Icho Umambo hwaMwari Hunogona Kureva Kwauri

JESU KRISTU akadzidzisa vateveri vake kunyengetera, kuti: “Umambo hwenyu ngahuuye.” (Mateo 6:10, NW) Mashoko iwayo akataurwa kakawanda sei kuna Mwari naavo vanotaura kuti vateveri vaJesu!

Zvisinei, Jesu akaita zvinopfuura kudzidzisa vadzidzi vake kunyengeterera Umambo hwaMwari. Iye akaita Umambo nhau huru yebasa rake rokuparidzira. Kutaura idi, Encyclopædia Britannica inotaura kuti Umambo hwaMwari “hunowanzorangarirwa kuva musoro mukuru wokudzidzisa kwaJesu.”

Apo vateveri vaKristu vanonyengeterera Umambo, vari kunyengetererei chaizvoizvo? Chii icho Umambo hwaMwari hunogona kureva kwavari nokwauri? Uye Jesu akahurangarira sei?

Murangariro waJesu woUmambo

Jesu aiwanzozvidana amene kuti “Mwanakomana womunhu.” (Mateo 10:23; 11:19; 16:28; 20:18, 28) Ikoku kunotiyeuchidza nezvenongedzero yomuporofita Dhanieri ku“mwanakomana womunhu.” Pamusoro pechinoitika chokudenga chomunguva yemberi, Dhanieri akati: “Ndikaona pane zvandakaratidzwa usiku, ndikaona mumwe wakafanana nomwanakomana womunhu achiuya namakore okudenga, akasvika kune wakakwegura pamazuva ake, vakamuswededza pamberi pake. Akapiwa simba, nokubwinya, noushe, kuti vanhu vose namarudzi ose namarimi ose vamushumire.”—Dhanieri 7:13, 14.

Achitaura pamusoro penguva apo iye aizogamuchira uhu utongi, Jesu akaudza vaapostora vake, kuti: “Kana Mwanakomana womunhu achizogara pachigaro choushe chokubwinya kwake, imiwo muchagara pazvigaro zvine gumi nezviviri.” Jesu akatiwo: “Kana Mwanakomana womunhu achiuya nokubwinya kwake, . . . namarudzi ose achaunganidzwa pamberi pake; uchavaraura somufudzi unoraura makwai nembudzi. . . . Ava [vasakarurama] vachaenda kukurohwa kusingaperi; asi vakarurama kuupenyu husingaperi.”—Mateo 19:28; 25:31, 32, 46.

Idzi nongedzero dzouporofita kuzvigaro zvoumambo namapoka ose amarudzi dzinoratidzira kuti Umambo ihurumende umo Jesu navamwe vavateveri vake vaizova vatongi parudzi rwomunhu. Hurumende iyoyo yaizova nesimba rokuparadza vasakarurama murufu. Mukutonga kwoUmambo, zvisinei, avo vane ndangariro yakanaka vaizogamuchira chipo chaMwari choupenyu husingagumi.

Nenzira yakajeka, ipapoka, Umambo hwaMwari ihurumende yokudenga yakagadzwa nenzira youmwari. Umambo hahusati huri chechi, uye Magwaro haabvumiri murangariro wenyika wahwo. Kupfuurirazve, hurumende yakapiwa naMwari haingagoni kuva chimwe chinhu chiriwo hacho mukati momwoyo womunhu. Sezvo Umambo hwaMwari huri hurumende, hahusati huchiva chimwe chinhu mumwoyo medu apo tinogamuchira chiKristu. Asi neiko vamwe vachifunga kuti Umambo mugariro unobatanidza mwoyo?

Umambo HuriMukati Medu Here?

Vamwe vanorangarira kuti Umambo huri mumwoyo medu nemhaka yenzira iyo Ruka 17:21 yakashandurwa nayo navashanduri vakati veBhaibheri. Mukuwirirana neNew International Version, Jesu ipapo akati: “Umambo hwaMwari huri mukati menyu.”

Muna ikoku The Interpreter’s Dictionary of the Bible inoti: “Kunyange zvazvo ichidudzwa kazhinji kazhinji somuenzaniso we‘dzidziso yakavandika’ yaJesu kana kuti ‘kupinda mukati,’ uku kududzira kuri zvikurukuru pashanduro yekare, ‘mukati menyu,’ . . . inonzwisiswa mupfungwa isina kukodzera yazvino uno ya‘yako’ sechinhu chimwe; ‘menyu’ . . . ndizvakawanda (Jesu ari kutaura kuvaFarise—ndima 20) . . . Rondedzero yokuti umambo hwaMwari mugariro womukati wendangariro, kana kuti woruponeso rwomunhu oga, inopesana namashoko akapoteredza eiyi ndima, uyewo nokupa kweT[estamente] I[tsva] yose mufungo wacho wose.”

