Chakavanzika Chinoyera Chinopetenuka
“Chakavanzika chinoyera chouku kuzvipira kwoumwari chinobvumwa kuva chikuru.”—1 TIMOTIO 3:16, “NW.”
1. Ndichakavanzikai chinorondedzerwa pana 1 Timotio 3:16?
ZVAKAVANZIKA zvinokufadza here? Unofarikanya kunzvera zvakavanzika here? Vazhinjisa vedu tinodaro! Tikumbanire, ipapoka, sezvatinoongorora chimwe chezvikurusa chezvakavanzika zvose—chakavanzika chakakiirwa muShoko raMwari kwezviuru zvamakore. Ichi chakavanzika chinoyera chinotapura zvinokosha zvikuru upenyu hwedu, hwose huri huviri hwazvino nohwomunguva yemberi. Icho ndi‘chakavanzika chinoyera chokuzvipira kwoumwari,’ chinotirondedzererwa pana 1 Timotio 3:16. Tinofanira kuva vanoonga sei kuna Jehovha, “Muzivisi wezvakavanzika,” nokuda kwokuzivisa nenzira yenyasha kwatiri ichi chakavanzika chikuru nokududzirwa kwacho!—Dhanieri 2:28, 29.
2. (a) Jehovha akatanga kutaura rini nezvechakavanzika chinoyera, uye chii icho iye panguva iyeyo akapikira? (b) Mibvunzoi inoda mhinduro?
2 Jehovha akatanga kutaura nezvechakavanzika chinoyera pashure pokunge Nyoka yanyengera Evha, uye Adhama amutevera mupandukiro. Mwari ipapo akapikira kuti “mbeu,” kana kuti mwana, yaizopwanya musoro weNyoka. (Genesi 3:15, NW) Iyi Mbeu ndiani? Aizokurira sei Nyoka? Iye aizoreverera uzvokwadi hwaMwari nedonzo Rake kupasi rino here?
3. Mauporofita oumwari akagovera zviratidzoi pamusoro pezivikanwo nomubato zveMbeu?
3 Pashure penguva yakati, mauporofita oumwari akazivisa zviratidzo pamusoro pezivikanwo nomubato wenguva yemberi zveMbeu. Iye aizova muzukuru waAbrahama, aizogara nhaka umambo hwaDhavhidhi, uye aizonzi Muchinda woRugare. ‘Hakusati kwaizova nomugumo woukuru hwokutonga kwake kwomuchinda nokworugare.’ (Isaya 9:6, 7; Genesi 22:15-18; Pisarema 89:35-37) Asi sezvinotaura VaRoma 16:25 (NW), chakavanzika chinoyera ichocho chaka“chengetwa chakanyarara kwenguva dzisingaperi.”
Kupedza Chakavanzika
4. Chakavanzika chinoyera chakavamba kupetenuka sei muna 29 N.V.?
4 Pakupedzisira, pashure pamamireniyumu mana, vhenekero yakaoneka! Munziraiko? Muna 29 N.V., Johane akabhapatidza Jesu weNazareta muRwizi rwaJoridhani, uye inzwi raMwari rakazivisa kudenga, kuti: “Uyu ndiye Mwanakomana wangu, anodiwa, wandatendera.” (Mateo 3:17, NW) A, pano pakupedzisira pakanga pane Mbeu yechipikirwa! Chakavanzika chinoyera chakanga chatanga kupetenuka mumativi acho ose ane mbiri, kubatanidza nhau yokuzvipira kwoumwari.
