Rudzi Runofara
RUDZI runofara! Ko iyi rondedzero inokodzera rudzi rupi norupi rworudzi rwomunhu nhasi here? Ko rudzi rupi norupi runogona here kuita kutaura kwokufara kwokuti irwo rwakabvisa masimba masimba, utsotsi, urombo, kushatisa, hosha dzinoremadza, ushati hwezvamatongerwe enyika, ruvengo rworudzidziso? Ko rudzi rupi norupi runopa tariro chaiyoiyo yokuwana nharidzano dzakadaro here? Nyangwe!
Zvakadiniko nezvomufananidzo wenyika yose? Mikhail Gorbachev, purezidhendi weU.S.S.R., akataura July 16 apfuura, kuti: “Tiri kusiya nhambo imwe muukama hwamarudzi ose, uye kupinda muimwe, nhambo, ndinofunga, yorugare rwakasimba, rurefu.” Zvisinei, magazini yeTime yomusi mumwe chetewo yakashuma kuti United States ichakangotondeka Moscow nezvombo zvinokandwa zvenyukireya 120, chimwe nechimwe chazvo chingaparadza chose chose guta iroro. Uye pasina panikiro vaSoviet vakagadzirira kuita zvakafanana. Nemitezo inoverengeka yeChibatanwa chaMarudzi zvino inoziva nzira yokugadzira nayo zvombo zvenyukireya, kune mufaro muduku mukurangarira angatanga kupfura.
Rudzi Runofara Zvirokwazvo
Pane imwe nhambo munhau—makore 3 500 apfuura—kwakanga kune rudzi runofara zvirokwazvo. Irworwo rwakanga rwuri Israeri wakare. Apo Mwari akasunungura rudzi irworwo rwavanhu mudzvinyiriro yeEgipita, vakakumbanira Mosesi murwiyo rwokufara rworukundo, uye ivo vakapfuurira kufara chero bedzi vaiteerera Mwari wavo noMununuri.—Eksodho 15:1-21; Dheuteronomio 28:1, 2, 15, 47.
Mukutonga kwaSoromoni “vaJudha navaIsraeri vakanga vari vazhinji, vakanga vakawanda sejecha pagungwa, vakadya, vakanwa, uye vakafara.” Iyoyo yakanga iri nguva yokufara kukuru, yakagumiswa nokuvakwa kwechakanga chiri zvimwe chivako chine mbiri zvikurusa munhau yose, tembere yokunamatwa kwaJehovha muJerusarema.—1 Madzimambo 4:20; 6:11-14.
Rudzi Runofara Rwomuzuva Razvino Uno
Israeri wakare akadeya kufananidzira rudzi rwazvino uno. Rupiko? Israeri wezvamatongerwe enyika weMiddle East here? Mishumo yenhau inoratidzira kuti rudzi irworwo runoparapatika harusati ruchitongofara. Ko chinonzi Chibatanwa chaMarudzi chakaunza mufaro chaiwoiwo kunyika dziri mitezo yacho here? Aiwa, mufaro wechokwadi hauwanikwi pakati pamarudzi anoita zvamatongerwe enyika anhasi. Makaro, ushati, uye kusatendeseka zvakawanda, uye munyika dzakawanda vanhuwo zvavo vanoparapatika nenzira isingafadzi kuti vangovepo chete.—Zvirevo 28:15; 29:2.
Zvisinei, nhasi kune rudzi rumwe runoshamisa runofara zvikuru kwazvo. Harusati rwuri rwezvamatongerwe enyika, nokuti Musoro warwo, Kristu Jesu, akati nezvavanhu varwo: “Hamusati muri rutivi rwenyika.” (Johane 15:19, NW) Nepo Chibatanwa chaMarudzi chakabatanidzwa nezita bedzi, rudzi runofara runowana vatsigiri varwo vanoda rugare “mumarudzi ose nendudzi navanhu nendimi.” (Zvakazarurwa 7:4, 9, NW) Zvino runodokusvika mamirioni mana, zvokuti chiverengero charwo chikuru kupfuura 60 amarudzi ari mitezo 159 eCM. Mitauro yaava vanhu vane mamirioni mana inosvika inenge 200; bva vose vakabatanidzwa mukutaura “mutauro wakachena” mumwe.—Zefania 3:9, NW.
Hakushamisi here kuti hunhu hwakasiana-siana hwakawanda kwazvo hunofanira kutaura mutauro unozivikanwa navose? Kwete chaizvoizvo, nokuti uyu mutauro mumwe unobatanidza unobatanidza shoko roUmambo huri kuuya hwaMwari hwokururama. Rudzi urwu runofara runobva “kumugumo wapasi” uye runozivikanwa munyika yose se‘Zvapupu zvaJehovha.’ (Isaya 43:5-7, 10, NW; Zekaria 8:23) Munodokuva munzvimbo iri yose maunofamba pamusoro penyika ino, uchavawana.
Pana Isaya 2:2-4 (NW), muporofita waMwari anorondedzera boka rinodirana richibva mumarudzi ose, richiti: “Uyai, imi vanhu, uye ngatikwire kugomo raJehovha, kuimba yaMwari waJakobho; uye iye achatiraidza pamusoro penzira dzake, uye tichafamba munzira dzake.” Nenzira yokushingaira, ivava vanokoka vamwe kuti vagamuchire muraidzo unobva kuna Jehovha kupfurikidza neShoko rake, Bhaibheri, kuti vagodzidza kuita kuda kwake. Rudzi rumwe irworwu runotevera nzira yorugare rwechokwadi, vanhu varwo vachiva vakatopfura ‘minondo kuva miromo yamapadza namapfumo kuva zvisanzauriso, kusadzidzazve hondo.’ Rudzi runofara zvamazvirokwazvo!
Iwewo unogona kugoverana muuyu mufaro. Unogona kudzidza nezvezuva riri kusvika nokukurumidza apo Mambo, Kristu Jesu, anobvisa vanhu vanoparadza nehurumende uye anodzorera Paradhiso kupasi. (Dhanieri 2:44; Mateo 6:9, 10) Kunyange zvino, sorudzi rwakabatana zvirokwazvo, Zvapupu zvaJehovha zvinowana mufaro mukuru mubasa razvo rokugadzirira nokuda kwenhambo iyoyo ine mbiri yorugare rwechokwadi, sezvicharatidza mapeji anotevera.