Lowo Roso Rossanni Heedhenni Ayyaanaamittetenni Kaajjite Heeꞌri

1-2. (a) Lowo roso rosa doodhoottoha ikkiro agurittokki assa hasiissannoheri maati? (b) “Tenne doogora amanyootunni alba hinge qaanfo” yaa mayyaate? (Filiphisiyusi 3:16)

MITE Yihowa soqqamaano uminna layinki dirimi roso gudduhu gedensaanni lowo roso rosa doodhitino. Insa konne roso rossannohu Yihowara soqqantanno woyte kaaꞌlannonsa looso afiꞌrate hedde ikkara dandaanno. Lowo roso rosa doodhoottoha ikkiro Yihowawa gamba yite heedhanni noottotanna teꞌee buuxiꞌra dandaattohu hiittoonniiti? (Yaq. 4:8a) Uminna layinki dirimi roso rositto yannara ammanakki fonqolannori tuncu yiinoheti dihuluullissannote. Hakkawarinte gede xaano Yihowara ammanante soqqamate ‘tenne doogora amanyootunni alba higge qaafa’ hasiissannohe.—Filiphisiyusi 3:16 nabbawi.

² “Tenne doogora amanyootunni alba hinge qaanfo” yitannoti Giriikete afii yaatto olanto mittu garinni dirante alba higge hadhannota kulate horoonsiꞌnannite. Lowo roso rosa doodhoottoha ikkiro uurrittokkinni woy badhera higittokkinni Yihowara soqqamate ‘alba higge haꞌra’ hasiissannohe. Konni birxichira kaaꞌlannoheha shoole Qullaawu Maxaafiha xintu seera ronseemmo. Kuni xintu seeri afoottoho. Kuni xintu seeri alba loosu aana hosiisoottoho; lowo roso rossanni heedheno ikko gudittohu gedensaannino loosu aana hosiisa hasiissannoheho.

DANCHA AYYAANAAMITTETE GADE HEEDHANNOHE GEDE ASSIꞌRI

3. Lowo roso rosatto woyte hiittoo qarri tuncu yaahera dandaanno?

³ Qarra ikkara dandaannore. Lowo roso rosatto woyte barru baala loosatto loosi aana wolu loosi lexxahera dandaanno. Roso seekkite rosa hasiꞌrakki nooreentilla; tini kayinni Yihowara soqqamantenni roso roorsiꞌratto gede assitahera dandiitanno. Isinni gambooshshe, soqqansho, hojjunnita Qullaawu Maxaafi xiinxallonna huuccatto lashshi assite agurattora nafa dandaatto.—Aju. 2:4.

4. ‘Mootichu loosi woꞌmannohe’ gede may kaaꞌlahera dandaanno? (1 Qorontoosi 15:58)

⁴ Umi Qorontoosi 15:58 nabbawi. Biskilliite hadhanno gede peedaale agurrikki kada hasiissannonte gede; Yihowa ledo noohe jaaloomi kaajje heeꞌranno gede assiꞌrate ‘Mootichu loosi woꞌminoheha ikka’ hasiissannohe. Togo yaa mito woyte tiokiraasete looso loonsanni mulla yanna saysa diꞌꞌikkitino. Kuni heeshshokki giddo balaxisiisa hasiissannohe loosooti. Roorsiꞌra hasiissannohehu lowo roso ikkikkinni Yihowara soqqama ikkitinota deꞌooti. (Mat. 22:37) Samanta yinanni wedellitte togo yitino: “Rosu Yihowara soqqameemmakki gede guficho ikkannoeha ikkiro agurate qaale eoomma.”

