“Tsvakai Rugare Ndokururonda”
“Jehovha ngaakudzwe, anofarira rugare rwomubatiri wake.”—PISAREMA 35:27, “NW.”
1. Rugarei rwatinofarikanya nhasi?
MUFARO wakadini munyika ino yakakamukana kuva norugare! Mufaro wakadini kunamata Jehovha, “Mwari amene worugare,” uye kugoverana muzvikomborero zve“sungano [yake] yorugare”! Kunozorodza sei, pakati pedzvinyiriro dzoupenyu, kuziva “rugare rwaMwari runopfuura mufungo wose” uye kuwana ‘chisungo chorugare’ icho chinobatanidza vanhu vaMwari pasinei zvapo nechiri rudzi rwavo, mutauro, dzinza, kana kuti mugariro wenzanga!—1 VaTesaronika 5:23, NW; Ezekieri 37:26; VaFiripi 4:7; VaEfeso 4:3.
2, 3. (a) Nepo vanhu vaMwari vose zvavo vachatsungirira, chii chingaitika kumaKristu mamwe namamwe? (b) Chii icho Bhaibheri rinotikurudzira kuita?
2 SeZvapupu zvaJehovha, tinokoshesa urwu rugare. Zvisinei, hatigoni kururerutsa. Rugare harungoerekani rwachengetwa nemhaka yokuti takabatanidzwa neungano yechiKristu kana kuti kungova rutivi rwemhuri yechiKristu. Nepo vakasarira vakazodzwa neshamwari dzavo dza“mamwe makwai” vachatsungirira seboka rimwe kusvikira kumugumo, vanhu vamwe navamwe vangarasikirwa norugare rwavo ndokuwa.—Johane 10:16; Mateo 24:13; VaRoma 11:22; 1 VaKorinte 10:12.
3 Muapostora Pauro akanyevera maKristu akazodzwa ezuva rake, kuti: “Hama dzangu, chenjerai kuti mukati momumwe wenyu murege kuva nomwoyo wakashata usingatendi, mutsauke muchibva kuna Mwari mupenyu.” (VaHebheru 3:12) Iyi nyevero inoshandawo kuboka guru. Naizvozvo Bhaibheri rinokurudzira maKristu, kuti: “Tsvakai rugare ndokururonda. Nokuti meso aJehovha ari pamusoro pavanhu vakarurama, uye nzeve dzake dziri kumukumbiro wavo; asi chiso chaJehovha chinorwisana naavo vanoita zvinhu zvakaipa.”—1 Petro 3:10-12, NW; Pisarema 34:14, 15.
“Kufunga Kwenyama”
4. Chii chingagona kuvhiringidza rugare rwedu naMwari?
4 Chii chinogona kuvhiringidza kuronda kwedu rugare? Pauro anodudza chinhu chimwe paanoti: “Kufunga kwenyama ndirwo rufu; asi kufunga kwo[mudzimu, NW] ndihwo upenyu norugare; nokuti kufunga kwenyama kunovengana naMwari.” (VaRoma 8:6, 7) Ne“nyama,” Pauro anonongedzera kumugariro wedu wakawa savanhu vasina kukwana vane kombamiro dzakagarwa nhaka dzokutadza. Kutera kukombamiro dzenyama yakawa kuchaparadza rugare rwedu. Kana muKristu akaita utere, akareva nhema, akaba, akadya mirimo, kana kuti muimwe nzira yakati akaputsa mutemo woumwari nenzira yokusapfidza, anoparadza rugare naJehovha rwaaimbofarikanya. (Zvirevo 15:8, 29; 1 VaKorinte 6:9, 10; Zvakazarurwa 21:8) Uyezve, kana iye akabvumira zvinhu zvokunyama kuva zvinokosha zvikuru kwaari kupfuura zvinhu zvomudzimu, rugare rwake naMwari runotyisidzirwa zvakakomba.—Mateo 6:24; 1 Johane 2:15-17.