5. Chii chiri “kuzvipira kwoumwari,” uye iko kunotapura sei avo vanokushandisa?
5 Chiiko chatinonzwisisa no“kuzvipira kwoumwari”? MuMagwaro echiGiriki echiKristu, kutaura kwacho kunooneka ka 20 chete, inopfuura hafu yaikoku mutsamba mbiri dzaPauro kuna Timotio. Chinyorwa chaInsight on the Scriptures chinorondedzera “kuzvipira kwoumwari” so“ruremekedzo, kunamata, uye basa kuna Mwari, noruvimbiko kuuchangamire hwake hwapose pose.” Ruremekedzo runobva mumwoyo uyo unoswededza pedyo naMwari, murutyo rwoukuru hwake, kusaguma kwake, uye mhatsa yezvisiko zvake zvikuru, nokuonga nokuda kwezvipo zvomudzimu nezvokunyama izvo anoisa pazvisikwa zvinoonga. Zvirokwazvo, mumwe nomumwe wedu uyo anoshandisa kuzvipira kwoumwari anogona kuti, sezvakaita wezvamapisarema paPisarema 104:1: “Rumbidza Jehovha, mweya wangu! Jehovha Mwari wangu, muri mukuru kwazvo; makafukidzwa nokukudzwa noumambo.”
6. (a) Vanamati vaJehovha vakasiana sei navagari vomuzvigaro vechiKristudhomu? (b) Chii chakataura Pauro pana VaRoma 11:33, 34, uye mibvunzoi inonzarwozvo kumutswa?
6 Kuzvipira kwedu kuna Mwari kunofanira kuwana ratidzirwo, uye kunoita ikoku kupfurikidza namabasa. Muna ikoku, vanamati vaMwari wechokwadi, Jehovha, vakasiana zvikuru navagari vomuzvigaro zvamachechi zvopera basa zvechiKristudhomu. Kuvanhu vazhinji vari pasi pano, rudzidziso—kana ivo vachine rudzidziso—muitiro, nguvo inopfekwa kuvaita kuti varatidzike vari vatsvene apo vanorarama upenyu hunowirirana nenyika yakaipa yakavapoteredza. Ivo havasati vachimboziva ari Mwari. Zvirokwazvo, vanhu vakadaro vanofanira kuteerera mashoko aPauro ari pana Mabasa 17:23 (NW), apo iye akati kuvaAtene vainamata “Mwari Usingazivikanwi”: “Chamunopa kuzvipira kwoumwari musingazivi, ndinozivisa kwamuri ichochi.” Pamusoro paMwari iyeyo akaisvonaka, Pauro anoti pana VaRoma 11:33, 34 (NW): “Haiwa udzame hwakadini hwepfuma nouchenjeri nezivo zvaMwari! Haanzvereki sei marutongeso ake uye nzira dzake hadzingatongorondwi! Nokuti ‘ndiani akaziva ndangariro yaJehovha, kana kuti ndiani akava mupi wezano wake?’” Ipapoka, tinosvika sei pakuziva nzira dzaMwari? Kuri kupfurikidza nokudzidza ‘chakavanzika chinoyera chokuzvipira kwoumwari.’ Asi tinoita sei ikoko?
7. Neiko kuchigona kutaurwa kuti “chakavanzika chinoyera chokuzvipira kwoumwari chinobvumwa kuva chikuru”?
7 Muna 1 Timotio ganhuro 3, muapostora Pauro anotanga kuratidzira chinodikanwa kuvabatiri vane mutoro muimba yaMwari, vanorondedzerwa 1Ti 3 mundima 15 se“ungano yaMwari mupenyu, mbiru nechitsigiro chezvokwadi.” Ipapo Pauro anowedzera, 1Ti 3mundima 16 (NW), kuti: “Chakavanzika chinoyera chouku kuzvipira kwoumwari chinobvumwa kuva chikuru.” Chikuru zvamazvirokwazvo nemhaka yokuti Jehovha akatumira Mwanakomana wake akaberekwa ari mumwe bedzi kupasi kuzokiinura ichi chakavanzika, kuzoratidzira icho kuzvipira kwoumwari kuri chaizvoizvo uye kuti kunokosha, kunokosha zvikuru sei, mukunamata kwechokwadi. Chakavanzika chinoyera chouku kuzvipira kwoumwari chinoratidzirwa muupenyu hwaJesu pano pasi pano. Vadi vose vaJehovha vanofanira kuvakira kutenda kwavo noupenyu hwavo pana Kristu, uyo akaratidzira kuzvipira kwoumwari. Ipapoka, Jesu akajekesa sei chakavanzika chinoyera chokuzvipira kwoumwari?