5. Yihowara diinaggaabbe soqqantanni heeꞌrate maa assa dandaatto?

⁵ Lowo roso hanafattora albaanni assa dandaattore. Balaxisiisa hasiissannohere buuxiꞌri. Ateneeto togo yite xaꞌmi: ‘Ganye gambooshshe haꞌrate, soqqansho fulatenna hojju xiinxallo assiꞌrate maa asseemmo?’ (Iya. 1:8; Mat. 28:19, 20; Ibi. 10:25) Qoleno uminna layinki dirimi roso rositto yannara ayyaanaamittete coye balaxisiisootto gara qaagi. Hakkawaro assattori gate bainoheti xa leeltinoheha ikkiro woyyeessiꞌrate maa assa dandaatto? Lowo roso rossanni heedhenni Yihowara diinaggaabbe soqqantanni heeꞌrate murciꞌri. Roso seekkite rosa hasiissannoheha ikkirono tini Yihowa magansiꞌrate yannanna wolqa hoogatto gede assitahera wodhitooti.a—Mat. 6:24.

6. Ateneeto layiꞌratto woyte maa heda hasiissannohe? (Misileno lai.)

⁶ Lowo roso rosatto woyte ganyite ateneeto layiꞌri; togo assattohu aganu kiiro ikkara dandaanno. ‘Xaa geeshsha ayyaanaamittete coye balaxisiisanni noommo?’ yite ateneeto xaꞌmi. Qorophatto gede assannohere wodanchittoro lawishshaho, gambooshshe hosa woy barrisiꞌra, gambooshshu yannara rosu daafira heda woy gambooshsheho silkete woy interneetete widoonni calla ea roso assiꞌrittoro rakke qaafo adhi. Qoleno ateneeto togo yite xaꞌmi: ‘Albi geeshsha huuccatto assiꞌranna Qullaawa Maxaafa nabbawa aguroommo? Soqqansho fuleemmohu fula hasiissannoe daafira callaati? Woy gawa gawa asse rahe agure higeemmo?’ Togoori roso ikkanni nooheta afittoro rakke biddi assiꞌri. Rosu Yihowara soqqama balaxisiisattota hoolahera wodhitooti.

‘XIINXALLA IKKI’

7. Lowo roso rosatto woyte hedatto gara soorrannori may tuncu yaahera dandaanno?

⁷ Qarra ikkara dandaannore. Lowo roso rosatto woyte doodhattohu mitu rosi ‘mannu woga aana xintantino hayyora, haafu awaawurshira’ hattono Maganu dino yaanno rosiranna suutu soorro rosira reqecci assahera dandaanno. (Qol. 2:8) Qoleno togoo rosi quwa saꞌne meessaneeto addaxxinanni gede assara dandaanno. Mittu wedellichu rodii albita qaage togo yiino: “Ronsoommohu haaro dandoo calla diꞌꞌikkino; magarinni heda hasiissannonkerono ronsoommo. Togoo hedo kayinni duucha woyte Yihowa hedo ledo sumuu diyitannote. Lawishshaho hagiirru noo heeshsho heeꞌra dandiineemmohu umonke addaxxinummoro callaati yaanno roso ronsoommo. Togoo hedo Yihowa kaaꞌlo dihasiissannonke yineemmo gede assitannote. Tini Yihowa addaxxa roore qarra ikkitannoe gede assitinoe.”

8. ‘Xiinxalloota ikka’ hasiissannonkehu mayraati? (Lawishsha 5:1, 2)

⁸ Lawishsha 5:1, 2, (NW) nabbawi.b Qullaawu Maxaafi ‘xiinxalloota ikkineemmo’ gede amaalannonke. Korkaatuno Sheexaanunna alamesi woꞌmanka woyte hedonke daaffara woꞌnaaltanno. (1 Ph. 5:8) Tini alame amanyootu, heeshshote kaimi woy Maganu nooha ikkasi daafira noohe ammana shoshshoggishshara dandiitanno. Rosu mini rosiisaanonna wolootu, togoo coyibba daafira noonsa lao ammanatto gede assitahera woꞌnaaltanno. Togoo hedo kayinni “Maganu albaanni gowwimmate.”—1 Qo. 3:18-20.

