Maganu Qaali Sokka—Hexxo Daramaasinete!

Diru dirunkunni, miliyoonetenni kiirranni manni qaensanni daramanno. Aterano togoohu dadillisanno coy iillinohe? Hatto ikkiro, Maganu kaaꞌlannohena callu qarrantooti. Isi woyyitino yanna dagganno yee Qullaawa Borro giddo hexxo uyno.

“Daramaasinete, hattono qaensanni fule xooqino manniraa wiinamu kaaꞌlo calla ikkikkinni, . . . konni kaꞌira hexxono hasiissannonsa” yiino Awuroppu Mittimma komishiinereb Kiritoos Istaylianides. Hexxo afiꞌrino manchi albillittete yanna daafira dancha danchare hedanno. Ikkollana daramaasinete wodaninsa sissamanno gede hexxo calla ikkikkinni sheshono hasiissannonsa.

“Xooqe gobbankenni fulummo woytenna maateꞌyawiinni baxxummo woyte, wolqaꞌyara aleenni ikkitino callimma amaddinoe. Lowo geeshsha waajjoommo, dadilloommo, hattono yaadoommo.”—Imaanueel, Heytii.

Aterano togoori macciishshamannohe? Qaekkinni darante wolewa noottoha ikkiro, sheshonna hexxo hasiissannohe. Maganu Qaali Qullaawu Maxaafi kaaꞌlannohehu hiittoonniiti?

Maganu Qaali aanno shesho

Qullaawu Maxaafi togo yaanno: “[Yihowa]c manni gobba manna . . . towatannonsa.”—Marro 10:17, 18.

Qullaawu Maxaafi togo yaanno: “Kaaliiqi woshshidhannosirira, . . . baalaho mule no.”—Faarso 145:18.

Qullaawu Maxaafi togo yaanno: “Woꞌmanka Dandaanno Magani, horontanni busha coye diassanno. . . . aye halaaleno didawisanno.”—Iyyoobi 34:10, 12.

Hakko daafira, iillinohe qarra abbinohu Magano diꞌꞌikkino yaate. Iillinohe qarri isi hanqo diꞌꞌikkino; woy isi jifahera yee assinore diꞌꞌikkino.

Maganu Qaali aanno hexxo

Qullaawu Maxaafi Maganu albillitte maa assankera hedinoro kulanno. Tini hexxo qaensanni darante fultinore kaaꞌlitanni noo gara wodanchi.

Qullaawu Maxaafi togo yaanno: “[Maganu] hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Yohaannisi Ajuuja 21:4.

Hatto yaa, qarrinkenni fooliishsho afiꞌneemmo yanna dagganno yaate. Maganu, xaa yannara hexxo mudhinanni gede assanno qarra baala hoolara qaale eino.

“Qooxeessinkera assinanni dawanna dawaawano hattono bunshe baala Maganu muli yannara hunanno. Tini hexxo qarru baalu baꞌꞌanno barra illachisheemma gede kaaꞌlitannoe.”—Kaarla, Eli Salvaadoori.

Qullaawu Maxaafi togo yaanno: “Sainore baala hambanni; horonta diqaanganni.”—Isayaasi 65:17.

Hatto yaa, giddonke xissiisidhanno gede assino coye albillitte diqaangeemmo yaate. Maganu woꞌma woyte konni albaanni iillinoheha busha coye qaagganni xissiisiꞌrattokki gede asse keere aannohe.

“Qullaawu Maxaafi aanno hexxo garinni, xissiisinonke coyenna bainonke coye nafa albillitte diqaangeemmo. Muli yannara baalunkuri soorramannota afoomma daafira, tini hexxo iillinonke qarra cinceemma gede kaaꞌlitinoe.”—Nataaliya, Yukireene.

Qullaawu Maxaafi togo yaanno: “Gordu Magani . . . gashshoote uurrisanno. Kuni [gashshootino] wole gashshoote baala coꞌo asse hunanno.”—Daanieeli 2:44.

Hatto yaa, baatto guutu gordu gashshooti gashshanno yaate. Muli yannara, Maganu uullate gashshoote baala hune iimiha umisi gashshoote abbanno. Kuni gashshooti addu keerenna hobbaate abbanno; hattono baalunkura taashshonna qawaaxxo abbanno.—Mikiyaasi 4:3, 4.

“Kadote gashshooti, babbadama, mimmito huluullama, sircho bade giwanna woluno togoo qarri yannate geeshsha calla heeꞌrannoha ikkinota afaꞌya jawaachishshannoe. Yihowa Gashshooti muli yannara konne qarra baala hunanno.”—Musxafa, Mereeri Soojjaato.

