Adhamaꞌne Kaajjishiꞌra Agurtinoonte

1. Dancha jaalla Yihowa eltooti yineemmohu mayraati?

DANCHA jaalla Yihowa eltooti. (Yaq. 1:17) Insa Maganono ninkeno baxxanno. Insa hagiidhineemmo woyte ledonke hagiidhitanno, dadillineemmo woyte sheshifachishannonke hattono hasiisanno woyte amaaltannonke. Ammanantinore ikkitino daafira addaxxa dandiineemmo. Togoo jaali “wodana tashshi assanno”!—Law. 27:9.

2. Adhantinori jaaloomansa kaajjishiꞌra hasiissannonsahu mayraati? (Maatewoosi 19:6)

² Minaanninna minaama mimmitoho lubbote jaalla ikka hasiissannonsa. Insa jaaloomansa mulluri gede assite laꞌꞌantenni kaajjishiꞌrate sharrama hasiissannonsa. Insa jaaloomansa lawashshi assituro, callimma amaddansara, caaccaabbaranna hanqitara nafa dandiitanno. Adhamansa kaajjishidhuro kayinni jaaloominsa geedonniha ikkanno. (Maatewoosi 19:6 nabbawi.) Konni birxichira adhantinori jaaloomansa kaajjishiꞌra dandiitanno gara ronseemmo. Kayinni hanni balanxe, adhaminokki Kiristaani geedote galte doodha dandaannohu hiittoonniitiro laꞌno.

GEEDOTE JAALA DOODHA DANDIINANNI GARA

3-4. Mittu manchi dancha galte afiꞌranno gede kaaꞌlannosiri maati? (Lawishsha 18:22)

³ Mitto shaaꞌꞌa ikkinokki doorsha doodhinammora albaanni gawajjankera dandaanno garanna afiꞌneemmo horo balanxe heda hasiissannonke. Doodhineemmohu shaaꞌꞌa ikkinokki doorshi heeshshonke woꞌma soorrara dandaanno daafira, seekkine heda lowo geeshsha hasiissannote.

⁴ Doodhineemmohu lowo geeshsha hasiisanno doorshi giddo mittu geedote jaala yaano galte doodhate. Adhama xintinohu Yihowa ikkino daafira, galte doodhineemmo woyte isi biddissa hasiꞌranke garankolla. Isi labbaahu dancha minaama afiꞌrara meyatino dancha minaanna afidhara hasiꞌranno. Isi ninkera woyyannori maatiro afino. (Lawishsha 31:10 nabbawi; Isa. 48:17, 18) Maganu Qaali giddo noohu xintu seeri mittu Kiristaanchi maltino galte afiꞌranno gede kaaꞌlannosi.

5. Galte doodhatto woyte Yihowa Farciꞌraasincho ikkitinota doodha hasiissannohehu mayraati?

⁵ Cuuammummo woyte Maganu jaalla ikkinoommo. (Fa. 25:14) Seenne adha hasiꞌrittoro Yihowa jaalla giddonni doodha hasiissannohe. (1 Qo. 7:39) Hatto assittoro Yihowa biddissa ayirrisattota leellishatto hattono minaamakki Yihowa uynohe elto ikkitinota huwatatto. (Law. 19:14) Qoleno ‘ammantinokkiri ledo doogimale waaxama’ abbitanno qarrinni gatatto. (2 Qo. 6:14) Yihowa Farciꞌraasine giddo anera ikkannohu hakkeeshsha dino yine hende ammaninokkihu ledo baxillu jaalooma hanafa gowwimmate. Yihowa Farciꞌraasincho ikkinokkihu ledo adhammummoro isi halaalu minira daara dandaanno yine hedano digaraho.

6-7. Baxillu jaalooma amaddine heedhinoonni yannara kiꞌneneeto hiikkuri xaꞌmuwa xaꞌma hasiissannoꞌne?

⁶ Hige cuuaminohu baalu dancha galte ikkanno yaa diꞌꞌikkino. Mitto beetto baxoottaha ikkiroa ateneeto togo yite xaꞌmi: ‘Maatesi magarinni amadanno? Isi mannaho hedanno? Manna ayirrisanno? Jaallasi ayeooti? Isi kawa kaꞌaa higino coye magarinni tiranno? Ani yoommoti calla ikkito yaannohonso Qullaawa Borroha xintu seera diiga hoongi geeshsha wolootu hedora sumuu yaannoho? Woxeho noosi lao hiittoote?’

⁷ Qoleno ateneeto togo yite xaꞌma dandaatta: ‘Yihowa lubbora baxanno? “Haaro mannimma” uddiꞌranni no? Yihowara albinni roore soqqameemma gede kaaꞌlannoe? Mittu gariti ayyaanaamittete mixo noonke? Lubbote jaalla ikka dandiineemmo?’ (Qol. 3:9, 10) Laydhanni nootta rodii dancha jaala woy dancha maatete umo ikka dandaannoho? (1 Qo. 11:3) Ati labbaa rodootiro laydhanni nootto rodoo guuntete xeꞌne nooheha ikkirono umimmate biilloonyikkira maahoyye yite galtanno? Hige tenne baala afate yanna hasiissanno. Hakko daafira baxillu jaalooma amaddine sayissinanni yannara mimmito seekkitine egennate sharramme.

