Mashoko Akanaka Anosvika Maruwa eSouth Africa
NYONGORI dzakashatirwa, mapurisa anodzivisa chimurenga, utsi hunobudisa misodzi. Mumakore achangobva kupfuura, mataundi namaguta zveSouth Africa zvakavhiringidzwa nerwisano yakadaro. Kunyange nharaunda dzomumaruwa dzakaisvonaka—umo munogara inopfuura 40 muzana yavagari vemo—hadzina kunzvenga kuparadza kwamasimba masimba ezvamatongerwe enyika. Pakati pekose ikoku, zvisinei, Zvapupu zvaJehovha zvakapfuurira kuzivisa “mashoko akanaka orugare.”—VaEfeso 6:15, NW.
Kwamakore Zvapupu zvakaita nhimbe yokuparidzira yemwedzi mitatu yegore negore yakanangidzirwa zvakananga kuvagari vomumaruwa. Somuenzaniso, muna 1990 vaparidzi voUmambo vanopfuura 12 000 vakabva muungano 334 vakatora rutivi munhimbe yacho. Nenzira yomuzvarirwo, mhinganidzo dzakawanda dzinofanira kukurirwa kusvika ava vagari vomumaruwa vakapararira vokumaodzanyemba kweAfrica.
Pakati pezvimwe zvinhu, Zvapupu zvinofanira kubata nemhatsa huru yetsika nemitauro. Uye muvhenganiswa une mhatsa wakadini! Somuenzaniso, kuna varimi vanotaura chiNgezi nechiBhunu, pamwe chete navaPedi, vaSotho, vaTsonga, vaTswana, vaVenda, vaXhosa, uye vaZulu. Boka rimwe nerimwe rine tsika nomutauro zvaro rimene zvakasiana. Kunewo zvinhambwe zvikuru nemigwagwa ine mabhambu. Kwose ikoku kunoda mudzimu wokuzvibaira nokushandiswa kwenguva nemari zvakati. Bva, Jehovha akakomborera zvikuru nhamburiko dzakaitwa. Ngatikuudzei zvishomanene pamusoro penhamo nebudiriro zvourwu rutivi rwechienzi rwebasa rokuparidzira.—Enzanisa naMaraki 3:10.
“Sandisikuru” muZululand
Pakati pamene peZululand iri pedyo namativi apasi anopisa pane mupata mukuru weRwizi rweUmvoti. Ari pamawere, munhu anogona kuona mapoka edzimba [misha] dzakapfirirwa nouswa dzeZulu kusvika kure. Rimwe Svondo muna 1984, vaparidzi vaviri voUmambo vakapinda mumupata macho nomugwagwa unomonereka, une guruva. Imomo munopisa kwazvo uye makanyorova zvokuti nharaunda yacho ine zita romusere rokuti Kwa-Sathane (Nzvimbo yaSatani)—nongedzero iri pachena kudzidziso yenhema yehero yomwoto unokuchidzirwa naDhiabhorosi!
Dzatota nedikita, hama dzakasvika mumwe mukadzi anonzi Doris, uyo akanga achiitisa kirasi yeSandisikuru. Pashure pokunzwa shoko roUmambo, Doris akakurumidza kukumbira Zvapupu kutaura kuboka rake repwere dzinenge 40. Muuyo wacho? Hama dzakadzokera vhiki rakatevera racho namakopi 70 echinyorwa chinonzi Bhuku Rangu Renhau dzeBhaibheri okushandisa pachikoro chomunzvimbomo. Mukati mamavhiki mashomanene, mugariro weSandisikuru wakachinjirwa kuuya weboka refundo yeBhaibheri. Panzvimbo penziyo dzechechi, nziyo dzoUmambo dzakaimbwa nenzira yeAfrica, netsinhirano yomuzvarirwo inofadza. Nokukurumidza boka racho rakakura kusvikira kuvanopfuura 60. Imwe hama yakati: “Chakanga chiri chinoitika chinofadza zvakadini kugoverana mukushandura iyi Sandisikuru kuva nzvimbo yokunamata kwechokwadi!”
