Lowo Roso Rossinannironna Teꞌee Hayyotenni Doodhe

1-2. (a) Wedellaho doodha hasiissannonsahu hiittoo coy tuncu yaannonsa? (b) “Lowo roso” yaa mayyaate? (“Harancho Xawishsha” lai.)

“LOPHITTORO hiittoo looso loosa hasiꞌratto?” Ati wedellichahoro togoo xaꞌmo duucha hinge xaꞌminoonniheha ikkara dandaanno. Doodhattora dandaattohu baalanka roorino loosi Yihowara woꞌma yanna soqqamate. Ikkirono maalaamittete hasiisannohere afiꞌrateno loosa hasiissannohe. (2 Te. 3:10) Albillitte hiittoo looso loosattoro hedoottoti dihuluullissannote.

² Mitu wedelli layinki dirimi roso guddanno woyte annuwinsanna amuuwinsa ledo hasaabbe looso afiꞌrate lowo roso rosa doodhitanno.a Lowo roso rosa hasiissannoe yite hedoottoha ikkara dandaanno. Hatto ikkiro hiittoo roso? Konni birxichira rosatto roso hayyotenni doodhatto gede kaaꞌlannoheha Qullaawu Maxaafiha xintu seera ronseemmo. Seekkite heda dancha doorsha doodhatto gede kaaꞌlitannohe. Konne birxicho qixxeessinoonnihu wedellootaho ikkirono lowo roso rosate hedanni noo Kiristaana baala kaaꞌlara dandaanno. Qoleno kuni xintu seeri annuwunna amuuwu oosonsa dancha doorsha doodhitanno gede assate kaaꞌlannonsa.

LOWO ROSO ROSA HASIISSANNOHE?

3. Mitu Kiristaani lowo roso rosa doodhannohu mayra ikkara dandaanno?

³ Mitu qooxeessira mittu manchi layinki dirimi roso gudihu gedensaanni looso afiꞌra dandaanno. Wolu qooxeessira kayinni dancha damooza baantannihanna yanna afiꞌnanni gede assanno looso afiꞌrate lowo roso rosa hasiissannoha ikkara dandaanno. Togoo loosi mittu Kiristaanchi albinni roore soqqamate woy wolu gariha tiokiraasete looso loosanno gedeb kaaꞌlasira dandaanno. Ikkirono lowo rosi mittu Kiristaanchi lowore baatanno gede assasiranna qarra iillishasira dandaanno.

4. Mittu Kiristaanchi lowo roso rosannoha ikkiro tenne doorannosihu ayeti? (Lekkaalliidi qaagiishshano lai.)

⁴ Qullaawu Maxaafi ‘mittu mittunku umisi duha duqqa’ hasiissannosita kulanno. (Gal. 6:5) Hakko daafira mittu mittunku wedellichi lowo roso rosannoronna teꞌee umisi doodha hasiissannosi.c Qoleno annuwunna amuuwu oosonsa rossanno roso doodhitanno woyte kaaꞌla hasiissannonsa. (Efe. 6:1) Insa uyitannonsa qajeelshi lophitanno woyte dancha doorsha doodhitanno gede kaaꞌlansara dandaanno.—Law. 22:6.

5. Mittu manchi lowo roso rosannoronna teꞌee heda hanafa hasiissannosihu mamooteeti? Mayra? ( misileno lai.)

⁵ Wedellu duucha woyte lowo roso rossannoronna teꞌee doodha hasiissannonsahu layinki dirimi roso guddara albaanniiti. Hige mittu wedellichi tenne doodhara albaanni tenne hajo kayise annisinna amasi ledo hasaawa hayyote. Tini insa mitteenni woyyinore malate yanna afidhanno gede kaaꞌlitannonsa. Insa albillitte rosanno rosira woy loosanno loosira kaaꞌlannosi roso illachishanno gede kaaꞌlitannosiha ikkara dandaanno. Insa beettinsa layinki dirimi roso gudikkinni albillitte ma assannoro doora hasiissannonsa? Dihasiissannonsa. (Law. 21:5) Mitu wedelli layinki dirimi roso gudde lowo roso rossannoronna teꞌee heddanni heedhe, looso hasidhanno hattono suwisaano ikkite soqqantanno. Mittu manchi dirisi lowoha ikkihu gedensaanni nafa togoo doorsha doodhara dandaanno.

