Macciishshitinanni Gara Seekkitine Hedde

1-2. (a) Xaa yannara Yihowa mannisira ayyaanaamittete hasiisannonsare wonshanni noohu hiittoonniiti? (Faarso 23:1, 2, 5) (b) Konni birxichira maa ronseemmo?

YANNANKERA Yihowa falakkinota ayyaanaamittete sagale shiqishanni noonke. Ninkeno Daawiti gede “Kaaliiqi allaalaanchoꞌyaati; hoogeemmori mitturino dino” yineemmo.—Faarso 23:1, 2, 5 Nabbawi.

² Yannankera Yihowa ayyaanaamittete sagale aannonke doogga giddo mitte songote gambooshsheeti. Togoo gambooshshuwawa duucha woyte ronseemmori bashshonni anfoommoreeti. ‘Halaalu giddo kaajjine uurrinoommoha ikkiro’ nafa kuni rosi hasiisannonke. (2 Ph. 1:12) Kayinni bashshonni afootto rosi duucha hige shiqanno woyte seekkite macciishsha qarra ikkitannohe? Konni birxichira gambooshshunniwa seekkine macciishshate kaaꞌlannonkeri maatironna tenne assa hasiissannonkehu mayraatiro ronseemmo. Hattono songote rosiissannori wolootu seekkite macciishshitanno gede kaaꞌla dandiitanno garanna seekkine macciishshineemmo gede kaaꞌlitannonketa mite hedo laꞌneemmo. Hanni balanxe gambooshshunniwa rosiisannonkehu ayetiro laꞌno.

ROSIISANNI NOONKEHU YIHOWA IKKINOTA QAANGO

3. Yihowa rosiisannonkehu ma garinniiti? Soqqamaanosi Qaalesi danchu garinni horoonsidhannohu hiittoonniiti?

³ Yihowa rosiisannonkehu Qaalisi Qullaawu Maxaafi widoonniiti. (2 Xi. 3:16, 17) Yesuusi tenne huwatino. Isi Maganu Qaale seekke horoonsiꞌrino gara dhaggeeffate macciishshanni noosi manni togo yee xaꞌmino: “Kuni manchi rosu mine eꞌꞌe rosikkinni togoota Qullaawa Borro egenno hiitto ikke afiꞌra dandii?” (Yoh. 7:15) Yesuusi Maganu Qaale xawisanna macciishshiti suwashshu wodani noonsa manni hagiidhino. Umi xibbi diro heeꞌrino Kiristaani lawishshaho Phaawuloosinna Aphiloosino wolootaho Qullaawa Borro seekkite xawissino. (Soq. 17:2, 3; 18:24, 28) Ninkeno borruwanke, jw biroodikaaste, lallawonna viidiyubbanke Qullaawu Maxaafi aana xintantinota anfoommo. Gambooshshenke daannohu batinyu manni Qullaawa Maxaafa horoonsiꞌneemmo gara lae dhagge assiꞌranno. Togoo gambooshshiwa rosiissanno roduuwi Maganu Qaali aana xintamino roso rosiissanno hattono qummeeshsha nabbawa calla ikkikkinni macciishshanni noo manni loosu aana hosiisanno gara xawissanno.—Luq. 24:32.

4. Ibiraawootu afiinni “macciishsha” yaanno qaali may tiro sayisanno?

⁴ Qullaawu Maxaafi giddo macciishsha yaanno qaale duucha woyte hajajama yitanno hedo sayisate horoonsiꞌnoonni. Yihowa gambooshshunniwa Qaalisi widoonni rosiisannonke woytenna fajjosi huwanteemmo woyte isira hajajama shota ikkitannonke. Yihowa isi yaannore macciishshine loosu aana hosiinseemmo woyte hagiidhannota addaxxa dandiineemmo.—Law. 27:11.

GAMBOOSHSHUNNIWA SEEKKINE MACCIISHSHA HASIISSANNONKEHU MAYIRAATI?

5. Yihowara noonke baxilli ma assineemmo gede kakkaysannonke? (Yoh. 4:23, 24; 1 Yo. 5:3)

⁵ Gambooshshunniwa macciishshineemmohu Yihowa banxeemmo daafiraati. (Mat. 22:37) Yihowa daafira ronsummo kiiro iso roore banxeemmo. Kuni baxilli iso macciishshineemmo, hajajammeemmosinna Qaalisi giddo kulino garinni magansiꞌneemmosi gede kakkayisannonke.—Yohaannisi 4:23, 24; 1 Yohaannisi 5:3 nabbawi.

