Qullaawu Maxaafihu Xintu Seerinni Tiiakki Qajeelsiꞌri

1-2. (a) Addaamiranna Heewanira uynoonninsa elto maati? (b) Insa tenne elto magarinni laꞌꞌa hasiissannonsa?

SAADA heda didandiitanno. Maashine loossannohuno uynoonnise hajajo garinni callaati. Mannu ooso kayinni dihattooti. Ninke mannu oosora baxxitino elto uynoonninke. Tini elto doodhate dandooti; hakko daafira mitto doorsha uminkenni doodha dandiineemmo. Qullaawu Maxaafi umi manchi Addaami Maganu daninni kalaqaminota kulanno. (Kal. 1:26, 27) Addaaminna Heewani hedate dandoo noonsare ikkitino daafira mitto coye uminsanni doodha dandiitanno.

² Yihowa Addaamiranna Heewanira mittu mittunku coyra seera diuynonsa. Isi insa uulla towaattanno gede, ilte ilante baatto woꞌmitanno gedenna biilloonyesi ayirrisse worino danna saꞌannokki gede calla kulinonsa. (Kal. 1:28; 2:16, 17) Addaaminna Heewani doodhate dandoo uynonsa Magano ayirrissannota leellisha dandiitannohu hiittoonniiti? Yihowa uyinonsa coy baalu insa tenne hajajo ayirrisse iso baxxannotanna hagiirsiisa hasidhannota leellishshanno gede assannonsaho.—Law. 23:15.

3. Addaaminna Heewani doodhate dandoonsa horoonsidhinohu hiittoonniiti?

³ Qullaawu Maxaafi Addaaminna Heewani doodhate dandoonsa hayyotenni horoonsidhinokkita kulanno. Isinni insa Yihowara hajajama hooga doodhitino. Insa tenne doodhitinohu umonsa calla baxxannohuraati. (Kal. 3:1-7) Insa doodhitinohu bushu doorshi xaa geeshsha ninkeno qarrammeemmo gede assinonke.—Rom. 5:12.

4. (a) Galaatiya 6:5 kultanno garinni ninke baalunku maa assa hasiissannonke? (b) Konni birxichira wole hiittenne elto daafira ronseemmo?

⁴ Barru baala addi addi doorsha doodhineemmohura heeshsho shota diꞌꞌikkitannonke. (Galaatiya 6:5 nabbawi.) Doodhineemmohu mitu doorshi hakkeya diqarrisannoho; mitu kayinni dishaaꞌꞌaho. Yihowa hagiirsiisanno doorsha doodha dandiineemmohu hiittoonniiti? Balanxe Yihowa kaaꞌlo hasiissannonketa ammanne adha hasiissannonke. (Law. 16:3; Erm. 10:23) Guutu manchi Yesuusi nafa Yihowa kaaꞌlo hasiissannosita huwatino. (Ibi. 5:7) Guuntete xeꞌne noonkere ikkinoommo daafira, ninkera isinni Yihowa kaaꞌlo roore hasiissannonke. Hanni xa dancha doorsha doodhineemmo gede kaaꞌlitannonketa Maganu uynonketa wole elto laꞌno; tini elto tiiankeeti.

TIIU MAATI?

5. (a) Tiiu maati? (b) Tiiu kaaꞌlannonkehu hiittoonniiti? (Rooma 2:14, 15)

⁵ Tiiu danchanna busha badate kaaꞌlitannonkete giddonke noo dandooti. Maganu seera horo afinokki mannira nafa tiiu noonsa. (2 Qo. 4:2) Tiiꞌꞌinke daanyu gede hendeemmori woy assineemmori dancha woy busha ikkinota kulannonke. (Rooma 2:14, 15 nabbawi.) Anfanni heeꞌnenni gara ikkinokkire assineemmo woyte qorophisiisannonke. (1 Sa. 26:8-11) Qoleno gara ikkinore assineemmo gede jawaachishannonke. Doodhate dandoo noonke daafira calla doodhineemmo doorshi baalu Yihowa hagiirsiisannoha ikkanno yaa diꞌꞌikkino. Tiiꞌꞌinke danchanna busha doorsha bande anfeemmo gede kaaꞌlannonkeha ikka hasiissannosi.