6. Lowo roso rosa lainohunni dancha doorsha doodhatto gede kaaꞌlannoheri maati?

⁶ Lowo roso rosa lainohunni dancha doorsha doodhatto gede kaaꞌlannoheri maati? Huuccatto assiꞌri. (Yaq. 1:5) Qoleno aane noore hedi. Umihunni, rosa hasiꞌroottohu mayraati? (Fa. 26:2) Layinkihunni, lowo roso rosa ma assitahera dandiitannoro hedi. (Law. 14:15) Hanni tenne mitte mittenta hedo laꞌno.

ROSA HASIꞌROOTTOHU MAYRAATI?

7. Lowo roso rosate hendanni heeꞌnoommoha ikkiro maa heda hasiissannonke?

⁷ Lowo roso rosate heddanni noottoha ikkiro aante noota qara xaꞌmo ateneeto xaꞌmi. Togoo roso rosa hasiꞌroommohu mayraati? Batinyu manni lowo roso rosannohu baxannoha woy lowo damooza baantanni looso afiꞌrateeti. Kuri coyibba hasiꞌra soꞌroteni? Soꞌro diꞌꞌikkitino. (1 Xi. 5:8) Ikkirono Qullaawu Maxaafi maalaamittete coye balaxisiinseemmokki gede woy agarooshshe afiꞌnannihu woxu callunniiti yine hendeemmokki gede qorophisiisannonke. (Law. 23:4, 5; 1 Xi. 6:8-10; 1 Yo. 2:17) Lowo roso rosa hasidhinannihu dureeyye ikkate woy mannu jajaꞌnera yitine ikkiro hagiirriꞌne baꞌꞌara, Yihowawiinnino xeertidhinara dandiitinanni.

8-9. (a) Kiristaanu roso ma garinni laꞌꞌa hasiissannonsa? (Maatewoosi 6:33) (b) Joosefiina, Moorinenna Ayrisi coyidhinorinni maa rosootto?

⁸ Ikkina roso laꞌꞌattohu ma garinniiti? Mittu coyino Yihowara shiqishiꞌneemmo kakkalonni roorankera dihasiꞌneemmo. (Mat. 22:37, 38; Fil. 3:8) Hakko daafira roso, Yihowara woꞌmu wodaniꞌnenni soqqantinanni woyte umoꞌne dandaate kaaꞌlannoꞌne coy gede assitine laꞌe.—Maatewoosi 6:33 nabbawi.

⁹ Hanni mito roduuwa lowo rosira gara ikkitino lao heedhannonsa gede kaaꞌlinonsari maatiro laꞌno. Chiili gobbara heedhannoti Joosefiina yinanni rodoo togo yitino: “Konne roso rosoommahu Yihowara soqqamate lowo yanna afiꞌreemma gede kaaꞌlannoe looso afiꞌrateeti. Baalunkunni roorse laeemmahu lowo roso ikkikkinni Yihowa ledo nooe jaaloomaati.” Moorine yinanni rodoo mitto diro danancho seesiisate roso rosa doodhitino. Ise tenne doodhitinohu mayraatiro coydhanni togo yitino: “Mixoꞌya sabbakkannori roore hasiissannowa haꞌre soqqamate. Hakko daafira tenne mixoꞌya wonshiꞌrate kaaꞌlannoe roso rosa hasiꞌroomma. Roso gudummahu gedensaanni danancho seesiisate looso loosanni sabbakkannori roore hasiissannowa haꞌrate woxe codhoomma. Rosoomma rosi hakkira haꞌrummahu gedensaannino looso afiꞌreemma gede kaaꞌlinoe.” Hinko xagisate roso lowo yanna rossinoti Ayrisi yinanni rodoo togo yitino: “Lowo roso rosa mito geeshshano ikkiro kaaꞌlitara dandiitanno; kayinni addu hagiirrenna harshammo afiꞌnanni gede diassitanno. Haranchunni, addu hagiirrenna harshammo afiꞌneemmohu Yihowa ledo kaajju jaaloomi heeꞌrinkero callaati.” Garankolla, baalunku coyinni roore Yihowa ledo noonke jaalooma balaxisiisiꞌneemmoha ikkiro geedote hagiirre afiꞌneemmo gede assannonke doorsha doodhineemmo.