Mashoko omuzasi pana Ruka 17:21 muNew International Version anoratidza kuti mashoko aJesu angagona kushandurwa, kuti: “Umambo hwaMwari huri pakati [among] penyu.” Dzimwe shanduro dzeBhaibheri dzinorava, kuti: “Umambo hwaMwari huri pakati [among] penyu” kana kuti “huri pakati [midst] penyu.” (The New English Bible; The Jerusalem Bible; Revised Standard Version) Mukuwirirana neNew World Translation of the Holy Scriptures, Jesu akati: “Umambo hwaMwari huri pakati [midst] penyu.” Jesu haana kureva kuti Umambo hwakanga huri mumwoyo yavaFarise vanodada avo iye akanga achitaura kwavari. Panzvimbo pezvo, saMesia naMambo Akagadzwa akamirirwa kwenguva refu, Jesu akanga ari pakati pavo pamene. Asi nguva yakati yaizopfuura Umambo hwaMwari husati hwauya.

Apo Hwaizouya

Vateveri vakati vaJesu Kristu vakasarudzwa savatongi pamwe naye vake muUmambo hwokudenga hwaMesia. Kufanana naJesu, ivo vanofa mukutendeka kuna Mwari uye vanomutsirwa kuupenyu hwomudzimu mudenga. (1 Petro 3:18) Vari vashomanene zvikuru muchiverengero, ivo vachava madzimambo navaprista 144 000 vanotengwa vachibva pakati porudzi rwomunhu. (Zvakazarurwa 14:1-4; 20:6) Vatongi pamwe naJesu vanobatanidza vaapostora vake vakatendeka.—Ruka 12:32.

Achitaura kuvateveri vake pane imwe nhambo, Jesu akapikira, kuti: “Pane vamwe vaavo vakamira pano avo vasati vachizotongoravidza rufu kutozosvikira vatanga kuona Mwanakomana womunhu achiuya muumambo hwake.” (Mateo 16:28, NW) Nenzira inofadza, ndima inotevera inoratidzira kuti chipikirwa chaJesu chakazadzikwa mazuva mashomanene chete gare gare. Ipapo iye akakwira navatatu vavadzidzi vake mugomo umo akashandurwa chitarisiko pamberi pavo, uye ivo nokudaro vakava nechiono chake mumbiri yoUmambo. (Mateo 17:1-9) Asi Umambo hahuna kugadzwa panguva iyoyo. Ikoko kwaizoitika rini?

Mumwe wemienzanisiro yaJesu unoratidzira kuti iye aisazogadzwa pakarepo saMambo wouMesia. Pana Ruka 19:11-15, tinorava, kuti: “Akataura . . . mufananidzo, nokuti akanga ava pedyo neJerusarema, ivo vakati ushe hwaMwari hwobva hwoonekwa pakarepo. Naizvozvo akati: ‘Mumwe munhu mukuru wakaenda kunyika yakanga iri kure, kuti andopiwa ushe, agodzokazve. Akadana varanda vake vane gumi, akavapa pondo dzine gumi, akati kwavari: “Shambadzirai, kusvikira ndichiuyazve.” . . . Zvino wakati adzoka kuya kwaakanga andopiwa ushe, akaraira kuti vaya varanda vaakanga apa mari, vadanirwe kwaari, anzwe kuti mumwe nomumwe wakawanei nokushambadzira kwake.’”

Mumazuva iwayo kwaigona kutora nguva yakati kuti munhu afambe achibva Israeri kuenda kuRoma, kumirira muguta iroro kutozosvikira awana simba roumambo, uye kudzoka kunyika yokwake samambo. Jesu akanga ari “munhu mukuru.” Iye aizogamuchira simba saMambo kubva kuna Baba vake mudenga asi aisazogadzwa pakarepo saMambo wouMesia. Vateveri vake vaizoita bhizimisi kupfurikidza nokupfuuridzira basa rokuzivisa mashoko akanaka oUmambo kwenguva yakati asati adzoka saMambo.

Kuuya Kunoita Umambo

Vadi vaMwari vari kukumbirei apo vanonyengeterera Umambo hwake kuti huuye? Chaizvoizvo ivo vari kukumbira kuti Umambo hwokudenga huite chiito chakasimba kupfurikidza nokuparadza masangano ehurumende akaitwa navanhu ayo akundikana kurarama mukuwirirana nechipikirwa chawo chokuparira rugare rwechokwadi norubudiriro. Achinongedzera kuchinoitika ichochi, muporofita Dhanieri akanyora, kuti: “Namazuva amadzimambo iwayo Mwari wokudenga uchamutsa ushe, husingatongoparadzwi, uye simba rahwo haringapfuuri kune rumwe rudzi rwavanhu; asi ihwo huchaputsanya nokuparadza ushe uhwo hwose, ihwo huchamira nokusingaperi.” (Dhanieri 2:44) Ikoku kwaizoitika rini?