5. Chii chinobatanidzwa mukurondwa kworugare?
5 Pane rumwe rutivi, Pauro akati: “Kufunga kwomudzimu kunoreva upenyu norugare.” Rugare rutivi rwechibereko chomudzimu, uye kana tikarovedza mwoyo wedu kuonga zvinhu zvomudzimu, kunyengeterera mudzimu waMwari kutibetsera muna ikoku, ipapo tichadzivisa “kufunga kwenyama.” (VaGaratia 5:22-24, NW) Pana 1 Petro 3:10-12, rugare runobatanidzwa nokururama. (VaRoma 5:1) Petro anotaura kuti kurondwa kworugare kunobatanidza ‘kubva pane chakaipa nokuita chiri chakanaka.’ Mudzimu waMwari unogona kutibetsera “kuronda kururama” uye nokudaro kuchengeta rugare rwedu naMwari.—1 Timotio 6:11, 12.
6. Ndoupi uri mumwe wemitoro yavakuru kana toreva nezvorugare rweungano?
6 Kurondwa kworugare ndokweitiro hanya huru kuvakuru muungano. Somuenzaniso, kana mumwe munhu akaedza kupinza miitiro inosvipisa, vakuru vane mutoro wokudzivirira ungano kupfurikidza nokuedza kutsiura mutadzi. Kana akagamuchira tsiuro, achawanazve rugare rwake. (VaHebheru 12:11) Kana akasadaro, angafanira kudzingwa kuti ukama hune rugare hweungano naJehovha hugochengetwa.—1 VaKorinte 5:1-5.
Rugare Nehama Dzedu
7. Kuratidzirwai kwo‘kufunga kwenyama’ uko Pauro anonyevera vaKorinte pamusoro pako?
7 ‘Kufunga nyama’ kunogona kuparadza kwete bedzi rugare rwedu naMwari asiwo ukama hwedu hwakanaka namamwe maKristu. Pauro akanyorera vaKorinte, kuti: “Nokuti muchiri venyama. Nokuti zvapachine godo pakati penyu, negakava, ko hamuzimi venyama, muchifamba nomutoo wavanhu here?” (1 VaKorinte 3:3) Godo negakava musiano umene worugare.
8. (a) Chii chingaitika kune uyo anoparira godo negakava muungano? (b) Rugare rwedu naMwari runotsamira pachii?
8 Kudzongonyedza rugare rweungano kupfurikidza nokuparira godo negakava kwakakomba zvikuru. Achitaura nezvevara rine chokuita norugare, sechibereko chomudzimu, muapostora Johane akanyevera, kuti: “Kana munhu achiti: ‘Ndinoda Mwari,’ achivenga hama yake, murevi wenhema; nokuti usingadi hama yake yaakaona, ungada seiko Mwari waasina kuona?” (1 Johane 4:20) Nenzira yakafanana, kana munhu akaparira godo kana kuti gakava pakati pehama, anogona chaizvoizvo kuva norugare naMwari here? Zvirokwazvo kwete! Tinokurudzirwa, kuti: “Pfuurirai kufara, kugadziridzwa, kunyaradzwa, kufunga nebvumirano, kugara norugare; uye Mwari worudo noworugare achava nemi.” (2 VaKorinte 13:11, NW) Hungu, kana tikapfuurira kugara norugare nomumwe nomumwe, ipapo Mwari worudo norugare uchava nesu.
9. Tinoziva sei kuti maKristu pane dzimwe nguva achava nokusanzwisisana nokusabvumirana?
9 Ikoku hakurevi kuti hakusati kuchizotongova nokusanzwisisana pakati pamaKristu. Mumavhiki apashure pePentekosta, pakava nokusabvumirana muungano duku yechiKristu pamusoro pegoverwo yezuva nezuva yezvokudya. (Mabasa 6:1) Pane imwe nhambo kusabvumirana pakati paPauro naBharnabhasi kwakatungamirira ku“kutsamwirana kukuru.” (Mabasa 15:39, NW) Pauro aitofanira kupa zano Yuodhia naSintike, pasina panikiro hanzvadzi dzakaisvonaka, dzinoshingaira, “kuti vave vendangariro imwe cheteyo munaShe.” (VaFiripi 4:2, NW) Hakushamisi kuti Jesu akapa pangiro ine udzame pamapedzerwe evhiringidzo dzorugare pakati pamaKristu ndokusimbisa kurumidziro yokubata zvinetso zvakadaro nokukurumidza! (Mateo 5:23-25; 18:15-17) Angadai asina kupa iri zano kudai asina kukarira zvinetso pakati pavateveri vake.
