Zvapupu zvechiKristu Nokuda Kwouchangamire Hwoumwari

“Muparidze kunaka kwaiye wakakudanai, kuti mubve parima muuye kuchiedza chake chinoshamisa.”—1 PETRO 2:9.

1. Uchapupui hunobudirira hwakapiwa pamusoro paJehovha munguva dzakatangira dzechiKristu?

MUNGUVA dzakatangira dzechiKristu, ndaza refu yezvapupu zvakapupurira noushingi kuti Jehovha ndiye Mwari wechokwadi bedzi. (VaHebheru 11:4–12:1) Zvakasimba mukutenda kwazvo, zvakateerera nokusatya mitemo yaJehovha ndokuramba kubvumirana pane zvisina kufanira munhau dzokunamata. Zvakapa uchapupu hune simba kuuchangamire hwechisiko chose hwaJehovha.—Pisarema 18:21-23; 47:1, 2.

2. (a) Chapupu chikurusa chaJehovha ndiani? (b) Ndiani akatsiva rudzi rwaIsraeri sechapupu chaJehovha? Tinoziva sei?

² Chapupu chokupedzisira uye chikurusa nguva yechiKristu isati yasvika chakanga chiri Johane Mubhapatidzi. (Mateo 11:11) Akaropafadzwa kuzivisa kuuya kweUyo Akasarudzwa, uye akasuma Jesu saMesiya akapikirwa. (Johane 1:29-34) Jesu ndiye Chapupu chikurusa chaJehovha, “chapupu chakatendeka, chazvokwadi.” (Zvakazarurwa 3:14) Nemhaka yokuti Israeri wokunyama akaramba Jesu, Jehovha akavaramba ndokugadza rudzi rutsva, Israeri waMwari womudzimu, kuti ave chapupu chake. (Isaya 42:8-12; Johane 1:11, 12; VaGaratia 6:16) Petro akanokora mashoko ohumwe uporofita pamusoro paIsraeri ndokuratidza kuti hwaishanda kuna “Israeri waMwari,” ungano yechiKristu, apo akati: “Imi muri rudzi rwakasanangurwa, uprista hwamambo, rudzi rutsvene, vanhu vaakazviwanira, kuti muparidze kunaka kwaiye wakakudanai, kuti mubve parima muuye kuchiedza chake chinoshamisa.”—1 Petro 2:9; Eksodho 19:5, 6; Isaya 43:21; 60:2.

3. Nderipi riri basa guru raIsraeri waMwari uye ra“vazhinji zhinji”?

³ Mashoko aPetro anoratidza kuti mutoro mukuru waIsraeri waMwari ndewokupa uchapupu hwapachena pamusoro pembiri yaJehovha. Muzuva redu urwu rudzi rwomudzimu rwakakumbanirwa ne“vazhinji zhinji” vezvapupu avo vanorumbidzawo Mwari pachena. Vanodanidzira nenzwi guru kuti vose vanzwe, vachiti: “Ruponeso ngaruve kuna Mwari unogara pachigaro choushe, nokuGwayana.” (Zvakazarurwa 7:9, 10; Isaya 60:8-10) Israeri waMwari neshamwari dzake vanogona sei kupedza uchapupu hwavo? Kupfurikidza nokutenda kwavo nokuteerera.

Zvapupu Zvenhema

4. Neiko vaJudha vomuzuva raJesu vakanga vari zvapupu zvenhema?

⁴ Kutenda nokuteerera zvinobatanidza kurarama mukuwirirana nenheyo dzoumwari. Ukoshi hwaikoku hunoonekwa mune izvo Jesu akataura pamusoro pavatungamiriri vorudzidziso vechiJudha vomuzuva rake. Ivava “vagere pachigaro chaMosesi” savadzidzisi voMutemo. Vaitotuma vafundisi kunotendeutsa vaisava vadaviri. Bva, Jesu akati kwavari: “Munofamba pagungwa napanyika kuzotapa mudzidzi mumwe; kana awanikwa, munomuita mwanakomana weGehena kukunda imi kaviri.” Ava vezvorudzidziso vakanga vari zvapupu zvenhema—vanozvitutumadza, vanonyengera, uye vasina rudo. (Mateo 23:1-12, 15) Pane imwe nhambo Jesu akati kuna vamwe vaJudha: “Imi muri vababa venyu Dhiyabhorosi, munoda kuita kuda kwakaipa kwababa venyu.” Neiko aizotaura chinhu chakadaro kumitezo yerudzi rwaMwari rwakasarudzwa? Nemhaka yokuti vakanga vasingateereri mashoko eChapupu chikurusa chaJehovha.—Johane 8:41, 44, 47.

