Roduuwinkeranna Baattote Seyannore Loosa

Yihowa Farciꞌraasine ikkankenni, Maganu Yihowa mannu pilaaneetenke aana abbino gawajjo ittisate mulenni qaafo adhannota anfoommo. (Yohaannisi Ajuuja 11:18) Ikkollana, baatto towaatate ninkeno dandaaminkere assineemmo. Lawishshaho, magaꞌnote ijaarshuwa qarqaru gawajjamannokki garinni miꞌnineemmo.

Qarqaru gawajjamannokki garinni minate yaa, dandaami deerrinni qarqara daafannore ajishshanno projektuwa loosate yaate. Togoo projektuwanke giddo gama hiikkuriiti? Tini projektuwa fushshotenni afiꞌnoommo woxe garunni horoonsiꞌneemmo gede kaaꞌlitinonkehu hiittoonniiti?

Jajjabbu Gambooshshi Addaraashe Qiissannoricho

Moozaambikete gobbara alba Matoola Jajjabbu Gambooshshi Addaraashe minni woyite girgiddu nookkiha qaaffichu callunni minnoonni. Qorqorro arrishshote iibbille gudisse sayissanno daafira, addaraashe gudisidhe iibbiteenna fooggalu qarrisanno. Hakko qarqarira heeꞌrannohu mittu rodii togo yiino: “Iibbillu batiꞌranno daafira hunkuu qarrisannonke! Roduuwu gambooshshu goofanni heeꞌreennanni rakke gobbara fulte diilallo adhitanno.” Gambooshshu base roduuwinkera Maganu Qaale rosate roore injiitannonsa gede maa assinoommo?

Konne qarra qarqara gawajjannokki garinni tirate woꞌnaalloommo: diilallotenni loosanno woggaraancho qansoommo, hattono iibbille hooltanno karo (insulation) diriirsinoommo. Iibbille hooltanno karo, arrishshotewiinni daanno iibbille ajishshanno; woggaraancho kay dancha ayyare heedhanno gede assitanno. Loossannohu korreentete wolqanni ikka hoogirono, bubbenna kalaqamu diilallo addaraashe eꞌanno gede assite qiissitanno. Mitte woggaraancho waagi 50 doolaare balla ikkanno.a

Tini projekte Gambooshshu Addaraashera dancha ayyare heedhanno gede lowore kaaꞌlitino. Fugantino ayyare heedhannokki daafira, addaraashete giddo albi gede shamme woy bulaaso diheedhanno. Qoleno albi gede kaarboondayioksayde dikuusantanno; oksijiine kay hasiꞌni gede afiꞌnanni. Hakko daafira, gamba yaanno manni injeennansa roore baqqi yee macciishshanno. Aleenni qummeessini rodii togo yiino: “Xa albi gede, gambooshshu goofanni heeꞌreenna gobbara didondeemmo. Sagalete saatera addaraashete giddo ofolline roduuwinke ledo hasaambeemmo. Xa Gambooshshu Addaraashera ofolla, jawa haqqicho hunda caaꞌlate gede baxissannote!”

Xoꞌannokki Buichonni Korreentete Wolqa Afiꞌra

Kalqoomu deerrinni, batinyu ijaarshinkera arrishshote xawaabba korreentete widira soorranno uduunne (PV system) qasiꞌnoommo. Kuni uduunni arrishshote xawaabbinni yaano xoꞌannokki buichonni korreentete wolqa afiꞌneemmo gede kaaꞌlannonke. Konninni kainohunni, korreentete wolqa afiꞌrate qarqara daafannore lawishshaho kasale, zayte woy beenzile hakkey geya dihoroonsiꞌneemmo. PV uduunni qarqara daafe diyaanno; qoleno roduuwinke fushshitino woxi afimalannokki gede kaaꞌlino.

Coy gedera, 2023, PV uduunne Isloveeniyu sinu biironkera qansoonni. Hakko hasiissanno wolqa giddo 30 anga ikkitannota afiꞌneemmohu konni uduunninniiti. Kuni uduunni sinu biirora hasiissannotera aleenni ikkitino wolqa aanno woyte, tirfitino wolqa qarqaru dagoomi horoonsiꞌranno gede assineemmo. Konne PV uduunne 360,000 doolaare fushshine hirroonni. Ikkirono, xa hatti sinu biiro korreentete fushshitanno woxi gariha ikkinokki daafira, konni uduunnira fushshinoommo woxi shoolu diri giddo higannonke.

