Qullaawu Maxaafihu Xintu Seeri Hasiisannonkehu Mayraati?

1-2. (a) Qullaawu Maxaafi hundi maxaafaati yineemmohu mayraati? (b) Xaa yannarano kaaꞌlannonke yineemmohu mayraati?

QULLAAWU MAXAAFI hundi maxaafaati. Konne maxaafa borreessa hananfoonnihu mitu 3,500 diri albaanniiti; borreessine gundoonnihu kayinni mitu 2,000 diri albaanniiti. Ikkirono, xaa yannarano “Maganu qaali” heeshshonnihonna wolqaataamoho. (Ibi. 4:12; 2 Xi. 3:16, 17) Qullaawu Maxaafi yannankera lowo miliyoone ikkanno manni qarra qeele saꞌꞌanno gede kaaꞌlinonsa.

² Ikkollana kuni hundi maxaafi yannankerano kaaꞌlanno yineemmohu mayraati? Hatto yineemmo gede assannonkehu lamu korkaati no. Umihunni, Qullaawu Maxaafi sokka dagginohu hayyosira taalle nookkihu ‘heeshshote Maganiwiinniiti.’ (1 Xi. 4:10; Rom. 16:26, 27) Layinkihunni, Qullaawu Maxaafi amaale yanna saꞌannokkite. Mittu manchi heeꞌranno yanna woy iillannosi qarri ikkihano ikkiro, Qullaawu Maxaafi amaale kaaꞌlitannosi.

3. Konni birxichira hiikkuri xaꞌmuwara dawaro qollanni?

³ Qullaawu Maxaafihu xintu seeri maati? Xaa yannara lowo geeshsha hasiisannonkehu mayraati? Qullaawa Maxaafa nabbambeemmo woyte xintu seera bande afa dandiineemmohu hiittoonniiti? Konni birxichira kuri xaꞌmuwara dawaro qollanni. Qoleno Yesuusi rosiisino rosi xintu seeri lowo waaga afiꞌrinota leellishanno gara ronseemmo.

QULLAAWU MAXAAFIHU XINTU SEERI MAATI?

4. Qullaawu Maxaafihu xintu seeri maati?

⁴ Maganu seeri xintaminohu, safote halaale ikkinohu Qullaawu Maxaafihu xintu seeri aanaati. Mito woyte, seeru giddo xintu seera xawinse kullara dandiinanni. (Mat. 22:37) Ikkirono xintu seeri seera rooranno. Seeru kaaꞌlannohu mite yanna geeshsha woy mitu coyra calla ikkara dandaanno. Qullaawu Maxaafihu xintu seeri kayinni addi addi haja daafira Yihowara noosi lao leellishanno. Xintu seeri seera uynoonnihu mayraatiro afate kaaꞌlanno. Mitto mittonka Yihowa seera uynoonnihu mulla diꞌꞌikkino. Xintu seeri mitte mittente hajora kaaꞌlannoha ikkinohura yanna disaꞌannoho. (Fa. 119:111) Seeru soorramara dandaanno; xintu seeri kayinni disoorramanno.—Isa. 40:8.

5. Seerunna xintu seeri mereero noo badooshshe lawishshunni kuli. (Misillano lai.)

⁵ Hanni seerunna xintu seeri mereero noo badooshshe roore huwatate aane noo lawishsha laꞌno. Ama shiima qaaqqose, ‘Iibbe noo baccicho kissooti’ yitara dandiitanno. Tini hajajote woy seeraho. Ama hatto yitinohu mayraati? Korkaatuno qaaqqu baccicho kisiro giiramara dandaanno. Qaaqqu iibbinore wolereno kisiro giiramanno. Lawishshaho, iibbe noo kaawiyya woy iibbinore wolere kisiro gawajjamara dandaanno. Qaaqqu tenne afasi mine calla ikkikkinni ayewano heeꞌriro kaaꞌlitannosi. Hige kuni qaaqqi lophanni haꞌriro, sagale qishiꞌrate baccicho horoonsiꞌrara dandaanno. Ikkirono baccichu itannosikki gede qoropha hasiissannosi. Hakko daafira, seeru soorramara dandaanno; seera uynoonni korkaati kayinni disoorramanno.

QULLAAWU MAXAAFIHU XINTU SEERI HASIISANNOHU MAYRAATI?

6. (a) Yihowa qaalisi widoonni maa aannonke? (b) Yihowa ayirrisinonkehu hiittoonniiti?

