Ganhuro 3
Marudzidziso Enyika Ari Kutungamirira Zvakarurama Here?
1. Mibvunzoi inokosha pamsoro pamarudzidziso enyika inomutswa pano?
“RUDZIDZISO rwave rwuri rwumwe rwamasimba ane simba zvikurusa munhau,”28 rakadaro The World Book Encyclopedia. Asika marudzidziso enyika ave ari simba chairoiro nokuda kworugare nokuchengeteka here? Ko iwo akadzidzisa vateveri vawo kuti rudo rwehama runofanira kukurira miganhu yamarudzi nemitsaukano yamadzinza here? Zvakare, ko machechi echiKristudhomu, chiKaturike, chiProtestant, chiOrthodox, akabvumikisa kuva echokwadi kukukambira kwawo kutevera Jesu Kristu so“Muchinda woRugare” here? Kana kuti iwo akabetsera chaizvoizvo kukuvengana kunoisa pangozi nguva yemberi yomunhu here? Kutarira pachinyorwa kuchapa mhinduro inokatyamadza.
2. Ko manyuko akasiana-siana anotizivisei pamsoro pechinyorwa chenhau?
2 Muna ikoku, Parade Magazine yakati: “Nhau inodzidzisa zvifundo kuavo vanodisisa kudzidza. Chimwe chezvifundo zvikurusa ndechokuti kurwisana kwakavakirwa pamitsaukano yorudzidziso nesekete kunenge kunogarova kwakashata zvikuru, kunogara zvikurusa uye kwakaisvooma zvikuru kugadzikisa.”29 Uye sokureva kwakaita Chicago Tribune, kuti: “Rudzidziso rukuru rwuri rwose rwunoparidzira rugare noukama nengoni, asi kumwe kwokudzvinyirira kwoutsinye zvikurusa nokwokusashivirira zvikurusa munhau kwave kuchiitwa muzita raMwari.”30 Achiyeuka maidi akadaro enhau, mupepeti wepepanhau C. L. Sulzberger nomutoo wakakodzera anobvunza, kuti: “Nyaya yacho zvaingava isingafadzi, hakusati kuchifanira kuzivikanwa here kuti mukuwedzera kuzvimwe zvisakiso—hurumende inodzorwa namadzimambo, udzinza, hondo—rudzidziso rwakakudziridzika mukuva tyisidziro huru zvikuru inopfuurira kuupenyu hwavanhu”?31
3. Ko nhau yomuzana redu ramakore rechi 20 inozivisa muitiroi unonyadzisa worudzidziso?
3 Hungu, nhau yakazadzwa neropa rokukakavadzana kunotsigirwa norudzidziso. Muzana redu ramakore bedzi, mukati mehondo mbiri dzenyika napashure, isu takaona muitiro unonyadzisa wavezvorudzidziso vamwe chetevo vachiurayana—muKaturike achiuraya muKaturike, muProtestant achiuraya muProtestant, muMuslim achiuraya muMuslim, navamwe. Uye mukuru mukuru worudzidziso pamativi anoshorana, kunyange zvazvo ari worudzidziso rumwe cheterwo, akakomborera mauto ayo nokukurumidza aizouraya hama dzawo dzorudzidziso.
4. (a) Neiko machechi echiKristudhomu ari ane mhaka zvikurusa? (b) Ko chimwe chikamu chenhau chomupepeti wenhau chinotsinhirei pamsoro pehondo?
