Iwe Unoyeuka Here?

Wakafarikanya kurava zvinyorwa zvemisi ichangobva kupfuura iyi zveNharireyomurindi here? Kana zvakadaro, uchawana kuchifadza kuyeuka zvinotevera:

▫ Neiko tsori dzechiIsraeri dzakasarudza kugara paimba yaRakabhi hure?

Tsori dzechiIsraeri dzairarama mukuwirirana noMutemo waMwari, naizvozvo hadzina kugara paimba yaRakabhi nokuda kwezvikonzero zvoutere. Sezvinobvira dzakarangarira kuti kuvapo kwadzo muimba yehure kwaizova kunobvira zvishomanene kunyandura nyumwiro muguta. Kuti imba yake yakanga yakavakwa parusvingo rweguta kungaita kuti kupukunyuka kuve nyore zvikuru. Asi kupfuura zvose, Jehovha akadzitungamirira kuenda kumutadzi ane mwoyo wakanga watapurwa zvakanaka kwazvo nemishumo yokubata kwoumwari navaIsraeri zvokuti akapfidza ndokuchinja nzira dzake.—12/15, mapeji 24-5.

▫ Kutsamwa kunotapura sei utano hwedu?

Fundo dzinoratidzira kuti kushatirwa kunoparira mahormone enhamo. Kushatirwa kazhinji kazhinji kunogona kuparira kusadzikama pakati pezvimiro zvinodzivirira nezvinokuvadza zvecholesterol, zvichitiisa mungozi yehosha yecardiovascular.—12/15, peji 32.

▫ Zvikarakadzoi zvichatibetsera kuti tiwedzere kuparadzira kwedu magazini eNharireyomurindi naMukai!?

Ziva Nharireyomurindi naMukai!; chengeta mharidzo yakapfava; iva anochinjika kupfurikidza nokugadzirira mharidzo pfupi shomanene; gadza nharidzano yomunhu oga.—1/1, mapeji 24-5.

▫ Neiko Mosesi ari muenzaniso wakaisvonaka wakadaro woubati ushe hwaMwari wokuti titevere?

Mosesi akatsvaka nhungamiro yaJehovha panhau. Akanga asina magwinyiro omunhu oga asi aiitira hanya mbiri yaJehovha. Akanga ane kutenda kwakasimba, uye haana kutongokanganwa kuti Jehovha ndiye akanga ari Mutongi chaiyeiye worudzi rwaIsraeri.—1/15, peji 11.

▫ Ndedzipi dziri dzimwe dzenzira umo dzidziso youmwari inokurira?

Dzidzisa youmwari inokurira kupfurikidza nokupa kuvanhu vaJehovha nzwisiso inofambira mberi yezvokwadi. Inopinza vanhu muchiedza chomudzimu, uye inoratidza vanyoro nzira yokunamata nayo Mwari “[nomudzimu, NW] nezvokwadi.” (Johane 4:24) Dzidziso youmwari inokurirawo zvitambudzo nenyika yakaipa.—2/1, mapeji 10-12.

▫ Chii chiri chinokosha kukupa zano kunobudirira?

Chinokosha ndiko kuremekedza mumwe munhu kwakafanira munhu namaruramiro ake okubatwa nomutoo une chiremera. Nokudaro, mupi wezano wechiKristu anofanira kuva ane mutsa uye akasimba asi anofanira kupfekedza mugamuchiri chiremera.—2/1, peji 28.

▫ Chechi yeRoma Katurike yakasvika sei pakugamuchira Kukwira Kudenga kwaMaria Nomuviri Wenyama sedzidziso?

Mumazana okutanga amakore pashure porufu rwaJesu, pfungwa yoKukwira Kudenga kwaMaria Nomuviri Wenyama yakanga iri yechienzi chose chose kukufunga kwavaKristu. Zvisinei, pashure pokunge dzidziso yoUtatu yava dzidziso yapamutemo yechechi, Maria akapiwa nzvimbo inokosha nenzira inowedzera. Rondedzero yoKukwira Kudenga kwaMaria Nomuviri Wenyama haina kugamuchirwa sedzidziso kusvikira November 1, 1950, apo Papa Pius XII akazivisa, kuti: “Tinokurondedzera kuva dzidziso yakaziviswa naMwari.”—Munificentissimus Deus.—2/15, mapeji 26-27.

▫ Muna Jeremia ganhuro 24, tswanda mbiri dzamaonde, maonde akanaka naawo akanga akashata, dzaimirirei?

Maonde akanaka aimirira vaJudha avo pakutanga vakatapwa kuBhabhironi, umo vakasarira vaizodzokera Judha kubva mariri. Maonde akashata aimirira Mambo Zedhekia navaiva naye avo vakapandukira Mambo Nebhukadnezari pasinei zvapo nokuva akaita mhiko muzita raMwari. Mukuenzanisa, tinowana munguva dzazvino uno vakasarira vaIsraeri womudzimu, avo vakabereka zvibereko zvakanaka muupenyu hwavo, mukupesana navafundisi vechiKristudhomu, avo vakabereka zvibereko zvakaora.—3/1, mapeji 14-16.

▫ Ndivanaani vakanga vari vaQuartodeciman, uye neiko vachifarirwa navaKristu nhasi?

Pashure penguva yavaapostora, kwakanga kune vamwe avo vaichengeta Chirairo chaShe pana Nisani 14 gore rimwe nerimwe, vachitevera muenzaniso wavaapostora. Vakasvika pakuzivikanwa sa“Vanochengeta zuva rechigumi nena,” kana kuti vaQuartodeciman. Ikoku ndokwefariro nhasi, nokuti kunoratidza kuti kunyange pashure pokunge vaapostora vafa, kwakanga kune vamwe vakaomerera kunzira yakafanira yokurangarira rufu rwaJesu kamwe pagore pana Nisani 14.—3/15, mapeji 4-5.

▫ Ndiani akanga ari William Whiston?

Iye akanga ari nyanzvi yakangwara yezana ramakore rechi 18 muEngland, musonganiri wapedyo waChangamire Isaac Newton. Whiston akashandura Magwaro echiKristu echiGiriki, akashora pachena dzidziso yedzidziso yoUtatu, uye akanga ari mudzidzisi pamusoro pouzivi hwokunzvera nyeredzi nenhamba. Asi Whiston sezvingabvira anoyeukwa zvikurusa nokuda kwokushandurira kwake muchiNgezi manyoro owezvenhau wechiJudha Flavius Josephus.—3/15, mapeji 26-28.

▫ Munhu akaitwa sei mumufananidzo waMwari? (Genesi 1:27)

Munhu akaitwa ane mano okushandisa mavara akatanhamara aMwari orudo, ruramisiro, uchenjeri, uye simba—pamwe chete namamwe mavara.—4/1, peji 25.