⁶ Yihowa baxannonke daafira gawajjannonkeriwiinni ganteemmo gede seera aannonke. (Yaq. 2:11) Qoleno isi xintu seera huwanteemmo gede woy seera uynoonnihu mayraatiro anfeemmo gede kaaꞌlannonke. Yihowa mittu mittunku coyra seera diuyinonke; ikkollana isi Qullaawu Maxaafi widoonni, seeru heeꞌrannokki woyte nafa dancha doorsha doodhineemmo gedenna gara ikkinore assineemmo gede kaaꞌlannonke biddishsha uynonke. Konne xintu seera oye Yihowa ayirrisinonke; hattono isonna biddishshasi banxeemmota leellishanno doorsha doodhineemmo gede fajjinonke.—Gal. 5:13.

7. Seera uynoonni korkaata afa kaaꞌlitanno gara leellishanno lawishsha kuli. (Misileno lai.)

⁷ Seera uynoonni korkaata huwata dandiineemmohu hiittoonniiti? Hanni mitto lawishsha laꞌno: Mitu qooxeessira makeenaanchote qaccera addi addita tiraafiikete malaatta worranni. Tenne malaatta giddo batinye seera diiggannore qorichinshannita leellishshanno. Kuri malaatta oofaanchu makeenu ranke ajisha woy makeena uurrisa hasiissannosihu mamooteetiro leellishshannota ikkitara dandiitanno. Wole batinye malaatta kayinni gawajjasira dandaanno coye qorophanno gede kaaꞌlitannosi. Lawishshaho mite malaatta doogo shalaqishshannota woy doogo tayisse saꞌanno saada heedhara dandiitannota leellishshannota ikkitara dandiitanno. Dandoo noosi oofaanchi coye heeshshi gotti asse hedanno; hattono gawajjannori noota leellishanno malaate lairo qorophe oofanno. Lawishshaho kaade woy barada xeena gananni nooha ikkiro roore qorophanno. Hatteente gede, Kiristaanu Maganu Qaali giddo bande kulloonniha gara ikkinokki amanyoote baala feexire giwanno; qoleno, Maganu seera diiganno gede assitansara dandiitanno hedo woy assoote baala qorophanno. Tenne assate heeshshi gotti asse heda hasiissanno.

8. Rooma 12:1, 2 kultanno garinni Qullaawu Maxaafiha xintu seera bande afa maaho kaaꞌlitannonke?

⁸ Qullaawu Maxaafiha xintu seera bande afanna hakko garinni heeꞌrano kaaꞌlitannonke. Lawishshaho, Yihowara mittu coy daafira noosi lao maatiro huwata dandiineemmo gara qajeelloommo. Qullaawu Maxaafi xagge nabbambeemmo woyte, kaaꞌlannonke roso afiꞌra dandiineemmo gara ronseemmo. Yihowa tenne xagge Qaalisi giddo borreessinanni gede assinohu mayraatironna tini xagge kaaꞌlitannonkehu hiittoonniitiro heda dandiineemmo. Konni garinni, Yihowara ‘woꞌma surrenkenni’ soqqammeemmo gara ronsoommo. Qoleno “dancha, hagiirsiissannotanna guuta Maganu fajjo” buunxoommota leellinsheemmo.—Rooma 12:1, 2 nabbawi.a

9. Qullaawu Maxaafihu xintu seeri garinni heeꞌra wolurira maaho kaaꞌlitannonke? (Ibiraawoota 5:13, 14)

⁹ Qullaawu Maxaafihu xintu seeri garinni heeꞌra rosa gikki yinoommo Kiristaana ikkate kaaꞌlitannonke. Qullaawu Maxaafihu xintu seeri garinni heeꞌnummoro Yihowa ledo noonke jaaloomi kaajjado ikkanno. (Ibiraawoota 5:13, 14 nabbawi.) Annuwunna amuuwu qaaqquullensa gawajjanno coyinni agarate addi addi seera fushshitara dandiitanno. Qaaqquullu qoricha waajjite konni seerira hajajantara dandiitanno. Ikkollana Yihowa ninke qaaqquullu gede asse ikkikkinni anjicho egemminoommori gede asse laꞌꞌannonke. Isi fajjosi ledo sumuu yaanno doorsha doodhineemmota dihuluullamanno; hatto assinummoro wodanisi baasa hagiidhanno.—Fa. 147:11; Law. 23:15, 26; 27:11.

QULLAAWU MAXAAFIHA XINTU SEERA BANDE AFA DANDIINEEMMOHU HIITTOONNIITI?