Maganu Qaali aanno hayyo

Iillinohe qarrinni beedho afiꞌrate sharramatto woyte, Qullaawu Maxaafinni afiꞌnanniti kaajja hayyo lowore kaaꞌlitannohe. Tini hayyo heeshshokki soorrantu gedensaanni amadannohe qarrano lawishshaho miinju qarra qeelateno kaaꞌlitannohe. Aante noo amaale daramaasine kaaꞌlitanni noohu hiittoonniitiro wodanchi:

Qullaawu Maxaafi togo yaanno: “Mittu manchi dureessa ikkiro nafa, heeshshote heeꞌrannohu miinjisinni diꞌꞌikkino.”—Luqaasi 12:15.

Tini hayyote amaale kaaꞌlitannohe gara: Lowo masilli amadinohehanna agurte xooqootto coyra lowo geeshsha dadillattoha ikkara dandaanno. Ikkollana, taxxi yite heeshshokki mageeshshi geeshsha muxxetero hedakki, bainohe coyra quwa saꞌe dadillattokki gede kaaꞌlitahera dandiitanno.

“Heeshsho maalaamittete coye roortanno. Mito woyte, jajju woy woxu kaaꞌle yaannori diheeꞌranno.”—Nataaliya, Yukireene.

Qullaawu Maxaafi togo yaanno: “‘Xaahunni roore albi diri hiittoo danchaati?’ yitooti.”—Rosiisaancho 7:10.

Tini hayyote amaale kaaꞌlitannohe gara: Xaa heeshshokki qarru batiꞌrinota ikkitara dandiitanno; ikkirono caaccaawatto gede assitannohe daafira, xa nootto gara albi heeshshokki ledo heewisiisa hoogate woꞌnaali.

“Heeshshoꞌya soorrantinota ammane heeꞌraꞌya, dancha danchare hedeemmo gede kaaꞌlitinoe.”—Eli, Ruwaanda.

Qullaawu Maxaafi togo yaanno: “Sagalenna uddano heedhunkero kurinni kassi yine heeꞌneemmo.”—1 Ximootewoosi 6:8.

Tini hayyote amaale kaaꞌlitannohe gara: Heeꞌrate hasiisanno coye afiꞌrittoro, hakkuyinni kassi yite heeꞌrate sharro assi. Nooherinni kassi yaakki, quwa saꞌe yaadattokki gede agartannohe; hatti qolte roore wodanaaꞌmatto gede kaaꞌlitannohe.

“Qullaawu Maxaafi laoꞌya biddi assiꞌreemmo gedenna bainonke coye illachisheemmokki gede kaaꞌlanni nooe. Aninna galteꞌya xa lubbote heeꞌrankenninna gawajjannori nookkiwa heeꞌrankenni hagiirraammaho.”—Ivaan, Yukireene.

Qullaawu Maxaafi togo yaanno: “Mannu kiꞌnera assaꞌnera hasidhinannire baala kiꞌneno insara assensa.”—Maatewoosi 7:12.

Tini hayyote amaale kaaꞌlitannohe gara: Cincanna shaqqille leellishate dandiittore baala assattoha ikkiro, wolu manni ledo sumuu yite heeꞌra roore shota ikkitannohe. Togoo akati heeꞌratto dagoomi giddo baxamoottoha ikkatto gedenna mannu allaggisannohekki gedeno kaaꞌlahera dandaanno.

“Rooru manni ayirrinsanninsata, hattono baxillenna shaqqille leellinshanninsata baxanno. Tini qolte atenna marootto dagoomi ledo dancha aante heedhanno gede assitanno.”—Anjelo, Siri Laanka.

Qullaawu Maxaafi togo yaanno: “Baalunku coyira . . . huuccattoꞌne Maganoho shiqishidhe; . . . Maganu keeri . . . wodanaꞌnenna surreꞌne agaranno.”—Filiphisiyusi 4:6, 7.

Tini hayyote amaale kaaꞌlitannohe gara: Giddokkita, hasattokki, waajjakkinna yaaddokki huuccattotenni Maganoho hasaaphi. Togoo huuccatto yaaddotenni beedho afiꞌratto gedenna haaro heeshshokki rosatto gede kaaꞌlitahera dandiitanno.

“Qarru amadie kiiro Magano huucciꞌreemmo; isino macciishshannoe. Qullaawu Maxaafinni rosoommori wodaniꞌya addinta fooliishshiꞌranno gede assinoe.”—Yool, Wodiidi Sudaane.

“Qullaawu Maxaafi aannoti dancha amaale, iillinoe qarra cinceemma gede kaaꞌlannoeha giddiidi keere afiꞌreemma gede kaaꞌlitinoe.”—Vaalentiina, Yukireene.

“Maganu Yihowa addinta woyyaabbino heeshsho abbara hexxo uynota afaꞌya baasa jawaachishshannoe.”—Imaanueel, Heytii

Qullaawu Maxaafi aanno sheshonna hexxo daafira hattono tenne sheshonna hexxo addaxxa dandaattohu mayraatiro ledde afa hasiꞌratto? Yihowa Farciꞌraasine baatooshshiweelo hasaawissannohe gede kuꞌla dandaatto. Insa kaaꞌlituhero tashshi yaannonsa.