‘Rosiisate Hayyo’ Woyyeessiꞌri

1. Hiittenne dandoo woyyeessiꞌra hasiissannonke? Mayra? (2 Ximootewoosi 4:2) (Misileno lai.)

YESUUSI haꞌrunsaanosi, “Manna rosaanoꞌya asse; . . . hajajoommoꞌnere baala agadhitanno gedeno rosiissensa” yiino. (Mat. 28:19, 20) Tini hajajo baalunku Kiristaani manna rosiisa hasiissannonsata leellishshanno. Hige Yihowa “suwashshu wodani noonsa” manna isiwa abbanno; sokkaasineno togoo manninni xaandeemmo gede kaaꞌlitannonke. (Soq. 13:48; Yoh. 6:44; Aju. 14:6) Ikkirono ninke, ninke widiidire assa hasiissannonke. Hanni soqqamaasinchu Phaawuloosinna Barnabaasi lawishsha laꞌno. Qullaawu Maxaafi insa Iqooniyooni noohu xaadu mine ‘dancha gede sabbakkino daafira lowo Ayihudootinna Girikooti ammaꞌnitinota’ kulanno. (Soq. 14:1) Phaawuloosinna Barnabaasi “rosiisate hayyo” woyyeessidhinoti dihuluullissannote. (2 Ximootewoosi 4:2 nabbawi.) Ninke baalunkuno tenne hayyo woyyeessiꞌrate sharrama hasiissannonke.

2. Mitu roduuwira rosiisate dandoo woyyeessiꞌra dandiitannokkiha lawannonsahu mayraati?

² Mitu roduuwi gari roso rossinokkihura woy kalaqamu dandoo noonsakki daafira, rosiisate dandoo woyyeessiꞌra dandiitannokkiha lawannonsa. Qullaawu Maxaafi giddo kulloonniri mitu labballino ikkadda diꞌꞌikkinoommo yite heddino. (Ful. 4:10; Erm. 1:6) Mitootu qolte soqqanshote dancha guma afidhinokkihura worba rosiisaano ikka didandiineemmo yite heddanno. Hige sabbankeemmoha dancha duduwo macciishshe adhannohu baalanka manna diꞌꞌikkino. Qoleno dancha guma afiꞌneemmohu dancha gede rosiinseemmore ikkinoommo daafira calla diꞌꞌikkino. Aleenni qummi assininte gede, Yihowanna sokkaasine suwashshu wodani noonsa manninni xaandeemmo gede kaaꞌlitannonke. Ikkirono dancha duduwo baxisanno garinni kulate dandiinummore baala assa hasiꞌneemmo. Hakko daafira konni birxichira rosiisate hayyo woyyeessiꞌra dandiineemmota sase doogga laꞌneemmo.

MANNAHO HEDDINANNITA LEELLISHSHE

3. Yesuusi mannu wodanira coanno garinni rosiisa dandiinohu mayraati?

³ Qullaawu Maxaafi Yesuusi ‘manchu giddota afinota’ kulanno. (Yoh. 2:25) Tini yaatto Yesuusi mannu hedanno garanna hakko garinni hedannohu mayraatiro afinota leellishshanno. Yesuusi mannu wodanira coanno garinni rosiisa dandiinohu insara hasiisannore afino daafiraati. Isi mannu ayyaanaamittetenni gattaawinotanna ammaꞌnote massagaano lowo seera fushshite heeshshonsa qarraataame assitinota afino. (Mat. 9:36; 23:4) Konnira Yesuusi ilaalaho heeꞌre sabbaki woyte mannaho fooliishsho aannore rosiisino. Batinyu manni Yesuusiwa daynohu, isi insa mittu mittunkura hasiisse noo hajo daafira rosiisinohuraati.

4. Mannaho hendeemmota leellisha dandiineemmohu hiittoonniiti? (Misillano lai.)

⁴ Sabbankeemmo mannira yaaddo ikkinonsari maatiro hedate woꞌnaalle insara hendeemmota leellisha dandiineemmo. Dancha duduwo kulleemmohu mittu mittunku manchira tenne busha Sheexaanu alame giddo qarru iillannosi. Tenne qaaganke qoqqowinkera heeꞌranno manna mararreemmo gede kaaꞌlitannonke. Lawishshaho, qooxeessinkera heeꞌranno manna yaachishshinoti yannitte haja no? Annuwanna amuuwa oosonsara rosu mine iillannonsari yaachishannonsa? Batinyu mannira looso afiꞌra qarra ikkitannonsa? Qullaawu Maxaafi aanno hexxo anfikkinni konni ‘qarrisanno dirira’ heeꞌra mageeshshi geeshsha ayirritannoro hedi.—2 Xi. 3:1; Isa. 65:13, 14.

