Mira Wakatsiga Mukurwisana Namano aSatani

“Pfekai chipfeko chakakwana chechifukidziro chesimbi chinobva kuna Mwari kuti mugokwanisa kumira makatsiga mukurwisana namano [chiGiriki, “mabasa amanomano”] aDhiabhorosi.”—VAEFESO 6:11, NW.

1. Hufakazii hwokuti Satani aripo hunogoverwa nemiedzo yaJesu?

SATANI aripo chaizvoizvo here? Vamwe vanhu vanoita nharo kuti muBhaibheri, “Satani” rinongonongedzera bedzi kuzvakaipa zviri mukati momunhu. Ivo vanoramba kuvapo kwake sechisikwa. Asi chii icho Magwaro anotiudza? Nhauro dzeEvhangeri dzaMateo naRuka dzinoratidza kuti Kristu Jesu akaedzwa zvakananga katatu naSatani, uye nguva imwe neimwe Jesu akamuramba, achishandisa Rugwaro. Neiko Jesu akamupindura kubva muMagwaro echiHebheru? Nemhaka yokuti Satani akauya kwaari achishandisa zvisakafanira Magwaro iwayo amene kuti amutadzise ndokukundikana soMwanakomana waMwari, Mbeu yakapikirwa.—Mateo 4:1-11; Ruka 4:1-13.

2. Tinoziva sei kuti Jesu haana kufungidzira kusangana kwake naSatani?

² Sezvinooneka, Jesu, munhu akakwana, haana kufungidzira uku kusangana. (VaHebheru 4:15; 7:26) Iye akasanganwa naye nomunhu mumwe cheteyo uyo akanga ari simba rakanga riri seri kwenyoka muEdheni, yaichimbova hama yake amene yengirozi iyo kare kare yakanga yapanduka uye zvino akanga akatsunga kudzivisa zadziko yaGenesi 3:15. Satani aida kupunza perero yeMbeu yakapikirwa. Akachenjera kumabasa ake amanomano, Jesu akaramba Muedzi zvakasimba. Chii chaiva kuita kwaSatani? “Dhiabhorosi akati apedza kuidza kwose, akamusiya kusvikira imwe nguva.” Nenzira yakajeka, Jesu haana kubva maari amene! Satani, akaidzwa, akamusiya, “vatumwa vakauya vakashumira [Jesu].”—Ruka 4:13; Mateo 4:11.

3. Chii chinotaura mumwe wezvenhau pamusoro poukoshi hwokuvapo kwaDhiabhorosi kuchiKristu?

³ Nenzira ine mufungo, mumwe wezvenhau anotsinhira, achiti: “Kuramba kuvapo noukoshi hukuru hwaDhiabhorosi muchiKristu kupesana nedzidziso yavaapostora nokukura chaikoiko kwedzidziso yechiKristu. Sezvo kurondedzera chiKristu mumashoko asiri iwaya kusina revo chaizvoizvo, hakuna mufungo muungwaru kutsigira chiKristu chinobvisa Dhiabhorosi. Kana Dhiabhorosi asiripo, ipapo chiKristu chave chisina kururama zvikuru papfundo guru kuvambira pamavambo chaipo.”a Mhedziso iyoyo inopa kokero nokuda kwomunhu ari wose ari pasi pano nhasi. Ko iwe unoziva kuvapo kwomuvengi asingaoneki uyo akatsunga kushatisa uchangamire hwaMwari noruvimbiko rwomunhu here?

