Soqqanshote Gaamo Qixxaawonni Horo Afidhe

1-2. Soqqanshote gaamo qixxaawo daafira batinyu roduuwira may macciishamannonsa?

DANCHU DUDUWI halashshaancho ikkatto gede fajjinihe yanna qaagatto? Hakko barra Yihowa magansidhannotenna suꞌmasi guwissannote halaꞌlado gaamo wido ikkootto. (Fa. 148:1, 2, 12, 13) Qoleno hakko barranni shiimu roduuwi noote soqqanshote gaamo wido ikkoottoha ikkara dandaanno. Soqqanshote gaamo Maganu Gashshootiha dancha duduwo “uulla woꞌmate” duduwate looso umo fushshineemmo gede lowore kaaꞌlitannonke.—Mat. 24:14.

² Soqqanshote gaamo qixxaawo daafira may macciishshamannohe? Wendia yinanni rodoo togo yitino: “Tini qixxaawo soqqanshoꞌyara lowore kaaꞌlitinoe. Wolootuwiinni haaro sabbakatenna rosiisate dandoo rosoomma, ayyaanaamittete mixo fushshiꞌranna wonshiꞌra dandoomma hattono tenne baxillu qixxaawonni geedote jaalla afiꞌroomma.” Richi yinanni rodii togo yiino: “Soqqanshote gaamoha aliidi laꞌꞌaancho ikke soqqama lowo qoossooti. Halashshaano mittu manchi cuuamate deerra iillanno gede kaaꞌlituro, soqqanshote gaamohu aliidi laꞌꞌaanchi isi albillitte ayyaanaamittetenni lophanno gede kaaꞌlate baxxitino qoosso afiꞌranno.” Diina yinanni rodoo, “Soqqanshote gaamo qixxaawo dhagge ikkitannote. Tenne gaamo maateꞌya gede asse laeemma!” yitino.

3. Konni birxichira maa xiinxallineemmo?

³ Konni birxichira umo soqqanshote gaamohu aliidi laꞌꞌaanchinna kaaꞌlaanchisi loosi maatiro hattono insa gaamonsa giddo noore kaaꞌlitanno gara laꞌneemmo. Hakkiinni soqqanshote gaamonke qinaabbinota ikkitanno gede mittu mittunku assa dandiineemmore ronseemmo. Jeefote tenne qixxaawonni horo afiꞌneemmo gara ronseemmo.

SOQQANSHOTE GAAMOHA ALIIDI LAꞌꞌAANCHONNA KAAꞌLAANCHOSI

4. (a) Soqqanshote gaamohu aliidi laꞌꞌaanchihu qaru qeechi maati? (b) Soqqanshote gaamohu aliidi laꞌꞌaanchi gaamosi towaatannohu hiittoonniiti? (“Soqqanshote Gaamoha Aliidi Laꞌꞌaancho Kaaꞌlitanno Hedo” yitanno saaxine lai.)

⁴ Soqqanshote gaamohu aliidi laꞌꞌaanchi, gaamosi giddo noori ayyaanaamittetenni lophitanno gede kaaꞌlara cimeeyyete bisi gaamannoho songote cimeessaati.b Isi tenne assa dandaannohu hiittoonniiti? Umihunni isi gaamosi giddo noore addinta kaaꞌla hasiꞌranno. (Law. 27:23) Isi baqqi yee towaatannonsa hattono insa ledo ganye xaadanno. Tini ayyaanaamittetenni jawaachishannonsanna mitore asse kaaꞌlannonsa gede assitannosi. (Law. 12:25; Isa. 32:2; Yaq. 2:15-17) Layinkihunni, isi mittu mittunku halashshaanchi woꞌmanka woyte soqqamanno gede kaaꞌlanno. Roorenkanni lamalate jeefora albisa ikke diinaggaawe soqqamanno. Qoleno jawaachishatenna qajeelsate mittu mittunku halashshaanchi ledo ganye soqqamanno. Isi nookki woyte kaaꞌlaanchisi woy tennera ikkado ikkino halashshaanchi gaamote giddo noore tawaatanno gede assanno. Sayikkihunni, cuuantino labballi songote giddo loonsanni loosira ikkadda ikkitanno gede kaaꞌlanno. (1 Xi. 3:1) Isi assitannorira galatannonsa, Qullaawa Borro amaale aannonsa hattono labballu roduuwi songote soqqamaanonna songote cimeeyye ikkitanno gede ganye qajeelsannonsa. Gaamonnihu aliidi laꞌꞌaanchi loosi lowo geeshsha hasiisannoha ikkino daafira cimeeyyete bisi tennera ikkado ikkino cimeessa dooranno.

