Maganu Coyra Haja Assatto?

Magano afatenna jaalasi ikkate diinaggaawattoha ikkiro, heeshshokki woyyaabbanno. Hatto assatto woyte ayyaanaamittete hasattokki wonshidhanni nootto. Hanni Yesuusi tenne daafira maynoro laꞌno.

Yesuusi yiinore

“Ayyaanaamittete coye goodhinori hagiirraammaho.”—Maatewoosi 5:3.

• Ninke baalunku aante noo gedee xaꞌmuwara dawaro afiꞌra hasiꞌneemmo: Heeꞌneemmohu mayraati? Qarru togo batiꞌrinohu mayraati? Mannu reyro hiikkanno? Kuri xaꞌmuwara dawaro afiꞌnummoro hagiirraamma ikkineemmo.

“Manchu Yihowaa afiinni fulanno qaali baalunni ikkinnina, sagaletenni calla diheeꞌranno.”—Maatewoosi 4:4.

• Maalaamittete sagale hasiissannonkente gede, ayyaanaamittete sagaleno hasiissannonke. Yesuusi ayyaanaamittete hasattonke wonshiꞌrate woꞌmanka woyte Yihowa addaxxa hasiissannonketa rosiisino.

“Qaalikki halaaleho.”—Yohaannisi 17:17.

• Yesuusi, Maganu ayyaanaamittete hasattonke wonshannoti qara doogo Qaalisi Qullaawu Maxaafi widoonni ikkinota rosiisino.

Maganu coyra diinaggaabbenna ayyaanaamittete hasattokki wonshidhe, geedanno hagiirre afiꞌratto gede jawaachinsheemmohe. Aante noo qixxaawo tennera kaaꞌlitahera dandiitanno:

• Baatooshshiweelo Qullaawa Maxaafa nabbawa dandaatto.

• Baatooshshiweelo Qullaawa Maxaafa xiinxallinseemmohe gede xaꞌmiꞌra dandaatto.