‘Macciishshatenna Laꞌꞌate’ Injiitannota Qoqqowu Gambooshshi Pirogiraame

Dirinkera noori Yihowa Farciꞌraasine, diru dirunku qoqqowu gambooshshira gamba yaa hanaffunku 130 diro ale ikkanno. Xaa yannara qoqqowu gambooshshiwa 40 ale ikkitanno lallawo, muuziiqu, qaalu xaꞌmuwanna viidiyubba shiqqanno. Pirogiraame daanno mannira kaaꞌlitannotanna loosoho kakkayissannota ikkitanno gede, dancha gede ‘macciishshantannotanna leeltannota’ ikka hasiissannose. (Luqaasi 2:20) Qoqqowu gambooshshe daanno manni heeꞌrannowi ikkiwano ikkiro, dancha gede rosanno gede kaaꞌlate, fushshitinanni woxe horoonsiꞌnanni heeꞌnoommohu hiittoonniiti?

Qoonqotenna Viidiyote Uduunne Bayichoho Malino Garinni Injeessinanni

Xaa yannara Galchimi gobbuwara nooti batinye istaadiyeeme uminsaha qoonqotenna viidiyote uduunne afidhino. Ikkina togoo istaadiyeeme qoqqowu gambooshshira karaayyaꞌneemmo woyite, uminke uduunne horoonsiꞌneemmohu mayiraati? Qara Biironkera Biroodikaastete Golira soqqamannohu Deevidi togo yee xawisino: “Karaayyaꞌneemmo istaadeemuwa giddo, lee saate ale lallawo shiqinshanna seekke macciishshate injaanno garinni qixxeessinoonniti gariti dino. Lawishshaho, ispoortete xawira horoonsiꞌnannihu qoonqote uduunni harancho egensiishsha kulatenna shiima muuziiqa fanatella horoonsiꞌnanniho. Viidiyote uduunninsano godoꞌlete naxiwe, daddalu egensiishshanna eꞌino goole wirro leellishate horoonsiꞌnanniho. Ninke kayinni, macciishshaano seeda viidiyubba laꞌaranna madirakete coyiꞌnanniha mitto mittonka qaale seekkite macciishshitara hasiꞌneemmo.”

Qoqqowu gambooshshe assinannihu mittu mittunku bayichi addi addi gariho; hakko daafira, qoonqotenna viidiyote uduunneno bayichoho malino garinni injeessa hasiissanno. Bayicho doorrihu gedensaanni, sinu biirora noohu Biroodikaastete Golinke hakkawoyintenni, bayichu mageeshshi manna haaꞌrannoronna gambooshsheho mageeshshi manni daannoro hede, daanno manni hiikkanni ofollannoro muranno. Hakkiinni roduuwu qoonqote uduunnenna viidiyo leellinshanni iskiriine suntanni darga heddanno, qoonqote uduunni shibba xaadinsanni gara murtanno, hattono daanno manni baalu pirogiraame seekke macciishshanna laꞌꞌa dandaanno gede assate hasiisanno uduunne baala borreessite amaddanno.

Qoqqowu gambooshshe assinanni darga, pirogiraame wolu qaalinnino sayinsanniha ikkiro, qoonqotenna viidiyote uduunne biddi assinanni gari roore xurqa ikkanno. Pirogiraame wolu qaalira qolle tirranniha ikkiro, tirtanno roduuwi qoonqonna viidiyo macciishshitanno gede assine, insa tirtino tiro qolte hakkoye qaale coyidhanno macciishshaanora saꞌanno gede assinanni. Viidiyo fannannihu baxxino uduunni noo daafira, qoonqo settu addi addi qaalinni sayinsanni heeꞌnoonniha ikkiro nafa, baalanti macciishshaano mittu gari viidiyo laꞌanno gede assa dandiinanni. Deevidi togo yiino: “Togoo yannara qoonqote uduunni roore xurqa ikkanno; hakko daafira qoonqote kifilera loossanno roduuwira lowo qajeelshi hasiisannonsa.”

Roore sinu biironkera, diru baala qoqqowu gambooshshira horoonsiꞌnannihu qoonqotenna viidiyote uduunni noonsa. Roduuwu konne uduunne mittu qoqqowu gambooshshi goofihu gedensaanni wolu gambooshshira horoonsiꞌnanni gede hogobbe haadhe hadhanno. Ameerikunniti sinu biiro calla nafa, qoonqote uduunne bayichunni bayicho hodhisate diru dirunku 200,000 doolaarea fushshitanno. Ikkirono, hatto assa haaro qoonqote uduunne hiratenna seekkisiisate fulanno woxe gatissanno. Kanaadaho qoqqowu gambooshshiwa qoonqotenna viidiyote uduunne towaata kaaꞌlannohu Istiven togo yiino: “Qoonqotenna viidiyote kifilera soqqantanno roduuwinke mitto mittonka biloone usurranni siwiilcho, mitte mittenta biloone, mitte mittenta shiwonna mitto mittonka uduunnicho kiirte, danchu garinni amaddenna hogobbe xaano wolu gambooshshira horoonsiꞌnanni gede qixxeessitanno.”