9. Xiinxalla ikkate ma assa dandaatto?

⁹ Lowo roso hanafattora albaanni assa dandaattore. Xiinxalla ikkate, lowo roso hanafattora albaanni Qullaawu Maxaafi rosiisanno rosira noohe ammana kaajjado ikkase buuxiꞌri. Ateneeto togo yite xaꞌmi: ‘Magano ammaneemmohu mayraati? Qullaawu Maxaafi Isi Qaale ikkinota afeemmohu hiittoonniiti? Qullaawu Maxaafi amanyootu daafira kulanno biddishshi mannunniha roorannota ammaneemmo gede assinoeri maati?’ Qoleno uminna layinki dirimi roso rositto waro alamete manni hedanno garinni hedate fonqolamoottoti dihuluullissannote; tenne qaagakkino kaaꞌlitannohe. Wolootu suutu soorro daafira afoo wonshite coydhanno gari ammanakki shoshshoggishino? Ledokki rossannori heedhannota amanyoote baꞌino heeshsho heeꞌrate fonqolamootto? Hatto ikkiro xa ammanakki albinni roore kaajjishiꞌra dandaattohu hiittoonniiti? Lowo roso rosatto woyte xiinxalla ikkate murciꞌri.—2 Xi. 2:16-18.c

10. Xiinxalla ikkite heeꞌra dandaattohu hiittoonniiti?

¹⁰ Lowo roso rosatto woyte ganyite ateneeto layiꞌri. Ateneeto togo yite xaꞌmi: ‘Maganiweelu manni heeꞌranno heeshsho heeꞌrate fonqolamanni noommo ikka? Rosanni noommohu mitu rosi mulla mannu woga aana xintaminoha ikkasi wodanchanni noommo? Mannu ooso qarra baala hunannohu Maganu Gashshoote ikkinota woꞌmunni woꞌma ammaneemmo?’ Xiinxalla ikkate worba Maganu Qaali rosaancho ikki. Qullaawa Maxaafa xiinxallanna hiinca halaale afiꞌroottota albinni roore ammanatto gede kaaꞌlitannohe.—1 Xi. 4:15.

YANNAKKI SEEKKITE HOROONSIꞌRI

11. Lowo roso rosatto woyte yannakki horoonsiꞌra lainohunni may qarra ikkahera dandaanno?

¹¹ Qarra ikkara dandaannore. Lowo roso rosatto woyte, roorenkanni fonqoloho woy mitte pirojekte uyinoonnihe yanna giddo gudate xiinxallato woyte yanna lowonta ajjahera dandiitanno. Yannakki seekkite horoonsiꞌra hoogittoro lowo geeshsha yaadattoranna daafurattora dandaatto. Hakko daafira rosoho xiinxallatto woyte ateneeto towaaxxa hasiissannohe.

12. ‘Yannakki seekkite horoonsiꞌrate’ hiikkuri coyibbarano yaanna gaaꞌma hasiissannohe? (Efessooni 5:15, 16)

¹² Efessooni 5:15, 16 nabbawi. ‘Yannakki seekkite horoonsiꞌra’ qarra ikkitahera dandiitanno. Korkaatuno loosattohu lowo loosi heeꞌrannohe. Lawishshaho rosunkunni roore ammanate roduuwikkinna maatekki ledo yanna saysate illachisha hasiissannohe. (Fa. 133:1; Law. 18:1) Baalunkunni rooranno coy ayyaanaamittete hasattokkiiti. (Mat. 6:33) Maatete hasiisannore wonshate qeechinna wolu loosino nooheha ikkara dandaanno. Qoleno dancha gede fooliishshidhenna bikku ispoorte loosse fayyimmakki agadha hasiissannohe. (Ros. 4:6: 1 Xi. 4:8) Konne baala coye assate yanna danchu garinni horoonsiꞌra hasiissanno.