6. Tiiꞌꞌinke dancha doorsha doodhineemmo gede kaaꞌlannonkehu woꞌmanka woyte diꞌꞌikkino yineemmohu mayraati?

⁶ Kayinni tiiꞌꞌinke mito woyte dancha doorsha doodhineemmo gede kaaꞌla hoogankera dandaanno. Guuntete xeꞌne noonkere ikkinoommo daafira tiiꞌꞌinkeno guuta diꞌꞌikkino. Lophinoommo gari, budinkenna busha yorto tiianke daaffara dandiitanno. Qullaawu Maxaafi tiiu ‘laafara, battaawara, ruqaꞌnino siwiilinni giirreenna bassaawino bisi gede dillaawaranna bushara’ nafa dandaannota kulanno. (1 Qo. 8:10; Tit. 1:15; 1 Xi. 4:2; Ibi. 10:22) Togoo tiiꞌꞌi dancha doorsha doodhineemmo gede dikaaꞌlannonke. Kuni tiiꞌꞌi guunjo dibbino maxanxare gedeeti; maxanxare feya hoongiro xunsine laꞌꞌa didandiinanni. Tiianke dancha gede qajeelsiꞌrateno sharrama hasiissannonke. (1 Ph. 3:16) Tenne assa dandiineemmohu hiittoonniiti?

TIIANKE QAJEELSIꞌRA DANDIINEEMMO GARA

7-8. (a) Tiianke qajeelsiꞌneemmo gede kaaꞌlannonkeri maati? (b) Qullaawu Maxaafihu xintu seeri kaaꞌlannonkehu hiittoonniiti? Lawishsha kuli. (Misileno lai.)

⁷ Tiianke qajeelsiꞌra dandiineemmohu hiittoonniiti? Ganyine Qullaawa Maxaafa nabbawanna Yihowa garanna gara ikkinokkiri daafira kulinore rosa hasiissannonke. Maganu Seera xiinxalla isi hedo huwanteemmo gede kaaꞌlitannonke. Ikkirono sai birxichira kullinte gede seeru xintu seeri geeshsha dikaaꞌlannonke. Xintu seera rosa hasiissannonkehu iseraati; xintu seeri Yihowa hedo seekkine huwanteemmo gede kaaꞌlannonke.—Isa. 55:9.

⁸ Heeshshonke halalla haꞌrate gedeeti yaa dandiinanni. Arrishsho woy beeddahe laꞌne mito geeshshano ikkiro haꞌra hasiissannonke raga anfeemmoha ikkara dandaanno. Kayinni haꞌneemmo doogora noota mite malaatta leellishanno kaarta afiꞌra roore kaaꞌlitannonke. Togoo kaarti gara ikkitino doogo haꞌnanni heeꞌnoommota buuxiꞌneemmo gedenna doogo soꞌneemmokki gede kaaꞌlannonke. Mixonke Yihowa hagiirsiisate. Qullaawu Maxaafi raga leellishanno kaarti gedeeti. Qullaawu Maxaafihu xintu seeri kayinni haꞌneemmo doogora noo malaatta gedeeti. Konni xintu seeri garinni heeꞌnummoro mixonke wonshiꞌra yaano Yihowa hagiirsiisa dandiineemmo.

9. Rooma 9:1 tiianke qajeelsiꞌrate kaaꞌlannonkere wolere maa kulloonni?

⁹ Tiianke garunni qajeelsiꞌrate Maganunnihu qullaawu ayyaani kaaꞌlo hasiissannonke. (Rooma 9:1 nabbawi.) Qullaawu ayyaani Maganoho mittu coy daafira noosi hedo huwanteemmo gede kaaꞌlannonke. Qoleno mitto coye Yihowa fajjo garinni assineemmo gede kakkaysannonke hattono wolqa ikkannonke. (Fil. 2:13) Ikkina qullaawu ayyaani kaaꞌlo afiꞌra dandiineemmohu hiittoonniiti?

10. Qullaawu ayyaani kaaꞌlo afiꞌra dandiineemmohu hiittoonniiti? (Luqaasi 11:10, 13)

¹⁰ Qullaawa ayyaana afiꞌrate huucciꞌri. (Luqaasi 11:10, 13 nabbawi.) Yihowa qullaawa ayyaanasi batise aannonketa addaxxa dandiineemmo. (Yoh. 3:34) Isi biddishshasi haꞌrunsitannorira qullaawa ayyaanasi shaqqillunni aanno. (Law. 1:23; Yaq. 1:5) Tiianke qajeelsiꞌneemmo gede kaaꞌlannonkeri woluri maati?