Uduunne Hiranna Seekkisiisa

Qoonqotenna viidiyote uduunne karaayyaꞌno yiniro, waagu horo giira kaxxinoho; qoleno karaayyaꞌnanni uduunni roore woyite dancha diꞌꞌikkino woy amadooshshe bainoho. Hakko daafira, roore woyite, hasiꞌneemmo uduunne uminke hidhineemmo. Xaa yannara, hojja onte meetirenna godowa sase meetire ikkitannota LED iskiriine 24,000 doolaarenni hirranni; wole agurina 15 meetire calla ikkitannota maykirafoonete shiwo mite 20 doolaarenni hirranni. Konnira, ‘fulanno woxe balaxe shallagate,’ Biroodikaastete Goli Uduunne Hiranno Goli ledo mitteenni loosanno. (Luqaasi 14:28) Lawishshaho, kuni goli togo yee hedanno: Konni uduunnichinni horoonsiꞌranno manni mageeshsha ikkanno? Woyyitannoti haaro uduunnicho hira callate? Hirranni uduunnicho worate ikkanno dargi noonke? Kuni uduunnichi mite ikkiro, seekkate hasiisanno uduunninna qajeelino manni noonke?

Noonkehu qoonqotenna viidiyote uduunni lowo diro loosanno gede, yannate kiiro seekkiꞌneemmo woy danchu garinni amaxxineemmo. Qoleno konni uduunnira muso hoolate, kaajjadu siwiilu ogorira worre hogombeemmo; hattee ogorrano danchu garinni amaxxineemmo.

Dancha Farciꞌronna Xabbe Leeltanno Pirogiraame

Yihowa Farciꞌraasine ikkinokki manni duucha woyite qoqqowu gambooshshinkewa qoonqotenna viidiyote uduunnenke lae dhagge assiꞌranno. Lawishshaho, mittu egennamino xaawira loosannohu mittu manchi qoqqowu gambooshshinkewa shiqqanno pirogiraame magey geya isilancho ikkitinoro lae maalaꞌlino. Qoqqowu gambooshshiwa qoonqotenna viidiyote uduunne biddi assa kaaꞌlannohu Joonaataani tenne kulanni togo yiino: “Kuni manchi, qoonqotenna viidiyote kifilera loossanno roduuwinke baalu woxe baantinsakkinni loossanni nootanna baxxitino ogeeyye ikkitinokkita afiti lowo geeshsha maalaꞌlino.” “Qoleno ninke mittu barrinna daratunni qixxeessine gundummo uduunne insa dirijjite ikkitoommero ontu barrinni guddannota coyiꞌrino.” Wolu qoqqowu gambooshshiwa, mittu gambooshshu bayichi murrichi togo yiino: “Konne bayicho batinyu muuziiqunna viidiyote ogeeyye horoonsidhanno; kayi kiꞌne manni gedee ogeeyyenna loosoho fushshiꞌrino manna horo lae diegennoommo!”

Qoqqowu gambooshshiwa qixxeessinannihu qoonqotenna viidiyote uduunni ate kaaꞌlinohehu hiittoonniiti? Atino Ingilizete gobbara heeꞌrannohu Deevidi yii gede yaattoha ikkara dandaanno. Isi togo yiino: “Xa anera 88 diro ikkinoe; heeshshoꞌya diro woꞌma qoqqowu gambooshshe haꞌranni keeshshoommo. Ikkirono, hedoꞌya bebbeehantukki shiqanno roso seekke macciishsha xa roore shota ikkitinoe. Baxissanno viidiyubba leellinshanni daafira, pirogiraame woꞌma rakke gooffanno; rosuno xa albinni roore xawe leellanno garinninna mittu garinni shiqanno.” Nayijeeriyaho heeꞌrannohu Maykilino togo yiino: “Roduuwinke lallawo shiqishanno rodii yaannore macciishsha woy viidiyo laꞌꞌa qarrissannonsakki daafira, macca worte macciishshitanno; qoleno pirogiraamete yannara diceeꞌmitanno.”

“Dancha Duduwo Dudubbe!” yaannoha tayixeha Qoqqowunna Baxxinoha Qoqqowu Gambooshshe beeqqatto woyite, pirogiraame dancha gede macciishshattoranna laꞌꞌattora yine loonsoonni looso hedate woꞌnaali. Shaqqillunni woxe fushshite (donate.jw.org widoonni ikkara dandaanno) konni loosira kaaꞌlamootto daafira, tashshi yiinonke. Galanteemmohe.