Kuzivikanwa Kwechokwadi kwaSatani

4. Chisikwa chakakwana chomudzimu chakava sei Satani?

⁴ Satani chisikwa chomudzimu chine simba, chakasikwa pakuvamba naMwari sengirozi, mwanakomana womudzimu aigona kusvika kudare raJehovha rokudenga. (Jobho 1:6) Zvisinei, Satani akashandisa chido chake mukushora Mwari; namanomano iye akatungamirira Evha uye, kupfurikidza naye, Adhama kupinda mukusateerera norufu. (2 VaKorinte 11:3) Nokudaro, iye akava Satani, kureva kuti “Muvengi”—mupanduki, dhemoni, muurayi, uye murevi wenhema. (Johane 8:44) Kwakakodzera sei kutaura kwaPauro kwokuti “Satani amene anoramba achizvishandura amene kuva ngirozi yechiedza,” apo zvomenemene iye anenge ari ‘mubati ushe wenyika wezarima rino’! (2 VaKorinte 6:14; 11:14; VaEfeso 6:12) Kupfurikidza nokunyengera dzimwe ngirozi kuti dzipandukire, iye akadzitungamirira kubuda muchiedza chaMwari ndokupinda murima rake amene. Iye akava “mubati ushe wamadhemoni.” Jesu akamuzivisawo so“mutongi wenyika ino.” Sezvinooneka, kuti agova mubati ushe, iye anofanira kuvapo somunhu womudzimu akasikwa.—Mateo 9:34; 12:24-28; Johane 16:11.

5. Satani anoziviswa zvakajeka sei muMagwaro echiKristu echiGiriki?

⁵ Nepo Satani asingawanzodudzwi muMagwaro echiHebheru, iye anoratidzirwa zvizere muMagwaro echiKristu echiGiriki—zvikuru kwazvo zvokuti tinosangana nezita rokuti Satani imomo ka 36 uye shoko rokuti Dhiabhorosi, ka 33. (Ona Comprehensive Concordance of the New World Translation of the Holy Scriptures.) Iye anoziviswawo pasi pamamwe mazita namazita okuremekedza. Maviri aiwaya akashandiswa naJohane pana Zvakazarurwa 12:9: “Zvino shato huru yakakandirwa pasi, iyo nyoka yakare, inonzi Dhiabhorosi, naSatani, munyengeri wenyika yose.”—Onawo Mateo 12:24-27; 2 VaKorinte 6:14, 15.

6. Ndeipi iri revo yeshoko rokuti “Dhiabhorosi”?

⁶ Pano muna Zvakazarurwa munooneka shoko rechiGiriki rokuti di·aʹbo·los, rakashandurwa kuti “Dhiabhorosi.” Mukuwirirana nenyanzvi yechiGiriki J. H. Thayer, iro chaizvoizvo rinoreva “mupomeri, mupomeri wenhema, mucheri.” (Enzanisa na 1 Timotio 3:11; 2 Timotio 3:3, Kingdom Interlinear.) W. E. Vine anorondedzera Dhiabhorosi sa“ari muvengi akaipa waMwari nomunhu.”b

7. Neiko Satani achigona kunangidzira nhamburiko dzake pavanhu vaJehovha?

⁷ Muvengi mukuru haasi kurovha. (1 Petro 5:8) Zvichida ndokusaka chirevo chichiti, “Dhiabhorosi anowana basa rokuti maoko ari kurovha aite.” Iye akatsunga kushatisa maKristu ose echokwadi. (2 Timotio 3:12) Uye iye anogona kunangidzira ngwariro pavanhu vaJehovha nokuda kwechikonzero chimwe chakapfava—iye anotova norutivi rwose rwasara rwenyika musimba rake! (1 Johane 5:19) Nyika yanhasi inyika yaSatani. Iye ndiye mubati ushe wayo namwari, vanhu vangave vachikuziva kana kuti kwete. (Johane 12:31; 2 VaKorinte 4:4) Somuuyo, iye achatendeukira kuchiito chipi nechipi chamanomano kana kuti chokunyengera kana kuti chikarakadzo kuti ashatise vanhu vaJehovha, somunhu mumwe nomumwe kana kuti zvimwe pamwe chete. Ngationgororei dzakati dzenzira dzaanoshandisa.—Marko 4:14, 15; Ruka 8:12.

Zviito Zvamanomano Nezvokuchenjera zvaSatani

8. Satani angave achishanda mukurwisana nesu nebetseroi?

⁸ Satani ava nenguva refu yokufunda kushanda kwendangariro yavanhu, kuongorora musikirwo wavanhu nezvikanganiso zvavo zvose zvokuberekwa nazvo nezvinowanwa. Iye anoziva nzira yokushandisa nayo utera hwedu nokusava namaturo kwedu. Zvino, chii chiri mugariro kana muvengi wako achiziva utera hwako uye iwe umene uchikundikana kuhuziva? Ipapoka hauna kushongedzerwa zvakanaka kuzvidzivirira umene, sezvo usingazivi nezvemwena iri muchifukidziro chako chesimbi chomudzimu. (1 VaKorinte 10:12; VaHebheru 12:12, 13) Akakodzera sei mashoko omudetembedzi weScotland, anoti: ‘Haiwa simba ngaritipe chipo chokuzviona timene seizvo vamwe vanotiona! Kungatisunungura pazvikanganiso zvakawanda zvoupenzi.’