Mativi Matanhatu
8. (a) Ndaapi ari mativi matanhatu echakavanzika chinoyera chinorondedzera Pauro pana 1 Timotio 3:16? (b) Ndiani ari “Iye” anoratidzirwa?
8 Kupfurikidza nefuridziro youmwari, Pauro anopindura mubvunzo iwoyo. Pano pana 1 Timotio 3:16 (NW), iye anorondedzera mativi matanhatu eichi chakavanzika chinoyera, achiti: “Iye [1] akaratidzirwa munyama, [2] akaruramiswa mumudzimu, [3] akaoneka kungirozi, [4] akaparidzwa pakati pamarudzi, [5] akadavirwa munyika, [6] akagamuchirwa kumusoro mumbiri.” Ndiani ari “Iye” anoratidzirwa? Sezvinooneka, “Iye” iMbeu yakapikirwa, Jesu, uyo akauya kuzoita kuda kwaMwari. Iye chinhu chikuru kuchakavanzika chinoyera, kuchichiita chikuru zvirokwazvo.
9. Chitendisoi chiripo chokuti 1 Timotio 3:16 haifaniri kurava, kuti: “Mwari akaratidzirwa munyama”?
9 VezvoUtatu vanoedza kusajekesa kunzwisiswa kwechakavanzika chinoyera nokutaura kuti “Iye” ari pana 1 Timotio 3:16 ndiMwari amene. Ivo vanotsamidza ikoku paBhaibheri reKing James iro rinorava kuti “Mwari akaratidzirwa munyama.” Zvisinei, chii chinotaura manyoro echiGiriki akavimbika zvikurusa? Nenzira inowirirana, iwo anoshandisa shoko rinotsiva zita “Iye” panzvimbo pa“Mwari.” Vatsoropodzi vamagwaro zvino vanobvuma kuti kuiswa kwa“Mwari” murugwaro urwu imhosho yavanyori. Nokudaro, shanduro dzemisi ichangobva kupfuura iyi zvikuru, zvakadai seAmerican Standard Version, The New English Bible, uye New World Translation, dzinorava nomazvo, kuti: ‘Iye [kana kuti, Iye uyo] akaratidzirwa munyama.’ Aiwa, akanga asiri Mwari amene uyo akaoneka “munyama.” Panzvimbo pezvo, akanga ari Mwanakomana wake anodiwa nechisiko chokutanga, nezvake muapostora Johane akanyora, kuti: “Naizvozvo Shoko rakava nyama ndokugara pakati pedu, uye takaona mbiri yake, mbiri yakadai seyomwanakomana akaberekwa ari mumwe bedzi akabva kuna baba; uye iye akanga akazara nomutsa usakafanirwa nezvokwadi.”—Johane 1:14, NW.
“Akaratidzirwa Munyama”
10. (a) Rutivi rwokutanga rwechakavanzika chinoyera rwakava pachena sei norubhapatidzo rwaJesu? (b) Neiko Jesu akava “Adhama wokupedzisira”?
10 Parubhapatidzo rwaJesu rutivi rwokutanga rwechakavanzika chinoyera rwakava pachena: Jesu “akaratidzirwa munyama” soMwanakomana akazodzwa waMwari. Jehovha Mwari akanga atamisa upenyu hwoMwanakomana wake huchibva kudenga huchienda kudumbu raMaria kuitira kuti Jesu agogona kuberekwa munyama somunhu akakwana. Nokudaro, sezvinoratidza 1 VaKorinte 15:45-47, Jesu akava Adhama wechipiri, kana kuti “wokupedzisira,” mweya wohunhu wakakwana unowirirana chaizvoizvo naAdhama wokutanga. Nokuda kwedonzoiko? Timotio Wokutanga 2:5, 6 (NW), inonongedzera kuna “Adhama wokupedzisira” so“munhu, Kristu Jesu, uyo akazvipa amene rudzikinuro runowirirana nokuda kwavose.” Pahwaro uhwu hwapamutemo hwechibairo chohunhu chakakwana, Jesu anoreverera sungano itsva kuvanhu vane 144 000 avo vanova vadyi venhaka pamwe chete naye muUmambo hwake.—Zvakazarurwa 14:1-3.
