Halaale Afa Hasiꞌratto?

MAYI halaale? yiittokki digatatto. Duuchcha wote mannu kayisanno hasiissanno xaꞌmore. Atino konni woroo noo gedee xaꞌmo kayisattoha ikkara dandaanno:

• Maganoho ninkeri huluullisannosi?

• Olunna qarru heeꞌrannokki yanna dagga ikka?

• Reyineemmo wote makkineemmo?

• Reyitiyorira mayi hexxo no?

• Maganu macciishshannoehu hiittoo huuccirummorooti?

• Heeshshoꞌyanni hagiirre afiꞌreemmohu hiittoonniiti?

Tenne xaꞌmora dawaro afiꞌrattohu hiikkinniiti? Babbaxxino manna xaꞌmittoro babbaxxitino dawaro aannohe. Ayirrisattorinna xiinxallootaho yaattori nafa ise iseneewa xaaddannokki dawaro uyitannohe. Maxaaffano nabbawittoro hattonni gurcheessitanno dawaro afiꞌratto. Wolereno ikkiro, yannate geeshsha horo aannoha lawirono shiima yanna gedensaanni yanna saꞌinoha, haaroonsanna wolurinni riqiwa hasiissannore ikkanno.

Ikkollana kayiinni, kuriuu xaꞌmora ikkado dawaro aannohu mittu maxaafi no. Isino halaalu maxaafati. Yesuusi Kristoosi Maganunniwa huuccatto shiqishiranni, ‘Qaalikki halaaleho’ yiino. (Yohaannisi 17:17) Kuni Qaali yannankera Qullaawa Maxaafa yaamamanno. Aane noo qoolira, aleenni kaꞌino xaꞌmora xawadonna halaalancho dawaro afiꞌratto.

Maganoho Ninkeri Huluullisannosi?

TINI XAꞌMO MAYIRA KAꞌU: Heeꞌnoommo alame bunshetenna halaalanynya yoo hoonginni woꞌmitinote. Batinynye ammaꞌna iillannonke qarra abbannohu Maganoho yite rosiissanno.

QULLAAWU MAXAAFI ROSIISANNORI: Bunshete kaimi Magano diꞌꞌikkino. Iyyoobi 34:10, “Bunshe assanna godowa hosa woꞌmanka dandaanno Maganiwii faffo!” yaanno. Maganoho mannu oosora dancha hedo noosi. Konniraati Yesuusi huucciꞌneemmo gara rosiisanni: “Iima heeꞌrattohu Annanke ballo, . . . Gashshootikki dayo, fajjokki iima ikkitino gede, uullano ikkito” yiino. (Maatewoosi 6:9, 10) Maganu mannu oosora noosi baxillinni kae ninkera noosi hedo jeefo gantanno gede muxxe ikkinore uyiinonke.—Yohaannisi 3:16.

Ledde Kalaqo 1:26-28; Yaaqoobi 1:13; 1 Pheexiroosi 5:6, 7 lai.

Olunna Qarru Heeꞌrannokki Yanna Dagga Ikka?

TINI XAꞌMO MAYIIRA KAꞌU: Olu kiiro nookki manna daafanni no. Konnii kainohunni baalinkera qarru iillannonke.

QULLAAWU MAXAAFI ROSIISANNORI: Maganu uulla woꞌmate keere abbannota umo asse coyirino. Iimi gashshootisi hunda, “ola rosannohu diheeꞌranno.” Hatteentenni, “bisensa tunte heellakko assittanno.” (Isayyaasi 2:4) Maganu qarranna halaalancho yoo hoonge hegerera hoolanno. Qullaawu Maxaafi: ‘Hindiiddo duuchcha illensa aaninni feyaanno; reyo, woyi dadillu, woyi wiꞌla, woyi dhibbu kunni kaꞌira diheeꞌranno Hakkuno mayiraati? Albi coyi budi sainohuraati’ yaanno.—Ajuuja 21:3, 4.

Ledde Faarso 37:10, 11; 46:9; Mikkiyaasi 4:1-4 lai.

Reyineemmo Wote Makkineemmo?

TINI XAꞌMO MAYIRA KAꞌU: Alamenkera noo ammaꞌna roore anga mannu reyanno wote giddosinni fule heeshshote sufannorichchi no yite rosiissanno. Mitootu kayinni reyitiyori heeshshote noore gawajjitanno woyi Maganu bushuulle hegerera gaannamete giiranni fooggaltanno gede qorichchishanno yite ammantanno.

QULLAAWU MAXAAFI ROSIISANNORI: Reyino manchi mittore diafanno. Mekibibi 9:5 “Reyitinori . . . kayinni mittoreno diaffanno” yaanno. Reyitiyori mittore affaakkihura, macciishamannonsari nookkihuranna mittore assitannokkihura, heeshshote noore gawajja ikko kaaꞌla didandiitanno.—Faarso 146:3, 4.

Ledde Kalaqo 3:19; Mekibibi 9:6, 10 lai.

Reyitiyorira Mayi Hexxo No?

TINI XAꞌMO MAYIRA KAꞌU: Banxeemmo manni ledo hagiirrunni heeꞌra hasiꞌneemmo. Konni daafira banxeemmori reyitiyori ledo galagalle xaadate ququxamanke nooreeti.