Musango Mune Guruva
Nemhaka yokubatanidzwa kwamachechi mukusaterama kwezvamatongerwe enyika, varimi vachena vazhinji vanongwarira kana kuti kunyange kunyumwa pamusoro pomunhu upi noupi anovasvika neshoko reBhaibheri. Cherekedza uyu mushumo wakanyorwa neboka rakabva Johannesburg iro rakafamba anenge makiromita 640 richienda kundoparidzira mashoko akanaka muchimwe chikamu cheTransvaal.
“Tave tichifamba kumusoro tichigura sango rine makakwira nemakadzika kwaanodokusvika maawa mana zvino. Manyiminya anotamba pamugwagwa wakatwasuka unonyiminya muzuva reAfrica. Kamwe kamwe, tara inoguma ndokupinda mumugwagwa usina tara, une munotsika mavhiri makadzika uye wakazara namakomba. Pakupedzisira, mugwagwa une jecha unotitungamirira kupurazi.
“‘Mangwanani, Meneer [Changamire],’ tinodaro mukukwazisa murimi mukobvu akasimba.
“‘Mangwanani,’ inouya mhinduro yake yakashata. ‘Ndinogona kukubetserai here?’
“Pashure pokuzvisuma timene, tinotsanangura chikonzero cheshanyo yedu. Mashoko haasati ambobuda mumiromo yedu apo iye anozhamba, achiti: ‘Dominee [mufundisi] wangu akandinyevera pamusoro penyu imi vanhu! Imi mose muri maKomonisiti navasingatendi Kristu. Ibvai panzvimbo yangu nokukurumidza ndisati nda . . . !’
“Mumhu womurimi unoratidzira kuti iye aigona kuva ane masimba masimba panguva ipi neipi. Tisina chisarudzo, tinosarudza kuenda ndoku‘zunza guruva patsoka dzedu.’ (Mateo 10:14) Pane guruva rakakwana rokuita ikoku chaizvoizvo zvikuru.
“Papurazi inotevera, mhinduro ndiimwe cheteyo. Ipapo tinoziva kuti tambo yorunhare yomunzvimbomo yave yakabatikaniswa zvikuru nomufundisi anogaramo weDutch Reformed, uyo ave achinyevera ‘boka rake’ pamusoro pe‘ngozi’ iri kuuya munzvimbomo. Pakupedzisira tinosangana nomurimi uyo, kunyange zvazvo iye amene asingafariri, anoti: ‘Hungu, munogona kutaura kuvashandi vangu.’
“Tave takamirira izvozvo chaizvo. Dzakaungana pamwe chete pedyo namapuranga dzimba duku tsvuku dzakaderera dzinenge gumi. Tinoona meso echiringa achidongorera ari mumba sezvo tinoisa mirwi yakatsvinda yamabhuku pabhoneti yemotokari yedu. Mumwe murwi wamaBhaibheri, mumwe murwi webhuku raIwe Unogona Kurarama Nokusingaperi muParadhiso Pasi Pano, murwi weBhuku Rangu Renhau dzeBhaibheri, uye mabhurocha akasiana-siana anopedza ratidziro yacho. Mumwe wavakomana vomunzvimbomo anomhanya kundozivisa vagari vomusha nezvokusvika kwedu. Nokukurumidza boka ravanenge 30 rinounganidzwa rakakomba motokari kuzonzwa shoko racho.
