumidza pashure paikoko, akafa. Catena akarwadziwa, asi akawana nyaradzo huru muchipikirwa cheBhaibheri chorumuko. (Mabasa 24:15) Ipapo, kukushamisika kwake kukuru, vana mejasitiriti—zvichida vanyengedzwa nenhau dzisina kururama dzakaparadzirwa nezvinobudisa nhau—vakamupomera mhaka yokuparira kufa kwomurume wake nemhaka yokuti akaramba kuvhiya uko vana chiremba vairangarira kuti kwaiva madikanwa.
Pashure perinopfuura gore rimwe, pana July 11, 1995, Catena akawanwa asina mhaka, sezvo akanga asina kupara mhaka. Kutaura idi, chipupuriro chenyanzvi chakaratidza kuti, vachirangarira mugariro womurwere wacho, kuvhiya kwavanachiremba kungadai kusina kubatsira hako.
Asi kutaura kwomutongi kwakaratidzira nhau huru. Kwakaoma kugamuchira, iye akaonesa kudaro, pfungwa yokuti varapi vanofanira kupindira apo kurapa kunorambwa nomurwere kana kuti navanhu vanomumiririra. Bumbiro romutemo rezvokurapa muItaly, iye akawedzera kudaro, “rinofanoona kudikanwa kwokuwana kubvuma uchiziva kwomunhu anofarira pasati pava nokupindira kupi nokupi.” Nokudaro, iye akataura kuti Catena “nenzira yapamutemo akadzivisa murume wake kuti avhiyiwe.”
Ichi chisarudzo chinosimbisazve kodzero yomunhu mukuru yokuramba kurapa kunorwisana nezvishuvo zvake.