5. Tinoziva sei kuti chiKristudhomu chakapa uchapupu hwenhema pamusoro paMwari?

⁵ Nenzira yakafanana, mukati memazana amakore kubvira panguva yaJesu, mazana amamiriyoni muchiKristudhomu akataura kuva vadzidzi vake. Zvisinei, havana kuita kuda kwaMwari uye naizvozvo havazivikanwi naJesu. (Mateo 7:21-23; 1 VaKorinte 13:1-3) ChiKristudhomu chakatumira vafundisi, vakawanda vavo pasina kupanikira vakanga vari vapachokwadi. Bva, vakadzidzisa vanhu kunamata mwari woUtatu anopisa vatadzi muhero yomwoto, uye vakawanda zvikurusa vevatendeuki vavo vanoratidza ufakazi hushomanene hwokuva vaKristu. Somuenzaniso, nyika yomuAfrica yeRwanda yave iri munda wakaorera nokuda kwavafundisi veRoma Katurike. Zvisinei, vaKaturike veRwanda vakakumbanira nomwoyo wose muhondo yemadzinza yemisi ichangobva kupfuura munyika iyoyo. Zvibereko mumunda iwoyo wavafundisi zvinoratidza kuti hauna kugamuchira uchapupu hwechokwadi hwechiKristu kubva kuchiKristudhomu.—Mateo 7:15-20.

Kurarama Mukuwirirana Nemipimo Youmwari

6. Munzirai umo mufambiro wakanaka uri rutivi runokosha rwokupa uchapupu?

⁶ Mufambiro wakaipa unoitwa naavo vanotaura kuva vaKristu unounza ruzvidzo pa“nzira yezvokwadi.” (1 Petro 2:2) MuKristu wechokwadi anorarama mukuwirirana nemipimo youmwari. Haabi, haanyepi, haanyengedzi, kana kuti kuita unzenza. (VaRoma 2:22) Zvirokwazvo haapondi muvakidzani wake. Varume vechiKristu vanotarisira norudo mhuri dzavo. Vadzimai vanotsigira noruremekedzo utarisiri ihwohwo. Vana vanorovedzwa navabereki vavo uye nokudaro ndokugadzirirwa kuva vaKristu vakuru vanovimbika. (VaEfeso 5:21–6:4) Chokwadi, tose zvedu hatina kukwana uye tinokanganisa. Asi muKristu chaiye anoremekedza mipimo yeBhaibheri uye anoita nhamburiko yapachokwadi yokuishandisa. Ikoku kunocherekedzwa navamwe uye kunopa uchapupu hwakaisvonaka. Pane imwe nhambo, avo vaichimboshora zvokwadi vakacherekedza mufambiro wakanaka wemuKristu uye vakawanwa.—1 Petro 2:12, 15; 3:1.

7. Kunokosha sei kuti vaKristu vadanane?

⁷ Jesu akaratidza rutivi runokosha rwomufambiro wechiKristu paakati: “Vose vachaziva naizvozvi kuti muri vadzidzi vangu, kana mune rudo pakati penyu.” (Johane 13:35) Nyika yaSatani inoratidzirwa no“kusarurama kwose, nokuipa, noruchiva, nokuvenga; vakazara negodo, nokuuraya, norukave, nokunyengera, nechinya; vanhu vanoita zevezeve, navacheri, navanovenga Mwari, navanodada, navanozvikudza, navanozvirumbidza, navavambi vezvakaipa, navasingateereri vabereki.” (VaRoma 1:29, 30) Mumhoteredzo yakadaro, sangano renyika yose rinoratidzirwa norudo raizova ufakazi hune simba hwokushanda kwomudzimu waMwari—uchapupu hunobudirira. Zvapupu zvaJehovha zvinoumba sangano rakadaro.—1 Petro 2:17.