13. Yannakki danchu garinni horoonsiꞌrate maa assa dandaatto?

¹³ Lowo roso hanafattora albaanni assa dandaattore. Qullaawu Maxaafi “jawaatu manchi hedo jirotenni xaadissanno” yaanno. (Law. 21:5) Tenne wodanaho wodhite, lowo roso hanafattora albaanni dancha pirogiraame fushshiri. Tennera kaaꞌlitannohe gede uminna layinki dirimi roso rositto warita qaagi: Hakkawaro yannakki dancha gede horoonsiꞌroottohu hiittoonniiti? Hakkawaro assattori gate bainoheti xa leeltuhero maa assa dandaatto? Yanna ajjanni qarrissannohekki gede dancha pirogiraame fushshirate murciꞌri.d

14. Ateneeto layiꞌrate kaaꞌlitannohe xaꞌmuwa hiikkuriiti?

¹⁴ Lowo roso rosatto woyte ganyite ateneeto layiꞌri. Ateneeto togo yite xaꞌmi: ‘Fushshiꞌroommo pirogiraame dancha gede fooliishshiꞌratenna ispoorte loosate kaaꞌlitanni nooe? Ammanate roduuwiꞌyawa aanate yanna afiꞌranni noommo? Mini looso yannatenni gudeemmo? Hatto ikka hoogiro loosu batiꞌrinoenso techo gaꞌa yaanni guda hoogoommo? Jaallaꞌyanna maateꞌya miilla fushshiꞌroommo pirogiraamera sumuu yitanno?’ Pirogiraamekki biddi assiꞌra hasiissannoheta woy seekkite haꞌrunsitanni noottokkita afittoro rakke qaafo adhi. Yannansa dancha gede horoonsiꞌrate dandoo noonsareno amaaꞌla dandaatto.—Law. 11:14.

‘EGENNAAMU LEDO HOSI’

15. Lowo roso rosatto woyte may qarri tuncu yaahera dandaanno?

¹⁵ Qarra ikkara dandaannore. Lowo roso rosatto woyte ledokki rossannori insa ledo yanna saysatto gede koyissahera dandiitanno. Ateno tini yorsiissannoheha ikkara dandaanno. Hakko iso rosu mine ledonsa lowo yanna saysattoha ikkiro insa ledo mitto assannohehu lowo coy heeꞌranno. Isinni mitu ammanate roduuwikkinni roore ledokki rossannori ledo hosa roorsiꞌrattoha ikkara dandaanno. Kayinni qoropha hasiissannohe. Insa ledo rosattoha ikkirono ati Yihowa hagiirsiisa hasiꞌratto daafira mitto diꞌꞌikkitinoonni. Insa ledo lowo yanna saysitto kiiro insa heddanno garinni heda hanafattora dandaatto. (1 Qo. 15:33) Shoole diro elektirooniksete qajeelsha adhinohu Mayikili yinanni rodii tini halaale ikkitinota coyiꞌrino. Isi togo yiino: “Meyata ayirrissannokkiri, Kiristaanaho malinokki muuziiqa macciishshitannorinna mancaꞌꞌa coye coyidhannori ledo barrunni sette saate looseemmo; insa ledo yanna saysummo kiiro ikkitonsa busha ikkitinokkihu gede asse heda hanafoommo.”

16. ‘Egennaamu ledo hosate yaa mayyaate?’ (Lawishsha 13:20)

¹⁶ Lawishsha 13:20 nabbawi. Qullaawu Maxaafi bushu jaaloomi gawajjannota kule qorophisiisannonke; “Egennaamu ledo hosannohu egennaamo ikkanno.” yeeno kulannonke. Rosu digoꞌlinoho: doodhineemmo jaalla danchare woy bushare assineemmo gede assitannonke. Hakko daafira atente gede Yihowa baxxannorenna atera danchare heddannore jaallakki assiꞌri.—Fa. 101:6, 7; 119:63.