10. Migariroi padzimwe nguva inomuka muungano, uye ikoku kunoisa mutoroi pavose vanobatanidzwa?
10 Nhasi, ipapoka, kunobvira chose kuti mumwe munhu angagumburwa neshoko rokusangwarira pakutaura kana kuti ruzvidzo runocherechedzwa kubva kumuKristu biyake. Vara riri mumumwe munhu ringashatirisa zvikuru mumwe. Hunhu hungabonderana. Mumwe munhu angasabvumirana zvakasimba nechisarudzo chavakuru. Mumutumbi wavakuru umene, mukuru mumwe angava ane pfungwa yakasimba zvikuru ndokuedza kukurira vamwe vakuru. Pasinei zvapo neidi rokuti zvinhu zvakadaro zvinoitika, tichiri vanofanira kutsvaka rugare ndokururonda. Denho ndeyokubata zvinetso zvakadaro nenzira yechiKristu kuti tigochengeta “chisungo chinobatanidza chorugare.”—VaEfeso 4:3.
11. Igadziriroi idzo Jehovha akaita kutibetsera kuronda rugare nomumwe nomumwe?
11 Bhaibheri rinoti: “Jehovha ngaakudzwe, uyo anofarira rugare rwomubatiri wake.” (Pisarema 35:27, NW) Hungu, Jehovha anoda kuti tive norugare. Nokudaro, iye akaita gadziriro mbiri dzakatanhamara kutibetsera kuchengeta rugare pakati pedu timene uye naye. Imwe mudzimu mutsvene, uyo rugare ruri chibereko chawo, pamwe chete namavara anowirirana orugare, akadai somwoyo murefu, mutsa, unyoro, uye kuzvidzora. (VaGaratia 5:22, 23) Imwe huchenjeri hwoumwari, uhwo tinorava nezvahwo, kuti: “Kuchenjera, kunobva kumusoro, zvikuru kwakachena, uye kune rugare, kunyoro, kunoteerera, kuzere nengoni nezvibereko zvakanaka.”—Jakobho 3:17, 18.
12. Chii chatinofanira kuita kana rugare rwedu nehama dzedu rwavhiringidzwa?
12 Naizvozvo, apo rugare rwedu navamwe runovhiringidzwa, tinofanira kunyengeterera uchenjeri hunobva kumusoro kutiratidza nzira yokuita nayo, uye tinofanira kukumbira mudzimu mutsvene kutisimbisa kuita chiri chakarurama. (Ruka 11:13; Jakobho 1:5; 1 Johane 3:22) Mutsinhirano nomunyengetero wedu, tinogona ipapo kunzvera mumanyuko ouchenjeri hwoumwari, Bhaibheri, nokuda kwenhungamiro, pamwe chete nokunzvera zvinyorwa zveBhaibheri zvinowanika nokuda kwezano pamusoro penzira yokushandisa nayo Magwaro. (2 Timotio 3:16) Tingashuvawo kutsvaka zano kuvakuru vari muungano. Nhano yokupedzisira yaizova kutevera nhungamiro inogamuchirwa. Isaya 54:13, (NW), inoti: “Vanakomana vako vose vachava vanhu vanodzidziswa naJehovha, uye rugare rwavanakomana vako ruchawanda.” Ikoku kunoreva kuti rugare rwedu runotsamira pakushandisa kwedu zvinhu izvo Jehovha anotidzidzisa.
“Vanofara Vane Rugare”
13, 14. (a) Chii chinorehwa nokutaura kwaJesu kwokuti “vane rugare”? (b) Tinogona sei kuva vaiti vorugare?
