Nzwisiso Panhau
Vane Mitezo Mimwe Cheteyo Yevatano Vanovatana—Vakaenzana Pamberi paMwari Here?
Munyika yeAustralia yeQueensland, zviito zvavane mitezo mimwe cheteyo yevatano vanovatana—kunyange pakavanda navakwanyina vanobvumirana—hazvisi zvapamutemo. Misi ichangobva kupfuura iyi, boka guru rechechi munyika iyoyo rakarwisana zvakasimba nemitemo yakadaro; ivo vanoda kuti vatano yavane mitezo mimwe cheteyo yevatano vanovatana irege kuva mhaka.
Mukuwirirana nepepanhau The Courier-Mail, iri Joint Church Social Justice Group rakaumbwa nemitezo yechechi yeAnglican, Roma Katurike, Lutheran, Baptist, uye Uniting uye Quakers (Society of Friends). Richitaura kuti mitemo iripo inorwisana navane mitezo mimwe cheteyo yevatano vanovatana yakavakirwa pakusaziva nokufungira mano akaipa, boka racho rakati: “Kutsigira kwedu ichi chimiro kwakavakirwa pachitendero chokuti vanhu vose vakaenzana pamberi paMwari uye vanofanira kuva vakaenzana pamberi pomutemo. Tinodavira kuti munhu anovatana naane mitezo mimwe cheteyo yevatano akafanana nomunhu anovatana naane mitezo yakasiana yevatano.”
Nepo kuri kwechokwadi kuti vanhu vose vanoberekwa vakaenzana, chii chiri murangariro waMwari wevatano yavanhu vane mitezo mimwe cheteyo yevatano? MuBhaibheri, zviito zvose zvevatano yavanhu vane mitezo mimwe cheteyo yevatano zvinoshurikidzwa sezvisiri zvomuzvarirwo uye sezvinofanirwa nokusatendera kwaMwari, zvichitungamirira kurufu. Ikoku kwakanga kuri kwechokwadi kwete bedzi muna Israeri wekare asiwo munguva dzechiKristu. (Revhitiko 18:22; VaRoma 1:26, 27) Shurikidzo yacho yakajeka uye haidi kududzira: “Uyewo zvifeve, . . . kana varume vakachengeterwa madonzo asiri omuzvarirwo, kana varume vanovatana navarume . . . havasati vachizogara nhaka umambo hwaMwari.”—1 VaKorinte 6:9, 10, NW.
Panzvimbo pokuchemera kuita kuti vatano yavanhu vane mitezo mimwe cheteyo yevatano vanovatana irege kuva mhaka, maKristu echokwadi anokurudzira avo vakaiswa muuranda kuuyu muitiro unozvidza Mwari kubuda mauri kupfurikidza nokutendeukira kuShoko raMwari rezvokwadi.
Ngozi Dzeropa Dzinopfuurira
Nzvero yemisi ichangobva kupfuura iyi yakazivisa kuti mazana emhosho akaitwa neAmerican Red Cross mukutarisirwa kweropa rakashatiswa. Inodokusvika hafu yamayuniti ane mamirioni 12 kusvikira kumamirioni 15 eropa rakashandiswa muUnited States gore negore anogoverwa neAmerican Red Cross. Apo mayuniti api naapi eropa anobudiswa ayo anowanwa kuva ashatiswa, FDA (Food and Drug Administration), sangano rehurumende yomubatanidzwa, inofanira kuziviswa. Zvisinei, The New York Times inotaura kuti muongorori womubatanidzwa anotaura kuti Red Cross kazhinji kazhinji yakakundikana kuita ikoku. Iye anotaura kuti nzverwo yezvinyorwa zvavo yakazivisa zvinoitika 380 umo kutarisirwa kusina kufanira kweropa rakashandiswa kwakanga kusina kutongoshumwa kuhurumende. Muwedzero, kubva muzvinoitika 228 zveAIDS izvo zvingave zvakaparirwa nokuisirwa ropa, muongorori akawana kuti Red Cross yakashuma 4 bedzi kuFDA.
Nepo vazhinji vachiri kurirangarira serinoponesa upenyu, ropa rinoisirwa rine mutoro worufu rwezviuru gore rimwe nerimwe. Bva, vanamati vechokwadi vaMwari, mukuteerera mitemo yake pamusoro peropa, panguva imwe cheteyo vanodzivirirwa pangozi dzokuisira. Mwari akaraira, kuti: “Hausati uchifanira kudya ropa; ridururire pavhu kufanana nemvura . . . kuti zvigokunakira navana vako pashure pako, nemhaka yokuti uchave uchiita chiri chakarurama.”—Dheuteronomio 12:23-25, New International Version.
Papa Pabasa Rehondo
Gore rapera papa akasangana nepwere dzinodzidzira hondo dzinopfuura 7 000 panzvimbo yavarwi yeRoma yeCecchignola. Panguva iyoyo varwi vaduku vana vanomirira varwi vakabvunza papa kana basa rehondo richiwirirana nehana yechiKristu. Nenzira yakananga, mukuwirirana nepepanhau reVatican City L’Osservatore Romano, ivo vakabvunza, kuti: “Ko munhu anogona here kuva muKristu akatendeka uye, panguva imwe cheteyo, murwi akatendeka?” Mumhinduro papa akati: “Hapana chitambudzo chikuru kana kusabvira mukubatanidza basa rechiKristu neiro rebasa rehondo. Kana tikatarira rapashure zvakananga, rinogona kuonwa sechinhu chakanaka, chakafanira uye chakaisvonaka.”
Ko murangariro wakadaro, zvisinei, unowirirana nokusatora rutivi kwakachengetwa namaKristu apakuvamba here? Mubhuku rake An Historian’s Approach to Religion, Arnold Toynbee anodudza chinoitika chaMaximilianus, mufiri kutendeka womuzana ramakore rechitatu uyo, paakatyisidzirwa norufu nedare reRoma nokuda kwokuramba kupinzwa muhondo, akati: “Handisati ndichizobatira. Mungandigura musoro, asi handisati ndichizobatira masimba eNyika Ino; ndichabatira Mwari wangu.” Neiko, mukutarisana norufu rwechokwadi, iye akaramba kutora rutivi mubasa rehondo? Nemhaka yokuti akarangarira vabatiri vechokwadi vaJesu kuva “vasiri rutivi rwenyika” kungofanana naJesu akanga asiri rutivi rwenyika. Uyezve, iye akarangarira hondo yomuKristu kuva yomudzimu, mutsinhirano namashoko omuapostora Pauro, anoti: “Hatisati tichirwa hondo mukuwirirana nezvatiri munyama. Nokuti zvombo zvehondo yedu hazvisi zvenyama.”—Johane 17:16; 2 VaKorinte 10:3, 4, NW.