9. Ndoupi ungava muuyo usingafadzi kana tikakundikana kuzviongorora timene ndokuchinja?

⁹ Ko tinodisa here kuzviona timene seizvo vamwe vanotiona—zvikurukuru seizvo Mwari kana kuti Satani vangationa? Ikoko kunoda kuzviongorora kwokutendeseka nokuzviyera nechido chokuita chinjo. Kuzvinyengedza kuri nyore kwazvo. (Jakobho 1:23, 24) Pane dzimwe nguva tinorangarira sei nokururamisa nzira yedu yechiito! (Enzanisa na 1 Samueri 15:13-15, 20, 21, 24.) Uye kuri nyore sei kuti, “Eya, hakuna munhu akakwana, unoziva!” Izvozvo ndizvo chaizvo izvo Satani anoziva, uye anoshandisa kusakwana kwedu. (2 Samueri 11:2-27) Kunosuruvarisa sei kusvika pazera rapakati ndokusvika pakuziva kuti nemhaka yenzira yokudzvinyirira, yokusakendenga, kana kuti isiri yomutsa iyo mumwe munhu akabata nayo navamwe mumakore apfuura, iye akava asina ushamwari; kana kuti kuziva kuti iye akaita zvishomanene kana kuti kusaita chinhu kuita kuti vamwe vanhu vafare. Namanomano Satani zvichida akatitungamirira muupenyu achishandisa udyire hwedu hwokuberekwa nahwo kutipofumadza. Takakundikana kubata ukoshi hwepfungwa yechokwadi yaKristu—rudo, tsitsi, uye mutsa.—1 Johane 4:8, 11, 20.

10. Mibvunzoi yatingazvibvunza timene, uye nei?

¹⁰ Naizvozvo, kuti tidzivise Satani, tinofanira kuzvinzvera timene. Ko iwe une here utera uhwo Satani angagona kushandisa kana kuti ari kushandisa iko zvino? Ko iwe une here chinetso chako umene? Ko iwe nguva dzose unofanira kuva wokutanga here? Ko rudado isimba rako rakavandika rinosunda here? Ko godo, ruchochoro, kana kuti rudo rwemari zvinoshatisa hunhu hwako here? Ko iwe hautani kutsamwa here? Ko iwe haukendengi uye unowanira mhaka here? Kana kuti iwe unonyanyotapurika here apo unopiwa zvikarakadzo kana kuti tsoropodzo? Ko iwe unoshatirirwa kana kuti kunyange kuramba zano here? Kana tichizviziva timene, tinogona kururamisa zvinetso zvakadaro, chero tichizvininipisa. Kukasadaro, tiri kuzvirega timene takazaruka kuna Satani.—1 Timotio 3:6, 7; VaHebheru 12:7, 11; 1 Petro 5:6-8.

11. Satani angaedza kusekesa umudzimu hwedu nomutooi wokuchenjera?

¹¹ Satani anogonawo kusekesa umudzimu hwedu nenzira yamanomano, yokunyengera. Zvichida tinoshatirwa pamusoro penzira zvinhu zviri kuitwa nayo muungano kana kuti sangano. Kazhinji kazhinji hatina maidi ose, asi hatitani kusvetukira kumhedziso. Kana ukama hwedu naJehovha hwakaneta, ipapo inhanho pfupi inotungamirira kukufunga kwakashata nepanikiro pamusoro pezvokwadi. Vamwe vangatsvaka nzira yokuzviruramisa vamene nayo vachibuda mumitoro iyo zvokwadi inobatanidza. Satani ipapo anopinza kusavimbika nokupandukira mumwoyo yavo. Nokukurumidza ivo vanova vanyajambwa vokuwa pakutenda, uye Satani anofara.—Ruka 22:3-6; Johane 13:2, 27; 2 Johane 9-11.