QULLAAWU MAXAAFI ROSIISANNORI: Reyitiyori giddo rooru manni kaꞌꞌanno. Yesuusi “waammate giddo noori qaalesi macciishshitanno yanna daggannona” yitanno hexxo uyiino. (Yohaannisi 5:28, 29) Xintaho Maganoho noosi hedo ledo sumuu yaanno garinni, reyote kaꞌꞌanno manni gannate ikkitanno uullara hegerera heeꞌrate kaayyo afiꞌdhanno. (Luqaasi 23:43) Tenne hexxo garinni hajajantannori mannu ooso coꞌo yiinoha billiitete keerenna hegere heeshsho afidhanno. Qullaawu Maxaafi: “Keerano uulla ragidhanno ise iimano hegerera heedhanno” yaanno.—Faarso 37:29.

Ledde Iyyoobi 14:14, 15; Luqaasi 7:11-17; Soqqamaanote Looso 24:15 lai.

Maganu Macciishshannoehu Hiittoo Huuccirummorooti?

TINI XAꞌMO MAYIRA KAꞌU: Duuchchante ammaꞌna giddo noo manni huuccatto shiqishiꞌranno. Ikkollana, roore anga huuccattonsara dawaro afiꞌdhinokki gede macciishshamannonsa.

QULLAAWU MAXAAFI ROSIISANNORI: Yesuusi huucciꞌneemmo wote yinoommore marro qolleemmokki gede rosiisino. Ledeno “Huuccidhinanni wote” “yitinoonnita marro marro higgine yitinoonte” yiino. (Maatewoosi 6:7, Haaro Alame Tiro) Maganu huuccattonke macciishshara hasiꞌnummoro, isi hasiꞌranno garinni shiqishiꞌra hasiissannonke. Togo assate, Maganu fajjo maatiro rosanna ronsoommo garinni huucciꞌra hasiissannonke. Umi Yohaannisi 5:14 “Ayee coyeeno isi [Maganu] fajjo gede Huucciꞌnummoro macciishshannonke” yaanno.

Ledde Faarso 65:2; Yohaannisi 14:6, 14; 1 Yohaannisi 3:22 lai.

Heeshshoꞌyanni Hagiirre Afiꞌreemmohu Hiittoonniiti?

TINI XAꞌMO MAYIRA KAꞌU: Batinynyu manni jiro, maccaha ikka, woyi xumillu hagiiraammo assanno yee ammananno. Kayinnilla, kuriuu shorra hagiirre huntanno.

QULLAAWU MAXAAFI ROSIISANNORI: Yesuusi: “Ayaanaamu coyira illachcha tuggannori hagiirraammaho” yee hagiirreho qara ikkinore coyirino. (Maatewoosi 5:3, Haaro Alame Tiro) Halaalancho hagiirre afiꞌneemmohu Maganonna Maganu ninkera noosi hedo afatenna ayyaanaamu halaalira noonke hasatto wonshirateeti. Konne halaale anfannihuno Qullaawu Maxaafi giddooti. Konne halaale afa heeshshonkera hasiisannorenna hasiissannokkire bande anfeemmo gede kaaꞌlannonke. Qullaawu Maxaafi halaali heeshshonke massagara fajjinummoro heeshshonke hagiirraamenna geꞌinota ikkitanno.—Luqaasi 11:28.

Ledde Lawishsha 3:5, 6, 13-18; 1 Ximootewosi 6:9, 10 lai.

Qullaawu Maxaafi leente xaꞌmora uyino dawaro haranchunni laꞌnoommo. Konnii roorsite afate hasiꞌratto? “Ayaanaamu coyira illachcha tuggannori,” giddo mitto ikkittoro roorsite afate hasirakki huluullisannokkireeti. ‘Maganoho ninkeri huluullisannosiha ikkina, bunshenna qarru heerara mayira fajjiyya?’ Maateꞌya heeshsho woyyeesseemmohu hiittoonniiti?’ Qullaawu Maxaafi tenneranna wole batinynye xaꞌmora ikkadonna hagiirsiissanno dawaro aanno.

Ikkollana, yannankera batinynyu manni Qullaawa Maxaafa rosa dihasiꞌranno. Korkaatuno konne maxaafa geeshshasi lowohanna huwata dandiinannikkiha asse laꞌꞌannohuraati. Heedhannohe xaꞌmora Qullaawu Maxaafinni dawaro uyiinahera hasiratto? Yihowa Farciꞌraasine ate kaaꞌlate lame qixxaawo assitino.

Umihu, Qullaawu Maxaafi Addinta Mayyee Rosiisanno? yaanno maxaafaati. Kuni maxaafi diinaggetenni kainohunni yanna hooganno manni heeshshonsa giddo kaꞌanno xaꞌmora Qullaawu Maxaafinni dawaro afiꞌrara hende qixxeessinoonniho. Layinkiti kayinni, mannu baatooshshu nookkiha Qullaawa Maxaafa xiinxallanno gede assinnonni qixxaawooti. Qooxxeessikkira heedhanno Yihowa Farciꞌraasine giddo mittu, Qullaawu Maxaafiti ikkado egenno noosihu minekki woyi injiitannohe basera baatooshshu nookkiha, lamalate giddo shiima yanna adhe Qullaawa Maxaafa rosiisannohe. Alamete doyichchora heedhannori miliyoonete kiirranni manni tenne qixxaawonni horo afidhino. Batinynyu tenne qixxaawonni afidhino egennonni kaꞌe, “Halaale afiꞌroommo” yitino.

Konnii saꞌino jiro horonta diafiꞌnani. Qullaawu Maxaafi halaali, gawajjanno budinni, gurcheessannorinninna gawajjitanno waajjanni keere fushshanno. Ledeno hexxo, dancha hedonna hagiirru heeranonke gede assano. Yesuusi: “Halaale affinanni halaaluno, borojjimmatenni fushshannoꞌne” yiino.—Yohaannisi 8:32.