5. Yesuusi Farisootu gedeeha diꞌꞌikkino yineemmohu mayraati? (Maatewoosi 11:28-30)

⁵ Yesuusi manna baxanno; isi manna amadanno gari tenne leellishanno. Isi horo Farisootu gedeeha diꞌꞌikkino; insa manna woffi assite laꞌanno hattono miiccanno. (Mat. 23:13; Yoh. 7:49) Ikkollana Yesuusi manna shaqqillunni amadanno hattono ayirrisanno. Isi “shaqqadohonna wodana joogaho;” tini worba rosiisaancho ikkanno gede assitinosi. (Maatewoosi 11:28-30 nabbawi.) Ninkeno rosiinseemmo manna shaqqillunni amadanna ayirrisa hasiissannonke.

6. Sokkanke macciishsha gibbannorira shaqqillenna ayirrinseemmonsata leellisha dandiineemmohu hiittoonniiti?

⁶ Mitu manni sokkanke macciishsha dihasiꞌranno; wolootu isinni hanqite kaꞌanno. Ikkina togoo woyte ma assa hasiissannonke? Yesuusi gibbannonkere cincineemmo gede calla ikkikkinni, ‘gibbannonkerira danchare assineemmo gede, runtannonkere maassiꞌneemmo gedenna xontannonkerira huuccatto assineemmo gede’ rosiisinonke. (Luq. 6:27, 28) Insa sokkanke macciishsha gibbannohu mayraatiro hendummoro Yesuusi yiinore assa diayirritannonke. Hige mitootu sabbankeemmo sokka feexidhe gibbanno. Wolootu kayinni sokkanke macciishsha gibbannohu ninke assinoommori heeꞌreenna ikkikkinni, maatensa giddo qarru kalaqaminohura woy woluri yaachishannori tuncu yiinonsahura ikkara dandaanno. Woy insawa marroommohu busha saatera ikkara dandaanno. Insa sokkanke gibbanno korkaati ikkihano ikkiro, aante noo amaale haꞌrunsa hasiissannonke: “Mittu mittunku manchira dawaro qola hasiissannoꞌne gara affinanni gede, coyidhinanni coyi ayewoteno maxinetenni cuukkinoonnihu gede nyammo afiꞌrinoha ikko.” (Qol. 4:6) Manna mararreemmohanna hasiisannonsari maatiro afate woꞌnaalleemmoha ikkiro, insara dihanqineemmo hattono worba rosiisaano ikka dandiineemmo.

MAGANU QAALE HOROONSIDHINE ROSIISSE

7. Yesuusi rosiisanno woyte Maganu Qaale horoonsiꞌrannota leellishinohu hiittoonniiti? (Yohaannisi 7:14-16)

⁷ Yesuusi umisi egenno diaddaxxino. Isi mannaho Maganu Qaale rosiisino; qoleno huwatate qarrisannokki garinni rosiisinonsahura rossinore qaaga qarra diꞌꞌikkitannonsa. Qullaawu Maxaafi Yesuusi ‘borreessaanote gede ikkikkinni silxaane noosi manchi gede ikke rosiisinota’ kulanno. Konnira mannu ‘lowo geeshsha dhagge assiꞌrino.’ (Maq. 1:22) Yesuusi waro heedhanno borreessaano rosiissanno woyte, egennantinori ammaꞌnote massagaano coydhinore qummi assitanno. Yesuusi kayinni Qullaawa Borronni qummi assanno. Isi Maganu Beetto ikkino daafira hasiꞌroommero iima noo waro afiꞌrinota lowo egenno kule mannu afoo amaxxanno gede assara dandaanno. Isi kayinni hatto diassino. Hatteentenni Qullaawa Borro horoonsiꞌre Maganu fajjo maatiro rosiisino. (Yohaannisi 7:14-16 nabbawi.) Addanko, Yesuusi rosaanosira kaajja lawishsha ikkino.

8. Soqqamaasinchu Pheexiroosi Yesuusi lawishsha haꞌrunsinohu hiittoonniiti?

⁸ Yesuusi rosaanono rosiissanno woyte Maganu Qaale horoonsidhanno. Hanni lawishshaho, 33 M.D. Phenxeqosxete ayyaani barra soqqamaasinchu Pheexiroosi shiqishino lallawo laꞌno. Pheexiroosi gari roso dirosinoho. Ikkirono isi Qullaawa Borro horoonsiꞌre Yesuusi aana woꞌmitino masaalo mannu wodanira coanno garinni xawise kulino. (Soq. 2:14-37) Tini may guma abbituyya? “Coyiꞌrinore hagiidhe adhino manni cuuami; hakko barra 3,000 meddi yaanno manni lexxi.”—Soq. 2:41.