12. (a) Vamwe vakashingiswa sei naSatani? (b) Satani anopinza sei vazhinji muutere?

¹² Vamwe vanoshingiswa naSatani kwete bedzi kuti vaite zvivi zvakakomba zvakafanirwa nokudzinga asi kunyange kutendeukira kunhema nenyengedzo kuti vaedze kunyengedza vakuru veungano. Kufanana naAnaniasi naSafira, ivo vanofunga kuti vanogona kunyengedza ngirozi nomudzimu mutsvene waMwari. (Mabasa 5:1-10) Zviuru zvakawanda makore achangobva kupfuura aya zvakawira mumusungo waSatani woutere. Dhiabhorosi anoziva kuti sundo dzevatano dzorudzi rwomunhu dzine simba, uye kupfurikidza netsika yake yenyika, anosimbisa, anoshatisa, uye anoipisa basa revatano. (Numeri 25:1-3) MaKristu asina kuroora angaedzwa kupinda muufeve kana kuti mukumwe kushatiswa kwevatano. (Zvirevo 7:6-23) Kana maKristu akaroora akabvumira ndangariro dzawo nomwoyo kudzungaira, anogona kusatana kuwira mumufambiro wokusavimbika, achiva asina kuvimbika kumukwanyina kwaakapika ruvimbiko.—1 VaKorinte 6:18; 7:1-5; VaHebheru 13:4.

13. (a) Terevhizheni ingagona sei kuumba kufunga kwedu? (b) Tinogona sei kudzivisa pesvedzero yakadaro?

¹³ Tinogara munyika umo nhema, kunyengedza, uye kutsamwa kwamasimba masimba zviri zvavose. Satani anoshandisa zvakazara zvinobudisa nhau kupa iyi pfungwa yakashata. Nhau dzomuterevhizheni kana kuti nhevedzano yenyaya dzinobuda muterevhizheni dzinoratidzira vanhu vanoratidzika kuva vanokwezva vanogara mumugariro wokunyengedzana. Kana tikabvumira kufunga ikoko kutitapura, tinogona kukurumidza kutera kuzvivi “zviduku,” izvo zvinozarurira nzira “zvikuru.” Zvikarakadzo zvokuchenjera zvaSatani zvinozvipinza zvimene nenyore mukufunga kwedu. Tinogona sei kudzivisa pesvedzero dzakadaro? Usatongo“bvumire Dhiabhorosi nzvimbo,” sezvakapa Pauro zano. Ikoko kunorevawo kudzora waunobvumira kupinda mumusha mako kupfurikidza neterevhizheni. Hatifaniri kuvenga here kupinda kwavanhu vane masimba masimba, vane utere, vanotaura zvakashata avo vanopinza zvakashata mukamuri redu rokutandarira?—VaEfeso 4:23-32.

Tinogona Sei Kudzivisa Satani Ndokuramba Takatendeka Kuna Mwari?

14. Chisarudzoi chakapetwa ruviri chinodikanwa kuti tidzivise Satani, uye ikoku kunodei?

¹⁴ Nomuvengi ane simba, anopfuura wohunhu akadaro anorwisana nesu zvisikwa zvohunhu zvisina kukwana, tinogona sei kuchengeta perero yedu? Mhinduro inowanwa mumashoko aJakobho, anoti: “Naizvozvo muzviise pasi paMwari; dzivisai Dhiabhorosi, agokutizai.” (Jakobho 4:7) Cherechedzai kuti zano raJakobho rakapetwa ruviri. Apo tinoshora Dhiabhorosi nokuda kwake, tinofanira kuzviisa timene pasi pokuda kwaMwari. Ikoko kunobatanidza kuda kuda kwaMwari nokuvenga kwaSatani. (VaRoma 12:9) Nokudaro, Jakobho anoti: “Swederai kuna Mwari, iye agoswedera kwamuri. Shambai maoko enyu, imi vatadzi; natsai mwoyo yenyu, imi mune mwoyo miviri.” (Jakobho 4:8) Hungu, mukudzivisa kwedu Satani, hapana nzvimbo yemwoyo miviri nokusasarudza. Hatigoni kutsunga kupinza mungozi perero yedu kupfurikidza nokuona kuti tinogona kusvika pedyo sei nomuganhu wouipi. Tinofanira “kuvenga [chose chose] chiri chakashata.”—Pisarema 97:10, NW.