13 Jesu, muMharidzo yake yapaGomo, akati: “Vanofara vane rugare, sezvo vachanzi ‘vanakomana vaMwari.’” (Mateo 5:9, NW) “Vane rugare” pano hakusati kuchinongedzera kune mumwe munhu akanyarara zvake nomusikirwo. Shoko rapakuvamba rechiGiriki rinoreva “vaiti vorugare.” Muiti worugare ano unyanzvi pakudzorera rugare apo runovhiringidzwa. Chinokosha zvikuru, kunyanguvezvo, muiti worugare anotamburira kudzivisa kuvhiringidza rugare pakutanga. ‘Rugare runodzora mumwoyo make.’ (VaKorose 3:15) Kana vabatiri vaMwari vakatamburira kuva vaiti vorugare, ipapo zvinetso pakati pavo zvicharamba zviri zvishoma.
14 Kuva muiti worugare kunobatanidza kuziva utera hwedu timene. Somuenzaniso, muKristu angava nehasha huru kana kuti asingatani kutsamwa naanogumburwa nyore nyore. Paanenge ari mudzvinyiriro, kunzwa kwake kungamuita kuti akanganwe nheyo dzeBhaibheri. Ikoku hakusati kuri kusingakarirwi muvanhu vasina kukwana. (VaRoma 7:21-23) Kunyanguvezvo, kuvengana, gakava, uye kutsamwa kukuru zvinorongwa samabasa enyama. (VaGaratia 5:19-21) Kana tikawana kombamiro dzakadaro matiri timene—kana kuti kana dzikaunzwa kungwariro yedu navamwe—tinofanira kunyengetera zvapachokwadi uye nguva dzose kuti mudzimu waJehovha ukudziridze matiri kuzvidzora nounyoro. Zvamazvirokwazvo, munhu ari wose anofanira kutamburira kusakurira mavara akadaro sorutivi rwohunhu hwake hutsva.—VaEfeso 4:23, 24; VaKorose 3:10, 15.
15. Uchenjeri hunobva kumusoro hunopesana sei nechisimbwa chisina mufungo?
15 Panhambo nenhambo, ungano kana kuti mutumbi wavakuru unovhiringidzwa nomumwe munhu akasindimara, anoomerera nguva dzose panzira yake amene. Chokwadi, pakunouya kumutemo woumwari, muKristu anofanira kuva ane ndangariro yakasimba, kunyange akaoma. Uye kana tichinzwa kuti tine pfungwa yakanaka iyo ingagona kubetsera vamwe, hapana chakaipa nokutaura mifungo yedu timene zvakananga, chero bedzi tichitsanangura zvikonzero zvedu. Asi hatidi kuva vakafanana naavo vari munyika “vasina kuzaruka kubvumirano ipi neipi.” (2 Timotio 3:1-4, NW) Uchenjeri hunobva kumusoro hune rugare, hune mufungo. Avo vane zviito zvinoumba muenzaniso wokuoma kwousindimari vanofanira kuteerera zano raPauro kuvaFiripi ro‘kusaita chinhu nokuzvitutumadza.’—VaFiripi 2:3.
16. Zano raPauro riri mubhuku raVaFiripi rinotibetsera sei kukurira kuzvitutumadza?
16 Mutsamba imwe cheteyo iyeyo, Pauro anokurudzira kuti tinofanira, ‘nendangariro inozvininipisa,’ ‘kurangarira [zvapachokwadi] kuti vamwe vakuru kwatiri.’ Ikoku imhesano imene yokuzvitutumadza. MuKristu akakura mumudzimu haatangi kufunga nezvokumanikidzira pfungwa dzake amene, kudzivisa manyadzi, kana kuti kudzivirira chimiro chake amene nechiremera. Ikoku kwaizova kunopesana nepangiro yaPauro yoku‘ngwarira, kwete fariro dzomunhu oga pazvinhu zvake amene chete, asiwo fariro yomunhu oga paizvo zvavamwe.’—VaFiripi 2:4; 1 Petro 5:2, 3, 6.