Zvapupu Vadzidzi veBhaibheri

8, 9. (a) Wezvemapisarema akasimbaradzwa sei nokufunda kwake Mutemo waMwari nokufungisisa pauri? (b) Fundo yeBhaibheri nokufungisisa zvichatisimbaradza munzirai kuti tirambe tichipa uchapupu?

⁸ Kuti abudirire mukupa uchapupu hwakaisvonaka, muKristu anofanira kuziva uye kuda mipimo yaJehovha yakarurama uye zvirokwazvo kuvenga ushati hwenyika. (Pisarema 97:10) Nyika inopesvedzera mukusimudzira kufunga kwayo imene, uye mudzimu wayo unogona kuva wakaoma kudzivisa. (VaEfeso 2:1-3; 1 Johane 2:15, 16) Chii chinogona kutibetsera kuchengeta chimiro chendangariro chakarurama? Kufundwa kweBhaibheri kwenguva dzose uye kune revo. Munyori wePisarema 119 akadzokorora nguva dzakawanda kuda kwake Mutemo waJehovha. Aiurava nokufungisisa pauri nguva dzose, “zuva rose.” (Pisarema 119:92, 93, 97-105) Somugumisiro, aigona kunyora kuti: “Nhema ndinodzivenga nokudzisema; asi murau wenyu ndinouda.” Uyezve, rudo rwake rukuru rwakamusunda kuita chiito. Anoti: “Ndinokurumbidzai kanomwe pazuva, nokuda kwezvakarurama zvamakatonga.”—Pisarema 119:163, 164.

⁹ Nenzira yakafanana, kufunda kwedu nguva dzose Shoko raMwari nokufungisisa pariri kuchatapura mwoyo yedu ndokutisunda ku‘murumbidza’—kupupura pamusoro paJehovha—kakawanda, kunyange “kanomwe pazuva.” (VaRoma 10:10) Mukuwirirana naizvozvi, munyori wepisarema rokutanga anotaura kuti munhu anofungisisa nguva dzose pamashoko aJehovha “uchafanana nomuti wakasimwa pahova dzemvura, unobereka michero yawo nenguva yawo, mashizha awo haasvavi; chinhu chipi nechipi chaanoita chichaendika.” (Pisarema 1:3) Muapostora Pauro akaratidzawo simba reShoko raMwari apo akanyora, kuti: “Rugwaro rwose rwakafuridzirwa naMwari, runobatsira pakudzidzisa, nokurayira, nokururamisa, nokuranga kuri mukururama, kuti munhu waMwari akwane, agadzirirwa kwazvo mabasa ose akanaka.”—2 Timotio 3:16, 17.

10. Chii chiri chakajeka pamusoro pavanhu vaJehovha mune ano mazuva okupedzisira?

¹⁰ Wedzero inokurumidza munhamba yavanamati vechokwadi murino zana ramakore rechi20 inoratidzira chikomborero chaJehovha. Pasina kupanikira kupi nokupi, seboka, izvi zvapupu zvomuzuva razvino uno nokuda kwouchangamire hwoumwari zvakasakurira kuda mutemo waJehovha mumwoyo yazvo. Kufanana nowezvamapisarema, zvinosundwa kuteerera mutemo Wake uye nokutendeka zvinopupurira “masikati nousiku” pamusoro pembiri yaJehovha.—Zvakazarurwa 7:15.

Mabasa Esimba aJehovha

11, 12. Chii chakapedzwa nezvishamiso zvakaitwa naJesu navateveri vake?