6. Gambooshshinkewa woloota kaaꞌlate daafira maa ronseemmo?

⁶ Gambooshshunniwa macciishshineemmohu manna banxeemmo daafiraati. (Mat. 22:39) Yihowa gambooshshinkewa ammanate roduuwankenna xaara iso affinokkire kaaꞌlineemmo gara rosiisannonke. Lawishshaho Manna Baxxe—Rosaano Asse yitanno biroshere soqqanshonkera kaaꞌlitanno akatta lossiꞌneemmo gede kaaꞌlitannonke. Soqqanshonniwa manna faasiiqqe hasaawisa qarra ikkitinohe? Hatto ikkiro Kiristaanu Heeshshonna Soqqansho gambooshshiwa rosaanote kifile shiqishshanno roduuwi tenne dandoo leellishshanno gara seekkite lai.

7. Woꞌmanka woyte Yihowa macciishsha hasiissannonkehu mayraati?

⁷ Gambooshshunniwa macciishshineemmohu hagiirraamma ikkanna hegerera heeꞌra hasiꞌneemmo daafiraati. Yihowa albi soqqamaanosira kulinonte gede hagiirraamma ikkanna hegerera heeꞌra hasiꞌnummoro isira hajajama hasiissannonke. (Mar. 32:44-47) Gambooshshunniwa macciishsha haaro alame dagga geeshsha cincine agadhineemmo gede assitanno jawaante afiꞌrate kaaꞌlitannonke. (Rom. 8:25) Heeꞌnoommohu goofimarchu barruwara ikkinohuranna ayyaanaamittetenni baqqi yine heeꞌra hasiissannonke daafira xaa yannara Yihowa macciishsha lowonta hasiissannote.—Mat. 24:42-44; Aju. 1:3.

GAMBOOSHSHUNNIWA MACCIISHSHITANNO GEDE WOLOOTA KAAꞌLINEEMMO GARA

8. Madirakete fulte rosiissanno labballi woꞌmanka woyte rosiisate dandoonsa woyyeessiꞌra hasiissannonsahu mayraati?

⁸ Madirakete fulte rosiissanno roduuwi roorenkanni dagate lallawo shiqishshannori rosiisate dandoonsa woꞌmanka woyte woyyeessiꞌra hasiissannonsa. Seekkine qixxaambe shiqinshannihu Qullaawu Maxaafi aana xintamino rosi mannu halaalu minira daanno gedenna ammanate roduuwinke rossinore loosu aana hosiissanno gede kaaꞌlanno. Hakko daafira kifile shiqishshannori shiqishshanno kifile mulluri gede assite laꞌꞌa dihasiissannonsa. Lallawo shiqishate qoosso afiꞌrittoro aante noo hedo loosu aana hosiisa dandaatto gara hedi. Tenne hedo qixxeessinoonnihu roore dagate lallawo shiqishshannorira ikkirono gambooshshunniwa kifile shiqishshannore baala kaaꞌlitanno.—2 Xi. 4:2; Tit. 1:9.

9. Lallawo leellanno garinni shiqisha hasiissannohu mayraati?

⁹ Lallawote gafa xawe leellanni garinni qixxaawi. Shiqishatto lallawo mannaho xabbe leeltara hasiꞌrattoti egennantinote. Shiqishatto lallawo raqaxantinota ikkituro macciishshanno manni billaachaawara dandaanno. Leellanno garinni shiqishate aane noore assa dandaatto: (1) Lallawo hanafatto woyte qara qara hedo xawisse kuli. (2) Mitte hedo gudittokki wolete saꞌooti; tenne hedo xawisse kuli hattono wolete saꞌꞌattora albaanni taxxi yii. (3) Lallawo gudattora albaanni qara qara hedo xaphi assite wirro kuli.

10. Shiqishatto lallawo lowo geeshsha baxa hasiissannohehu mayraati?

¹⁰ Shiqishatto lallawo baxi. Shiqishatto lallawo baxattoha ikkiro, iibbado giddonni coyiꞌratto. (Law. 2:4, 5; Soq. 4:20) Lallawonna giddose noo qummeeshshuwa hiinca shiqishatto lallawo baxatto gede kaaꞌlitannohe. Yunayitidi Isteetisete heeꞌrannohu 70 diro ikkannosi rodii shiimu heeꞌre macciishshino lallawo qaage togo yiino: “Lallawo shiqishino rodii Maganu Qaale nabbambeemmo woyte seekkine hiinca hasiissannonketa kule jawaachishinonke gara xaa geeshsha qaageemmo. Isi woꞌma giddonni coyiꞌranni tenne assa dandiinanni gara xawise kulinonke. Tini lallawo, Qullaawa Maxaafa nabbawe lowore roseemmo gedenna albinni roore Yihowawa shiqeemmo gede kaaꞌlitinoe.”