11. (a) Qara mixonke maa ikka hasiissannose? (b) Tiiꞌꞌinke qajeelinotanna garunni loosanni noota buuxiꞌra hasiissannonkehu mayraati?

¹¹ Woꞌmanka woyte Yihowa hagiirsiisate sharrami. (Law. 8:34, 35) Qara mixonke ikka hasiissannoti tenneeti. Heeshshonke giddo tuncu yaannonke coy ikkihano ikkiro tenne mixonke qaaganke tiianke qajeelsiꞌneemmo gede kaaꞌlitannonke. Dancha gede qajeelino tiia afiꞌrate yaa Yihowa hedo seekkine afatenna iso dadillisannore assa qorophate. Heeꞌnoommo yanna qarrissannota ikkitino daafira dancha gede qajeelino tiia afiꞌra kaaꞌlitannonke. Mito woyte Qullaawu Maxaafi giddo bande kulloonnikki coy tuncu yaannonke. Kuri coyibba giddo mitu boohaarsha, looso, rosonna wolootu ledo noonke aante ikkitara dandiitanno. Kuri coyibba lainohunni doodhineemmo doorshi Yihowa hagiirsiisannotanna teꞌee buuxa dandiineemmohu hiittoonniiti?—2 Qo. 1:12.

12. Tiiꞌꞌinke gara ikkinore assineemmo gede massaganni noonketa afate kaaꞌlannonkeri maati? (Efessooni 5:10)

¹² Maganu Qaali giddonni nabbawoottore hiinci. (Fa. 49:3) Qullaawa Maxaafa nabbawatto woyte Yihowa hedo huwatatto gede kaaꞌlannoheha xintu seera hasiꞌri. (Efessooni 5:10 nabbawi.) Iillinonkeha shaaꞌꞌa ikkinokki qarra tirate sharrammeemmo woyte Qullaawu Maxaafiha xintu seera hasiꞌra hasiissannonke; togo assanke tiiꞌꞌinke dancha doorsha doodhineemmo gede kaaꞌlanni noonkeronna teꞌee afate kaaꞌlitannonke. (Law. 2:4-9, 11-13) Kuni xintu seeri tiiꞌꞌanke qajeelsiꞌratenna Yihowa hasiꞌrannore assineemmo gede kaaꞌlannonke.—Ibi. 5:14.

13. Assa hasiissannonkekki coy maati? Lawishsha kuli.

¹³ Mitto doorsha doodhite kaꞌe hakkiinni tennera kaaꞌlannoha xintu seera hasidhooti. Yerusaalame 607 K.A. baꞌuhu gedensaanni Yihudu gobbara gattino Israeele gede ikka dihasiꞌneemmo. Insa Ermiyaasira togo yitino: “Eeggatena, doogo kulannonke gedenna ikkineemmo gara xawisannonke gede Maganokki Kaaliiqa huuccinke.” (Erm. 42:3-6) Insa kayinni balaxxe assitannore doodhite kaꞌino. Yihowa kulinonsari hagiirsiisa hooginsata umonni hedde noore assitino. Tini qarra abbitinonsa. (Erm. 42:19-22; 43:1, 2, 4) Konnira mitto doorsha doodhinammora albaanni Yihowa hedo anfeemmonna fajjosi assineemmo gede kaaꞌlannonkeha xintu seera hasiꞌra hasiissannonke.