15. Neiko “chipfeko chakakwana chechidzitiro chesimbi chinobva kuna Mwari,” chichikosha? Enzanisira.

¹⁵ Zano rakatanhamara pakudzivisa Satani rinowanwa muna VaEfeso ganhuro 6. Pauro anotaura kuti tinogona sei kudzivisa “manomano,” “mazano,” kana kuti “matandi” zvaSatani? (VaEfeso 6:11, Phillips, New International Version, The Jerusalem Bible) “Pfekai chipfeko chakakwana chechifukidziro chesimbi chinobva kuna Mwari,” anopa zano kudaro. Uku kutaura kwokuti “chipfeko chakakwana” hakusiyi nzvimbo yechimiro chokusangwarira kuuKristu, sezvo murwi weRoma aisagona kutsunga kuva asingangwariri pakugadzirira nokuda kwehondo. Murwi aizoita sei kudai iye akazvigadzirira amene nechifukidziro chose chesimbi kunze kwechifukidziro chapachipfuva chesimbi nengowani? Iye anogona kuva akafunga kuti, ‘Ichocho chaizvoizvo chifukidziro chapachipfuva chesimbi chikuru, uye ngowani inorema kwazvo. Izvo zvinorema zvikuru, uye handizvidi chaizvoizvo.’ Fungidzira mugariro wacho—murwi weRoma akashongedzerwa kurwa asi asina zvinhu zvake zvikuru zvokuzvidzivirira.—VaEfeso 6:16, 17.

16. (a) Tinofanira kutevera sei muenzaniso waJesu mukushandisa “munondo” wedu? (b) Tingaramba sei tichingwarira “zvombo zvinopfuta mwoto zvinokandwa” naSatani, uye nomuuyoi?

¹⁶ Fungidzirawo, murwi asina munondo wake. “Munondo womudzimu” ndichokuzvidzivirira nacho chakaisvonaka, sezvaunoshandiswa kuparadza zvombo izvo Satani anorwisana nazvo nomuKristu. “Munondo” wedu unofanira kuva wakagadzirira nguva dzose. Uchava wakadaro kana tikasaregeredza fundo yedu yeBhaibheri yomunhu oga neyemhuri. Asi nenzira yakatanhamara zvikuru, uyu “munondo . . . Shoko raMwari” ndicho chombo chedu chokudenha nacho. Jesu akaushandisa munzira dzose dziri mbiri. (Mateo 4:6, 7, 10; 22:41-46) Ndozvatinofanira kuitawo. Tinofanira kuramba tichirodza nzwisiso yedu yezvokwadi. Hatigoni kuchengeta umudzimu hwedu pahwaro hwezvatakadzidza mumwedzi yedu mishomanene yokutanga kana kuti makore muzvokwadi. Kana tikakundikana kumutsidzira umudzimu hwendangariro yedu, chiono chedu chomudzimu chingava chisina kujeka. Shingairo yedu yokunamatwa kwechokwadi kwaJehovha ingaderera. Tingava vakaneta mumudzimu. Hatisati tichizova vanokwanisa kudzivisa kudenha kwehama dzokunyama, shamwari, vafambidzani, uye vawi pakutenda avo vangatutira ruzvidzo pazvitendero zvedu. Asi Mwari achatidzivirira pana Dhiabhorosi ne“zvombo [zvake] zvinopfuta mwoto zvinokandwa” kana tikaramba tichizvishongedzera timene ne“chipfeko chakakwana chechifukidziro chesimbi chinobva kuna Mwari.”—Isaya 35:3, 4.

17, 18. Kurwa kwedu ndokwokurwisana naani, uye tinogona sei kukunda?