5. Soqqanshote gaamora aliidi laꞌꞌaano ikkite soqqantannori mite cimeeyyera hiittoo qarri tuncu yaannonsa?

⁵ Gaamonnihu aliidi laꞌꞌaanchi gaamosi giddo noore kaaꞌlanno woyte qarra ikkannori tuncu yaasira dandaanno. Lawishshaho Jarmanete heeꞌrannohu Yorgi yinannihu soqqanshote gaamohu aliidi laꞌꞌaanchira wole cimeeyyente gede songote giddo batinyu qeechi noosi. Isi togo yiino: “Duucha looso loosa shota diꞌꞌikkitino. Hakko daafira gaamoꞌya giddo noore mitto mittonka kaaꞌlate fushshiꞌroommo mixo wonshiꞌra qarra ikkitinoe.” Ugaandaho heeꞌrannohu 70 diro ikkannosihu Aabeeli yinanni cimeessi togo yiino: “Songonkera noo cimeeyyenna songote soqqamaano shiimate. Hakko daafira mitte mittente Soqqanshote gaamo giddo noo halashshaano kiiro lowote. Konnira gaamoꞌya giddo nooha mitto mittonka halashshaancho ganye towaata shota diꞌꞌikkitinoe.” Qoleno Surinaami heeꞌrannohu Obeedi yinanni cimeessi togo yiino: “Woloota qajeelsa baxeemmo. Kayinni woloota qajeelsate yannanna wolqa hasiissanno; qoleno guma afiꞌnannihu woꞌmanka woyte baychonkonni diꞌꞌikkino. Konnira loosu batiꞌrannoehura woloota qajeelseemmohu duuchanka woyte diꞌꞌikkino.” Kuninna togoohu wolu qarri tuncu yaannonsa cimeeyye kaaꞌlansara dandaannori maati?

6. Soqqanshote gaamo giddo noo halashshaano kiiro ajisha aliidi laꞌꞌaanchi insa towaatanno gede kaaꞌlitannohu hiittoonniiti?

⁶ Dandaamannoha ikkiro gaamote giddo noo halashshaano kiiro ajisha hasiissanno; hatto ikkiro aliidi laꞌꞌaanchi gaamosi giddo noore seekke egennanna ayyaanaamittetenni kaajjite heedhanno gede kaaꞌla dandaanno. Songote noo cimeeyye kiiro shiima ikkiturona? Gaamote giddo noo halashshaano kiiro batinseenna aliidi laꞌꞌaanchira loososi umo fushsha qarra ikkitasinte, cimeeyyete bisi gaamote giddo noore towaatanno gede yannate geeshsha songote soqqamaancho gaamara dandaanno. Gaamote giddo noo halashshaano batiꞌra hoogguro soqqanshote gaamori aliidi laꞌꞌaano gaamonsa giddo noore dancha gede kaaꞌla dandiitanno.

7. Cimeeyyete kiiro shiima ikkituro soqqanshote gaamori aliidi laꞌꞌaano gaamonsa giddo noore baala dancha gede towaatate maa assa dandiitanno? (1 Pheexiroosi 5:2) (Misileno lai.)

⁷ Shiima cimeeyye noo songora gaamote aliidi laꞌꞌaancho ikkite soqqantanni noottoha ikkiro Maganu hoshsha towaatate looso kaaꞌlannohe gede kaaꞌlaanchokki qajeelsate illachishi. (1 Pheexiroosi 5:2 nabbawi.) Kaaꞌlaanchikkira looso uy. Lawishshaho saꞌe saꞌe qanchu soqqanshora albisa ikke massaganno gede assi. Isi ledo huuccatto assidhine gaamote giddo noo halashshaano noo gara hasaabbe. Gaamote giddo noore ganyite kaaꞌlaanchikki ledo towaati; towaanyote albaanninna gedensaanni assannore kulisi hattono galatisi. Gedensaanni isi gaamonniha aliidi laꞌꞌaancho ikkate ikkado ikka dandaanno. (2 Xi. 2:2) Qoleno ayyaanaamittetenni gikki yitinori qajeelsitannosi gede xaꞌma dandaatto. Suwisaanonna woꞌnaalshu noonsa halashshaano haaruuddunna woꞌnaalshu noonsakkiri ledo soqqama dandiitanno. Qoleno ayyaanaamittetenni gikki yitinori hasaawa hanafate, galagalle marre hasaawisatenna xiinxallo hanafisiisate kaaꞌlo hasiissannonsare kaaꞌla dandiitanno. Hanni xa mittu mittunku soqqanshote gaamonke qinaabbinota ikkitanno gede kaaꞌla dandiineemmota sase doogga laꞌno.

