‘Shesho Baalate Maganiwiinni’ Rosse

1. Woloota sheshifachisha hasiissannonkehu mayraati?

NINKE baalunku mito woyte, “addi addi fonqolinni kainohunni” yaandeemmo daafira, sheshonna jawaante hasiissannonke. (1 Ph. 1:6) Wolootu sheshifachishshannonke woyte hagiidhineemmo daafira, ninkeno qarru amadinonsare ranke kaaꞌla hasiissannonke. (Mat. 7:12) ‘Shesho baalate Magani Yihowa, duuchunku gari qarri giddo noore sheshifachisha dandiineemmo gara’ rosiisinonke. Ninkeno isi lawishsha haꞌrunsine ‘mimmito sheshifachisha’ dandiineemmo. (2 Qo. 1:3, 4; 1 Te. 4:18) Roduuwanke sheshifachinsheemmohu hatto assa hasiissannonke daafira calla ikkikkinni banxeemmonsa daafiraati. Konni birxichira, (1) Qullaawu Maxaafi kulanno garinni sheshote yaa mayyaatero, (2) woloota sheshifachisha dandiineemmohu hiittoonniitironna (3) ninkenkura shesho hasiissannonke yannara ma assa dandiineemmoro ronseemmo.

QULLAAWU MAXAAFI KULANNO GARINNI SHESHOTE YAA MAYYAATE?

2. Qullaawu Maxaafi giddo “shesho” yine tirroonni qaali hiittenne addi addi tiro afiꞌrino?

² Qullaawu Maxaafi giddo, “shesho” yine tirroonnihu Girikete afii qaali addi addi tiro afiꞌrino. Konne qaale “jawaachisha” woy “seejja” yineno tira dandiinanni. (Rom. 12:8) Qoleno kuni qaali noo gedeenni tirriro, “mule uurra” yitanno tiro afiꞌrino. Hakko daafira, qarramino jaalasi kaaꞌlate dodanni noo mancho heda dandiineemmo. Kuni manchi jaalasi kaaꞌlanno gari ikkihano ikkiro, qarru giddo noo jaalisi kaaꞌlinoonnisihura jawaatanna kaajje uurra dandaanno.

3. Barnabaasi woloota sheshifachishate lawishsha ikkinonkehu hiittoonniiti? (Misileno lai.)

³ Hanni mitto Qullaawu Maxaafi lawishsha laꞌno. Yooseefi yinanni Kiristaanchi woloota jawaachishatenna sheshifachishate dandoo noosita leellishino daafira, soqqamaasine Barnabaasi yite woshshitannosi; hatto yaa “Sheshote Beetto” yaate. (Soq. 4:36) Kuni suꞌmi isira malinoha ikkino daafira, hakkunni gedensaanni iso Yooseefi yine diwoshshinoonnisi. Barnabaasi duucha hige kaaꞌlo hasiissannonsare ammanate roduuwasi kaaꞌle suꞌmisi garinni heeꞌrino. Lawishshaho haarote rosaancho ikkinohu Saaooli Yerusaalame haꞌre hakko noo rosaano ledo xaada hasiꞌrino. Ikkirono insa, hakkuyira albaanni Maganu manna xiiwannoha ikkino daafira, iso waajjitino. Barnabaasi kayinni iso diwaajjino hattono soqqamaasinete ledo egensiisinosi.—Soq. 9:26-28.

WOLOOTA SHESHIFACHISHA DANDIINEEMMO GARA

4. Woloota sheshifachisha dandiineemmoti kaajja doogo hiittenneeti? (Rooma 1:11, 12)

⁴ Dandiitinanniha ikkiro, insa martine laꞌe. Yihowa woloota sheshifachishate soqqamaanosi horoonsiꞌranno. Lawishshaho masaalaanchu Eeliyaasi yaadi yannara, Yihowa sokkaasincho kaxxe jawaachishinosi. (1 Mo. 19:4-7) Soqqamaasinchu Phaawuloosino ammanate roduuwasi noowa mare jawaachisha lowo wolqa afidhinota huwatino. (Rooma 1:11, 12 nabbawi.) Woloota sheshifachishate hadhinanni woyte, insa lae higate calla ikkikkinni jawaachishate haja assitine marre. (1 Qo. 16:7) Mitto mancho martine laꞌꞌa dandiitinannikkiha ikkiro kayinni, iso jawaachishate silke dowwola hattono borrotenni woy silketenni sokka soya lowore kaaꞌlitannota deꞌinoonte. Yihowa woloota sheshifachishate horoonsiꞌrahera maahoyye yaatto?