8-9. Baxillu jaalooma amaddinori dancha doorsha doodhitanno gede kaaꞌlannonsari maati? (Misileno lai.)

⁸ Baxillu jaalooma amaddine heedhinoonni yannara laydhanni nootto beettota addu ayimma afate woꞌnaalittoro dancha doorsha doodha dandaatto. Wolootu ise daafira maytannoro afate woꞌnaali. Hiittoo suꞌminna akatta noosero woloota xaꞌma dandaatto. Lawishshaho, ise jooga, shaqqadonna quwa saꞌannokkita ikkase buuxa dandaatto. Daanieeli yinanni rodiira assidhinoti Firench Giyaanaho heedhannoti Saara yinanni rodoo togo yitino: “Daanieeli daafira ledosi galannoha, suwisaancho ikke ledosi soqqamannoha, songosira noo cimeessa, anjicho egemmitino jaallasinna songosira noore meya roduuwa xaꞌmoomma.” Mitu coy woy rosichi adhammihu gedensaanni lowo qarra kalaqara dandaanno daafira, laydhanni nootto beettota albi woy xaa heeshshose daafira afa hasiissannoheha baalanka coye kultannohe gede ise shaqqillunni xaꞌma dandaatto.

⁹ Ise daafira huluullisinohere woy gikki yitino jaallakki maaxxukkinni kultinohere lashshi assite agurtooti. Hatto assittoro, baxillu jaalooma agurattoronna teꞌee doodha qarra diꞌꞌikkitannohe.b Xa hanni adhantinori jaaloomansa kaajjishiꞌra dandiitanno gara laꞌno.

MITTEENNI YANNA SAYSA JAALOOMA KAAJJISHSHANNO

10. Minaanninna minaama mitteenni yanna saysa hasiissannonsahu mayraati?

¹⁰ Minaanninna minaama loosu batiꞌrannonsaha ikkirono, mitteenni yanna sayisse adhamansa kaajjishiꞌra dandiitanno. Tini insa hoshshansa hasaabbanno gede, mimmitoho giddonsata xawisse kultanno gede, mimmitoho baxille leellishshanno gedenna mitteenni hagiirsiisannonsa coye assitanno faro fantannonsa.

11. Minaanninna minaama aante daafara dandaannori maati?

¹¹ Minaanninna minaama mimmitoho lubbote jaalla ikkiro, mimmituwiinni dixeertiꞌranno. Hige woꞌmanka woyte mitteenni heeꞌranno yaa diꞌꞌikkino. Kayinni mimmituwiinni xeertiꞌne seeda yanna keeshsha qarru giddo tugganno. Lawishshaho, mitootu looso loosate yite maatensawiinni xeertidhe hadhe seeda yanna keeshshitanno. Insa togo assansanni woxe afidhara dandiitannoha ikkirono seeda yanna keeshsha kayinni adhamansa gawajjitara dandiitanno.

12-13. (a) Mitu adhamino Kiristaani mitteenni yanna saysate maa assino? (Misileno lai.) (b) Minaanninna minaama jaaloomansa magarinni laꞌꞌa hasiissannonsa? (“Jaaloomaꞌne Magarinni Laꞌꞌa Hasiissannoꞌne?” yitanno saaxine lai.)

¹² Hanni mitu adhantinori woꞌmanka woyte mitteenni yanna saysate maa assitinoro laꞌno. Guwaami heedhannoti Liya togo yitino: “Aninna minaanniꞌya mitteenni addi addi coye assa banxeemmo. Mimmituwiinni baxxine assineemmori hakkeya dino.” Yunaytidi Isteetisete heedhannoti Rokisaanino togo yitino: “Gari yanna heedhannonkekki daafira wolu hasiisanno coyra assineemmonte gede mitteenni saysateno yanna gaaꞌma hasiissannonketa huwantoommo.” (Amootsi 3:3 ledo heewisiisi.) Faransayete heeꞌrannohu Deemeni togo yiino: “Kuꞌu koꞌonni hasatto balaxisiisa hasiissannonketa ronsoommo.” (Mat. 7:12) Yunaytidi Isteetisete heedhannoti Kaatiya qolte togo yitino: “Hedonke bebbeehantannokki gede mito woyte silkenke cunfeemmo.”