10. Qullaawu Maxaafiha xintu seera bande afa dandiineemmohu hiittoonniiti?

¹⁰ Qullaawa Maxaafa nabbambeemmo woyte, Yihowara mittu coy daafira noosi lao huwanteemmo gede kaaꞌlannonkeha xintu seera afiꞌneemmo. Yihowa mito seera fushshinohu mayraatirono huwata dandiineemmo. Tenne huwantummo kiiro, Yihowa roore xawe leellannonke. Ikkollana Yihowa hedo maatiro huwatate kaaꞌlannonke gede iso huucciꞌranna hedate dandoo lossiꞌra hasiissannonke. (Law. 2:10-12) Ninkeneeto togo yine xaꞌma dandiineemmo: ‘Maganu konne seera uynohu mayraati? Kuni amanyooti Yihowa hagiirsiisannokkiha ikkiro, togoohu wolu amanyooti daafira may macciishshamannosi? Tenne Qullaawu Maxaafi xaggenni maa roseemmo? Loosu aana hosiisa dandeemmohu hiittoonniiti?’ Seera uynoonnihu mayraatironna Qullaawu Maxaafi xaggenni maa ronseemmoro bande anfummoro, Yihowa fajjo ledo sumuu yaannoha dancha doorsha doodha dandiineemmo.

11. Yesuusi ilaalaho heeꞌre sabbaki yannara Qullaawu Maxaafiha xintu seera bande anfeemmo gara leellishinohu hiittoonniiti? (Misillano lai.)

¹¹ Yesuusi ilaalaho heeꞌre sabbaki yannara Qullaawu Maxaafiha xintu seera bande anfeemmo gara leellishino. Hanni sase lawishsha laꞌno. Mittu mittunku lawishshira Yesuusi umo seera qummi assino. Hakkiinni seera uynoonnihu mayraatiro xawisino. Yesuusi kulinore hiincineemmoha ikkiro, xaa yannara konne xintu seera loosu aana hosiisa dandiineemmo gara huwanteemmo. Qoleno kuni rosi kaaꞌlannonketa wodanchineemmo.

12. Maatewoosi 5:21, 22 noo seera uynoonnihu mayraati? (Misileno lai.)

¹² Maatewoosi 5:21, 22 nabbawi. “Shitooti.” Konne seera uynoonnihu mayraati? Yihowa assootinkenni, coyiꞌneemmorinni woy hedonkenni nafa woloota gimbammora dihasiꞌranno. Yesuusi mittu manchi lubbo shaannokkiha ikkirono, rodoosi giwannoha ikkiro konne seera uyinanni gede assinoha xintu seera diigannota xawisino. Mittu manchi, ‘rodiisira hanqe agurannokkiha’ woy xonannoha ikkiro, ‘xaꞌmamasi’ digattanno. Isinni togoo akatinna assooti mitto mancho shaate widira massara dandaanno.—1 Yo. 3:15.

13. Maatewoosi 5:21, 22 nooha xintu seera loosu aana hosiisa dandiineemmohu hiittoonniiti? (Misillano lai.)

¹³ Maatewoosi 5:21, 22 nooha xintu seera xaa yannara loosu aana hosiisa dandiineemmohu hiittoonniiti? Koma amada qoropha hasiissannonke. (Lew. 19:18; Iyo. 36:13) Mayra? Korkaatuno koma amada woloota gimbeemmo gede assitannonke; tini qolte xissiisannore coyiꞌneemmo woy assineemmo gede kakkayissannonke. (Law. 10:12) Lawishshaho koma amandummoro wolootu daafira gara ikkinokkire coyiꞌne suꞌnaado suꞌmansa hunnammora dandiineemmo. (Law. 20:19; 25:23) Hakko daafira, dagoomittete miidiyi, interneete woy sokka sonkanni appilikeeshiine nookki yannara nafa, Yesuusi gikki yiino Kiristaani interneete horoonsiꞌranno woyte qorophanno gede kaaꞌlannoha xintu seera kulino. Mitto mancho shaa hasiꞌneemmokkinte gede, wolootunniha suꞌnaado suꞌma hunannore coyiꞌra woy assano dihasiꞌneemmo.

14. Maatewoosi 5:27, 28 kulloonni seera uynoonnihu mayraati? (Misileno lai.)

¹⁴ Maatewoosi 5:27, 28 nabbawi. “Soorritooti.” Konne seera uynoonnihu mayraati? Yihowa foorre calla ikkikkinni amanyoote bainore assineemmo gede kakkayissannonke hedono giwanno. Yesuusi mittu manchi minaamasi agure wole meyata yortote illenni laꞌꞌannoha ikkiro, cubbo loosannota kulino. Hakko daafira amanyoote bainore heda hoogate lowo geeshsha sharrama hasiissannonkeha ikkiro nafa, togoo hedo qeeꞌlate dandiinummore baala assa hasiissannonke. (Mat. 5:29, 30) Kuni xintu seeri mine kalaqidhinokkirino haꞌrunsa hasiissannonsaho.