4 Pakati paawo ane mhaka zvikurusa munhau iyoyi ndiwo machechi echiKristudhomu. Neiko? Nemhaka yokuti iwo anokambira kumirira Mwari weBhaibheri noMwanakomana wake Jesu Kristu, uyo akati: “Kupfurikidza naikoku vose vachaziva kuti imi muri vadzidzi vangu, kana imi muno rudo pakati penyu.” (Johane 13:35) Asika kuuraya kwakaipisisa kwose kwakaitikira mukati chaimo mechiKristudhomu. Sokuzivisa kwakaita nhau yomupepeti wenhau muWaterloo Courier yokuIowa, kuti: “Uyewo maKristu haana kumbotya kurwisa mamwe maKristu. Kudai akanga ave achidaro, huzhinjisa hwehondo dzinopisira muEurope dzaizodai dzisina kuitika. . . . Hondo dzeNyika I, II, idzo dzakagadza zvinyorwa zvenguva yose nokuda kwamaKristu anouraya maKristu, dzingadai dzisina kutongoitika.”32
5. (a) Ko Bhaibheri risanozivisei avo vanobatira zvomenemene Mwari? (b) Ko mitezo yamachechi inofanira kunangana nomubvunzoi pamsoro pechechi yayo imene?
5 Pamsoro peiyi nhau, Bhaibheri rakajeka: Avo vanobatira Mwari zvamazvirokwazvo vanoudzwa ku“tsvaka rugare ndokururonda,” ku‘pfura minondo yavo kuva miromo yamapadza,’ uye kusa“dzidzirazve hondo.” (1 Petro 3:11; Isaya 2:2-4) “Isu tinofanira kudanana; kwete saKaini, uyo wakabva kuno wakaipa [Satani Dhiabhorosi] ndokuuraya munun’una wake.” (1 Johane 3:10-12) Asi vateveri vamarudzidziso enyika ino vanopfuurira kuuraya hama dzavo, sezvakaita Kaini, uye vakuru vakuru vavo vorudzidziso vakatsigira avo vanoronda nzira iyoyo. Nokudaro, kana uri worudzidziso, zvibvunze umene, kuti: ‘Kudai munhu ari wose ari pasi pano aiva worudzidziso rwangu, hondo dzaizodai dzakaguma uye pasi rino zvino raizodai rakava nzvimbo yorugare chairwoirwo here?’
6. Ko nyika yakakamukana neinorwisana yamarudzidziso enyika inobvumikisei?
6 Mugariro wakakamukana nowokurwisana wamarudzidziso enyika unobvumikisa kuti Mwari haasati ari mutsigiri wawo. Ikoku kungava sechikatyamadzo kuavo vanofunga kuti rudzidziso rwose rwunofanira kuva rwakanaka sezvarwunokambira kuva rwunomirira Mwari. Asika Bhaibheri rinosanoratidzira kuti “Mwari ndiMwari, asati ari wenyongano, asi worugare.” (1 VaKorinte 14:33) Rinoratidzirawo kuti kune ose ari maviri rudzidziso rwechokwadi norudzidziso rwenhema. Uye rinoti kunamata bedzi kwakavakirwa pazvokwadi, kusitongorina nyengedzo, kune tsigiro yaMwari.—Mateo 15:7-9; Johane 4:23, 24; Tito 1:16.
7. (a) Ko Bhaibheri rinoshandisa shokoi kurondedzera marudzidziso enyika? (b) Ko iwo anopomerwa mhakai?
7 Chokwadi, nemhaka yokuti marudzidziso enyika akazvipinza amene muupombwe nokuda kwemhindu yezvamatongerwe enyika, yenhengeseranwa, neyenzanga, Bhaibheri rinoafananidza kuva saari akafanana nehure. Richirondedzera iri “hure,” rinoti: “Maari makawanwa ropa . . . raavo vose vakaurawa pasi pano.” (Zvakazarurwa 17:1-6; 18:24) Hungu marudzidziso enyika ane mhaka yeropa hurusa pamsoro pokuuraya kwose kwenhau yenyika! Iwo achadanirwa pakuzozvidavirira nokuda kwaikoku.
8. Ko mashoko aJesu pamsoro pa“vatungamiriri vari mapofu” anoshanda sei nhasi?
8 Nomutoo wakajeka, rudzidziso rupi norupi rune miitiro inopesana neBhaibheri harungatongobudiriri mukutungamirira vanhu kurugare rwechokwadi nokuchengeteka. Ndokusaka Jesu akataura nezvavatungamiriri venhema vorudzidziso muzuva rake, kuti: “Ivo vatungamiriri vari mapofu. Kana, ipapoka, bofu richitungamirira bofu, ose ari maviri achawira mugomba.” (Mateo 15:14) Nenzira imwe cheteyo, marudzidziso enyika nhasi “vatungamiriri vari mapofu” mune zvehondo nomuna mamwe mativi anokoshawo oupenyu.