¹¹ Muzana ramakore rokutanga, mudzimu mutsvene wakapa simba zvapupu zvechiKristu zvakatendeka kuti zviite zvishamiso, izvo zvakapa chibvumikiso chakasimba chokuti uchapupu hwazvo hwakanga huri hwechokwadi. Apo Johane Mubhapatidzi akanga ari mutorongo, akatuma vadzidzi kunobvunza Jesu, kuti: “Ko ndimi iye wakanga achinzi unouya here, kana tichakatarira mumwe?” Jesu haana kupindura kuti hungu kana kuti aiwa. Panzvimbo pezvo, akati: “Endai, mundoudza Johane zvamunonzwa nezvamunoona; zvokuti, mapofu anosvinudzwa, vanokamhina vanofamba, vane maperembudzi vanonatswa, vematsi vanonzwa, vakafa vanomutswa, navarombo vanoparidzirwa Evhangeri. Wakaropafadzwa iye usingagumbuswi neni.” (Mateo 11:3-6) Aya mabasa esimba akabatira souchapupu kuna Johane kuti Jesu zvirokwazvo akanga ari “Unouya.”—Mabasa 2:22.

¹² Nenzira yakafanana, vamwe vevateveri vaJesu vakaporesa vanorwara uye vakatomutsa vakafa. (Mabasa 5:15, 16; 20:9-12) Izvi zvishamiso zvakanga zvakafanana nouchapupu hwaibva kuna Mwari amene nokuda kwavo. (VaHebheru 2:4) Uye mabasa akadaro akaratidzira simba rose raJehovha. Somuenzaniso, ndekwechokwadi kuti Satani, “muchinda wenyika” ane zvokushandisa kuparira rufu. (Johane 14:30; VaHebheru 2:14) Asi apo Petro akamutsa mukadzi akatendeka Dhorkasi kuvakafa, aigona bedzi kuve akakuita kupfurikidza nesimba raJehovha, sezvo Iye bedzi achigona kudzorera upenyu.—Pisarema 16:10; 36:9; Mabasa 2:25-27; 9:36-43.

13. (a) Zvishamiso zvomuBhaibheri zvichiri kupupurira simba raJehovha munzirai? (b) Kuzadzikwa kwouporofita kunoita sei rutivi runokosha mukubvumikisa Umwari hwaJehovha?

¹³ Nhasi, mabasa iwayo ezvishamiso haachaitiki. Chinangwa chawo chakabatirwa. (1 VaKorinte 13:8) Zvisinei, tichiine chinyorwa chawo muBhaibheri, chakapupurirwa navakaona nameso vakawanda. Apo vaKristu nhasi vanopa ngwariro kunhoroondo idzodzi dzenhau, mabasa iwayo achiri kupa uchapupu hunobudirira kusimba raJehovha. (1 VaKorinte 15:3-6) Mukuwedzera, shure muzuva raIsaya, Jehovha akanongedzera kuuporofita hwakarurama sechibvumikiso chakatanhamara chokuti ndiye Mwari wechokwadi. (Isaya 46:8-11) Uporofita hweBhaibheri hwakawanda hwakafuridzirwa nenzira youmwari huri kuzadzikwa nhasi—nhamba yakati yahwo paungano yechiKristu. (Isaya 60:8-10; Dhanieri 12:6-12; Maraki 3:17, 18; Mateo 24:9: Zvakazarurwa 11:1-13) Mukuwedzera kukunongedzera kuti tiri kurarama mu“mazuva okupedzisira,” kuzadzikwa kweuhwu uporofita kunoreverera Jehovha saMwari wechokwadi bedzi.—2 Timotio 3:1.

14. Nhau yomuzuva razvino uno yeZvapupu zvaJehovha uchapupu hwakasimba munzirai hwokuti Jehovha ndiye Changamire Ishe?

¹⁴ Pakupedzisira, Jehovha achiri kuitira vanhu vake zvinhu zvikuru, zvinoshamisa. Chiedza chinowedzera pazvokwadi yeBhaibheri chiri kutungamirirwa nomudzimu waJehovha. (Pisarema 86:10; Zvakazarurwa 4:5, 6) Wedzero dzakatanhamara dzinoshumwa kupote nyika yose ufakazi hwokuti Jehovha ‘ari kukukurumidzisa munguva yakwo imene.’ (Isaya 60:22) Apo chishoro chakakomba chakatanga munyika nenyika mumazuva ose okupedzisira, kutsungirira kwoushingi kwevanhu vaJehovha kwave kuchibvira nemhaka yetsigiro inosimbisa yomudzimu mutsvene. (Pisarema 18:1, 2, 17, 18; 2 VaKorinte 1:8-10) Hungu, nhau yomuzuva razvino uno yeZvapupu zvaJehovha iyo imene uchapupu hune simba hwokuti Jehovha ndiye Changamire Ishe.—Zekaria 4:6.