SOQQANSHOTE GAAMOKKI QINAABBINOTA IKKITANNO GEDE KAAꞌLI

8. Soqqanshote gaamokki qinaabbinota ikkitanno gede kaaꞌla dandaattohu hiittoonniiti? (Rooma 1:12)

⁸ Soqqanshote gambooshshe haꞌri. Wolootu ledo soqqamatto woyte ‘mimmito jawaachishshinanni.’ (Rooma 1:12 nabbawi.) Mitteenni soqqama gaamote giddo noori agarooshshe afidhannonna manna hasaawisa waajjitannokki gede kaaꞌlitansara dandiitanno. Loosu soqqanshote gaamokki ledo soqqamattokki gede assannoheha ikkiro pirogiraamekki biddi assiꞌrate loosiisaanchokki hasaawisa dandaatto? Isi wole barra loosatto gede fajjannoheha ikkara dandaanno. (Neh. 2:4-6) Dhibbunni woy geedhimmatenni kainohunni soqqanshote gaamokki ledo xaada qarra ikkituhero gaamonnihu aliidi laꞌꞌaanchira kuꞌla dandaatto. Isi gaamote giddo noori ledo viidiyotenni xaadde, sokka borreessite woy silketenni soqqamatto gede kaaꞌlahera dandaanno. Wedellichanna dancha ordu fayyimma nooheha ikkittorono ganyite soqqansho fula qarra ikkitinohe? Hatto ikkiro gaamokki giddo noo halashshaanchi ledo lamalate kiiro soqqamate mixo fushshiꞌri. Balaxisiisatto coye woy yannakki horoonsiꞌratto gara wirro layiꞌra hasiissannoheha ikkara dandaanno. (Rom. 12:11; Qol. 4:5) Tenne daafira assattori baalu digaabbisannohe. Kaaꞌlannohe gede Yihowa huucciꞌri. Isi “hasattonna wolqa oye” kaaꞌlannohe.—Fil. 2:13.

9. Soqqanshote gaamonke hagiirrunna baxillu noota assa dandiineemmohu hiittoonniiti? (Rooma 12:13)

⁹ Wosina adhi. ‘Wosina adha roso assiꞌne’ soqqanshote gaamonke hagiirrunna baxillu noota assa dandiineemmo. (Rooma 12:13 nabbawi.) Soqqanshote gambooshshe minenke assinanni gede fajja dandiineemmohano ikkara dandaanno. Mite songuwa lallawo shiqishshannori wole songonni dagguro gaamo bado badotenni wosinsidhanno gede assitanno. Lallawo shiqishino rodii sagalete dayirono daa hoogirono hatte gaamo giddo noo halashshaano sagale itatenna mimmito jawaachishate xaaddanno. Saara yinanniti baxxitino suwisaancho togo yitino: “Wosina adhate daafira hedeemma woyte waajjeemma; ikkirono quwa sainokkire qixxeesseemma. Lowo sagalete qishate yaadantenni wolootu ledo egennamate illachisheemma.” Soqqanshote gaamonke baxillu nootanna maatete gedeeta ikkitanno gede assinummoro Yihowawanna mimmitunniwa albinni roore shinqeemmo.—Neh. 8:10; Soq. 20:35.

10. Soqqanshokki lainohunni mito coye biddi assiꞌra hasiꞌrittoro maa assa dandaatto? (Lawishsha 1:5; 27:17) (Misileno lai.)

¹⁰ Sabbakatenna rosiisate dandookki woyyeessiꞌrate sharrami. Sabbakatenna rosiisate dandookki woyyeessiꞌrittoro gaamokki ledo soqqama roore baxissannohe. Soqqanshokki lainohunni woyyeessiꞌra hasiꞌratto coy no? Gaamokki giddo noo suwisaancho woy woꞌnaalshu noosi halashshaancho kaaꞌlo xaꞌmiꞌra dandaatto. (Lawishsha 1:5; 27:17 nabbawi.) Gaamokkihu aliidi laꞌꞌaanchira mixokki kuli. Isi mixokki wonshiꞌratto gede kaaꞌlahera dandaanno. Qoleno kaaꞌlitannohe gede woloota xaꞌmiꞌra dandaatto. Heezeri yinanni rodoo hatto assitino. Ise manna waajjitannota ikkiturono togo yitino: “Manna galagale mare hasaawisa dandeemma gede kaaꞌlitaera mitte suwisaancho xaꞌmiroomma. Ise baxillenna shaqqille leellishshinoe hattono ane ledo ganyite soqqamate dinye amaddino. Ise galagale mare hasaawiseemma manni giddo mitte mancho xiinxallo hanafisiiseemma gede nafa kaaꞌlitinoe. Ise kaaꞌlo xaꞌmiraꞌyanni hagiidhoomma; xa albi gede soqqansho fula baxissannoe.” Soqqanshote gaamonke qinaabbinota assate duuchu garinni kaaꞌla dandiineemmo.

SOQQANSHOTE GAAMOKKINNI HORO AFIꞌRA DANDAATTOHU HIITTOONNIITI?