14. Mitto doorsha doodhineemmo woyte Qullaawu Maxaafiha xintu seera haꞌrunsa hasiissannonkehu mayiraati?

¹⁴ Mitto Doorsha doodhatto woyte Qullaawu Maxaafiha xintu seera haꞌrunsi. (Mat. 7:24-29; Yaq. 1:23-25) Mitto doorsha doodhineemmo woyte Qullaawu Maxaafiha xintu seera haꞌrunsineemmoha ikkiro qullaawu ayyaani ledo sumuu yaannore assineemmo. Hatto assineemmoha ikkiro Yihowa qullaawa ayyaanasi aannonke. (Soq. 5:32) Kayinni Yihowa ayyaani massagannonketa gimbeemmoha ikkiro qullaawa ayyaana ‘dadillinseemmo’ woy qullaawu ayyaani ledo sumuu yaannokkire assineemmo. (Efe. 4:30; Isa. 63:10; Soq. 7:51) Yihowa qullaawa ayyaanasi nafa ninkewiinni haaꞌre hoolara dandaanno. (Fa. 51:11; 1 Te. 5:19) Hatto ikkiro Yihowa ayyaani aanno wolqanna jawaante hoongeemmo daafira qarrammammora dandiineemmo.—Efe. 3:16.

KAAꞌLANNONKEHA XINTU SEERA AFIꞌRA DANDIINEEMMO GARA

15-16. (a) Kaaꞌlannonkeha qullaawu Maxaafiha xintu seera afiꞌra dandiineemmohu hiittoonniiti? (b) Mitto Qullaawu Maxaafi rosaancho sijaara aga aguranno gede kaaꞌlannosihu xintu seeri hiikkonneeti?

¹⁵ Xiinxallote kaaꞌlanno uduunne horoonsiꞌri. Qullaawu Maxaafiha xintu seera loosu aana hosiinsammora albaanni balanxe Qullaawa Borro giddonni hanse afiꞌra hasiissannonke. Lawishshaho, Qullaawu Maxaafi rosaanchikki sijaara aga aguralla huluullami? Isi togo yaannoha ikkara dandaanno: ‘Qullaawu Maxaafi giddo sijaaru daafira yinoonniri dino. Ikkina sijaara aga soꞌro ikkitinota mayinni anfeemmo?’ Tennera kaaꞌlannosiha xintu seera afiꞌranno gede iso kaaꞌla dandaattohu hiittoonniiti? Yihowa Farciꞌraasineti Xiinxallote Kaaꞌlitanno Borro tennera kaaꞌlitannohe. Rosaanchikkira tenne borrora nooha “Araddonna Sijaara” yaanno birxicho leellishattosira dandaatto. Isi konni birxichi hunda “Sijaara Angannita Maganu Baxanno?” yitanno borro afiꞌranno. (Ella 1, 2014 Agarooshshu Shae lai.) Isi hakkonne birxicho nabbawanno woyte hiikkuri qummeeshshuwanna xintu seera afiꞌranno?

¹⁶ Hakko birxichi giddo aane nooha onte xintu seera kulloonni. (1) Reyonniwa massannonke coyra borojje ikka dihasiissannonke. (Rom. 6:16) (2) Maalanke batteessanno coye baala giwa hasiissannonke. (2 Qo. 7:1) (3) Yihowa isira woꞌma lubbonkenni soqqammammosira hasiꞌranno. (Mat. 22:37) (4) Assootinkenni woloota gawajja dihasiissannonke. (Mat. 22:39; 1 Qo. 10:24) (5) Yihowa gara ikkinore assineemmo gede jawaante aannonke. (Fil. 4:13) Hakko daafira Qullaawu Maxaafi giddo sijaaru daafira bande kulloonnikkiha ikkiro nafa xintu seeri rosaanchikki Yihowa hedo bade afanno gede kaaꞌlannosi.

17. Adhamate qixxaawanni noo Kiristaani tennera kaaꞌlannonsaha xintu seera afiꞌra dandaannohu hiittoonniiti?

¹⁷ Adhamate qixxaawanni noo Kiristaani dancha doorsha doodhanno gede kaaꞌlannonsaha, Qullaawu Maxaafiha xintu seera afiꞌra dandaannohu hiittoonniiti? Tennerano Xiinxallote Kaaꞌlitanno Borro kaaꞌlitansara dandiitanno. “Sargenna Jila” yaanno birxichi hunda tennera kaaꞌlannoha Qullaawu Maxaafiha xintu seera amaddino birxichuwa no. Kuri birxichuwa giddo adhamate qixxaabbanni noore kaaꞌlara dandaannohu lewu xintu seeri no. (1) Sargete qixxaawo baalanti Yihowa ayirranno gede assitannota ikka hasiissannose. (1 Qo. 10:31, 32) (2) Uddiꞌneemmo uddano bikkunnitanna kawajjaame hattono quwa saꞌinokkita ikka hasiissannose. (1 Xi. 2:9; 1 Ph. 3:3, 4) (3) Sheexaanu alame wido ikkino manni assannore yaano afiꞌnoonnire leellishiꞌrate ikkito giwa hasiissannonke. (Yoh. 17:14; Yaq. 1:27; 1 Yo. 2:15, 16) (4) Sargete qixxaawo amanyootu noota ikka hasiissannose. (1 Qo. 14:40) (5) Sargete daanno manni dimbanna ikkinannikkita ikka dihasiissannonsa. (Gal. 5:21) (6) Sargete jilira murricha ikke soqqamannohu heeꞌra hasiissanno.—Yoh. 2:8, 9.