9. Rosiinseemmo woyte Maganu Qaale horoonsiꞌra hasiissannonkehu mayraati?

⁹ Maganu Qaali geeshsha mannu wodanira coanno garinni rosiisate kaaꞌlannori woluri dino. (Ibi. 4:12) Hakko daafira rosiinseemmo woyte Qullaawa Maxaafa horoonsiꞌra hasiissannonke. Uminke hedo ikkikkinni ‘qaale sabbankeemmo.’ (2 Xi. 4:2) Lawishsha 2:6 togo yitanno: “Egenno aannohu Kaaliiqaati; egennonna buuxa daggannohu isiwiinniiti.” Hakko daafira Qullaawa Borro horoonsiꞌne sabbankeemmo woyte Yihowa coyiꞌranno gede assinanni heeꞌnoommo yaate. (Mil. 2:7) Mannu Qullaawu Maxaafi rosiisannori mannu hayyo koꞌo hune roorannota afara hasiꞌneemmo. Qullaawu Maxaafi Maganu ayyaaninni borreessaminoho; kuni Maxaafi Kalaqaanchonke hagiirsiisatenna hagiirru noo heeshsho heeꞌrate maa assa hasiissannoro kulannonke.—2 Xi. 3:16, 17.

10. Xiinxallinseemmo manni Maganu Qaale illachishanno gede assa dandiineemmohu hiittoonniiti?

¹⁰ Qullaawa Maxaafa xiinxallisate qixxaabbinanni woyte, xiinxallissinanni manni Qullaawa Maxaafa illachishanno gede kaaꞌla dandiitinanni doogga hedde. Misillanna viidiyubba rosu xawe leellannonsa gede kaaꞌlitannonsaha ikkirono, rosaanoꞌne xiinxallitanni noohu Qullaawa Maxaafa ikkinota huwattanno gede kaaꞌlensa. Hakko daafira qara qummeeshshuwa nabbabbe hattono rosaanoꞌne qummeeshshuwate hedo huwattanno gede kaaꞌlensa. Misilla woy viidiyubba horoonsidhine rosiissinanni woyte rosaanoꞌne rosiinsara hasiꞌnoonniha Qullaawu Maxaafi roso huwattinoronna teꞌee buuxxe. Tenne assate lowore coyiꞌra woy batinye qummeeshshuwa nabbawa hasiissannoꞌne yaa diꞌꞌikkino. Hatteentenni rosaanoꞌne nabbabbinoonni qummeeshshi tiro huwattanno gede yanna uyiyyensa; hasiisannoha ikkiro hakkonne qummeeshsha wirro nabbabbe. Hatto assineemmoha ikkiro, maxaafa, misile woy viidiyo ikkikkinni Qullaawa Maxaafa xiinxallinsanni heeꞌnoommo yaate.—1 Qo. 2:13.

11-12. (a) Qullaawu Maxaafi rosaanonke cinca dandiineemmohu hiittoonniiti? (Soqqamaasinete Looso 17:1-4) (Misileno lai.) (b) Mitu mannira Qullaawu Maxaafi daafira noonsa egenno mageeshshite? Insa kaaꞌla dandiineemmohu hiittoonniiti?

¹¹ Rosaanchikkira rosanni noore huwata qarra ikkitusiro, ‘qaale lowo cincanni rosiisa’ hasiissannoheta qaagi. Baalanti rosaano taalo lophitanno yaa diꞌꞌikkino. Mite rosaanora ninke qarrammummokkinni huwantoommo halaale huwatate lowo yanna hasiissannonsaha ikkara dandaanno. Phaawuloosi Teselonqe heedhanno Ayhudootira sabbaki woyte, insa giddo mitu rosiisinonsare huwattinohu isi Qullaawa Borronni duucha hige xawise kulinsahu gedensaanniiti.—Soqqamaasinete Looso 17:1-4 nabbawi.