Mashoko Ane Rugare
17. Kushandiswai kusina kururama kworurimi kunogona kuvhiringidza rugare rweungano?
17 Uyo ari kuronda rugare anongwarira zvikuru mukushandisa kwake rurimi. Jakobho anonyevera, kuti: “Rurimi mutezo muduku asi runoganza zvikuru. Tarirai! Kunoda mwoto muduku sei kutungidza sango guru kwazvo!” (Jakobho 3:5, NW) Guhwa remisikanzwa, kutsoropodzwa kwavamwe vasinganzwi, mashoko asina mutsa naane hasha, kugunun’una nokunyunyuta, pamwe chete namafadzahanzvadzi okusatendeseka nokuda kwebetserwo yomunhu oga—ose iwaya mabasa enyama anovhiringidza rugare rwavanhu vaMwari.—1 VaKorinte 10:10; 2 VaKorinte 12:20; 1 Timotio 5:13; Judhasi 16.
18. (a) Muchinoitika chokushandiswa kwakaipa kusiri kwamaune kworurimi, ndeipi iri nzira yakarurama nokuda kwomunhu ari wose anobatanidzwa? (b) Apo hasha dzinoparira mumwe munhu kutaura mashoko anokuvadza, maKristu akakura mumudzimu anoita sei?
18 Chokwadi, Jakobho akati: “Hakuna munhu ungapingudza rurimi; ndicho chinhu chakaipa chinoshanduka-shanduka.” (Jakobho 3:8) Kunyange maKristu akakura mumudzimu padzimwe nguva anotaura zvinhu zvaanodemba zvapachokwadi pashure. Tose zvedu tinokarira kuti vamwe vachatikanganwira zvikanganiso zvakadaro sezvo tichivakanganwirawo. (Mateo 6:12) Pane dzimwe nguva kutsamwa kukuru kungabereka mashoko anokuvadza. Ipapo, muiti worugare achayeuka kuti “mhinduro nyoro inodzora kutsamwa; asi shoko rinorwadza mwoyo rinomutsa hasha.” (Zvirevo 15:1) Kazhinji kazhinji, achangofanira kutura befu zvikuru ndokuramba kupindura kumashoko okutsamwa namashoko okutsamwa zvikuru. Pashure, apo hasha dzinenge dzapora, muiti worugare ane mwoyo wakanaka anoziva nzira yokufuratira nayo zvinhu zvakataurwa mukukurumidza kutsamwa. Uye muKristu anozvininipisa achaziva nzira yokukumbira nayo ruregerero ndokuedza kurapa maronda api naapi ayo akaparira. Chiratidzo chetsika dzakasimba kukwanisa nokutendeseka kuti, “Ndine urombo.”
19. Tinodzidzei kuna Pauro naJesu pamusoro pamapirwe ezano?
19 Rurimi rungafanira kushandiswa kupa zano vamwe. Pauro akatuka Petro pachena apo wapashure akaita nenzira isina kururama muAntiokia. Uye Jesu akapa zano rakasimba mumashoko ake kuungano nomwe. (VaGaratia 2:11-14; Zvakazarurwa, ganhuro 2, 3) Kana tikafunda iyi mienzaniso, tinodzidza kuti zano harifaniri kuva nyoro kwazvo zvokuti pfundo raro rinorasika. Kunyanguvezvo, Jesu naPauro vakanga vasina hasha kana kuti vane utsinye. Zano ravo rakanga risiri nzira yokubudisa nayo kangaidziko dzavo vamene. Vaiedza zvapachokwadi kubetsera hama dzavo. Kana munhu ari kupa zano akanzwa kuti haasati ari kudzora rurimi rwake zvakazara, iye angasarudza kutindika ndokutonhora zvishomanene pamberi pokutaura chinhu chipi nechipi. Akasadaro, angataura mashoko ehasha ndokuparira chinetso chakaipa zvikuru kupfuura icho ari kuedza kupedza.—Zvirevo 12:18.