17. Busha jaalooma giwate ma assa dandaatto?

¹⁷ Lowo roso hanafattora albaanni assa dandaattore. Ledokki rossannori ledo mageeshshi yanna saysattoronna insawa mageeshsha aanattoro hedi. Tirentooni yinanni rodii togo yino: “Ledoꞌya rossannorira danchare asseemmo; kayinni rosu yanna gedensaanni insa ledo yanna disayseemmo. Insa ledoꞌya rossannori gede asse ikkinnina muli jaallaꞌya gede asse dilaeemmo.” Ati ledokki rossannore muli jaallakki assiꞌrattokki gede ma assa dandaatto? Tenne xaꞌmora dawaro afiꞌrate hanni albita qaagi: Uminna layinki dirimi roso rositto waro togoo jaalooma giwate maa assootto? Hakkawaro assattori gate bainoheti xa leeltuhero maa assa dandaatto? ‘Egennaamu ledo hosatenna’ Yihowa baxxannokkire jaallakki assiꞌrattokki gede murciꞌri.e

18. Ateneeto hiikkuri xaꞌmuwa xaꞌma hasiissannohe? (Misileno lai.)

¹⁸ Roso rosatto woyte ganyite ateneeto togo yite xaꞌmi: ‘Ledoꞌya rossannori ledo muli jaalooma kalaqiꞌranni noommo ikka? Coydhannorinna akatinsa coyiꞌreemmonna hedeemmo gara soorranni nooe ikka? Insa ledo nooe aante Yihowa ma garinni laꞌꞌanno?’ (Fa. 1:1) Insa ikkito huntanni nooheti leeltuhero rakke qaafo adhi. Muli jaalla assiꞌra hasiissannohehu atente gede Yihowa baxxannore ikkinota deꞌooti. Ledokki rossannorira farciꞌrateno hobbi ruxxi yitooti. Halaale rossanno gede insa kaaꞌlate maloottohu ateeti.

QIXXAAWOOTTOHA IKKI

19. Lowo roso rosatto woyte ayyaanaamittekki gawajjannore qeelate qixxaawa dandaattohu hiittoonniiti? Lawishsha kuli.

¹⁹ Dubbu giddoonni haꞌrannohu hayyichu manchi haꞌra hanafara albaanni balaxe qixxaawanno. Isi tuncu yaasira dandaannore baala afinokkiha ikkirono, koatte wodhanno, mitiri qasannosikki gede seeda uddano uddiꞌranno hattono hiikka haꞌrannoro bade afino. Atino lowo roso rosatto woyte hattonni qixxaawa dandaatto. Woꞌmanka woyte ammanakki kaajjishiꞌri; ‘Maganunniha olu uduunne woꞌma uddiꞌri’ hattono tenne alamera qiniitu gede assine laꞌnanni coye afiꞌrate ikkikkinni assattori baalunkunni Yihowa ayirranno gede assate mixiꞌri.—Efe. 6:11-13; 1 Qo. 9:26, 27; 10:31.

20. ‘Ammanatenni kaajjite noottoronna teꞌee buuxiꞌra’ dandaattohu hiittoonniiti?

²⁰ Qullaawu Maxaafi “Ammanatenni kaajjitine heedhinoonnironna teꞌee buuxiꞌrate, woꞌmanka woyite kiꞌneneeto qonqolchitine layidhe” yee jawaachishannonke. (2 Qo. 13:5) Lowo roso rosatto woyteno tenne assa dandaatto. Konni birxichira ronsummore assitanni noottoronna teꞌee ganyite layiꞌri. Dancha ayyaanaamittete gade heedhannohe gede assidhanni nootto? Alame hedokki soorritannokki gede xiinxalla ikkakki leellishshanni nootto? Yannakki seekkite horoonsidhanni nootto? Busha jaalooma gibbe ammanate roduuwikki ledo noohe jaalooma kaajjishidhanni nootto? Rosu mine, loosu baycho woy wole aye baserano heeꞌrittoro ateneeto kuri xaꞌmuwa xaꞌma hasiissannohe. Nootto gari ikkihano ikkiro ammanatenni kaajjite heeꞌrate murciꞌri. Kuri coyibba assittoro Yihowa maassiꞌrannoheta addaxxa dandaatto.—Law. 3:5, 6.