Nabbawaano Xaꞌmitanno Xaꞌmo

Daga “keerunna gaꞌlabbo daggino!” yite dudubbannohu mamooteeti?

Bocaasa 2025 Agarooshshu Shaera fulinohu “Nabbawaano Xaꞌmitanno Xaꞌmo” yaanno birxichira, Yihowa muli yannara “tonne buudda” (baalunku poletiku gashshooti) wodanira wolqansanna biilloonyensa ‘duumu moychira’ yaano Halantino Gashshootubbara aate hedo worannota kulloonni. Konne moycho ‘moyichu misileno’ yinoonni. (Aju. 13:14, 15; 17:3, 16, 17) Hakkiinni ‘tonne buuddanna’ insawiinni biilloonye adhino moychi alamete doychora noota kaphu ammaꞌno hunanno. Daga “keerunna gaꞌlabbo daggino!”a yite dudubbannohu kaphu ammaꞌno baꞌara albaanniitinso baꞌuhu gedensaanniiti?—1 Te. 5:3.

Haranchunni, daga “keerunna gaꞌlabbo daggino!” yite dudubbannohu mamooteetiro dianfoommo. Tenne daafira mitto mittonka coye anfoommoro baqqi yine agadha dihasiissannonke. Ikkirono Yesuusi duucha hige rosaanosi, “baqqi yitine agadhe” yee amaalino. (Mat. 24:42; 25:13; 26:41) Hanni xa soqqamaasinchu Phaawuloosi qullaawu ayyaaninni Teselonqe Kiristaanira borreessino sokkara noo masaalo seekkine xiinxallino.

Phaawuloosi, “Keerunna gaꞌlabbo daggino!” yitanna, . . . hakkawoyintenni hedeweelcho bao daggannonsa” yee borreessino. (1 Te. 5:2, 3) Bashsho borruwankera Phaawuloosi coyiꞌrino hedo togo yine xawinsoonni: “Keerunna gaꞌlabbo daggino!” yaanno duduwo quuxxote qarri hanafara shiima yanna gatte heedheenna dudumbanni; quuxxote qarri hanafannohu qole alamete doychora noote kaphu ammaꞌno yaano Batiꞌra Baabiloone baonniiti. Qoleno kuni duduwi quuxxote qarri hanafara noota leellishannoho jeefote malaateeti yine hendeemmo.

Ikkirono, seekkine xiinxallinummohu gedensaanni tini masaalo wolu garinnino woꞌmitara dandiitannota huwantoommo. “Keerunna gaꞌlabbo daggino!” yine dudumbannihu kaphu ammaꞌno baꞌuhu gedensaanni ikkara dandaanno. Hanni hatto yineemmohu mayraatiro laꞌno.

Kaphu ammaꞌno olaho karsantinohu hiittoonniiti? Qullaawu Maxaafi togo yaanno: “Ise [“Foora mancho,” yaano Batiꞌra Baabiloone] giddo, . . . uullate aana gorrinoonni manni baalu mundee anfoonni.” (Aju. 17:1, 5; 18:24) Lowo diro foora mancho olaho karsantanni, finqille kaꞌanno gede assitanninna lowo miliyoone ikkanno manna guddanni keeshshitino. Konnira ise keerenna gaꞌlabbo abbitinoha ikkikkinni olanna finqille kakkayissino. Tini wole xaꞌmo kaꞌanno gede assitanno: Daga “keerunna gaꞌlabbo daggino!” yite dudubbannohu Batiꞌra Baabiloone huntuhu gedensaanni callaati? Ikkara dandaanno; kayinni afoo wonshine coyiꞌra didandiineemmo.

“Keerunna gaꞌlabbo daggino!” yaanno duduwinni aane may ikkanno? Phaawuloosi, “Hakkawoyintenni hedeweelcho bao daggannonsa” yiino. (1 Te. 5:3) Daga “keerunna gaꞌlabbo daggino!” yite dudubbannohu kaphu ammaꞌno baꞌara albaanni ikkiro, insa uminsa baꞌa geeshsha shiima yanna saꞌanno. Kayinni Phaawuloosi “hakkawoyintenni hedeweelcho bao daggannonsa” yiino daafira, daga “keerunna gaꞌlabbo daggino!” yite dudubbannohu kaphu ammaꞌno huntuhu gedensaanni ikkara dandaanno.

Tini masaalo woꞌmitanno woyte Yihowa manni hiitto ikkanno? Phaawuloosi togo yiino: “Roduuwa, heedhinoonnihu tunsichu giddo ikkinokki daafira, hashshu hedeweelcho soodannosi mooraanchi gede, hakku barri hedeweelcho didaannoꞌne.” (1 Te. 5:4) Hanni hedi: “Keerunna gaꞌlabbo daggino!” yine dudumbannihu kaphu ammaꞌno baꞌuhu gedensaanni ikkiro, Yihowa manni daga baꞌanno yanna gambissinota afanno. Dagate kayinni bao hedeweelcho mooraanchu gede ikkite daggannonsa.

Ikkina anfoommo coy maati? Muli yannara ‘tonne buuddanna’ insawiinni biilloonye adhino moychi kaphu ammaꞌno hunanno. Tini quuxxote qarrira hanafote. Qoleno barrunni mitto barra daga “keerunna gaꞌlabbo daggino!” yite dudubbannota anfoommo. Kuni ikkannohu mamooteeti? Masaalo lamu garinni woꞌmitara dandiitannota laꞌnoommo. Umihunni: Konne duduwo dudumbannihu kaphu ammaꞌno baꞌara albaanniiti. Layinkihunni: Konne duduwo dudumbannihu poletiku gashshaano kaphu ammaꞌno woꞌmunni woꞌma huntuhu gedensaanniiti. Hakka woyte may ikkannoro marranni anfeemmo. Duucha woyte Qullaawu Maxaafi masaalo woꞌmunni woꞌma huwanteemmohu masaalo woꞌmitanno woyte woy woꞌmituhu gedensaanniiti.—Yohaannisi 12:16 ledo heewisiisi.

Hatte yanna geeshsha “keerunna gaꞌlabbo daggino!” yine dudumbanni yanna illachishantenni Maganu albaanni minshe nookkire ikkine heeꞌrate sharrammo. Masaalo woꞌmitanno gari ikkihano ikkiro, qixxaambe heeꞌra dandiineemmo gede “baqqi yine heeꞌno; wodanchate dandoonkeno agadhino.”—1 Te. 5:6.