20. Chii chinofanira kudzora chinhu chiri chose chatinotaura kuhama dzedu nehanzvadzi kana kuti pamusoro padzo?
20 Sezvatodudzwa, rugare norudo zvakabatana zvikuru sezvibereko zvomudzimu. Kana zvatinotaura kuhama dzedu—kana kuti pamusoro padzo—kazhinji kazhinji iri ratidziro yorudo rwedu nokuda kwavo, ipapo kuchapira kurugare rweungano. (Johane 15:12, 13) Kutaura kwedu kunofanira kuva “nenyasha, kwakarungwa nomunyu.” (VaKorose 4:6) Kunofanira kuva kunonaka, sokunge zvakadaro, kuchifadza kumwoyo. Jesu akapa zano, kuti: “Ivai nomunyu mamuri mumene, uye chengetai rugare pakati pomumwe nomumwe.”—Marko 9:50, NW.
“Itai Hunani Hwenyu”
21. Chii chiri pachena pamusoro pavanhu vaMwari pamisangano yavo yevhiki nevhiki uye mukati mamagungano nekokorodzano?
21 Wezvamapisarema akanyora, kuti: “Tarirai! Kunaka kwazvo nokufadza kwazvo kana hama dzichigara pamwe chete norugare!” (Pisarema 133:1) Zvirokwazvo, tinofara kuva nehama dzedu, zvikurukuru pamisangno yedu yevhiki nevhiki nomukati mamagungano nekokorodzano huru. Panguva dzakadaro rugare rwedu rwuri pachena kunyange kuvokunze.
22. (a) Rugarei rwenhema urwo marudzi nokukurumidza achafunga kuti ari kuwana, kuchitungamirira kuchii? (b) Rugarei chairwoirwo urwo sungano yaMwari yorugare ichatungamirira kwarwuri?
22 Nokukurumidza marudzi achafunga kuti ari kuwana rugare asina Jehovha. Asi achiti, “Rugare nechengeteko!” ruparadziko rwakamwe kamwe ruchauya pavose avo vasina rugare naMwari. (1 VaTesaronika 5:3, NW) Pashure paikoko, Muchinda mukuru woRugare achapfuurira nokurapwa kworudzi rwomunhu pamiuyo inoparadza yokurasikirwa kwapakuvamba kwomunhu norugare naMwari. (Isaya 9:6, 7; Zvakazarurwa 22:1, 2) Ipapo, sungano yaMwari yorugare ichaguma norunyararo rwenyika yose. Kunyange zvikara zvesango zvichawana zororo pautsinye.—Pisarema 37:10, 11; 72:3-7; Isaya 11:1-9; Zvakazarurwa 21:3, 4.
23. Kana tichikoshesa tariro yenyika itsva ine rugare, chii chatinofanira kuita zvino?
23 Iyoyo ichava nguva ine mbiri zvakadini! Unotarira mberi nokudisa kwairi here? Kana zvakadaro, “ronda rugare navanhu vose.” Tsvaka rugare zvino nehama dzako, uye zvikurukuru naJehovha. Hungu, “sezvo muri kumirira izvi zvinhu, itai unani hwenyu kuti muwanikwe naye pakupedzisira musina ruvara uye musina chakaipa uye muri murugare.”—VaHebheru 12:14; 2 Petro 3:14, NW.
Unoyeuka Here?
◻ Chii chinogona kuparadza rugare rwedu naJehovha?
◻ Rudzii rwokusanzwisisana rungada kupedzwa muungano?
◻ Igadziriroi iyo Jehovha akaita kutibetsera kutsvaka rugare ndokururonda?
◻ Zvimiroi zvenyama zvinogona kuvhiringidza rugare rweungano, uye tinogona sei kuzvikurira?
[Mufananidzo uri papeji 22]
Rugare rwakawanda pakati paavo vanodzidziswa naJehovha
[Mufananidzo uri papeji 24]
Runofadza sei rugare rwehama dzinobatira muchinzwano!