Mashoko Akanaka Anofanira Kuparidzwa

15. Uchapupui hwakakudziridzwa hwaizopiwa neungano yechiKristu?

¹⁵ Jehovha akagadza Israeri sechapupu chake kumarudzi. (Isaya 43:10) Zvisinei, vaIsraeri vashomanene bedzi ndivo vakarayirwa nenzira youmwari kuenda ndokuparidzira vaisava vaIsraeri, uye ikoku kwaiwanzoitirwa kuzivisa rutongeso rwaJehovha. (Jeremia 1:5; Jona 1:1, 2) Zvisinei, uporofita huri muMagwaro echiHebheru hunoratidzira kuti Jehovha pane rimwe zuva aizotendeudzira ngwariro yake kumarudzi munzira huru, uye ikoku akakuita kupfurikidza naIsraeri waMwari womudzimu. (Isaya 2:2-4; 62:2) Asati akwira kudenga, Jesu akarayira vateveri vake, kuti: “Endai naizvozvo, mudzidzise marudzi ose.” (Mateo 28:19) Nepo Jesu akanga aisa ngwariro pa“makwai akarashika eimba yaIsraeri,” vateveri vake vakatumwa ku“marudzi ose,” kunyange “kusvikira kumugumo wenyika.” (Mateo 15:24; Mabasa 1:8) Uchapupu hwechiKristu hwaifanira kunzwiwa norudzi rwose rwomunhu.

16. Ibasai iro vaKristu vomuzana ramakore rokutanga vakazadzika, uye kusvikira kutambanukoi?

¹⁶ Pauro akaratidza kuti aisanonzwisisa ikoku. Pakazosvika gore ra61 C.E., aigona kutaura kuti mashoko akanaka akanga ari ku“bereka zvibereko, [a]chikura” “panyika yose.” Mashoko akanaka akanga asina kuganhurirwa kurudzi rumwe chete bedzi kana kuti sekete rimwe, rakadai seiro rakapinda mu“kunamata vatumwa.” Panzvimbo pezvo, nenzira yapachena akaparidzirwa “zvisikwa zvose pasi pokudenga.” (VaKorose 1:6, 23; 2:13, 14, 16-18) Nokudaro, Israeri waMwari womuzana ramakore rokutanga akazadzika basa rake roku“paridz[a] kunaka kwaiye waka[va]dana. . ., kuti [va]bve parima [va]uye kuchiedza chake chinoshamisa.”

17. Mateo 24:14 inopfuurira kuzadzikwa sei munzira huru?

¹⁷ Zvisinei, basa rokuparidza iroro romuzana ramakore rokutanga rakanga richingova kufanoravidzwa kwezvaizopedzwa mukati memazuva okupedzisira. Achitarira mberi zvikurukuru kunguva yedu, Jesu akati: “Evhangeri iyi youshe ichaparidzirwa munyika dzose, chive chapupu kumarudzi ose; ipapo kuguma kuchasvika.” (Mateo 24:14; Marko 13:10) Uporofita uhwu hwakazadzikwa here? Zvirokwazvo, hwakadaro. Kubva pamavambo maduku muna 1919, kuparidzwa kwamashoko akanaka zvino kwakatambanudzirwa kudzinopfuura nyika 230. Uchapupu huri kunzwiwa kuNorth kune chando uye munyika dzinopisa nedzakanyorovera. Makondinendi makuru ari kufukidzwa, uye zvitsuwa zviri kure zviri kutsvakwa kuitira kuti vagari vazvo vagone kugamuchira uchapupu. Kunyange mukati mokusagadzikana kukuru, kwakadai sehondo iri muBosnia neHerzegovina, mashoko akanaka ari kupfuurira kuparidzwa. Somuzana ramakore rokutanga, uchapupu huri kubereka zvibereko mu“nyika yose.” Mashoko akanaka ari kuziviswa pachena “zvisikwa zvose pasi pokudenga.” Chii chave chiri mugumisiro wacho? Chokutanga, vakasarira vaIsraeri waMwari vakaunganidzwa kubva ku“marudzi ose, nendimi dzose, navanhu vose, nendudzi dzose.” Chechipiri, mamiriyoni a“vazhinji zhinji” akavamba kuunzwa kubva mu“ndudzi dzose, namarudzi, navanhu, nendimi.” (Zvakazarurwa 5:9; 7:9) Mateo 24:14 inopfuurira kuzadzikwa munzira huru.