11. Betsero dzechibairo chorudzikinuro chaJesu dzinoenda kuna vanaani?
11 Vamwewo vaizobetserwa norufu rwechibairo rwaJesu here? Hungu zvamazvirokwazvo! Johane Wokutanga 2:2 (NW) inotaura kuti Jesu Kristu “ndiye chibairo chinoyananisira zvivi zvedu [ndiko kuti, zvivi zvamaKristu akazodzwa akafanana naJohane], bva kwete zvedu bedzi asiwo zvenyika yose.” Betsero dzechibairo chorudzikinuro chaJesu nokudaro dzinopfuura zvikuru maKristu akazodzwa ane 144 000 kusvikira kunyika yose yorudzi rwomunhu. “Boka guru” avo zvino vanorarama nezviuru zvamamirioni zvichamutswa muParadhiso yapasi zvinofanira kugamuchira upenyu husingaperi pahwaro hwokutenda kwavo muchibairo chorudzikinuro chaJesu. Nechekare, sezvakaporofitwa pana Zvakazarurwa 7:9, 10, boka guru rakasuka nguvo dzavo ndokudzichenesa kupfurikidza nokushandisa kutenda muropa rakadeurwa reGwaiana, Jesu Kristu. Ivo vanonzi vakarurama pamusoro poushamwari naMwari. Nomufaro, ivo vanodzidza mativi akasiana-siana echakavanzika chinoyera ndokuratidzira kuzvipira kwoumwari mutsinhirano nomuenzaniso waJesu!
Mamwe Mativi
12. Jesu “akaruramiswa mumudzimu” sei?
12 Zvakadiniko, zvino, nezvorutivi rwechipiri rwa 1 Timotio 3:16? Jesu “akaruramiswa mumudzimu.” Asika sei? Kupfurikidza nokumutsa kwaJehovha Mwanakomana wake anochengeta perero achibva muna vakafa achienda kuupenyu hwomudzimu. Ikoku kwakaguma neziviso yaMwari yokuti Jesu akanga akarurama chose chose uye akanga akafanirwa nemimwe migove mikuru. VaRoma 1:4 (NW) inoti, Jesu “akanzi Mwanakomana waMwari mukuwirirana nomudzimu woutsvene kupfurikidza norumuko muna vakafa.” Achisimbisa ikoku, Petro anotiudza mutsamba yake yokutanga, 1Pe ganhuro 3, ndima 18 (NW), kuti: “Kristu akafa kamwe kwenguva yose pamusoro pezvivi, munhu akarurama nokuda kwavasakarurama, kuti agokutungamirirai kuna Mwari, iye achiva akaurawa munyama, asi achiitwa mupenyu mumudzimu.” Ko muenzaniso waJesu wokuzvipira kwoumwari uri kukutungamirira kuna Mwari here?
13. Jesu akamutswa akaoneka kungirozii, uye rudzii rweshoko rwaakaparidzira kwadziri?
13 Achipfuurira na 1 Timotio 3:16 (NW), Pauro anotevera kunongedzera kurutivi rwechitatu rwechakavanzika chinoyera, achitaura kuti Jesu “akaoneka kungirozi.” Idzi ngirozi dzingava vanaani? Pamusoro paJesu, zvino “akaitwa mupenyu mumudzimu,” Petro anonyora pana 1 Petro 3:19, 20 (NW), kuti: “Ari muuyu mugarirowo akaenda ndokuparidzira kumidzimu iri mutorongo, yakanga yambova isingateereri apo shiviriro yaMwari yakanga ichimirira mumazuva aNoa.” Mukuwirirana naJudhasi 6 (NW), midzimu iyoyo dzakanga dziri “ngirozi dzisina kuchengeta nzvimbo yadzo yapakuvamba asi dzakasia nzvimbo yadzo dzimene yakafanira yokugara” mumatenga. Idzo dzakapfeka muviri yenyama kuti dzifarikanye vatano isakafanira navakadzi. Apo Boporodzi rakamanikidzira ngirozi idzodzo kudzokera kunzvimbo yemidzimu, dzakakandirwa muTartaro, mugariro wederedzwo yachose chose. (2 Petro 2:4, NW) Jesu akamutswa akaparidzira kwadziri. Asi iroro rakanga riri shoko roruponeso here? Nyangwe! Panzvimbo pezvo, Jesu akashurikidza uipi hwadzo semhesano imene yokuzvipira kwoumwari. Vapi navapi vavanhu vaMwari vanotamba zvavo noutere hwevatano nhasi vanofanira kunyeverwa norutongeso rwakaziviswa pangirozi idzodzi!