Marudzidziso Enyika Anosimudzira Tsika Here?
9, 10. (a) Neiko kuomerera kumipimo yechokwadi yetsika kuchikosha kurugare nokukuchengeteka? (b) Sezvinodzidziswa muBhaibheri, chii chinosimudzira tsika dzakadaro?
9 Ko munhu upi noupi anogona kufarikanya rugare rwechokwadi navavakidzani vake kana kuti kuchengeteka chaikoiko kana mipimo yetsika isingachengetwi here? Uko kusina mipimo yakadaro, kureva nhema, kuba, upombwe, uye miitiro mimwe cheteyo yakapararira. Kuno rumwe rutivi, kuda chaikoiko muvakidzani kunofanira kusimudzira tsika.
10 Bhaibheri rinoratidzira murangariro waMwari pamsoro petsika neiyi nzira: “Iye unoda munhu biyake wazadzika mutemo. Nokuti bumbiro romutemo, rinoti: ‘Iwe hauzati uchifanira kuita upombwe, Iwe hauzati uchifanira kuponda, Iwe hauzati uchifanira kuba, Iwe hauzati uchifanira kuchochora,’ uye mumwe murairo upi kana upi uripo, unopetwa neiri shoko, rinoti, ‘Iwe unofanira kuda muvakidzani wako sokuzvida kwaunoita iwe umene.’ Rudo harusati ruchibatira chakashata kumuvakidzani wako.”—VaRoma 13:8-10.
11, 12. (a) Ko munhu asingaomereri kumipimo yetsika angakarira kufarikanya rugare naMwari here? (b) Ndiani anogadza mipimo iyeyo nomutoo wapamaruramiro?
11 Zvisinei, kunokosha zvikuru kupfuura uku, ko unodavira kuti munhu angagona kuva norugare naMwari here, ane simbisiro yokutendera Kwake netaviridzo, kana iye asingashandisi mipimo yaMwari yetsika? Ungagona kunyange kuremekedza Mwari uyo asina kuda tsika dzakadaro kuavo vanokambira kumubatira here?
12 Kuti Mwari agoda kuomerera kumipimo yake, iye aizotofanira kujekesa iri mipimo iyoyo. Iye akaita ikoku muShoko rake, Bhaibheri. (2 Timotio 3:16, 17) Kutaura kuti munhu mumwe nomumwe anofanira kuita mipimo yake amene ndokuita mukuwirirana nayo kwaizova kusino mufungo kungofanana nokutaura kuti munhu mumwe nomumwe anofanira kuita mitemo yake amene yemotokari ndokuita mukuwirirana nayo. Iwe unoziva chingava muuyo wacho. Nenzira ino mufungo Bhaibheri rinoratidzira kuti kunongova nenzira imwe bedzi inovigira tendero yaMwari. Sokutaura kwakaita Jesu, dzimwe nzira dzose dzinoenda kukuparadzwa.—Mateo 7:13, 14; Ruka 13:24.
13-15. (a) Mibvunzoi pamsoro petsika inodikanirwa kubvunzwa pamsoro pemitezo yechechi yako umene? (b) Ko Bhaibheri rinoti chii chinofanira kuitwa pamsoro pemutezo weungano unoomerera mukuputsa mitemo yaMwari? (c) Ko ikoku kunoitwa mumachechi here?
13 Ko machechi echiKristudhomu, zvikurukuru, anotsigira mipimo yetsika ndokutungamirira vamwe vose vasara venyika here? Ko upenyu hwavazhinji avo vari vamachechi iwawo hunoratidzirei? Ko iwe uri wechechi here? Ipapo zvibvunze umene, kuti: ‘Kudai munhu ari wose pasi pano airarama sezvinoita mitezo yorudzidziso rwangu, ikoku kwaizogumisa utsotsi here, miitiro yokusatendeseka yebhizimisi, kakavadzano, noutere hwevatano?’