5. Ammanate roduuwanke sheshifachinsheemmo woyte hiittoo qarri iillankera dandaanno?

⁵ Tini alame bushshanni hadhu kiiro, ammanate roduuwanke noowa marre sheshifachishate woꞌnaalleemmo woyte, qarra ikkannonkeri heeꞌrannota anfoommo. Phaawuloosi Roomaho usurame noo yannara, Efessooni heeꞌrannohu Onesforoosi usurrasira wole agurina shinasira dandiinanniha ikkiro nafa iso hasanni marino. (2 Xi. 1:16-18) Ruusiyaho heedhanno roduuwino ammanate roduuwansa ammanansanni kainohunni xiimbinsa yannara marte jawaachishshino. Roduuwa amande yoote minira massini yannara, ammanate roduuwinsa insano usurransara dandiinanniha ikkirono insa jawaachishate hakkira martino. Atino Maganu manni hundano ikko xaa yannara mimmito kaaꞌlino garanna dartu heeꞌrirono hagiirraamma ikkino gara xiinxallite insa lawishsha haꞌrunsa dandaatto.

6. Woloota sheshifachinsheemmo woyte Yihowa lawishsha haꞌrunsa dandiineemmohu hiittoonniiti? (Misileno lai.)

⁶ Seekkitine macciishshe. Masaalaanchu Eeliyaasi qarru giddo noommo yee hedi yannara, giddosita fushshe Yihowara hasaaphino. Baxillaanchu Maganinke isira iillanni noosire afinoha ikkirono, yaachishinosire hasaaphanna macciishshinosi. Wole agurina Eeliyaasi duucha hige yiinota yii woyte nafa Yihowa cince macciishshinosi! (1 Mo. 19:9, 10, 14) Qoleno Yihowa masaalaanchu Imbaaqoomi iso ayirrisannokkiha lawanno garinni coyiꞌri yannara nafa, huluullosinna yaaddosi hasaaphanno gede fajjinosi. (Imb. 1:2, 3) Xaa yannarano Yihowa hasiisannonkeri maatiro afinoha ikkirono, huuccattonke macca wore macciishshanno. Ninkeno ammanate roduuwinke hasaaphitanno woyte, ayirrinseemmonsata leellishanno garinni seekkine macciishshine Yihowa lawishsha haꞌrunsa dandiineemmo. Insa hasaaphitanno woyte, ‘macciishshate rakkinoonnire’ ikke; hattono kaajjishshe coydhannoha woy duucha higge yitinota yitannoha ikkiro nafa afoo gantinoontensa woy insara hanqitinoonte.—Yaq. 1:19; Ros. 7:9.

7. Yaadino manchira hasiisinore afa dandiineemmohu hiittoonniiti?

⁷ May hasiisinosiro afate woꞌnaalle. Ninke Yihowa gede mannu wodanita afa dandiineemmokkihura, yaadino manchira may hasiisinosiro afa dandiineemmohu seekkine macciishshinummoro callaati. Ati iso ikkoottoro maa assinahera hasiꞌrattoro afootto daafira, isirano togoori hasiisannosi yite heddooti. Korkaatuno mannu baalu mitto diꞌꞌikkino. Hakko daafira haja assite coyiꞌrannore seekkite macciishshi; hattono hayyotenni giddosita fushshe hasaaphanno gede kaaꞌlitannosi xaꞌmuwa xaꞌmi.—Law. 20:5.

8. Alazzaari reyhu gedensaanni, Yesuusi Maartanna Maariyaami sheshifachishinohu hiittoonniiti? (Misillano lai.)

⁸ Hanni rodiinsa Alazzaari reyhu gedensaanni, Yesuusi Maartanna Maariyaami sheshifachishino gara laꞌno. Insa lamenti rodoonsa shiiꞌrino; ikkirono Yesuusi lamenta addi addi garinni sheshifachishino. Maarta Yesuusi ledo hasaabbuhu gedensaanni, isi kaote daafira kulinose hattono tenne baxillu qixxaawo albinni roore ammantanno gede kaaꞌlinose. Maariyaami kayinni isiwa wiꞌlitanni dagguta, Yesuusi isera kaote daafira kulinosekkiha ikkara dandaanno. Hatteentenni Maariyaami ledo wiꞌlino hattono Alazzaari hiikko wortinoro xaꞌmino. (Yoh. 11:20-35) Maa ronseemmo? Ninkeno qarru amadinonsare sheshifachinsheemmo woyte, baalanka mittu garinni sheshifachishate woꞌnaalantenni, may hasiisannonsaro afate sharrama hasiissannonke.