14. Kwakadaro sei kuti Jesu akavamba ku“paridzirwa pakati pamarudzi”?
14 Rutivi rwechina rwa 1 Timotio 3:16 (NW) ndorwokuti Jesu “akaparidzwa pakati pamarudzi.” Ikoku kwakazadzikwa sei? Pamberi chaipo pokusungwa kwake, Jesu akaudza vaapostora, kuti: “Zvirokwazvo, zvirokwazvo, ndinoti kwamuri: Unotenda kwandiri, mabasa andinoita, iye uchaaitawo, uchaita makuru kuna wawa; nokuti ndinoenda kuna Baba.” (Johane 14:12) Nokukurumidza pashure paikoko, paPentekosta 33 N.V., Jesu akadururira mudzimu mutsvene pavadzidzi vake, uye mashoko anokatyamadza okuti “Mwari akamutsa uyu Jesu” akavamba kuparidzirwa kuvaJudha. Gare gare, vaSamaria vakagamuchirawo shoko raMwari ndokuvamba kugamuchira mudzimu mutsvene. (Mabasa 2:32; 8:14-17) Ipapo, muna 36 N.V., Petro akaparidzira kuna Kornerio navamwe Vamarudzi vakanga vakaungana muimba yake. Nokudaro, mashoko akanaka pamusoro paJesu akavamba ku“paridzirwa pakati pamarudzi,” ndiko kuti, pakati pavasiri vaJudha, avo vakazodzwawo nomudzimu mutsvene.
15. Chii chinobvumikisa kuti maKristu omuzana rokutanga ramakore akanga adzidza zvakanaka chakavanzika chinoyera chokuzvipira kwoumwari?
15 Sezvinoshumwa pana Mabasa 12:24 (NW), “shoko raJehovha rakaramba richikura nokupararira.” Mabasa 17:6 inorondedzera kuti kuchamhembe kweGirisi vashori vakadanidzira, sezvavanoita ikoko kusvikira kuzuva rino, kuti: “Ava vakakanganisa nyika yose, vakasvika napanowo.” Mukati mamakore 30, Pauro aigona kunyora ari muRoma kuti mashoko akanaka akanga “aparidzirwa muchisiko chose chiri pasi pedenga.” (VaKorose 1:23, NW) MaKristu enguva iyoyo akanga adzidza zvakanaka chakavanzika chinoyera chokuzvipira kwoumwari. Akanga achichishandisa nokushingaira sei! Uye isuwo ngatichidzidze ndokuchishandisa muzuva rino rokupedzisira rokuparidzira Umambo!
16. Ndorwupi rwakanga rwuri rutivi rwechishanu rwechakavanzika chinoyera, uye mubatoi wakachiratidzirwa?
16 Mukugamuchira kuparidzira ikoko kwomuzana rokutanga ramakore, rutivi rwechishanu rwechakavanzika chinoyera cha 1 Timotio 3:16 rwakava pachena zvikuru. Jesu zvino “akadavirwa munyika.” Ikoku kwakanga kuri muuyo wokuzvipira kwoumwari kwakafanana nokwaKristu kwavafundisi vanoshingaira, kubatanidza Pauro naTimotio. Ivo vakapinza mashoko akanaka muAsia Minor neEurope, zvichida kure seSpain, uye kupinda muEast Africa nomuromo womuEtiopia akabhapatidzwa, apo Petro akabatira muBhabhironi.
