Nabbawaano Xaꞌmitanno Xaꞌmo

Muli yannara Yihowa dagate wodani giddo woranno “hedo” maati?

Ajuuja 17:16, 17 quuxxote qarri hanafanno gara kultanni togo yitanno: “Laittoti tonne buuddanna moyichu, foortanno mancho gibbannose; afidhinore baala mulqite mullicho agurtannose. Maalase ittanno; giirateno tuggannose. Maganu hedinori woꞌma geeshsha, mitteenni sumuu yite gashshootunnita wolqansa moyichoho uyitanno gede tenne hedo wodaninsa giddo worinohu Maganoho.” Konni albaanni borruwankera, Yihowa dagate wodani giddo woranno “hedo” kaphu ammaꞌno hunate hedooti yinanni keeshshinoonni.

Ikkollana konne roso biddi assa hasiissino. Yihowa dagate wodanira woranno hedo, ‘gashshootensa moyichoho uyitanno gedeeti.’ Tini masaalo woꞌmitanno gara huwatate, hanni aante noo xaꞌmuwa laꞌno.

Masaalote giddo luphi assine kulloonniri ayeooti? ‘Foora mancho’ yaano “Batiꞌra Baabiloone” alamennite kaphu ammaꞌno dirijjittara lawishshaho. “Duumu moyichi” Halantino Gashshootubbara lawishshaho; bashsho Qaalu Gondoori Maamara yinanniti tini dirijjite, alamete keere agarsiisate yine 1919 xintinoonnite. (Aju. 17:3-5) “Tonne buudda” moyichoho kaaꞌlantanno gashshootubba baalate lawishshaho.

Foora manchoranna duumu moyichira noonsa aante maati? Foora mancho moyichu “aana ofolte no;” tini ise moyicho kaaꞌlitannotanna isira annata hasidhannota leellishshanno.

Foora manchora mayi iillannose? Moyichunna iso kaaꞌlitannoti tonne buudda “foortanno mancho gibbannose.” Lowo geeshsha gibbannose daafira, jirose mulqidhanno; bunsheseno xawo fushshitanno. Qoleno Yihowa yiino yoo woꞌmitanno gede, woꞌmunni woꞌma huntannose. (Aju. 17:1; 18:8) Hakka woyite kaphu ammaꞌno dirijjitta baala baꞌanno. Ikkollana kuni ikkara albaanni, Yihowa mannu ooso xagge giddo horo ikke egenninokkire assitanno gede daga kakkayisanno.

Yihowa daga maa assitanno gede kakkayisanno? “Wolqansanna mootimmansa [duumu moyichira]” yaano Halantino Gashshootubbara uyitanno gede tonne buudda wodani giddo ‘hedosi’ woranno. (Aju. 17:13) Hanni hatto yaa mayyaatero hedi. Mannu gashshootubba mulla uminsanni kaꞌe wolqansanna mootimmansa moyichoho uyitanno yaateni? Deeꞌni! Masaalo kultanno garinni, insa hatto assitanno gede kakkayisannonsahu Magano umosiiti. (Law. 21:1; Isayaasi 44:28 ledo heewisiisi.) Silxaanensa uyitannohu sunu sununniitini? Deeꞌni! Hedeweelcho rahe soorramannore ikkinoti dihuluullissannote. Hakkiinni haarote mootimma adhino moyichi, kaphu ammaꞌno dirijjitta higge higgannokkita baꞌanno gede asse Yihowa yoo wonshanno.

Muli yannara mayi ikkanno yine agadha dandiineemmo? Gashshootubba sunu sununni Halantino Gashshootubba albinni roore kaaꞌlitanni noota kultanno odoo agadha dihasiissannonke. Aane noori ikkanno yine agadha dandiineemmo: Yihowa silxaanensa moyichoho uyitanno gede, tenne hedo dagate wodani giddo hedeweelcho woranno. Kuni ikkanno woyite, quuxxote qarri hanafara kae noota anfeemmo. Coyi muli yannara hedeweelcho soorramanno daafira, hakka geeshsha “baqqi yine heeꞌno, hattono wodanchate dandoonke agadhino.”—1 Te. 5:6.