18-19. (a) Kaaꞌlankera dandaannohu wolu uduunni hiikkonneeti? (b) Kuni uduunnichi ayyaana ayirrisa lainohunni danchare doodhatto gede kaaꞌlannohehu hiittoonniiti? (“Xintu seera badde afa dandaatto?” yitanno saaxine lai)

¹⁸ Kiristaanu Heeshshora Kaaꞌlitanno Qummeeshshuwa yitanno borrono lowo manna kaaꞌlitino. Tenne borro giddo addi addi birxichi hunda batinye qummeeshshuwa no. Mitto birxicho faꞌnatto woyte hakko birxichi hunda, Qullaawu Maxaafiha xintu seera badde afate kaaꞌlitannohe xaꞌmuwanna qummeeshshuwa no. Lawishshaho mittu Kiristaanchi mitto ayyaana ayirrisa hasiissannosironna teꞌee hedanni nooha ikkara dandaanno. Isi “Ayyaanna” yaanno birxicho faꞌniro hakko gafira “Kiristaanu ayirrisannokki ayyaanna” yaannoha cinaancho birxicho afiꞌranno.

¹⁹ Hakko gafira noo hedo giddo mite togo yitannote: “Kaphu ammaꞌno ledo xaadooshshe afidhino ayyaanna ayirrisa soꞌro ikkitinohu mayiraati? (1 Qo. 10:21; 2 Qo. 6:14-18; Efe. 5:10, 11).” Hakkiinni togoo ayyaanna ayirrisa hasiissannokkihu mayraatiro kulloonni. Hakkiicho “Gobbate baxillira yine ayirrinsanni ayyaanna” yaannohu cinaanchu birxichi no. Konni birxichi hunda, mittu Kiristaanchi mitte gobba xagge qaagate, alba olantino ola qaagate ayirrissanno ayyaana ayirrisa woy Yihowara uyinanni gedee ayirrinye macca mannira aate qixxeessinanni qixxaawora karsama hasiissannosironna teꞌee hedanno woytira kaaꞌlannosiha, xintu seera worroonni. Yihowa dirijjite tiianke qajeelsiꞌneemmo gede kaaꞌlannoha togoo uduunne uytinonke daafira lowo geeshsha tashshi yaannonke!

DANCHA GEDE QAJEELINO TIIꞌꞌI NOOHETA LEELLISHI

20. Tiianke dancha gede qajeelsiꞌnoommota leellisha dandiineemmohu hiittoonniiti?

²⁰ Yihowa uynonketa doodhate qoosso lowori gede assine laꞌneemmo. Qoleno tenne qoossonke danchu garinni horoonsiꞌrate tiianke qajeelsiꞌra hasiissannonketa anfoommo. Dancha gede qajeelino tiiꞌꞌi Yihowa ayirranno gede assannohanna fajjosi ledo sumuu yaanno doorsha doodhineemmo gede kaaꞌlannonke. Tenne assate Yihowahu qullaawu ayyaani kaaꞌlo hasiissannonke. Hakko daafira qullaawa ayyaana afiꞌrate woꞌmanka woyte huuccatto assiꞌranna qullaawu ayyaani ledo sumuu yaannore assa hasiissannonke. Qullaawu Maxaafihu xintu seerino tiianke qajeelsiꞌneemmo gede kaaꞌlannonke. Tenne Yihowa uynonke elto dancha gede horoonsiꞌne, Maganu Qaali wolqa kaaꞌlitannonke gara laꞌno!—2 Xi. 3:16, 17; Ibi. 4:12.