17. Nei Jesu achidavirwa munyika yose yazvino uno?
17 Zvakadiniko nezvezuva redu? Chibviro cha 1919 vakasarira vakazodzwa vave vachiratidzira kuzvipira kwoumwari kwomuenzaniso. Ava vakazodzwa vakavakira zvakasimba pahwaro hwokutenda hwakavanzarikwa naJesu. Zvikurukuru chibviro cha 1935, ivo vakapfuurira kuunganidza boka guru, avo vanofarira kariro yokupfuura mu“dambudziko guru” nokufarikanya upenyu husingaperi muparadhiso yapasi. (Zvakazarurwa 7:9, 14, NW) Nokudaro, mashoko akanaka anonangidzira ngwariro pana Jesu ari kudavirwa munyika yose yazvino uno. Mukuzvipira kwoumwari, Zvapupu zvaJehovha zvinopfuura 3 700 000 zvino zviri kuparidzira nokubudirira kupote nyika!
18. Jesu “akagamuchirwa kumusoro mumbiri” sei?
18 Rumwezve rutivi rwechakavanzika ichocho chinoyera rwasara, rwechitanhatu: Jesu “akagamuchirwa kumusoro mumbiri.” Mukati mamazuva 40 pashure pokuitwa mupenyu mumudzimu, Jesu akapfeka miviri yenyama, achioneka kuvadzidzi vake nokuvaudza “zvinhu pamusoro poumambo hwaMwari.” Ipapo iye akakwira kudenga. (Mabasa 1:3, 6-9, NW) Munyengetero wake, wakanyorwa pana Johane 17:1-5, nokudaro wakapindurwa: “Baba, . . . kudzai mwanakomana wenyu, kuti mwanakomana akukudzei imi . . . Ndinokukudzai panyika . . . Zvino imi Baba, mundikudzei pamberi penyu nokukudzwa kwandaiva nako kwamuri, nyika isati yavapo.”
19. Chii chinofanira kuva chakaperekedza kudzokera kwaJesu kudenga?
19 Kufara kukuru kwakadini kunofanira kuva kwakaperekedza kudzoka kwaJesu kudenga! Pamberi zvikuru, apo Jehovha akavamba pasi, “vanakomana vose vaMwari vakapururudza nomufaro.” (Jobho 38:7) Mapoka iwayo engirozi anofanira kuva akafadzwa zvikuru nokugamuchira zvakare pakati pawo Mutsigiri akavimbika wouchangamire hwaJehovha!
20. Neiko Jesu akagara nhaka zita rakaisvonaka rakadaro, uye chii chaakaita ari pasi pano?
20 Pana VaHebheru 1:3, 4, Pauro anotaura nezvaJesu anokurira, kuti: “Wakati apedzisa kunatswa kwezvivi, akagara kurudyi rwoumambo kudenga, akapfuura vatumwa nokunaka saizvozvo, sezita raakagara nhaka yaro, rakanyanya kunaka kupfuura ravo.” Kristu akagamuchira zita iroro nemhaka yorukundo rwake pakusarurama. Uyu Mwanakomana waMwari zvamazvirokwazvo akanga aratidzira nzira yokuzvipira kwoumwari pano pasi pano. Iye akanga agadzawo muenzaniso wavamwe vose vachasvika paupenyu husingaperi. Nokukwidzwa kwaJesu kurudyi rwaMwari mudenga, chakavanzika chinoyera chouku kuzvipira kwoumwari chakaziviswa mumativi acho ose.
Ungapindura Sei?
◻ Chii chiri “kuzvipira kwoumwari”?
◻ Jesu “akaratidzirwa munyama” sei uye pashure paikoko “akaruramiswa mumudzimu”?
◻ Jesu akaoneka kungirozii, uye neshokoi?
◻ Kristu “akaparidzwa pakati pamarudzi” uye “akadavirwa munyika” sei?
◻ Jesu “akagamuchirwa kumusoro mumbiri” rini, uye pashure pokuitei pamusoro pokuzvipira kwoumwari?