LOWO ROSO ROSA MA ASSITAHERA DANDIITANNORO HEDI

10. Lowo roso ronseemmoronna teꞌee hendeemmo woyte Marro 32:29 noohu xintu seeri kaaꞌlannonkehu hiittoonniiti?

¹⁰ Mitto looso loosate qajeelsha adhate heddanni noottoha ikkara dandaanno. Kayinni ati hedootto gedeehu woy hakkiinni baxxinohu wolu loosi heeꞌrara dandaannota hedano danchate. (Lawishsha 18:17 ledo heewisiisi.) Xaa yannara konni albaanni heedhe egentinokkiti roso ronsanniti addi addi doogga no; kuri giddo mitte interneetete widoonni rosate. Lede rosa hasiissuhekkinni maalaamittete hasiisannohere afiꞌrattoronna teꞌee heda deꞌooti. Lawishshaho Finlaandete heedhannoti Johaana yinanni rodoo lowo roso dirossino. Ise togo yitino: “Roso gudummati darate barra loosanni suwisaancho ikkoomma. Addi addi looso loosoomma; Yihowa towaateemmoꞌne yee eino qaale woꞌmanka woyte wonshanna laoomma.” Lowo roso rosate doodhineemmo doorshinna doodhineemmohu rosu dani kaaꞌlankera woy gawajjankera dandaannota hawa dihasiissannonke. Ateneeto togo yite xaꞌmi: ‘Doodhoommo doorshi roore anga kaaꞌlannoho?’ (Marro 32:29 nabbawi; 1 Qo. 10:23) Hanni tenne xaꞌmora dawaro qolate kaaꞌlannoheha mito coye laꞌno.

11. Rosu lamalate giddo mageeshshi yanna gudannoro heda dancha ikkitinohu mayraati? (Misillano lai.)

¹¹ Rosu lamalate giddo gudanno yanna. Lamalate giddo rosu minira hadhanni, roso rossanninna mini looso loossanni mageeshshi yanna gudattoro hedi. Ayyaanaamittete coye assatenna mini giddo looso loosate yanna heedhannohe? (Fil. 1:10) Lowo roso rosa songote gambooshshira qixxaawa woy hojju xiinxallo assiꞌra gooddo ikkitannohe gede assitannohe? Hindete heeꞌrannohu Jeroozi yinanni rodiira togoo coy iillinosi. Isi togo yiino: “Ayyaanaamittete coye illachisha qarra ikkitinoe. Mito woyte gambooshshe hoseemmo. Hakkawarita hedeemmo woyte hakku rosi yannaꞌyanna wolqaꞌya beebba gudino.” Kayinni yanna gudannokkihu darate barra ronsannihunna mini loosi batiꞌrannokki rosino no. Lawishshaho Moozaambikete heedhannoti Rebeka doodhitino rosinni hagiidhitino. Ise togo yitino: “Barrunni lame saatella roseemma. Tini woꞌma yanna suwisaanchimma agureemmakki gede kaaꞌlitinoe.”

12. Mittu manchi roso rosanni heeꞌrenni yannasi danchu garinni horoonsiꞌra dandaannohu hiittoonniiti? (Rosiisaancho 12:1)

¹² Roso rossanni keeshshatto yanna. Roso rosse gudattohu mageeshshi agani woy dirinniitiro hedi. Rosu yannakki danchu garinni horoonsiꞌratto gede assannoheho? (Efe. 5:15-17) Ati wedellichahoro rosate doodhootto rosi wedellimmakki yannanni Yihowara woꞌma wolqakkinni soqqamatto gede woy miteekkite woꞌma yanna soqqansho soqqamatto gede assannoheho? (Rosiisaancho 12:1 nabbawi.) Hasiꞌrootto gedee loosira kaaꞌlitannoheti harancho korse heedha ikka? Lawishshaho mitu rosu mini harancho yanna giddo shiimu woxinni kaaꞌlitannohe dandoo rosate kaaꞌlahera dandaanno. Chiili gobbara heeꞌrannohu Maariyo yinanni rodii togo yiino: “Yuniversitete baantanni geeshsha ikkinokki woxinni lame diro ogimmate roso rosoommo. Lamalate giddo shoole barralla roseemmo; tini rosanni heeꞌrenni suwisaancho ikkeemmo gede kaaꞌlitinoe.”