“Mharidzo yakarekodhwa kare inovaridzirwa muTswana. Ava vanhu vanofara sei kunzwa mumutauro wavo vamene mashoko akanaka oUmambo hwaMwari netariro yeParadhiso! Pane kutaura kwokunyandurwa kukuru apo zvinyorwa zvinogoverwa. Nguva refu isati yapera, hatitongogoni kuvambirana nezvinogoverwa. Mumwe mutana anotoisa chikarakadzo chomutengo wetepi rekodha. Tinoororwa zvikuru sezvo kuonga mashoko akanaka kuchiratidzirwa munzira duku dzakawanda—nyemwerero yokunyara, ‘mazvita’ anoorora, akapfava.
“Nenzira yomuzvarirwo, vana vanoumba mutsara wakashata ndokuimba rwiyo rweonekano yegamuchidzanwa. Kamwe kamwe, migwagwa ine guruva, ine munofamba mavhiri makadzika uye pane dzimwe nguva mhinduro dzakaipa zvinova zvisingakoshi. Kwave kwakafanira nhamburiko iri yose!”
Mambo Anobudisa Chirevo!
Imwe ungano yokuSoweto yaiva nomugove wokuparidzira munharaunda yedzinza pedyo netaundi rokumabvazuva rePiet Retief. Tsika ikoko inoraira kuti mushanyi atange kutaura basa rake kuna induna (mambo) wenharaunda yacho. Hama dzakawirirana negadziriro iyoyo. Chishamiso chakadini apo mambo akavagamuchira noushamwari uye kunyange kudzipa pokugara mumusha make amene! Mukuwedzera, achishandisa chidhindo chake chapamutemo, akanyora tsamba yesumo yokuti vaparidzi vatakure pasuo nesuo. Iyo yaiti: “Ava vaparidziri voUmambo hwaMwari. Vapinzei mumusha menyu, uye vateererei.”
Kugamuchira kwacho kwaishamisa kwazvo zvokuti Zvapupu zvakaronga kuti hurukuro yavose ikurukurwe muruvanze rweimba yamambo Svondo iyoyo masikati. “Horo” yapanze yakazadzwa zvikuru, uye musangano wacho wakazarurwa ndokupfigwa norwiyo nomunyengetero. Zvinoitika zvakafanana navanhu vane ndangariro yakanaka zvakafarikanywa mudzimwe nharaunda dzomuruwa.
Mumwe munhu akadaro akanga ari Nathaniel, mumusha muduku wePitsedisulejang mukona rakarohwa nokusanaya kwemvura reBophuthatswana. Iye akanga ari mudhomeni wenzanga aibatikana mugadziriro yokudzidzisa vanhu vomunzvimbomo kurima zvirimwa nenzira inobudirira. Iye akafungidzira kushandura iyi nzvimbo isina chinhu kuva paradhiso. Asi apo akadzidza kuti paradhiso yapasi pose yaizokurumidza kuuya, meso ake akajeka. Iye akanyora nokudisa rugwaro ruri rwose vaparidzi vakamuratidza. Nathaniel akakurumidza kuitwa kuti aonane neungano yapedyosa, kure namakiromita 30.
Kubetsera Nomufaro Vatsvaki Vezvokwadi Vazhinji
“Jehovha akatiratidza kuti urombo haudzivisi munhu ane nzara mumudzimu kudzidza zvokwadi,” anodaro Monika, piona, kana kuti muzivisi woUmambo wenguva yakazara. Iye akanga ari rutivi rweboka ramapiona ayo akaparidzira papurazi nepurazi kugura mabani akachena eOrange Free State murutivi rwapakati rwenyika yacho. Mapiona acho akanzwa sei pamusoro pokuzvishandisa amene mukuendesa mashoko akanaka kuava vanhu? “Ndianiko anogona kuisa mutengo pazvinhu zvatakawana?” ivo vakapindura kudaro. Zvamazvirokwazvo, mapiona akasanotuswa mumudzimu nokuda kwenhamburiko dzawo.
