Keeraano Qansoota Ayi Gatisanno?—Qullaawu Maxaafi Mayyaanno?

Buusantino Mangistubba Uurrinsha odeessitino garinni:

• Birra 7-23, 2023 geeshsha, Gaazanna Israeelete mereero kaino gaarinni 6,400 saꞌꞌanno manni lubbamino; 15,200 ikkanno manni qole madiꞌrino; kuri giddo rooru keeraano qansootaati. Qoleno xibbu kuminni kiirranni manni qaensanni daramino.

• Wocawaaro 24, 2023 geeshsha, Ruusiyunna Yukireenete mereero kaino olinni Yukireenete heedhannori 9,701 keeraano qansooti reyitino; 17,748 ikkitannori qolte madidhino.

Qullaawu Maxaafi olu gawajjino mannira aanno hexxo maati?

Hexxo no!

Qullaawu Maxaafi giddo, Maganu “baattote qacce geeshsha nooha ola uurrisanno” yine himannoonni. (Faarso 46:9) Isi gordu gashshootesi abbe uullate gashshoote baala hunanno. (Daanieeli 2:44) Maganu Gashshooti mannu oosora fooliishsho abbanno.

Maganu Gashshooti Moote ikkinohu Yesuusi Kiristoosi assannore wodanchi:

• “Qarraataamo woshshiꞌrannosi woyite gatisannosi; buxichonna gadadaamo kaaꞌlanno. Buxanenna wolqiweeloota mararanno; qarraataamma reyotenni gatisanno. . . . Gadadaamma shettotewiinni fushshannonsa.”—Faarso 72:12-14.

Maganu Gashshootesi kaxxe, olunna gaancu abbino rakkonna shetto baala badhera qolanno.

• “Hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”—Yohaannisi Ajuuja 21:4.

Maganu Gashshooti muli yannara uullate aana lowo coye soorre biddi assanno. Xa baalunku raginni macciishshinanni heeꞌnoommoha “olu luulonna olu duduwo” Qullaawu Maxaafi giddo balanxe masaalloonni. (Maatewoosi 24:6) Tini ikkitonna alamete aana ikkanni noohu wolu coyi baalu, mannu gashshootira “goofimarchu barra” heeꞌnoommota leellishanno.—2 Ximootewoosi 3:1.