14 Bhaibheri rinonyevera kuti “mbiriso shomanene inokukumutsa bundu rose” uye kuti “songaniro dzakashata dzinoshatsa miitiro inobetsera.” (VaGaratia 5:9; 1 VaKorinte 15:33) Nokuda kweichi chikonzero rinorairawo maKristu ku“rega kusonganirana muboka nomunhu upi noupi unoidzwa hama ari chifeve kana kuti munhu ana makaro kana kuti munamati wezvidhori kana kuti mutuki kana kuti chiradza kana kuti gororo, musatongodya nomunhu akadaro. . . . ‘Bvisai munhu akaipa pakati penyu mumene.’”—1 VaKorinte 5:11-13.
15 Chokwadi, mumwe munhu angatsauka dzokonokei odzoka. Asika zvakadiniko naavo vanojaidza kuita zvinhu zvakadaro? Kana vanhu ivavo vachikambira kuva vanobatira Mwari, ivo vanyengeri. Zvamazvirokwazvo iwe unosemburwa nounyengeri, uye Bhaibheri rinoratidzira kuti Mwari anokuvengawo naavo vanojaidza kuhuita. (Mateo 23:27, 28; VaRoma 12:9) Ko zvino, zvakadiniko norudzidziso rwako? Ko irwo rwunotevera murairo weBhaibheri wo“kubvisa” avo vanosimbisira mukuputsa mitemo yaMwari naavo vasingaratidziri rupfidzo chairwoirwo here? Kana kuti irwo rwunobvumira vanhu vakadaro kuramba vari mukumira kwakanaka, nokudaro ndokuisa vamwe pangozi here? Ko irwo rwunongotsigira bedzi nomuromo tsika kunyange rwuchifuratira chaizvoizvo chisino kururama here, kana kuti kunyange kuchiregerera?—Mateo 15:7, 8.
16. (a) Ko vakuru vakuru vazhinji vorudzidziso zvino vanotii pamsoro pomufambiro wevatano? (b) Ko Bhaibheri rinotii pamsoro pomufambiro wakadaro?
16 Vakuru vakuru vorudzidziso vakawanda zvikuru vanotaura havo kuti ufeve, utere, nevatano yavanhu vane mitezo mimwe chete yokubereka nayo hazvina hazvo kuipa. Asika ivo havasati vari mutsinhirano nokufunga kwaMwari. Shoko rake rinosanorondedzera kuti: “Musatsauswa. Zvifeve, kana kuti vanonamata zvidhori, kana kuti mhombwe, kana kuti vanhu vakachengeterwa madonzo asati ari omuzvarirwo, kana kuti varume vanovatana navarume, kana kuti mbavha, kana kuti vanhu vana makaro, kana kuti vararadzi, kana kuti vatuki kana kuti makororo havasati vachizogara nhaka umambo hwaMwari.”—1 VaKorinte 6:9, 10.
Miuyo Yokuramba Shoko raMwari
17-19. (a) Ko muapostora Pauro akarangarira sei Bhaibheri? (b) Ko vakuru vakuru vorudzidziso vazhinji nhasi vanorangarira sei Bhaibheri?
17 Chikonzero chikuru nei marudzidziso enyika ino ari mumugariro wakadaro wakakamukana, wenyongano ndechokuti iwo anofuratira mitemo yaMwari seinowanwa muShoko rake, Bhaibheri. Zvamazvirokwazvo, vakuru vakuru vorudzidziso vazhinji vanoramba Bhaibheri seShoko rakafuridzirwa raMwari. Asika, muapostora Pauro akafuridzirwa akazivisa, kuti: “Rugwaro rwose rwakafuridzirwa naMwari.” (2 Timotio 3:16) Pauro akatikuchidzirawo kugamuchira Bhaibheri “kwete seshoko ravanhu, asi, sezvarakangoita chaizvoizvo, seshoko raMwari.” (1 VaTesaronika 2:13) Zvamazvirokwazvo Jehovha Mwari, Musiki Wamasimba ose wechisiko chapose pose chinotyisa, aigona kuvamba bhuku ndokutarisira kuti raichengeta kukwana kwaro kwamazana amakore!