Kunyange kusagona kurava hakudzivisi munhu ane nzara yomudzimu kudzidza zvokwadi yapaMagwaro. Bhurocha rine mifananidzo yakanaka Farikanya Upenyu Pasi Pano Nokusingaperi! rinogamuchirwa zvakanaka zvikuru naavo vasingagoni kurava kana kuti vanogona kurava zvishomanene zvikuru. Vaduku navakuru zvakafanana vanofadzwa nemifananidzo yakanaka yeParadhiso. Mumwe mushandi wenguva yakazara uyo anobatsira mukutsikirira mashoko akadaro akati: “Iri bhurocha rinobetsera vanhu kuona Paradhiso sechinhu chaichoicho uye rinowedzera ruremekedzo rwavo rwomuzvarirwo norutyo nokuda kweBhaibheri.”
Nokuda kwechikonzero chimwe chetechi, chinyorwa chinonzi Bhuku Rangu Renhau dzeBhaibheri rave rakakurumbira zvikuru. Muimwe nharaunda yedzinza iri kure yeLebowa, mbiri dzehanzvadzi dzedu dzomudzimu dzakashamiswa nokuwana kuti mumwe murume akwegura, anodokuva bofu nomudzimai wake vaiva nekopi yeiri bhuku mumutauro weSepedi. Ava vaviri vairishandisa sebhuku ravo rinoshandiswa rokudzidzisa vana vomunzvimbomo. Kutaura idi, bhuku racho rakanga rasanofundwa kwazvo ndokutaura zvokuti rakanga rava kuparara. Vakafadzwa sei kuwana kopi idzva!
Kwakadaro kuti zvinyorwa zvechiKristu chechokwadi zviri kuita chinodikanwa chikuru mukubetsera avo vane nzara yezvokwadi. Nenzira inofadza, chikamu chikuru chamashoko ose akatsikirirwa muyakawanda yemitauro yomunzvimbomo yeAfrica yokumaodzanyemba chinobudiswa neWatch Tower Society. Muna 1990 moga, mabhuku, mabhurocha, uye magazini 113 529 zvakabudiswa neSosaiti zvakaparadzirwa mumaruwa eSouth Africa.
Chibereko Chebasa
Ko izvi zvinoitika zvakaisvonaka namabhuku akagoverwa zvakabudisa chibereko chisingagumi mumaruwa eSouth Africa here? Zvamazvirokwazvo zvakadaro. Chifo cha 1989 ungano ina namapoka ari oga mapfumbamwe zvakaumbwa somuuyo wakananga wokuzivisa mashoko akanaka mumaruwa eSouth Africa. Mapiona chaiwo echinguvana namapiona enguva dzose akatungamirira rakawanda reiri basa.
Unoyeuka Doris neSandisikuru yake here mumupata uya uri kure muZululand? Nhasi, iye Chapupu chakazvitsaurira, chakabhapatidzwa chaJehovha. Uyezve, boka rinobudirira ravaparidzi voUmambo vapfumbamwe rinopfuurira kuita fambiro mberi yomudzimu ikoko. Vatsva vazhinji vari kupinda misangano inoitirwa mumusha maDoris, uye vanhu vanomwe avo akaitisa fundo dzeBhaibheri dzapamusha vakabhapatidzwa pakokorodzano yoruwa yakaitwa muDurban muna December 1990.
Chibereko chakadaro ikurudziro inofadza kuvaparidzi voUmambo muSouth Africa. Ivo vanofunga zvakakomba mashoko omuapostora Pauro, anoti: “Zvino zvatine nguva, ngatiitire vose zvakanaka.” (VaGaratia 6:10) Hungu, vabatiri vaJehovha vakatsunga kusvika vanhu vose vane mwoyo wakatendeseka, kubatanidza avo vanogara mumaruwa ourwu “rutivi rwuri kure rwapasi.”—Mabasa 1:8, NW.
[Mepu/Mifananidzo iri papeji 24]
(Kana uchida mashoko azere, ona bhuku racho)
Lebowa
TRANSVAAL
Soweto
Piet Retief
Bophuthatswana
ORANGE FREE STATE