15. Maatewoosi 5:27, 28 nooha xintu seera xaa yannara haꞌrunsa dandiineemmohu hiittoonniiti? (Misillano lai.)

¹⁵ Maatewoosi 5:27, 28 nooha xintu seera xaa yannara haꞌrunsa dandiineemmohu hiittoonniiti? Amanyoote bainore calla hendeemmokki gede qoropha hasiissannonke. (2 Sa. 11:2-4; Iyo. 31:1-3) Hige mittu gikki yiino Kiristaanchi baalunku garita teeda baꞌino misilla laꞌꞌa qoropha hasiissannositi egennantinote. Isi, ‘Amanyoote bainore assalla hoogummo geeshsha togoore leellishshanno misilla woy viidiyubba laummoro qarru dino’ yee heda dihasiissannosi. Qoleno isi togoo misilla woy viidiyubba hakkeeshsha teeda baꞌinote yinannita diꞌꞌikkitino yee isonooto doga dihasiissannosi. Yesuusi yannara, elekitirooniksete uduunni, filme woy fotta dino. Ikkirono Yesuusi teeda baꞌino misillanna viidiyubba daafira Yihowara noosi lao maatiro rosiisinonke. Isi rosiisinonke rosi, Yihowa silketenni amanyoote baꞌino misilla, viidiyubbanna sokka soya woy wolere togoore assa effire giwannota huwanteemmo gede kaaꞌlannonke. Mittu mine kalaqiꞌrino manchi konne xintu seera haꞌrunsiro galtesira ammaname heeꞌra dandaanno. (Mil. 2:15) Qoleno kuni xintu seeri adhantinorino adhantinokkirino foorrenniwa massansara dandaannoha aye coyeno qorophitanno gede kaaꞌlannonsa.—Law. 5:3-14.

16. Maatewoosi 5:43, 44 noo seera uynoonnihu mayraati? (Misileno lai.)

¹⁶ Maatewoosi 5:43, 44 nabbawi. “Olliichokki baxi.” Konne seera uynoonnihu mayraati? Yihowa baalanka manna olliichinke gede assine laꞌne banxammora hasiꞌranno. Hige ma assinanni, Yesuusi waro noo Ayhudooti tenne hajajo garimale huwattinohura diinnansa giwa dandiitannohu gede assite heddino. Yesuusi kayinni Yihowa hedo tenne ikkitinokkita afino. Yesuusi, baxillaanchu iimi Anninke sirchinsa woy gaꞌrensa ikkitutano ikkituro baalanka manna olliichinke gede assine laꞌnammora hasiꞌrannota afino.—Mat. 5:45-48.

17. Maatewoosi 5:43, 44 nooha xintu seera loosu aana hosiisa kaaꞌlitannonkehu hiittoonniiti? (Misillano lai.)

¹⁷ Maatewoosi 5:43, 44 nooha xintu seera xaa yannara loosu aana hosiisa dandiineemmohu hiittoonniiti? Manna banxeemmoha ikkiro, tenne alame oliranna gaancira anga diwodhineemmo. (Isa. 2:4; Mik. 4:3) Qoleno mittu manchi sirchi, gaꞌre woy ammaꞌno ikkitutano ikkituro danchare assineemmo. (Soq. 10:34, 35) Hattono ninke woy banxeemmo manna xissiissinore maarreemmo.—Mat. 18:21, 22; Maq. 11:25; Luq. 17:3, 4.

QULLAAWU MAXAAFIHU XINTU SEERI GARINNI HEEꞌRATE MURCIꞌNO

18. (a) Maa assate murciꞌra hasiissannonke? (b) Aananno birxichira maa xiinxallineemmo?

¹⁸ Yihowa qaaqquullu gede asse ikkikkinni anjicho egemmitinori gede asse laꞌꞌannonkehura lowo geeshsha galaxxineemmosi! Isi Qullaawu Maxaafiha xintu seera haꞌrunsinammora hasiꞌranno; hatto assanke dancha doorsha doodhineemmo gede kaaꞌlitannonke. (1 Qo. 14:20) Konnira mitto doorsha doodhineemmo woyte, ‘Yihowa fajjo maatiro wodanchate’ murciꞌno. (Efe. 5:17) Yihowa fajjo ledo sumuu yaanno doorsha doodhineemmohu iso banxeemmo daafiraati ikkinnina qoricha waajjine diꞌꞌikkino. Ikkollana dancha doorsha doodhineemmo gede kaaꞌlannonkehu wolurino no. Hakkuno tiiankeeti. Aananno birxichira tenne daafira xiinxallineemmo.