13. Rosattohu xeertowa hadhe ikkiro may kalaqamara dandaanno?

¹³ Rosatto baycho. Rosatto baychi qooxeessikkira nooha ikkara dandaanno. Kayinni xeertowa nooha ikkirona? Woy ronsannihu hakko Yuniversitete gallanni ikkirona? Maatekkiwiinni xeertidhe haꞌra, hakko iso ledokki galtanno ooso Yihowa Farciꞌraasine ikka hoogguro tini ayyaanaamittekki lowonta gawajjitannota deꞌooti. (Law. 22:3; 1 Qo. 15:33) Moozaambikete heeꞌrannohu Maatiyaasi yinanni rodii shiimu woxinni mittu diri korse rose gudino. Ikkirono isi tenne doodhasinni gaabbino. Mayra? Isi togo yiino: “Yannaꞌya baala rosu mine sayisa hasiissinoe. Barru baala gara ikkinokkire assate fonqolameemmo. Maateꞌnewiinni xeertidhinannikki gede assanno roso doodhitinanni gede amaaleemmoꞌne.” Ruusiyaho heedhannoti mitte rodoo togo yitino: “Yuniversitete galantenni mine maateꞌyawa galanni iillitaera dandiitanno gawajjonna fonqolinni gatoomma.” Isinni interneetete widoonni ronsanni roso nafa afiꞌrattoha ikkara dandaanno.

14. Lowo roso rosate hedatto woyte Luqaasi 14:28 noohu xintu seeri kaaꞌlannohehu hiittoonniiti?

¹⁴ Baantanni woxe. Mitu rosi lowo woxe baaxxinannikkiha woy gashshootu baatannoha ikkara dandaanno. Hatto ikkiro lowo woxe fushshiꞌrittokkinni rosse looso afiꞌrate kaaꞌlitannohe egennonna dandoo afiꞌra dandaatto. Mitu qooxeessira kayinni lowo roso rosate lowo woxe baantanni. Loosoho ikkado ikkate gillete rosi mine eꞌe rosa woy mine daye rosiisanno rosiisaanchira baaxxittanni rosattohano ikkara dandaanno. Mitu rosi rosaano lowo diro asalu giddora eꞌanno gede assannoho. Moozaambikete heeꞌrannohu Adilseni yinanni rodii doodhino rosinni gaabbino. Isi togo yiino: “Maateꞌya shoole diro rosummo yannara sagalenna wole hasiissannoere shiqishate lowo geeshsha qarrantino.” Mite Korse woy qajeelsha adhate hedatto woyte ateneeto togo yite xaꞌmi. ‘Mageeshshi woxe baantanni? Maateꞌya woy ani konne woxe baata dandeemmo? Lowo woxe baaxxinikki ronsanni rosi heeꞌra ikka?’ (Luqaasi 14:28 nabbawi.) ‘Asalu giddora eummoro mageeshshi yanna giddo baaxxe gudeemmo? Roso gudummoro looseemmo loosi hasiisannoere afiꞌratenna asaleꞌya baaxxate ikkannoeho?’—Law. 22:7.

15. Mitto roso ronsammora albaanni looso afiꞌrate kaaꞌlannohoronna teꞌee heda hasiissannonkehu mayraati?

¹⁵ Rosu looso afiꞌrate kaaꞌlannoho? Heeꞌratto woy heeꞌra hasiꞌratto qooxeessira hiittoo loosi heeꞌrannoro hedi. Rosatto rosi looso afiꞌratto gede kaaꞌlannoheho? Mite korse looso afiꞌrate hakkeeshshi geya dikaaꞌlitanno. Togoo korsewa loosoho kaaꞌlitanno dandoo ikkikkinni addi addi hedo rosiisatenna egenno sayisate calla illachinshanni. (Qol. 2:8) Mitte Hindete heedhanno rodoo togo yitino: “Rosoomma rosi hasiꞌreemma loosira dandoo heedhannoe gede dikaaꞌlinoe. Hakko daafira konni rosinni looso diafiꞌroomma.” Mitu rosi qole looso boodu mannilla afiꞌrannoho. Mereerimi Afiriki Rippaabilikera heeꞌrannohu Sabiliimi yinanni rodii ayyare qiissitanno maashine biddi assate roso rosino. Ikkirono isi togo yiino: “Ani heeꞌreemmo qooxeessira rooru manni loosa giwino uduunnicho uminsa biddi assiꞌranno; hakko daafira looso afiꞌra qarra ikkitinoe.”

