‘Zvakazvitsaurira Kuna Mwari Mukuru Jehovha Nokusingaperi’

MUNA APRIL 1935, mushumiri weAmerica anosanozivikanwa nomukurukuri akashanyira Hawaii. Ikoku kwakanga kuri kwefariro chaiyo kuZvapupu zvaJehovha, izvo zvaingova bedzi 12 panguva iyoyo, sezvo uyu mushanyi akakurumbira akanga ari Joseph F. Rutherford, purezidhendi wechipiri weWatch Tower Bible and Tract Society. Hurukuro inoti “Ndiani Uchatonga Nyika?” yakakurukura kutongwa kwenyika kuri kuuya noUmambo hwaMwari. Yakakurukurirwa muhoro yechikoro chapamusoro chomunzvimbomo ndokugamuchira paradziro huru.

Zita raMwari noUmambo hwake zvave zviri musoro womubato wokuparidzira weZvapupu zvaJehovha chibviro chokutanga kwavo kwomuzuva razvino uno. Naizvozvo ndokwefariro kuvose vanonzwisisa ndokushandisa zita chairo raMwari wamasimba ose, Jehovha, zvokuti rakaenzana rechiHawaii, Iehova, rakashandiswa navose navanamati vapakuvamba veHawaii. Imwe yechechi dzokutanga yakavakwa navafundisi vechiKristudhomu muHawaii, ibwe rechechi rapaKawaiahao muHonolulu, yakavanzarikirwa ibwe rapakona rayo muna 1839. Akanyorwa paibwe iri retsauriro mashoko anoti: “Kuna Jehovha Mwari wedu nokusingaperi-peri.”

Chibviro cha 1935, apo Judge Rutherford akashanyira, basa reZvapupu zvaJehovha muHawaii rakakura kubva paZvapupu zvinoshingaira 12 bedzi kusvikira kuvanopfuura 5 400 nhasi. Izvo zvirokwazvo ‘zvakazvitsaurira kuna Mwari mukuru Jehovha nokusingaperi.’