Daramino Manni Qarra—Miliyoonetenni Kiirranni Manni Yukireenetenni Fule Xooqanni No

Ammajje 24, 2022 Ruusiyu gashshooti Yukireene horrino; konninni kainohunni lowo miliyoone ikkanno manni qarru giddo no; qoleno Yukireenete gobbanni fule xooqate woꞌnaalanni no.a

“Base baalate bombu dhoohanno. Coyi lowo geeshsha waajjishannoha ikkino daafira yee kuleemma gari nafa dileellaae. Manna haaꞌre haꞌranno baabura qixxeessinoonnita anfummoti, haꞌrate kaꞌnummo. Mittu manchi mitto shiima borsa calla adhe eanno daafira, noonkere baalare agurre fulloommo. Dokimentuwa, xagga, waanna shiima sagale calla adhinoommo. Wolere baalare agurre, bombu dhoohannota macciishshinanni baaburu xaawa haꞌnoommo.”—Nataaliya, Yukireenete Karkiivi kataminni dagginote.

“Umi qara, olu kaꞌꞌanno yine horo dihendoommo. Katamu giddo mito widoonni bombu dhoohannota macciishshoomma; maskoottano shashshafantino. Lowo geeshsha hasiissanno coyibba calla adhe katamunni haꞌrate kaumma. Soodo lame saatenni fule baaburunni Leviivi katama haꞌre, hakkiinni otobisetenni Poolaandete gobba dayoomma.”—Naadiya, Yukireenete Karkiivi kataminni dagginote.

Konni birxichira

• Yukireenete mannu daramannonna qarru giddo uwanno gede assinohu qaru coyi maati?

• Daramino manni hexxo afiꞌra dandaannohu hiikkiinniiti?

• Qullaawu Maxaafi daramino mannira kaaꞌlanno?

Yukireenete mannu daramannonna qarru giddo uwanno gede assinohu qaru coyi maati?

Yukireenete gobbara mannu daraminohunna qarru giddo uwinohu Ruusiyu hattee gobba horrino daafiraati. Ikkollana, Qullaawu Maxaafi mannu konni garinni daramannonna qarramanno gede assannohu wolu hakkii saino korkaati noota kulanno:

• Alame woꞌmate noohu mannu gashshooti mannu oosora hasiisannore wonsha didandiino. Gashshaasine roore woyite silxaanensa horoonsidhe manna gadadissanno.—Rosiisaancho 4:1; 8:9.

• “Tenne gobba [alame] gashshaanchi” Sheexaanu Daawuloosi, mannu ooso bunshe assitanno gede xixxiiwanno; hakko daafira, Qullaawu Maxaafi “tini gobba [alame] gudisante bushunni amadantino” yaanno.—Yohaannisi 14:30; 1 Yohaannisi 5:19.

• Mannu oosora lowo xibbe diro batinyu qarri iillinonsatano agurranna, xa heeꞌnoommo yanna Qullaawu Maxaafi togo yee balaxe kulinote: “Goofimarchu barra qarrissanno yanna dagganno.” (2 Ximootewoosi 3:1) Hakkiinni saeno, heeꞌnoommo yanna olu, kalaqamu dano, hudenna taraawe gudanno dhibbi batiꞌrinote; kuri coyibba mannu qaensanni daramanno gede assitanno.—Luqaasi 21:10, 11.

Daramino manni hexxo afiꞌra dandaannohu hiikkiinniiti?

Qullaawu Maxaafi, Kalaqaanchinke Maganu Yihowab qaensanni darame qarramino manna baxannotanna mararannota kulanno. (Marro 10:18) Yihowa gordu gashshootisi yaano Maganu Mangiste widoonni, daramino mannira iillanno qarra baala hunara qaale eino; tini Mangiste mannu gashshoote baala hunte insa bayicho amaddanno. (Daanieeli 2:44; Maatewoosi 6:10) Yihowa Mangistesi widoonni Sheexaane Daawuloosi hunanno. (Roomu Sokka 16:20) Tini Mangiste alame woꞌma gashshitannota ikkitino daafira, mannu danna bade worino babbadooshshe huntanno. Mannu ooso baalanti alamete deerrinni mitte maate ikkitanno. Hatte yannara mittu manchino qaesi agure didaramanno; korkaatuno Qullaawu Maxaafi togo yee hexxo aanno: “Mannu annu annunkunni kaasiꞌrino balasenna woyinete caali hunda, harshammi yite fooliishshidhanno; masisannonsari diheeꞌranno. Konne coye coyiꞌrinohu Olantote Mootichi Kaaliiqaati.”—Mikiyaasi 4:4.

Daramanno manni qarra woꞌmunni woꞌma tirtannoti Maganu Mangiste callate. Yihowa Mangistesi widoonni mannu daramanno gede assanno qarra hunanno. Hanni mito lawishsha laꞌno:

• Ola. “[Yihowa] baattote qacce geeshsha nooha ola uurrisanno.” (Faarso 46:9) Maganu mannu mereero kaꞌanno gaance uurrisanno gara afate, “Uulla Keere Afidhannohu Hiittoonniiti?” yaanno birxicho nabbawi.

• Gadadonna finqille. “[Yihowa] gadadaamma shettotewiinni fushshannonsa.” (Faarso 72:14) Mannu giddonsa rumuxxitinota busha akatta biddi assiꞌra dandaanno gara afate, “Manna Giwa Agura Dandiinanni!” yaanno birxicho nabbawi.

• Buxima. ‘[Yihowa] qarraataamu woshshiꞌrannosi woyite gatisannosi; buxichonna gadadaamo kaaꞌlanno.’ (Faarso 72:12) Maganu buximate qara kora ikkinore hoolannohu hiittoonniitiro afate, “Miinju Manna Baalaho Taalo Iillanno Yanna Dagga Ikka?” yaanno birxicho nabbawi.

• Hude. “Baatto gide laashshito; ilaallate aana jajju woꞌmo.” (Faarso 72:16) Maganu baattote aaninni hude hunannohu hiittoonniitiro afate, “Hude Heedhannokki Alame” yaanno birxicho nabbawi.

Qullaawu Maxaafi daramino mannira kaaꞌlanno?

Ee kaaꞌlanno. Qullaawu Maxaafi daramino mannira addu hexxo noota kulannotano agurranna, xa iillannonsa qarra qeeltanno gede kaaꞌlitannonsa amaaleno aanno.

Qullaawu Maxaafi biddishsha: “Baalunku coyira galaxxitinanninna huuccidhinanni hasidhinoonni coye Maganoho kuꞌle ikkinnina, mittu coyirano yaaddinoonte. Mannu hedora aleenni ikkinohu Maganu keeri, Kiristoosi Yesuusinni wodanaꞌnenna hedoꞌne agaranno.”—Filiphisiyusi Sokka 4:6, 7.

Hatto yaa mayyaate? Iillinohe qarri ikkihano ikkiro, Maganu giddiidi keerenna harshammo aannohe gede huucciꞌri. “Filiphisiyusi Sokka 4:6, 7—‘Mittu Coyirano Yaaddinoonte’” yaanno birxicho nabbawi.