16. Roso gundummohu gedensaanni loonseemmo loosi hiittoohoro heda dancha ikkitinohu mayraati?

¹⁶ Roso guditto gedensaanni loosatto loosi hiittoohorono hedi. Loosu hagiirsiisannoheho? (Ros. 3:12, 13) Loosu base hiittoote? Loosu gawajjannori nooho? Heewisammanni gede assannoho? Woy batiꞌre yaachishannoheha? Xaphoomunni mageeshshi damooza baantanniho? Hasiisannohere afiꞌrate ikkannoheho? Loosokki hoogattokki gede ledde rosa hasiissannohe gede assannoho? Wolu baalunkunni roore Maganu Gashshoote balaxisiisatto gede kaaꞌlannoheho? (Ros. 12:13) Hige loosu nookki qooxeessira hasiꞌnoommo gedee looso doodha qarra ikkitara dandiitanno. Ikkirono doodhineemmo rosi albillitte looso afiꞌneemmo woy hoongeemmo gede assara dandaanno. Hindete heedhannoti Xabbita lee agana uduunne gowate roso rosa doodhitino. Ise togo yitino: “Uduunne gowate loosi suwisaancho ikkeemma gede kaaꞌlannoe yee doodhoomma. Kuni loosi woꞌmanka woyte loonsanniho, hasiꞌrumma yannara looseemmaho hattono hanafate lowo woxi dihasiisannoho.” Xabbita rossino rosi suwisaancho ikkite soqqantanno woytira kaaꞌlannose looso afidhanno gede assinose.

17. (a) Mittu Kiristaanchi rosu daafira dancha doorsha doodhanno gede kaaꞌlitannosi mashalaqqe afiꞌra dandaannohu hiittoonniiti? (b) Dancha doorsha doodhatto gede kaaꞌlitannohe qummeeshshuwa hiikkuriiti? (“Heda Hasiissannoha Qullaawu Maxaafiha Xintu Seera” yitanno saaxine lai.)

¹⁷ Konni birxichira lowo rosi daafira heda hasiissannota duucha coyibba laꞌnoommo. Dancha doorsha doodhatto gede kaaꞌlitannohe mashalaqqe afiꞌra dandaattohu hiittoonniiti? Rosu minira marte woy webisayitensa widoonni rosa hasiꞌratto rosi daafira mashalaqqe hasiꞌra dandaatto. Ati rosa hasiꞌratto rosinni afiꞌnannihu mageeshshi loosi nooro afate woꞌnaali. Qoleno rosa hasiꞌratto roso rosse guddinore woy hakkonne looso loossanni noore amaaꞌla dandaatto. (Law. 13:10) Insa togo yite xaꞌmi: “Kuni rosi woy loosi kaaꞌlannori woy gawajjannori maati?” Qoleno Yihowara hagiirrunni soqqantanni noore amaaꞌli. (Law. 15:22) Insa hiittoo roso woy looso kultahera dandiitanno? Hedde nafa egennoottokki looso kultahera dandiitanno.

18. Qaaga hasiissannonkeri maati?

¹⁸ Konni birxichira ronsummonte gede lowo roso woy ledote roso rosa kaaꞌlitarano gawajjitarano dandiitanno. Hakko daafira doodhattore huuccatto assidhe seekkite hedi. Ledote rosi maalaamittete hasiisannore afiꞌnanni gede kaaꞌlara dandaannota, addu hagiirre afiꞌnannihu kayinni Yihowa ledo muli jaalooma kalaqiꞌne ikkinota qaagi. (Fa. 16:9, 11) Rosinohu maalaamittete rosi ikki geeshshihano ikkiro Yihowa mannasi woꞌmanka woyte towaatanno. (Ibi. 13:5) Xa lowoha woy ledote roso rosate daafira maa doodhitto? Roso rossanni heedhenni Yihowawa gamba yite heeꞌratto gede kaaꞌlannoheri maati? Aananno birxichira tenne daafira ronseemmo.