11-12. Soqqanshote gaamo qixxaawonni afiꞌrattoti ayyaanaamittete horo maati? Lawishsha kuli.

¹¹ Ayyaanaamittete horo. Mittu mittunku soqqanshote gaamo qixxaawonni ayyaanaamittete horo afiꞌneemmo. Lawishshaho gaamonnihu aliidi laꞌꞌaanchi Yihowa roorenkanni baxannonsare yaano gunnoota, annanna ama afidhinokki oosonna geerra ille wore towaatannonsa. (1 Te. 2:8; Yaq. 1:27) Maganu Gashshootihu sabbakatenna rosiisate loosira addi addi qajeelsha uyinanninke. Lawishsha ikkitannori cuuantino labballira, songote giddo loosira qajeelsha uyinanninsa.—1 Xi. 3:10.

¹² Hanni aleenni qummi assinita Wendi soqqanshote gaamo qixxaawo kaaꞌlitinose gara laꞌno. Ise togo yitino: “Anniꞌya halaale giwanno daafira amaꞌya lamalate jeefora soqqanshote gaamose ledo ganyite soqqama didandiitino. Ani kayinni fajjinannie daafira haꞌreemma. Mitte jawa suwisaancho rodoo jaala ikkitinoe hattono ledoꞌya soqqantanno; ise sabbakeemmanna songote giddo woloota kaaꞌleemma gara rosiissinoe. Gaamoꞌyahu aliidi laꞌꞌaanchi uynoeta Qullaawa Borro amaale dihaweemma; tini xaa geeshsha kaaꞌlitinoe.”

13. Soqqanshote gaamonke kaaꞌlineemmo woyte afiꞌneemmoti wole horo maati? (Misileno lai.)

¹³ Soqqanshote gaamonkenni baxxannonkenna kaaꞌlitannonke jaalla afiꞌneemmo. Gaamonke giddo noori ledo soqqammeemmo woyte dancha jaalla ikkineemmo. (Fil. 1:27) Gaamote giddo noo halashshaano kiiro shiima ikkase manna waajjitannori wolootu ledo dancha jaalooma kalaqidhanno gede kaaꞌlitannonsa. (2 Qo. 6:13) Kuri jaalla dhiwammeemmo, yaaddo amaddannonke woyte woy shiiꞌne xissiisiꞌneemmo woyte kaaꞌlitannonketa addaxxa dandiineemmo. (1 Te. 5:14) Roorenkanni albillitte dancha jaalla hasiissannonketi dihuluullissannote. (Mat. 24:21) Qarrinke hoꞌla hoogara dandaanno; kayinni baxxannonkerinna kaaꞌlitannonke roduuwi noota afanke qarra dandiine saꞌneemmo gede kaaꞌlitannonke.—Law. 17:17.

14. Qarru yannara soqqanshote gaamo widoonni horo afiꞌneemmohu hiittoonniiti?

¹⁴ Qarru yannara afiꞌneemmo horo. Fayya ubbanno woyte, kalaqamu dano iillitanno woyte, hedeweelcho xagisiꞌra hasiissannonke woyte, dartu iillannonkenna angate anje woyte soqqanshote gaamo widoonni kaaꞌlo afiꞌneemmo. Lawishshaho mitte mittente songora nooti soqqanshote komite, soqqanshote gaamori aliidi laꞌꞌaano ledo kaaꞌlo hasiissannonsare kaaꞌlate qixxaawo assitanno. Kalaqamu dano yannara soqqanshote gaamohu aliidi laꞌꞌaanchi gaamosi giddo nooti mitte mittenti maate noowa afatenna hasiisannonsari maatiro lawishshaho xagichu, sagale, galtannowinna uddano hasiissannonsaro afate albisa ikke loosanno. Soqqanshote gaamonke widoonni afiꞌneemmoti baxillu qixxaawo dhagge ikkitannote!

15. Yihowa dirijjite giddo heeꞌnoommore baalanka mitto assannonkeri maati?

¹⁵ Yihowara iimanna uulla iso magansiꞌrannohu batinyu kalaqami noosi. Yihowa dirijjitete iimiidi kifilera calla ammanantinoti lowo miliyoone woy biliyoone ikkitanno sokkaano no. Uullaaydi kifilera barru barrunkunni kaajjitanninna lexxitanni hadhanni noori honse miliyoone saꞌanno soqqamaano noosi. (Zak. 8:23; Aju. 5:11) Yihowa magansidhannore baala, Maganu Gashshootiha dancha duduwo duduwate loosi mitto assannonsa. (Aju. 14:6, 7) Yihowa woꞌmu wodaninkenni guwisiꞌneemmo gede kaaꞌlitannonkete soqqanshote gaamo qixxaawonni woꞌmanka woyte horo afiꞌno.—Fa. 111:1.