18 Asika, New Catholic Encyclopedia inoti: “Kutaura kuzhinji kweBhaibheri hakusati kuchingova bedzi kwechokwadi pakunotemwa mukuwirirana nezivo yazvino uno yesayenzi nenhau.”39 Achinyora muU.S. Catholic, mumwe muprista akataura kuti kusikwa kwapasi hakusati kwaigona kuitika nenzira yakunorondedzerwa nayo muna Genesi. Uye pamsoro penhau yaro yokusikwa kwomunhu, iye akati: “Rudzi rwavanhu harwuna kutanga nenzira iyeyo.”40 Bhishopi weEpiscopal akati: “Bhaibheri rine mhosho, kusarurama nepokanidzano. Naizvozvo kunochinzwisisika kuti chikonzero nei machechi makuru echiKristu asati achirangarira Bhaibheri kuva risingakanganisi.”41 MuEngland, bhishopi weAnglican akataura pamsoro porumuko rwaJesu kuva mapinimini okushiripita namapfupa.”42
19 Nokudaro, vazhinji vavakuru vakuru vorudzidziso vanozvidza Bhaibheri kana kuti havasati vachidzidzisa vateveri vavo kuriremekedza ndokutevera mitemo yaMwari iri mariri. Ndicho chikonzero chikuru chokusazivikanwa kunokatyamadza kweShoko raMwari muchiKristudhomu chose. Mutsinhiri worudzidziso M. J. McManus akanyora ikoku pamsoro pavapindi vechechi, kuti: “Kombamiro shomanene murudzidziso dzinotyisidzira zvikuru kusekesa rudzidziso rwakarongwa muma 1980 sezvinoita mugariro unosuruvarisa wezivo yeBhaibheri.” Iye akacherekedza kuti “Bhaibheri rinoramba risingarahwi, riri rugwaro rwokumwe” kuvaendi kuchechi vazhinjisa.43
20, 21. Chii chave chiri miuyo yokuramba dzidziso dzeBhaibheri?
20 Chii chave chiri miuyo yaikoku kwose? Ko marudzidziso enyika akaratidzira kuti iwo anogona kuderedza dzidziso dzeBhaibheri asi achiita rugare kana kuti tsika dzakanaka pakati pavateveri vawo here? Mukupesana, migariro inoipisisa mupasi rose. Marudzi asina marudzidziso echiKristu akava anowedzera mukuva nzvimbo yokusaterama, yokukamukana, youshati hwezvamatongerwe enyika, netsika dzinoshata. Asi chiKristudhomu zvikurukuru changuve chiri chinotambura zvikurusa pamsoro poutsotsi, utere, kupindwa muropa nemirimo, kakavaro yamadzinza, nehondo. Zvakaitika chaizvoizvo sezvakadeya kuziviswa neShoko rinovimbika raMwari, kuti: “Ivo vakaramba Shoko rimene raJehovha, uye ivo vane uchenjeri hwakadini?”—Jeremia 8:9.
21 Hufakazi hahurambiki. Hunoratidzira kuti marudzidziso enyika haasati ari simba rechokwadi rorugare nokuchengeteka. Uye kuti ivo vakasiya vateveri vawo vasingazivi tariro yechokwadi—Umambo hwaMwari. Ko zvino, ikoku kwose kunoratidzirei?
Mugumo Wamarudzidziso Enyika Woswedera Pedyo
22, 23. Ko Bhaibheri rinoti chii chichawira marudzidziso enhema enyika ino?