¹³ Wolu baalunkunni roore ayyaanaamittete coye mitteenni asse. Faransayete heedhannoti Miiriyaami togo yitino: “Soodo soodo Qullaawa Maxaafa nabbambe baxissinonketanna loosu aana hosiisa hasiꞌneemmo hedo mimmitoho kulleemmo. Tenne yanna lowo geeshsha baxeemma.” Ise ledde togo yitino: “Qoleno mitteenni huuccatto assiꞌneemmo yanna lowo geya baxeemma; minaanniꞌya assanno huuccatto isi Yihowa mageeshshi geeshsha baxannoro leellishshanno.” Aleenni kulliti Kaatiya togo yitino: “Mitteenni soqqammeemmo yanna lowo geeshsha banxeemmo. Lamunku ammananke wolootaho xawise kulanke hagiirsiissannonke; qoleno mimmituwiinni ronseemmori dihooganno.”—Law. 27:17.

QARRU KALAQAMANNO WOYTE MIMMITUNNIWA GAMBA YITINE HEEDHE

14-15. Adhantinori mereeronsa kalaqamanno qarra tirate dandiiture baala assa hasiissannonsahu mayraati? Lawishsha kuli.

¹⁴ Adhantinori guuntete xeꞌne noonsare ikkitino daafira mereeronsa qarru kalaqamara dandaanno. Qullaawu Maxaafi ‘adhantannore lowo qarri amadannonsata’ xawise kulanno. (1 Qo. 7:28) Tini hedo adhantinore baala qarru amadannota leellishshannote. Adhantinori mereeronsa qarru kalaqamanno woyte mimmitunniwa gamba yaanna kalaqamino qarra tirate dandiiture baala assa hasiissannonsahu mayraati?

¹⁵ Hanni mitto lawishsha laꞌno. Mittu lowo geeshsha biifadu mini gawajjamiro, minu anni konne mine gatamarannoti egennantinote. Isira konne mine gatamarate lowo woxinna wolu coy hasiisannosiha ikkara dandaanno; gatamare gudate lowo diri hasiisannoha ikkiro nafa hexxo dimudhanno. Mayra? Korkaatuno isi hakkonne mine miꞌnate lowore assino. Hatteente gede adhamano ayirradote. Lowo geeshsha baxantanno minaanninna minaama mereero nafa qarru kalaqamara dandaanno. Ikkirono gawajjamino mine galagalle gatamara dandiinanninte gede, adhamate mereero kalaqamanno qarrano tira dandiinanni. Kalaqamino qarra tirate yannanna sharro hasiissannoha ikkirono, minaanninna minaama adhamansa kaajjishidhe mitteenni heeꞌrate sharrantannoha ikkiro Yihowa hagiidhanno. (Mil. 2:16) Insa hatto assitannoha ikkiro mimmitonsa calla ikkikkinni adhama xintinoha Yihowa baxxannotanna ayirrissannota leellishshanno.

16. 1 Qorontoosi 13:4-8a kultanno garinni, adhamansa mereero lowo qarri kalaqamino minaannanna minaama kaaꞌlannonsari maati? (Misilenna “Adhamaꞌne Kaajjishiꞌrate Kaaꞌlannore” yitanno saaxine lai.)

¹⁶ Adhamaꞌne mereero qarru kalaqamiro babbaxxate muddantinoonte. (1 Qo. 7:10, 11) Hatteentenni kiꞌneneeto togo yitine xaꞌme: ‘Jaaloomanke kaajjishate kawiinni sainore assa dandiinammokka?’ Qullaawu Maxaafi baxille leellishate daafira mayyaannoro xiinxalli hattono 1 Qorontoosi 13:4-8a kulloonni akatta giddo mite lossiꞌra dandiitinannironna teꞌee hedde. (Qummeeshsha nabbawi.) Babbaxxate hedantenni galagaltine mimmito lubbora baxate dandiitinire baala asse. Galagaltine jaaloomaꞌne kaajjishiꞌrate maa assa dandiitinanniro hedde. Kaaꞌlannoꞌne gede Yihowa huuccidhe. Maa assa dandiitinanniro afate kaaꞌlitannoꞌne borruwanna viidiyubba laꞌe hattono songote cimeeyyenna wole gikki yiino Kiristaana amaaꞌle. Yihowa addaxxitiniro, ‘sase qiqqishonni gannoonni siiwo rakke taꞌannokkinte’ gede adhamaꞌneno geedonnita ikkitanno.—Ros. 4:12.

17. Adhamate heddanni noorino adhantinorino hagiirraamma ikka dandiitannohu hiittoonniiti?

¹⁷ Yihowa baalanti soqqamaanosi adhamate heddanni noorino adhantinorino hagiirraamma ikkitara hasiꞌranno. Ati seenne adhoottokkihanna adhate heddanni noottoha ikkiro, geedote galte gura qiniite laꞌe doodhi. Seenne adhite kaoottoha ikkiro kayinni adhamaꞌne kaajjishiꞌrate sharrami. Yihowa kaaꞌlannoꞌneta addaxxitine adhamaꞌne mereero kalaqamanno qarra tirate woꞌnaalle. Hatto assitine baxxinanni galteꞌne ‘ledo hagiidhe’!—Ros. 9:9.