Jesu akadeya kutaura kuti ikoku kwaizoitika mukati mechizvarwa chaavo vaizopupurira chinjo yechienzi muzvinhu zvavanhu. Pamusoro po“kuvapo” kwake, Jesu akapa “chiratidzo” chinoumbwa nezvizhinji chinobatanidza zvinoitika zvakadai sehondo isingaenzaniswi, kudengenyeka kwapasi, nzara, nhenda—hungu, uye kuparidzirwa munyika yose kwamashoko akanaka oUmambo hwaMwari.—Mateo, maganhuro 24, 25; Marko, ganhuro 13; Ruka, ganhuro 21.

Uporofita hwaJesu hunobatanidza zvinoitika zviri kuitika iye zvino—muzana redu ramakore rechi 20. Nokudaro, hakusati kuchizova nguva refu Umambo hwaMwari husati hwaunza zvikomborero zvikuru kurudzi rwomunhu. Unogona kuva pakati paavo vachafarikanya betsero dzokutonga kwoUmambo. Asi Umambo hwaMwari hunogona kurevei chaizvo kwauri navadiwa vako?

ZvikomboreroZvokutonga kwoUmambo

Mufarwa uchatekeshera mupasi rose. Pasi pe“denga idzva”—Umambo hwokudenga—pachava ne“pasi idzva,” chaunga chenyika yose chavadzorwi voUmambo vanoteerera. “Mwari amene achava navo,” akanyora kudaro muapostora Johane. “Uye achapukuta musodzi uri wose pameso avo.” Hakusati kuchizova nechikonzero chechinhu chipi nechipi kunze kwomufarwa panguva iyeyo, nokuti “hakuchazovizve nokuchema uyewo kurira uyewo kurwadziwa.”—Zvakazarurwa 21:1-4, NW.

Rufu haruchazovipozve. Ichi chisakiso chakaipa chenhamo hachichazotibirizve shamwari navadiwa. “Muvengi wokupedzisira, uchaparadzwa, ndirwo rufu.” (1 VaKorinte 15:26) Mufaro wakadini uchavapo apo mariro anotsiviwa norumuko rwaavo vari muyeuko yaMwari!—Johane 5:28, 29.

Utano hunofadza huchatsiva chirwere noutera. Mibhedha yezvipatara haisati ichazadzwazve naavo vanotambudzwa nechirwere chomuviri nendangariro. Chiremba Mukuru, Jesu Kristu, achashandisa ukoshi hwechibairo chake chorudzikinuro “nokuda kwokuporeswa kwamarudzi.” (Zvakazarurwa 22:1, 2, NW; Mateo 20:28; 1 Johane 2:1, 2) Kuporesa kwaakaita paakanga ari pasi pano wakanga uri bedzi muenzaniso weizvo achaita kupfurikidza noUmambo.—Enzanisa naIsaya 33:24; Mateo 14:14.

Migove yezvokudya ichava yakawanda. Sokutaura kwakaita wezvamapisarema, “kuchava nezviyo zvakawanda pasi pano; pamusoro pamakomo pachava nokufashukira.” (Pisarema 72:16, NW) Kuna ikoku, uporofita hwaIsaya hunowedzera, kuti: “Pagomo iri Jehovha wehondo uchagadzirira marudzi ose avanhu mutambo wezvakakora, mutambo wewaini yakagara pamasese, wezvakakora zvizere nemwongo, wewaini yakagara pamasese yakasvinwa zvakanaka.” (Isaya 25:6) Zvirokwazvo, nzara haisati ichizotambudza vagari vapasi mukutonga kwoUmambo.

Pasi rose richava paradhiso. Chichanzarwozvo kuzadzikwa ichi chipikirwa chaJesu kumuiti wezvakaipa anopfidza: “Uchava neni muParadhiso.” (Ruka 23:43, NW) Iwewo unogona kufarikanya upenyu husingagumi papasi rino, pasi rakabviswa uipi ndokushandurwa kuva nyika inofadza, yakafanana nomunhanga.—Johane 17:3.

Idzi kariro dzinoshamisa dzinopiwa kurudzi rwose rwomunhu runoteerera. Shoko rakafuridzirwa raJehovha, Bhaibheri, rinopa idzi vimbiso dzakakomborerwa. Uye zvose izvozvi ndizvo izvo Umambo hwaMwari hunogona kureva kwauri.

[Mufananidzo uri papeji 7]

Unodavira izvo Jesu akataura pamusoro poUmambo hwaMwari here?