22 Jesu Kristu akataura, kuti: “Muti uri wose uyo Baba vangu vokudenga vasina kusima uchadzurwa.” (Mateo 15:13) Chibereko chakashata chakaberekwa namarudzidziso enyika ino chinobvumikisa kuti iwo haasati ari okusima kwaMwari. Nokudaro, Bhaibheri rakadeya kuzivisa kuparadzwa kunouya kwamasangano ose enhema okunamata.
23 Achitaura nezvamasangano aya orudzidziso mumufanananidzo we“Bhabhironi Guru” rakafanana nehure, Mwari anotaura zvinotevera pamsoro poumambo hwenyika hworudzidziso rwenhema, kuti: “Zvivi zvaro zvatutirana kusvikira kudenga, uye Mwari wayeuka mabasa aro okusaruramisira . . . nezuva rimwe madambudziko aro achasvika, rufu nokuchema nenzara, ipapo richapiswa chose chose nomwoto, nokuti Jehovha Mwari, unoritonga, une simba.”—Zvakazarurwa 18:2, 5-8.
24. Ko kuparadzwa kwakadaro kuchasvika sei, uye kunobva mumanyukoi?
24 Cherekedza kuti uku kuparadzwa kuchauya nokukurumidza kunokatyamadza, so“muzuva rimwe.” Kukukatyamadzwa nokupererwa nezano kwavanhu vazhinji, rudzidziso rwenhema rwuchatsakatiswa, ruchaparadzwa, namarudzi ezvamatongerwe enyika ayo iro ranguve richiita uhure nawo.—Zvakazarurwa 18:10-17, 21; 17:12, 16.
25. (a) Pana Zvakazarurwa 18:4, ko vanhu vanoshuva tendero yaMwari vanokuchidzirwa kuitei? (b) Chii chinofanira kusunda munhu kuita chiito chakadaro?
25 Naizvozvo kudanidzira kwoumwari ndouku: “Budai mariri, vanhu vangu, kana musati muchida kugoverana naro muzvivi zvaro, uye kana musati muchida kuwana rutivi rwamadambudziko aro.” (Zvakazarurwa 18:4) Kuita chiito chakadaro kunoreva kuti munhu anoona rudzidziso rwenhema samaonere anoruita Mwari. Kunoreva kuti munhu anoruvenga nokuda kwezvibereko zvaro zvakaora, kunyengera kwaro, nokudavira kwaro mashura. Kusemburwa kunofanira kunzwiwa nokuda kwenzira yakakwenengerwa Mwari norudzidziso rwenhema pamberi pavanhu uye nokuda kwenzira yarwakapira nayo kukutambura nokudzvinyirirwa kwavanhu. (VaRoma 2:24; Jeremia 23:21, 22) Kana ukaziva ikoku, uchabvisa kutsigira kwose marudzidziso akadaro, nokudarokwo uchiratidzira kutsigira kwako kuzere rutongeso rwaMwari paari.
26. (a) Mukuwedzera, munhu anofanira kuwanei kana iye achizofarikanya rugare rwaMwari nokuchengeteka? (b) Ko munhu anofanira kutsvaka vanhu vorudzii pakutsvaka avo vanonamata zvechokwadi?
26 Zvisinei, kungobva bedzi hakuna kuringana. Unofanira kutsvaka ndokuwana kunamata kwechokwadi, kusinganyengeri kuchakuunzira rugare rwaMwari nokutaviridzwa apo kuparadzwa kwakadeya kuziviswa kunosvika. Avo vanobatikana mukunamata kwakadaro kwechokwadi vanofanira kuva vanhu vakato‘pfura minondo yavo kuva miromo yamapadza, vasati vachidzidzirazve hondo.’ (Isaya 2:4) Vanofanira kuva vanhu vanodavira Shoko raMwari ndokurarama mukuwirirana naro, vachirirega richiva simba rinotungamirira muupenyu hwavo. (Pisarema 119:105) Ivo vanofanira kuratidzira rudo chairwoirwo, rwusinganyengeri nokuda kwomunhu biyavo. (Johane 13:35; VaRoma 13:8) Ko kunamata kupi nokupi kwakadaro kuripo nhasi here? Mamirioni akakuwana pakati peZvapupu zvaJehovha. Izvo zvinozivikanwa mupasi rose nokuda kwokunamatira kwazvo kumitemo yaMwari seinowanwa muBhaibheri. Uye rugare nokuchengeteka zvazvinofarikanya kunyange zvino zvinoreverera huchokwadi nesimba reShoko raMwari.