11. Lallawo shiqishatto woyte macciishshano kaaꞌlitannota mite hedo badde kula dancha ikkitinohu mayraati? (1 Xi. 4:13-16)

¹¹ Macciishshaanote hasiisannonsarenna roso loosu aana hosiisate kaaꞌlannonsare kuli. Mulla roso saysantenni qummeeshsha horoonsidhe macciishshaano jawaachishi hattono roso loosu aana hosiissanno gara kuli. Lawishshaho soqqamaasinchu Phaawuloosi, Ximootewoosi Efessooni soqqami yannara uyinoonnisi looso loosanno woyte ayyaanaamittesi kaajjishiꞌrate hasiisannosire bade kule amaalinosi. (1 Ximootewoosi 4:13-16 nabbawi.) Macciishshaanokkira hasiisannonsare hedi hattono roso loosu aana hosiisate assa hasiissannonsare affanno gede kaaꞌli.

12. Lallawo barru baala hasaawatto garinni shiqisha dancha ikkitinohu mayraati?

¹² Lallawo barru baala hasaawatto garinni shiqisha dandaatto gede huurokki fushshite rosiisiꞌri. Lallawo borreessidhe hakkiinni laꞌanni shiqishantenni barru baala hasaawatto garinni shiqisha mannu seekke macciishshannohenna yaattori leellannonsa gede assitanno. Nabbawatenna Rosiisate Dandiittore Baala Assi yitanno biroshere, “Barru baala hasaawatto garinni, shaqqillunninna rosiisatto roso ammanattota leellishanno garinni coyiꞌri” yitanno. Woꞌma giddokkinni coyiꞌrattoha ikkiro macciishshaano lallawokki roore baxxanno hattono loosu aana hosiisate kaꞌanno.

13. Songote giddo rosiissannori woꞌnaalshu noonsare amaaꞌla hasiissannonsahu mayraati? (Misileno lai.)

¹³ Woꞌnaalshu noosi rodoo amaaꞌli. Tenne assa dandaattohu hiittoonniiti? Balaxxe lallawokki woꞌnaalshu noosi rodiira leellishattoranna isi kulannohe hedono ledde shiqishattoha ikkara dandaanno. Qoleno woyyeessiꞌra hasiissannohere kulannohe gede lallawo balaxxe isi laꞌꞌanna shiqishi. (Law. 1:5) Woyyeessiꞌra hasiissannonkere uminkenni afiꞌneemmohu woꞌmanka woyte diꞌꞌikkino; hakko daafira kuni rodii lallawo danchu garinni shiqishatto gede kaaꞌlannohe. Macciishshannonke manni Maganu Qaali giddo noote muxxe jironni horo afiꞌranno gede kaaꞌlate rosiisate dandoonke woyyeessiꞌra hasiꞌneemmo.a

SEEKKINE MACCIISHSHINEEMMORE IKKINEEMMO GARA

14. Faarso 119te borreessaanchihu gedee akati heeꞌrannonke gede assiꞌra hasiissannonkehu mayraati? (Faarso 119:24, 111, 167)

¹⁴ Yihowa amaale lowo geeshsha hasiissannota ikkase qaangummoro seekkine macciishshineemmo. “Dandee heeꞌrate qarrisannohu” konni diri giddo iillannonke qarra dandiine saꞌꞌate Yihowa amaale hasiissannonke. (2 Xi. 3:1) Macciishshinanni heeꞌnoommo rosi konni albaanni duucha hinge macciishshinoommoha lawannonke woyte, Maganu aannonke amaalera Faarso 119te borreessaanchira noosi gedee lao heedhannonke gede assiꞌra hasiissannonke.—Faarso 119:24, 111, 167 nabbawi.