¹⁷ Hungu, Pauro akasimbisa ngozi inobatanidzwa muhondo yechiKristu paakanyora, kuti: “Nokuti kurwa kwedu hakusi kwokurwisana navavengi vavanhu, asi kwokurwisana namasimba enyika, kwokurwisana nezviremera navatongi venyika ino ine rima, kwokurwisana namasimba anopfuura ohunhu akaipa ari mumatenga.” (VaEfeso 6:12, The New English Bible) Ko isu vanhu vasina simba tinogona sei kudzivisa ndokukunda muhondo yakadaro yakaipa? Pauro anodzokorora pfundo rake, achiti: “Nokuda kwaikoku pfekai chipfeko chakakwana chechifukidziro chesimbi chinobva kuna Mwari, kuti imi mugogona kudzivisa muzuva rakaipa uye, pashure pokunge imi masanoita kwazvo zvinhu zvose, kuti mumire makatsiga.” (VaEfeso 6:13, NW) Kutaura kukuru ndouku: “Pashure pokunge imi masanoita kwazvo zvinhu zvose.” Ikoku zvakare hakusiyi nzvimbo yechiKristu chemwoyo miviri kana kuti chakatsauswa.—1 Johane 2:15-17.

¹⁸ Naizvozvo, ngatimirei takatsiga muzvokwadi, tichida kururama kwaJehovha, kuparidzira mashoko akanaka orugare, kubatisisa tine kutenda kwakasimba muruponeso urwo Jehovha anopa kupfurikidza naKristu Jesu, apo tinenge tichivimba neShoko raMwari setsigiro yedu huru. (VaEfeso 6:14-17) Yeuka, Mwari anotiitira hanya uye achatibetsera kukunda miedzo nefunganyo zvinouya kwauri mutsika yaSatani yezvinhu. Tose zvedu ngatiteererei nyevero, inoti: “Svinurai, murinde; muvengi wenyu Dhiabhorosi, anofamba-famba seshumba inorira, ichitsvaka waingaparadza.” Hungu, “mumudzivisei, makamira nesimba pakutenda.”—1 Petro 5:6-9.

19. (a) Ndiimwe gadziriroi inokosha yatinofanira kushandisa kuti tidzivise Satani? (b) Chii chichaitika pakupedzisira kuna Satani?

¹⁹ Tisakanganwa wedzero inokosha yaPauro ku“chipfeko chechifukidziro chesimbi.” Iye anoti: “Nechimiro chiri chose chomunyengetero neteterero pfuurirai kunyengetera panhambo iri yose mumudzimu. Uye nokuda kwedonzo iroro rambai makamuka nokutsiga kwose uye neteterero nokuda kwavatsvene vose.” (VaEfeso 6:18, NW) Muvengi wedu asingaoneki ane simba kwazvo zvokuti tinoda “chimiro chiri chose chomunyengetero neteterero.” Ipapoka, minyengetero yedu inofanira kuva yechokwadi neyakasiana-siana sei! Kutsamira kwedu kwakakwana pana Jehovha kunokosha kana tichizokunda kurwa ndokuchengeta perero. Iye bedzi anogona kugovera “simba rinopfuura iro riri renguva dzose” iro richatigonesa kudzivisa Muvengi wedu ane utsinye. Inyaradzo yakadini kuziva kuti Muvengi wedu mukuru achakurumidza kupinzwa mugomba rakadzika-dzika uye ipapo pakupedzisira kuparadzanywa nokusingaperi!—2 VaKorinte 4:7; Zvakazarurwa 20:1-3, 10.

[Mashoko Omuzasi]

Unogona Kupindura Here?

◻ Tinoziva sei kuti Satani munhu chaiyeiye?

◻ Nei mamwe mazita namazita okuremekedza zvaSatani akakodzera?

◻ Kuzviongororai kungatibetsera kudzivisa denho dzokuchenjera dzaSatani?

◻ Izanoi richabetsera mukukurira Satani, uye nei?

[Mufananidzo uri papeji 15]

Imwe nzira yokudzivisa nayo pesvedzero yaSatani kuva vane ushamwari, vanobetsera, vane rudo

[Mufananidzo uri papeji 16]

Tinofanira kudzivisa kuva vakafanana naAnaniasi naSafira, avo vakatera kuna Satani

[Mufananidzo uri papeji 17]

Kuti tidzivise zvombo zvinokandwa zvaSatani, hatigoni kurega rutivi rupi norupi rwechifukidziro chedu chomudzimu