27. Chii chauchakwanisa kuzvicherekedzera umene pakupinda misangano yeZvapupu zvaJehovha paHoro yazvo yoUmambo?
27 Zvapupu zvaJehovha zvinoitira hanya zvikurukuru mugariro une ngozi uyo rudzidziso rwenhema rwakapinza vanhu mauri. Izvo zviri kutamburira nomutoo wapachokwadi kupa Shoko raMwari nzvimbo yokutanga muupenyu hwazvo. Iwe unokumbirwa kucherekedza misangano yazvo muHoro yoUmambo yazvo yomunzvimbomo ndokuzvifeyafeyera umene tambanuko iyo yazvinoratidzira mudzimu waMwari ndokufarikanya rugare nokuchengeteka kwaunounza. Uchaonawo madzidzire azvinoita ndokushandisa izvo Mwari anoda kuna avo vanopukunyuka kuparadza kunouya ndokurarama muTsika Itsva yake yakarurama muubati ushe hwoUmambo hwake hwokudenga.
[Bhokisi riri papeji 29]
Vakuru vakuru vorudzidziso vakawanda zvikuru vanogamuchira icho Bhaibheri rinoshora soutere hwevatano, sezvinoratidzirwa neiyi misoro mikuru yomuenzaniso nemisoro yenhau:
“Apo Chiri Chakashata Chinova Chakanaka Vakuru Vakuru Vorudzidziso Vachatizivisa.” “[Chechi yeEngland] zvino iri kuchinja mutoo wayo wechiremera wechinyakare. Vatano yapamberi peroorano, nomukwanyina mumwe kana kuti vanopfuura, . . . kubvira zvino icharangarirwa kuva inogamuchirwa mutsika.”—Alberta Report.33
“Vatungamiriri Vorudzidziso Vanonyarara Pamsoro Pevatano Yapamberi Peroorano.” “Vatungamiriri vorudzidziso veAmerica vave vachinyarara mukuita chivi mukuparidzira pamsoro pevatano yapamberi peroorano . . . Ivo vanotya kuti vacharashikirwa navamwe vavateveri vavo. Isaya aiziva nezvavaprista vakadaro. Muganhuro 1 yebhuku rake, iye anonokora Ishe seanotaura pamsoro pavo, kuti, ‘Ndichakuvanzirai meso angu; kunyange zvazvo muchiita minyengetero mizhinji, handisati ndichizoteerera; maoko enyu azere neropa.’”—Telegraph, North Platte, Nebraska.34
“Upombwe Muchiedza Chinyoro Zvikuru.” “Mukuru mukuru wechiNgezi . . . akasimudza tsiye apo iye akakurukura murangariro wakaterama wechechi paMurairo weChinomwe. . . . ‘Chimiro chedu chendangariro ndechokutarisira pane chorutongeso,’ iye akataura kudaro.”—The Sunday Times, Perth, Australia.35
“VaUnitaria Vanotsigira Roorano Dzavanhu Vane Mitezo Mimwe Cheteyo.”—The New York Times.36
“Simba Rebasa reUnited Church yeCanada rakatsigira kugadzwa kwavanhu vanovatana vane mitezo mimwe cheteyo vanoshingaira savashumiri.”—The Toronto Star.37
“Bvumirai Pamutemo Uhure—Ndicho Chigadzikiso Chavasande.”—Chikamu chenhau chomupepeti wenhau chakanyorwa nabhishopi weKaturike muPhiladelphia Daily News.38
[Mufananidzo uri papeji 25]
Vakuru vakuru vorudzidziso vakaisa ropa mumaoko avo mukutsigira vashushi