CHIDZIDZO 18

Ita Kuti Vateereri Vadzidze Chimwe Chinhu

1 VaKorinde 9:19-23

PFUPISO YECHIDZIDZO: Ita kuti vateereri vafunge, kuti vasare vachiona kuti pane chimwe chinhu chinokosha chavadzidza.

Funga zvinotozivikanwa nevateereri vako. Pane kungotaura zvinhu zvavanotoziva, vabatsire kuti vave nemamwe maonero panyaya yavagara vachiziva.

Kurumidza kutaura pazvinhu zvavanoziva, wotaura zvishoma nezvishoma paunenge uchitsanangura pfungwa itsva.
Tsvaga mashoko uye fungisisa. Pazvinenge zvichiita, taura zvinhu zvisinganyanyi kuzivikanwa nevateereri kana zvinhu zvichangobva kuitika kuti utsanangure pfungwa huru. Nyatsofunga kuti zvinhu izvozvo zvinobatana sei nenyaya yauchataura nezvayo.

Paunenge uchiongorora nyaya yauchataura, zvibvunze mibvunzo yekuti ‘chii, nei, riini, kupi, ndiani, uye sei,’ nemimwewo kuti zvikubatsire kufungisisa nezvenyaya yacho. Paunenge uchidzidzisa, ita uchibvunza mibvunzo iyoyo woipindura kuti hurukuro yako ive neupenyu.
Ratidza kuti mashoko acho anoshanda sei. Tsanangura kuti pfungwa dziri muMagwaro dzinogona kubatsira sei vateereri vako muupenyu hwavo. Taura mamiriro ezvinhu, mafungiro, kana maitiro anonyatsobatwa nepfungwa dzauri kudzidzisa.