¹² Rosaanonke cincineemmota leellisha dandiineemmoti wole doogo insa xaꞌmo xaꞌmatenna dawaro qolta geeshsha agarate. Coydhanno woyte seekkitine macciishshe hattono hedonsa huwatate woꞌnaalle. Hakkiinni hattenne hajo daafira Yihowara noosi lao maatiro huwattanno gede kaaꞌlate mite qummeeshshuwa nabbabbine hasaabbe. Qoleno tenne hedde: Mitu manni Qullaawu Maxaafi giddosi maa amadinoro horo diafino. Hakko daafira Qullaawu Maxaafi giddo lowohu kaaꞌlanno rosi noota kulate Haaro Alame Tirora hanafote nooha “Maganu Qaalinni Ronseemmo Roso” yaanno gafa leellisha dandiitinanni. Hakkiinni xaꞌmo 15 noo qummeeshshuwa giddo mitte woy lame nabbabbine Qullaawu Maxaafi hagiirraamma ikkineemmo gede kaaꞌlannonke gara kultinansara dandiitinanni. Rosaanoꞌne Maganu Qaali lowo wolqa afiꞌrinota huwattanno gede kaaꞌlitininsaro, dancha guma afidhinanni.

MANNU YIHOWA ILLACHISHANNO GEDE KAAꞌLE

13. Sabbankeemmo woyte mannu aye illachishanno gede assa hasiissannonke? Lawishsha kuli.

¹³ Mixonke sabbankeemmo manni Yihowa afanno gedenna isiwa shiqanno gede kaaꞌlate. (Yaq. 4:8) Mittu manchi tunsote mitore hasiꞌranna anfummoro leellannosi gede baatire ganneemmo. Kayinni baatire ganneemmohu ninkewa qolle ikkikkinni hakkonni hasiꞌranni noo uduunnichi aanaati. Ninkeno rosiinseemmo woyte mannu ninke ikkikkinni Yihowa illachishanno gede assa hasiissannonke.

14. Rosaanchinke Yihowa illachishanno gede kaaꞌla dandiineemmohu hiittoonniiti?

¹⁴ Qullaawa Maxaafa xiinxallissinanni woyte, rosaanchiꞌnera Yihowa hagiirsiisate hasatto heedhannosi gede kaaꞌlesi. (Law. 27:11) Rosaanchiꞌnera garanna gara ikkinokkire calla rosiissine agurtinoonte. Rosaanchiꞌne Yihowa hagiirsiisate biddi assiꞌra hasiissannosire biddi assiꞌrara hasidhinanniti egennantinote. Lawishshaho, rosaanchiꞌnera mitte busha gade qeeꞌla qarra ikkitinosiha ikkiro iso togo yitine xaꞌma dandiitinanni: “Yihowa togoo assoote giwannohu mayraati? Yihowa baxisannoheha mito coye agurattora hasiꞌrannohu mayraati? Yihowa konne coye agurattora hasiꞌrannohu baxannohehuraati yineemmohu mayraati?” Rosaanchikki albinni roore Yihowa daafira hedanno gede kaaꞌlittosiro, Yihowa mageeshshi geeshsha baxannosiro albinni roore huwatanno. Tini isi Yihowa hagiirsiisa hasiꞌranno gede kaaꞌlitannosi.

ROSIISATE HAYYO WOYYEESSIꞌRA AGURTINOONTE

15. Woꞌmanka woyte rosiisate hayyo woyyeessiꞌrate maa assa dandaatto?

¹⁵ Rosiisate hayyo woyyeessiꞌratto doogga huwatatto gede kaaꞌlahera Yihowa huucciꞌra dandaatto. (1 Yo. 5:14) Yihowa songote gambooshshiwa qajeelsannonke gara seekkine illachinshe huuccattonke ledo sumuu yaannore assino. Qullaawa Maxaafa xiinxallisatto woyte worba rosiisaano koysa dandaatto. Hakkiinni maa woyyeessiꞌro yite xaꞌmi. Qoleno rosaanchokki xiinxallissanni nootto hajo daafira ati afootto yaa rosaanchikkino afino yaa ikkinokkita qaagi. Hatte hajo daafira isira may macciishshamannosiro hedate woꞌnaali. Hakkiinni rosaanchikki sabbankeemmo sokka addanka dancha duduwo ikkitinota huwatanno gede kaaꞌlisi. Tini isi Yihowa ledo muli jaalooma kalaqiꞌranno gedenna addu hagiirre afiꞌranno gede kaaꞌlitannosi.—Fa. 1:1-3.

16. Rosiisate hayyo woyyeessiꞌnummoro afiꞌneemmo horo maati?

¹⁶ Lowo geeshsha hagiirsiisannonke coy giddo mittu wolootaho Yihowa daafira rosiisate. Albillitte haaro alamera sabbakate loosi roore hasiisanno. Konnira dancha duduwo sabbankeemmo woyte, mannaho heda, Qullaawa Maxaafa horoonsiꞌranna mannu Yihowa illachishanno gede kaaꞌla agurroonke. Hatto assineemmoha ikkiro, soqqammeemmo woyte rosiisate hayyo woyyeessiꞌra dandiineemmo.