15. Gambooshshunniwa shiqqannonketa ayyaanaamittete sagale naandeemmota leellisha dandiineemmohu hiittoonniiti?

¹⁵ Israeele Yihowa halalla uyinonsa menna naada hasiissinnonsante gede ninkeno Yihowa shiqishannonketa ayyaanaamittete sagale naada hasiissannonke. (Ful. 16:15, 31) Insa menna umi qara lowo geeshsha naaddinoti dihuluullissannote. Kuni menni Yihowa uynonsaho, coommannoho hattono heeshshote heeꞌrate hasiisannonsaho. Kayinni mite yanna gedensaanni mitu Israeelete manni barru baala menna ita ceeꞌmino. (Kir. 21:5) Ninke tennenni maa ronseemmo? Shiqqannonketa ayyaanaamittete sagale rosaminori gede woy hasiisannokkiri gede assine laꞌꞌa horo dihasiissannonke. Tenne sagale buicho Yihowa ikkinota deꞌnoonke. Tenne sagale Yihowa dirijjite seekkite hedde qixxeessitinota ikkitinota qaango. Qoleno konni rosinni afiꞌneemmo hayyo hegere heeshsho afiꞌrate kaaꞌlitannonketa qaaga hasiissannonke.—Law. 3:13, 16-18; Yoh. 17:3.

16. Yihowara lowo yanna soqqantinore mite soqqamaano gambooshshunniwa seekkite macciishshitanno gede kaaꞌlinonsari maati? (“Seekke Macciishshate Kaaꞌlitanno Hedo” yitanno saaxineno lai.)

¹⁶ Aane noore loosu aana hosiinseemmoha ikkiro seekkine macciishshineemmore ikkineemmo. Hanni Yihowara lowo yanna soqqantinore mite soqqamaano gambooshshunniwa seekke macciishshate kaaꞌlinonsare laꞌno. Yihowara 30 saꞌꞌanno diro soqqantinoti Ashili togo yitino: “Gambooshshunniwa seekkine macciishshate qaru coy qixxaambe haꞌrate. Qixxaawa hoogummaro dawaro qola qarra ikkitannoe hattono hedo bebbeehantannoe.” Yihowara 52 diro soqqaminohu jooziseefi togo yiino: “Konni albaanni afoommore hige hige macciishsha diceeꞌmishannoe; korkaatuno lallawo shiqqanna hattono wolootu dawaro qoltanna macciishsheemmo woyte hakko coy daafira lede haarore rosanni noommo. Mittu rodii lallawo shiqishate fushshiꞌrinoha ikka hoogiro nafa coyiꞌranno gara ikkikkinni Maganu Qaali giddonni kulanno sokka illachisheemmo.”

17. Gambooshshunniwa seekkite macciishshate maa assa dandaatto? (Misileno lai.)

¹⁷ Hanni gambooshshunniwa seekkite macciishshate kaaꞌlannoheha mito coye lende laꞌno. (1) Sagale gambooshshu hanafara albaanni itattoha ikkiro baqqi yite macciishshatto gede shiima iti. (2) Gambooshshe yannatenni hadhe ofollatto baycho balaxxe layiꞌri. (3) Elektirooniksete uduunnichokki macciishshattota hoolannohekki gede assite wodhi. (4) Gambooshshunniwa shiqannore quqquxante agadhi. (5) Lallawo shiqishanno rodoo illachishi. (6) Harancho qaagishsha woy qara qara hedo borreessite amaxxi. (7) Qara qummeeshshuwanna rosu isi isiniiwa xaadino gara hedate woꞌnaali. (8) Ateneeto togo yite xaꞌmi, ‘Konne roso ammanate roduuwaꞌyanna woloota kaaꞌlate horoonsiꞌra dandeemmohu hiittoonniiti?’ (9) Woradunna qoqqowu gambooshshi hanafara albaanni barru cuꞌmo, mitte mittente lallawo birxichonna qara qummeeshshuwa lai. (10) Pirogiraame hanaffara albaanni ofolte fannanni muuziiqanna viidiyo seekkite macciishshite gambooshsheho wodanakki qixxeessiꞌri.

WOꞌMANKA WOYTE YIHOWA ROSIISANNOHERE MACCIISHSHI

18. Woꞌmanka woyte gambooshshunniwa macciishsha hasiissannonkehu mayraati?

¹⁸ Woꞌmanka woyte gambooshshunniwa macciishsha hasiissannonke; korkaatuno tini Yihowa “keeraanchimmate doogora” massagannonke gede assitanno. (Fa. 23:3; 31:3) Gara ikkinore assa agurreemmokki gede Yihowa aanno biddishshi hasiisannonke. Hakko daafira gambooshshunniwa ‘macciishshatto gara seekkite hedi’ hattono rosoottore loosu aana hosiisi. (Luq. 8:18) Yihowa macciishshitannori xaa yannara hagiirraamma ikkitanno hattono albillitte hegere heeshsho afidhanno.—Fa. 119:2, 14.