9. Woloota sheshifachishate Qullaawa Maxaafa horoonsiꞌra dandiineemmohu hiittoonniiti? (Rooma 15:4, 5)

⁹ Qullaawa Maxaafa horoonsidhe. Qarru amadinonsarira “Qullaawa Borronni afiꞌneemmo [shesho]” kulleemmonsaha ikkiro, hexxo heedhannonsa gede kaaꞌlineemmonsa. (Rooma 15:4, 5 nabbawi.) Tini hexxo qolte jawaattannonna sheshifattanno gede assitannonsa. (Isa. 40:31) Mitto mancho jawaachishate kaaꞌlanno qummeeshsha mamiinni afiꞌra dandaatto? Mitootu Kiristaanu Heeshshora Kaaꞌlitanno Qummeeshshuwa yaanno maxaafira “Shesho” yaanno gafi hunda noo qummeeshshuwa borreessite amaxxitanno. Yihowa Qaalesi woloota jawaachishate malino garinni horoonsiꞌratto gede kaaꞌlahera huucciꞌri. Qullaawu ayyaani hasiissanno yannara maltino qummeeshshuwa qaagatto gede kaaꞌlannohe.—Yoh. 14:26.

10. Woloota jawaachinsheemmo woyte shaqqillunni coyiꞌra hasiissannonkehu mayraati?

¹⁰ Shaqqillunni coydhe. “Shesho” yaanno qaalira horoonsiꞌnoonniha hundi afii qaale “seejja” woy “jawaachisha” yineno tira dandiinanni. Mito woyte, mittu manchi hedosi biddi assiꞌranno gede sheshifachishshinanni woyte seejja woy jawaachisha hasiissannoꞌneha ikkara dandaanno. Hatto assitinanni woyte, sissineemmo yitine madiissitinannikki gede coydhinara albaanni seekkitine hedde. (Law. 12:18) Yihowa Eeliyaasi hasaawisi woyte kaajja lawishsha ikkinonke; Eeliyaasi Yihowara soqqamanni noommohu ane callaati hattono masaalaancho ikke soqqamaꞌya kaaꞌlitinori dino yee hedino. Yihowa Eeliyaasi bushiishikkinni hedosi biddi assiꞌranno gede shaqqillunni kaaꞌlinosi. (1 Mo. 19:15-18) Atino shaqqillunni coydhenna coyiꞌrattora albaanni seekkite hedde hatto assa dandaatto. Gambooshshunniwa kifile shiqishatto woytenna dawaro qolatto woyte, ammanate roduuwakki jawaachisha dandaatto gede, woꞌmanka woyte dancha danchare shaqqillunni coyiꞌri.

11. Duucha woyte dadillitinorira may hasiisannonsa? (1 Yohaannisi 3:18)

¹¹ Mitore assitine kaaꞌlensa. Duucha woyte, dadillitinorira sheshifachishatenni sainore assa hasiissannonke. (1 Yohaannisi 3:18 nabbawi.) Barnabaasi noosiha gama jajja hire afiꞌrino woxinni kaaꞌlo hasiissannonsare haarote cuuantino roduuwasi kaaꞌle kaajja lawishsha ikkinonke. (Soq. 4:36, 37) Xaa yannara noori batinyu ammanate roduuwinkeno kaaꞌlo hasiissannonsarira mitore assite kaaꞌlite isi lawishsha haꞌrunsitino. Poolaandete heedhannoti Gabireela yinanni rodoo minese lolahu baasa gawajjita lowo geeshsha massino. Ise togo yitino: “Lowo geeshsha masoomma hattono yaadoomma; anewa heeꞌrannori anniꞌyanna amaꞌyano baasa masino. Hiikkeemmakka yee yaadoomma. Ikkollana qooxeessaho noo songo roduuwi mineꞌya gatamartino. Tini Yihowa qarrantinore sheshifachishate mannasi horoonsiꞌrannota albinni roore ammaneemma gede kaaꞌlitinoe.”