Qoleno 2024, Siri Laanku sinu biironkera PV paanelenna jawa baatirete kincho eessinoonni. Tenne projektera 3 miliyoone doolaare fushshinoommoha ikkanna, hatte biironkera xibbunni 70 anga korreentete wolqa afiꞌneemmohu konni uduunnichinniiti. Konni uduunnira fushshinoommo woxe, sasu diri callunni qoꞌlineemmo. Hakko dironni, Neezerilaandete sinu biironkerano PV uduunne eessinoonni. Konne uduunne eessate 1.1 miliyoone doolaare fushshinoommo; hatte biironkera 35 anga korreentete wolqa afiꞌneemmohu konni uduunninniiti. Konne uduunne horoonsiꞌrankenni isira fushshinoommo woxe honsu diri giddo qoꞌlineemmo.

Meksikote gobbarano babbaxxitino xeertote tirote biironkera (RTO) PV uduunne eessinoonni. Hanni mitto lawishsha laꞌno: Tarahumara (Mereerima) RTO noohu Chiwaawa yinanni baychooti. Hawado hawado iibbillu jilbi 0°C (32°F) woroonni dirranno; arro kay ruqaꞌne 40°C (104°F) ikkanno! Ikkirono, korreentete fulanno woxi lowoha ikkino daafira, roduuwinke iibbille aannoha woy qiissanno uduunnicho dihoroonsidhanno. Hatte RTOra soqqamannohu Joonaataan yinanni rodii togo yiino: “Hawado bindillisenna duꞌma uduunne uddiꞌneemmo; arro kay maskootta faꞌnine ofollineemmo.”

Hakkiinni 2024, hatte RTOra PV uduunne eessinoonni. Konni uduunnira 21,480 doolaare fushshinoommoha ikkirono, konne uduunne horoonsiꞌrankenni ontu diri giddo hakkey woxi higanno gede assineemmo. Roduuwinke xa iibbille aanno uduunnenna qiissanno uduunne roore horoonsiꞌra dandiitanno. Joonaataani togo yiino: “Xa roore hagiidhinanni loonseemmo; hattono albinni roore xa lowo looso loonsay heeꞌnoommo. Qoleno dirijjitete woxe danchu garinninna qarqara daafannokki garinni horoonsiꞌnanni heeꞌnoommota anfoommo daafira xa roore tashshi yaannonke.”

Xeenu Waa Qoa

Afirikaho, mite Gambooshshu Addaraashubbara waa afiꞌnanni gari diꞌꞌinjaanno. Konnira, roduuwinke Addaraashete way heeꞌranno gede seeda doogo hadhe dukke abbitanno. Wole addaraashera kay, roduuwu hogowu makeeninni daanno waa hidhitanno; hakku qole waaga lowoho, hattono qarqara gawajjannoho.

Roduuwinke waa afidhanno gede, Afirikaho duucha gobbara Gambooshshu Addaraashera ashanda seekkinoonni hattono jawa way taanke eessinoonni. Gambooshshu Addaraashera waa dancha gede qoꞌne haaꞌra dandiinanni gede, roduuwinke balaxxe qooxeessaho ayyarete gade hiittootero seekkite xiinxallitino. Mitte Gambooshshu Addaraashera konne uduunne eessate 600 kayse 3,000 doolaare geeshsha ikkanno woxi fulanno. Ikkollana, kuni uduunni Gambooshshu Addaraashe fulo lowo geeshsha ajishanno; mayra yiniro, roduuwinke xaate waaho woxe difushshitanno.

Kuni xeenu way roduuwanke lowo geeshsha kaaꞌlino. Moozaambikete heedhannoti Noeemiya yinanni rodoo togo yitino: “Bashsho waa abbate seeda doogo haꞌneemmo. Gambooshshu Addaraashe iillineemmohu lowo geeshsha daafurre quubbi yineeti. Alba way anje noo daafira, hasiꞌnummo gede hayishshiꞌra didandiineemmo. Xa baalunku anga hayishshiꞌra dandaanno. Gambooshshu Addaraashe haꞌneemmo woyite daafuru noonkekki daafira gambooshshe dancha gede macciishsha dandiineemmo. Lowo geeshsha galanteemmoꞌne!”

Tenne projektubbara woxe mamiinni afiꞌneemmo? Alamete doycho loosinkera meessi fajjonni fushshinanni fushshonni afiꞌneemmo; batinyu manni loosinkera woxe fushshannohu donate.jw.org widoonniiti. Shaqqillunni fushshitinanni fushshora lowo geeshsha galanteemmoꞌne!