Yesuusiha Dancha Duduwo—Kaameeraho Badheenni

Tayixe Yihowa Farciꞌraasine lowo geeshsha quqquxante agadhite keeshshitino coy giddo mittu Yesuusiha Dancha Duduwo yinanni filme Fooliishsho 1 laꞌꞌate. Lowo miliyoone ikkanno manni xa tenne filme laino. Tini 18 fooliishsho giddo umitella! Tenne filme qixxeessate roduuwinke maa assitanni no? Konne looso irkisate ati assoottori maati?

Filme Loossannorenna Viidiyote Gaamo Towaata

Dancha Duduwo yinanni filme roore anga qixxeessinanni heeꞌnoonnihu Awustiraaleezhiyu biironkeraati; hakko filmennita mitte mittenta ikkito kayinsanni woyite 50nni 80 geeshsha ikkanno manni gamba yaanno.a Filme loossannoriranna viidiyote gaamora barri sagale, hurbaatenna mereeroho caqaꞌmi yinannire shiqinshanni. Hiittoo sagale shiqqannoro balanxe seekkine hendanni. Sagalete Owaante Golira soqqantannoti Ester togo yitino: “Danchu waaginni danchare hidha dandiineemmo gede, sagalete ikkanno uduunne babbaxxitino uurrinshubbanni doorre hidhineemmo.” Leddeno, “Qoleno sagale afimalsineemmokki gede, sagale qinshanni biddissa yannate kiiro taashshineemmo” yitino. Mittu manchira calla barru barrunku shoole Ameeriku doolaare meddi yaanno woxe sagalete fushshineemmo.

Filme loossanno roduuwinkeranna viidiyote gaamonkera hasiissannoti sagale calla diꞌꞌikkitino; agarooshshuno hasiisannonsa. Mayira? Awustiraaliyaho diilallo iibbadonna dancha ikkiturono, mito woyite kay qoonte kartanno arrishsho fultanno. Arrishshote gawajjo hoolatenna iibbillu roduuwanke daafursannota gatisate, kaaꞌlaasine roduuwinke dandaami deerrinni addi addiha arrishsho qiissiꞌnanni darganna dunkaana qixxeessitino; qoleno arrishsho hooꞌlate buudhinanni qiwaate, xilanna waa lowoha qixxeessinoonni. Huurotenna Viidiyote Owaante Golira soqqamannohu Keeven togo yee xawisino: “Roore anga konne looso loossanno roduuwi qaensanni hadhe marte Beeteelete kaaꞌlitannoreeti. Insa konnenna wole togoo looso umonsa heeshshi assite hagiirrunni loossanno. Insa hooggoommero, konne looso umo fushsha didandiineemmo.”

Filme Haꞌne Wole Battalara Kaysa

Mite filmete ikkito, sinu biirora lawishshaho filmete yine qixxeessinoonni basera woy istuudiyote giddo kayinsiro hakkeya diseekkanno. Togoo woyite, filme kayinsannihu wole battala haꞌneeti. Korreentete masmari, yannitte doogga, woy yannitte minna (fooqqa) nookkita biꞌree manni heeshsho filme kaysate, filme loossannorinna viidiyote gaamo xeertidhe hadhanno. Uddidhanno uduunnenna horoonsidhanno uduunne garunni usurre, hogombe filmete dargira massine worranni. Filme kaysa hananfara albaanni, loosu qineessaano jenereetere, angannihu xalalu wayinna shumate mini qixxaawinota buuxxanno. Filme loossannorinna viidiyote gaamo qooxeessaho heedhanno roduuwi mine, kaameelu giddo, hoteelete, woy wole hattoo kifilera fooliishshidhanno.

Wole battala haꞌne marre filme kaysa lowo woxi fulanno gede assitanno, yanna guddanno, hattono loossanno roduuwa baasa daafursitanno. Konnira Aliidi Bisi 2023, 2.5 miliyoone Ameeriku doolaare fushshine, wolewa heeꞌnoonniha lawanno gede asse viidiyo leellishanno girgidda hirranni gede fajjino. Tini tekinooloje misile waraꞌa yite leeltanno gede assitanno iskiriinenni loossannota ikkaseno agurranna, gobba heeꞌnoonniha lawanno gede caabbicho misilete garinni soorritanno. Hakko daafira, wole battala haꞌne filme qixxeessinanna fulanno woxe gatisa dandiinoommo. Awustiraaleezhiyu Sinu Biiro Komite miila ikkinohu Daaren togo yee xawisino: “Viidiyote girgidda horoonsiꞌne loosa filme loossanno roduuwira daafuro gatissanno; qoleno mitto gafa hasiꞌni gede marro marro hinge filme kaysa dandiinanni. Lawishshaho, alba gobba fulle loonseemmo woyite, eꞌara kaꞌino arrishsho eꞌukkinni foto kaysate shiimu daqiiqi calla heeꞌrannonke. Viidiyote girgiddinni loosa hananfummoti kay, filme hasiꞌnoommo gede ikkitanke geeshsha banxummo gede eꞌara kaꞌino arrishsho xawaabba kalanqe viidiyo kaysa dandiineemmo.”

“Ani Horo Assoommari Nooha Dilawaae”

Dancha Duduwo yitanno filmera mitte mittente fooliishshora, lowo xibbe ikkitannori filme loossannorinna hakkiinni saꞌino viidiyote gaamo miilla hasiissanno. Kuri roduuwi insa towaatate assinanni sharro ma garinni laꞌanno?

Qaesenni Melborninni kaꞌe tenne projektera beeqqate 700 kiilomeetire hadhannoti Amber yinanni rodoonke togo yite borreessitino: “Horophillu xaawa iillumma saatenni kayse, Beeteelete roduuwi seekkite towaattinoe. Batinyu Beeteelooti sagalete woy shaete koyissinoe. Filme loonsanni baychono baalunku roduuwi wodanaaꞌmeemma gede assitannoe hattono baxille leellishshannoe. Haꞌraꞌyanni lowo atoote afiꞌroomma. Ani horo assoommari nooha dilawaae!”

Deerek tenne viidiyubba loosa kaaꞌlanno rodooti. Isi togo yiino: “Looso hananfummo yannanni kayisse, duuchu loosu goli kaaꞌlinonke. Tenne projektera yannansa, woxensanna wolqansa uyitino roduuwi ledo loosaꞌyanni lowo geeshsha tashshi yiinoe. Insa kaaꞌla baxxannoreeti, maahoyye yitannoreetinna shaqqaddaho. Yihowa insano ninkeno maassiꞌrinonketa afoommo. Isi loosinke abbanno guma calla ikkikkinni, loosonke loonseemmo garano illacha tuge laꞌꞌannota dihuluullameemmo.”

Aante aantete fultannota tenne viidiyubba kaaꞌlate, donate.jw.org widoonnino ikko wole doogganni woxe fushshitinanni daafira galanteemmoꞌne.