18. Ndezvipi zvimwe zvinhu zviri kupedzwa nokuparidzwa munyika yose kwamashoko akanaka?

¹⁸ Kuparidzirwa kwomunyika yose kwamashoko akanaka kunobetsera kubvumikisa kuti kuvapo kwoumambo kwaJesu kwakavamba. (Mateo 24:3) Uyezve, ndiyo nzira huru kupfurikidza nayo “kucheka kwenyika” kuri kukohwewa, sezvakunonangidzira vanhu kutariro yechokwadi bedzi yorudzi rwomunhu, Umambo hwaJehovha. (Zvakazarurwa 14:15, 16) Sezvo vaKristu vechokwadi bedzi vanokumbanira mubasa rokuparidza mashoko akanaka, iri basa rinokosha rinobetsera kusiyanisa vaKristu vechokwadi nevenhema. (Maraki 3:18) Neiyi nzira, kunoguma noruponeso rwaavo vanoparidza pamwe chete nerwaavo vanogamuchira. (1 Timotio 4:16) Chinokosha zvikurusa, kuparidza mashoko akanaka kunounza rumbidzo norukudzo kuna Jehovha Mwari, uyo akarayira kuti kuitwe, uyo anotsigira avo vanokuita, uye uyo anokuita kuti kubereke zvibereko.—2 VaKorinte 4:7.

19. VaKristu vose vanokurudzirwa kuva nokutsungai sezvavanopinda mugore rebasa idzva?

¹⁹ Hakushamisi kuti muapostora Pauro akasundwa kuti: “Ndine nhamo, kana ndisingaparidzi Evhangeri.” (1 VaKorinte 9:16) VaKristu nhasi vanonzwa nenzira imwe cheteyo. Iropafadzo huru uye mutoro mukuru kuva “vabati pamwe chete naMwari,” kuparadzira chiedza chezvokwadi munyika ino iri murima. (1 VaKorinte 3:9; Isaya 60:2, 3) Basa rakava namavambo maduku muna 1919 zvino rakasvika mwero inoshamisa. VaKristu vanenge mamiriyoni mashanu vari kupupurira uchangamire hwoumwari sezvavanopedza maawa anopfuura bhiriyoni pagore vachiunzira vamwe shoko roruponeso. Mufaro wakadini kuva norutivi mune iri basa rokutsvenesa zita raJehovha! Sezvatinopinda mugore rebasa ra1996, ngatitsungei kusaderera. Panzvimbo pezvo, kupfuura nakare kose tichateerera mashoko aPauro kuna Timotio, anoti: “Paridza shoko; ramba uchidaro.” (2 Timotio 4:2) Sezvatinoita kudaro, tinonyengetera nemwoyo yedu yose kuti Jehovha achapfuurira kukomborera nhamburiko dzedu.

Unoyeuka Here?

◻ Ndiani akatsiva Israeri se“chapupu” chaJehovha kumarudzi?

◻ Mufambiro wechiKristu unobetsera sei kukupa uchapupu?

◻ Neiko kufundwa kweBhaibheri nokufungisisa pariri zvichikosha nokuda kweChapupu chechiKristu?

◻ Nhau yomuzuva razvino uno yeZvapupu zvaJehovha inobatira munzirai soufakazi hwokuti Jehovha ndiye Mwari wechokwadi?

◻ Chii chinopedzwa nokuparidzwa kwamashoko akanaka?

[Mifananidzo iri papeji 15]

Asingatongorambidzwi, mashoko akanaka zvino ari kuziviswa “zvisikwa zvose pasi pokudenga”