Alamete Aana Keeru Daanno!

Mannu baalu keeru woꞌmino alamera heeꞌra halchanno. Hundinni kayisse, alamete gashshaasine gaance hoolte keere latisate daafurtanni keeshshitino. Mito woyte, daafurinsa yannate geeshshano ikkiro gaꞌlabbo abbanno. Kayinni hige ma assinay, duucha woyte olu wirro kaꞌꞌanno. Alame woꞌmunni woꞌma keere ikkitanno yanna daggakka? Ee, dagganno! Hanni tenne daafira Yesuusiwiinni maa ronseemmoro laꞌno.

Yesuusi assannore

Yesuusi alamete aana keere abbate muli yannara maa assannoro Qullaawu Maxaafi xawise kulanno.

• “[Yesuusa] ‘Keeru Roorricha’ yinanni. Wolqasira gawalo dino; gashshootisira hegere keeri woꞌmino.” (Isayaasi 9:6, 7) Yesuusi Maganu Gashshooti Moote ikkino daafira, isi alame woꞌmate abbanno keeri geedonniha ikkanno.

• “Qarraataamo woshshiꞌrannosi woyite gatisannosi; buxichonna gadadaamo kaaꞌlanno.” (Faarso 72:12-14) Yesuusi biilloonyesi horoonsiꞌre, taashsho halaꞌlitanno gede assanno; hakko daafira, olu, shittimma, hattono shetto baala baꞌanno.

• “Gashshootu gashshootu aana ola dikayisanno; hakkunni gedensaanni olaho qixxaawannohu diheeꞌranno.” (Isayaasi 2:4) Yesuusi gashshooti giddo, mannu baalunku ola ikkikkinni sumuu yine heeꞌnanni gara rosanno.

Yesuusi hattenne keeru yanna abbanno garanna atino hakko heeꞌrate maa assa hasiissannohero afate, Maganu Mangiste Maati? yitannota harancho viidiyo lai.

Yesuusi rosiisinore

Xaa yannara nafa, Yesuusi rosiisino rosi miliyoonetenni kiirranni manni sumumme ikke heeꞌranno gede kaaꞌlanni no. Isi ilaalaho heeꞌre rosiisi yannara, mannu mimmitu ledo sumuu yee heeꞌranno gede kaaꞌlanno biddissa uyno. Hanni mito mito laꞌno.

• “Keere kalaqqannori hagiirraammaho.” (Maatewoosi 5:9) Yesuusi gibbotewiinni xoonqeemmo gede calla ikkikkinni, keere kalanqeemmo gedeno rosiisino.

• “Balaxxe rodiikki ledo araarami; hakkiinni galagalte dagge kakkalokki shiqishiꞌri.” (Maatewoosi 5:23, 24) Yesuusi kawa kaꞌaanni higino coye ranke tirranni gede amaalino. Maganu ledo danchu jaaloomi heeꞌrankera hasiꞌnummoro, mannu ledono keere heeꞌra hasiissannonketa rosiisino.

• “Yoo yinanniꞌnekki gede kiꞌneno woleho yoo yaa agurre.” (Maatewoosi 7:1) Yesuusi wolootaho kaajjado yoo yaa, hattono ninke assineemmokkire assitara agadha hasiissannonkekkita rosiisino; korkaatuno togoo akati keere hunanno. Yesuusi haꞌrunsaanosi wolootu soꞌro xinqisiisiꞌrantenni, “woꞌmanka woyite gatona [yitanno]” gede rosiisino.—Luqaasi 6:37.

Kalqoomunni batinyu manni Yesuusi rosiisino roso haꞌrunsanni no. Kuni manni finqillenna babbadooshshu batiꞌrino qooxeessira nafa, kawa kaꞌaanni higino coye gaꞌlabbi yiino garinni tiranno gara, gatona yaanno garanna wolootu kakkachituro nafa baxille leellishanno gara rosanni no.

Yesuusi rosiisino rosi mito manna keere afiꞌranno gede kaaꞌlino gara huwatate, “Olunna Kipho Heedhurono Keere Afiꞌra” yaanno birxicho nabbawi.