Bhetrehema—Chiratidzo Chechinzwano chechiKristu Norudo Here?
“BHETREHEMA . . . chibvumikiso chorudo rusingagumi, chidzidzo mukuzvininipisa.”—Maria Teresa Petrozzi, munyorikadzi webhuku rinonzi Bethlehem.
Ko Bhetrehema rinoreva chimwe chinhu chakafanana naichocho kwauri here? Zvichida saizvozvo, sezvo mazana amamirioni avanhu vapachokwadi, vanoda rugare munyika yose achitarira noruremekedzo kuBhetrehema, zvikurukuru mukati menguva yeKrisimisi. Iwo anoziva kuti iri guta duku reMiddle East ndiyo nzvimbo yakaberekerwa “Muchinda woRugare,” Jesu Kristu. Kwamazana amakore vanoenda kunzvimbo tsvene vakadirana muno kuzoshanyira imwe yenzvimbo tsvene zvikurusa dzechiKristudhomu uye zvichida kuzoikudza. Iyoyo iBako roKuberekwa kwaJesu Kristu, nzvimbo yamagamuchidzanwa yokuberekwa kwaJesu Kristu. Iyo iri muchivako chikuru, chakakurumbira chinonzi Chechi yoKuberekwa kwaJesu Kristu.—Isaya 9:6; Mateo 2:1.
Zvisinei, chaizvoizvo, ko idzi nzvimbo tsvene dzamagamuchidzanwa dzakabatira senzvimbo huru dzechinzwano, rudo, uye kuzvininipisa kwechiKristu here? Chii chaunogumisa kubva muzvinotevera?
Munyori weKaturike Maria Teresa Petrozzi anotsinhira muBethlehem: “Kuvambira muzana ramakore rechi 16, [Bhetrehema] rakatambura nerwisano dzakakasharara nedzine chishava pakati pavaLatin [vaRoma Katurike] uye vaGiriki [vatendi veOrthodox yeGirisi] nokuda kwoudzori muchechi yoKuberekwa kwaJesu Kristu.” Idzi “rwisano dzine chishava” dzinoitika dzaitikazve nokuda kwoudzori kazhinji kazhinji dzakananga panyeredzi yesirivha iri muBako roKuberekwa kwaJesu Kristu, iyo yakaiswa pasi pevhu, pasi peChechi yoKuberekwa kwaJesu Kristu. Iyi nyeredzi inotaurwa kuva inoratidzira nzvimbo chaiyoiyo yokuberekwa kwaKristu. R. W. Hamilton anoshuma mubhuku rake The Church of the Nativity, Bethlehem: “Kunosanozivikanwa kuti miviri yemibvunzo iri mugakava pakati peFrance neRussia iyo yakatungamirira kuhondo yeCrimea yaiitira hanya kutaura kwokukwikwidzana kwokuva nekiyi dzamasuo makuru ebasilica neecrypt [Bako roKuberekwa kwaJesu Kristu], uye kubiwa kwechienzi usiku humwe muna 1847 kwenyeredzi yesirivha ine runyoro rwechiLatin iyo yakapinzwa musirabhu yemarble pasi peatari yoKuberekwa kwaJesu Kristu.”
Somuuyo werwisano dzinopfuurira dzapakati pamasangano mumazana ose amakore pamusoro pamararamiro muidzi nzvimbo, “maruramiro esangano rimwe nerimwe ari kusanorondedzerwa zvino. Pamarambi 53 ari mubako, somuenzaniso, vaFrancis vanobvumirwa 19. Atari yoKuberekwa kwaJesu Kristu ndeyavaGiriki, uye vaLatin havabvumirwi kuitira minamato ipapo.”—Historical Site in Israel.
Mukati menguva yeKrisimisi, kana mugariro wezvamatongerwe enyika uchibvumidza, imwe neimwe yenzanga dzorudzidziso dzechiKristudhomu iripo inova neMisa yeKrisimisi yayo imene uye inofora ichipfuura nomuBhetrehema. Pana December 24 na 25, vaLatin vanofora uye Misa yapakati pousiku muSaint Catherine’s Church, pedyo neChechi yoKuberekwa kwaJesu Kristu, iyo zvino inogoveranwa nechechi yechiGiriki neOrthodox yeArmenia. Pana January 6, chechi yeGirisi, yeSiria, yeOrthodox yeCoptic dzinochengeta Misa dzadzo dzeKrisimisi. Pana January 18, Misa yeKrisimisi yeOrthodox yeArmenia inoitwa, nokufora pana January 19.
Ko zvichangobva kududzwa zvinokarakadza kuti nzvimbo tsvene dzamagamuchidzanwa dzeBhetrehema ‘chibvumikiso chorudo rusingagumi, chidzidzo mukuzvininipisa here’? Mukuwedzera, ko idzo dzinoratidzira zvokwadi pamusoro pemigariro yokuberekwa kwaJesu here? Somuenzaniso, iye akaberekwa rini? Iye akaberekerwa zvomenemene here muriri zvino Bako roKuberekwa kwaJesu Kristu? Uye iwe kana kuti munhu upi noupi zvake anofanira kukudza nzvimbo yake yokuberekerwa here?
[Vakatipa Mufananidzo uri papeji 3]
Pictorial Archive (Near Eastern History) Est.