12. Qarra dandiitine saꞌꞌaꞌne ammanate roduuwaꞌne kaaꞌlitannohu hiittoonniiti?

¹² Qarra dandiitine saꞌe. Phaawuloosi Teselonqe Kiristaani qarra dandee saꞌꞌansa sheshonna jawaante ikkitinosita kulinonsa. Isi daafurisi mullawa gatinokkita afino. (1 Te. 3:5-8) Qoleno isi iillannosi qarra dandee sairo ammanate roduuwisino dandiite saꞌanno gede jawaachisha dandaannota afino. (Qol. 2:1, 2) Hatteente gede ammanate roduuwinke Yihowa qarra dandiine saꞌneemmo gede kaaꞌlanni noonke gara huwatturo lowo geeshsha jawaattanno.

13. Woloota jawaachinsheemmo woyte, woꞌmanka woyte maa assa hasiissannonke?

¹³ Cincitinannire ikke. Hexxo mudhitinori ammanate roduuwinke jawaachinsheemmonsa woyte baychonkonni sheshifata hooggara dandiitanno. Ikkollana Qullaawa Borro, ‘mimmito jawaachisha agurreemmokki’ gede amaaltannonke. ‘Jawaachisha agurtinoonte’ yitanno yaatto mitto coye agurikkinni assinannita leellishshanno. (1 Te. 5:11) Ate kaaꞌlo hasiissannore sheshifachishattonna jawaachishatto woyte cincattoha ikki. (1 Te. 5:14) Hige mito woyte ninke baalunkura shesho hasiissannonke. Hatto ikkiro maa assa dandiineemmo?

SHESHO HASIISSANNOHE WOYTE

14-15. Yaandeemmo woy dadillineemmo woyte maa assa hasiissannonke?

¹⁴ Yihowa huucciꞌri. Yaadatto woy dadillatto woyte kaaꞌlannohe gede Yihowa huucciꞌri. (Fa. 94:19) Giddokkita fushshite hasiisannohere badde kulte huucciꞌri. (Fa. 62:8) Yihowa huucciꞌrattora albaanni nafa giddokkita afinoti egennantinote. Ikkollana giddokkita isira hasaapha ammana nooheta leellishshanno. Qoleno Yihowa ammanatenni huucciꞌrootto huuccatto isi hedino garinni qolanno. (Maq. 11:24) Filiphisiyusi 4:6, 7 togo yite amaaltannonke: ‘Eeggifatatenni huuccattoꞌne Maganoho shiqishidhe; wodancha baalanta roorannohu Maganu keeri wodanaꞌnenna surreꞌne agaranno.’

¹⁵ Woloota kaaꞌleꞌꞌe yii. Giddokkita anjicho egemmino jaalakkira woy addaxxatto cimeessira hasaaphi. Ammanate roduuwikki sheshote buicho ikkitahera dandiitanno; kayinni giddokkita fushshite hasaapha hoogittoro hasiisannohere mamiinni affanno! (Law. 14:10) Insa seekkite macciishshitannohe gede hattono jawaachishanno qummeeshsha woy birxicho kultannohe gede xaꞌmiꞌra dandaatto.

16. Wolootu jawaachishshannohe woyte ma assitahera dandiitanno? Ati kayinni maa qaaga hasiissannohe?

¹⁶ Cincattohanna gatona yaattoha ikki. Ammanate roduuwikki jawaachishshannohe woyte sodhara dandiitanno. Bagu aana bakakka yinannihu gede, insa roore xissiisannohere coydhara woy assitara dandiitanno. Togoori kalaqamannoha ikkiro, insara hanqitooti. (1 Qo. 13:4, 7) Qoleno Yaaqoobi 3:2 noo hedo qaagi; qummeeshshu togo yaanno: “Coyiꞌranno qaalinni gufiꞌrannokkihu aye manchino heeꞌriro, . . . hakku manchi guuta manchooti.” Roduuwikki ate kaaꞌla hasidhannota habbooti. “Ayyaanu qixxaawaho; maalu kayinni daafuraamoho.”—Mat. 26:41.

17. Maa assate murciꞌra hasiissannonke?

¹⁷ Tini alame roore bushshanni hadhu kiironna Maganu diina effidhe gibbannonke woyte ninke baalunkura albinni roore jawaantenna shesho hasiissannonke. Konnira mimmito sheshifachishate murciꞌno.