Iillannohe Qarrira Gara Ikkitino Lao Heedhohe

1-2. Iillannonke qarra dandee heeꞌrate maa assa hasiissannonke? (Misileno lai.)

XAA yannara ammanakkinni kainohunni miincoonniheha, maatekki gibbinoheha, woy xiimboonniheha ikkara dandaanno. Dhibbu woy geedhimma amaddinohe? Woy shiidhe lowo geeshsha xissiisiꞌroottoha ikkara dandaanno. Batinye Yihowa soqqamaanonte gede ate ‘heeshshono qarru woꞌminota’ ikkitara dandiitanno.—Fa. 90:10.

² Iillannonke qarra dandee heeꞌrate gara ikkitino lao heedhannonke gede assiꞌra hasiissannonke. Tini hasiissannota ikkitinohu mayraati? Korkaatuno iillannonke qarrira gara ikkitino lao heedhannonke gede assiꞌra hoongummoro, dandee heeꞌrate maa assinummoro woyyannoro afa qarra ikkitannonke. Tini makeena kadate gedeeti. Makeena kadanno manchi hincilaallo xuru beeshshiro woy guunjo dibburo, doogote noore guficho ikkannore laꞌꞌa didandaanno. Ikkollana hincilaallo hayishshinoonnita ikkituro, haꞌranno raga afa qarra diꞌꞌikkitannosi. Konni birxichira (1) qarru iillannonke woyte maa qaaga hasiissannonkero, (2) gara ikkitinokki lao gawajjitannonkehu hiittoonniitironna (3) qarru amadannonke woyte gara ikkitino lao heedhannonke gede assiꞌrate maa maa assa dandiineemmoro ronseemmo.

QARRU IILLANNONKE WOYTE QAAGA HASIISSANNONKERE

3. Tenne busha alamera heeꞌnummo geeshsha gatannokkiri maati?

³ Tini busha alame noo geeshsha qarru iillannonke. Cubbaataamma ikkinoommohuranna Sheexaanu gashshe noo alamera heeꞌnoommo daafira, baalanka qarru amadannonke. Qoleno tenne alame goofimarchi gambise day kiiro iillannonke qarri lexxannilla haꞌranno; lawishshaho baattote huxano, lolahu, dolu giiranna mannu assannohu bushu coy gawajjankera dandaanno. (Mat. 24:8; 2 Xi. 3:13) Yihowa xaa yannara konne qarra baala hooloommero, tenne alame gashshaancho Sheexaane kaaꞌlanni nooha lawara dandaanno. Sheexaanu gashshooti noo geeshsha qarru iillannonke.—Ros. 9:12.

4. Kiristaanaho iillannohu wolu qarri maati?

⁴ Kiristaanaho wolu qarrino iillannonsa. Yesuusi duucha hige, rosaanosira ammanansanni kainohunni dartu iillannonsata kulino. (Mat. 24:9; Yoh. 16:2) Tenne afanke togoo qarri iillannonke woyte sheke yineemmokki gede kaaꞌlitannonke. (1 Te. 3:3, 4) Kaajjado ammana noonke daafira iillannonke qarra dandiine saꞌꞌanke, hegere heeshshowa massitanno doogora heeꞌnoommota addaxxineemmo gede assitannonke. Qoleno Yihowa magansiꞌra doodhinoommotanna Sheexaanu kaphaancho ikkinota leellinsheemmo. Sheexaanu mannu Maganoho soqqamannohu uminsa qiniitira calla ikkinohu gede asse coyiꞌrino. Isitero tini halaale ikkitinota leellishate Yihowa mannira buutote qarra iillishanno. (Iyo. 1:9-11) Yihowa banxeemmo daafira qarra dandiine saꞌnummoro iso hagiirsiinseemmo.—Law. 27:11.

5. Rosiisaancho 7:13, 14 maa ronseemmo? (Misillano lai.)

⁵ Yihowa qarru heeꞌrara fajjino. Yihowa horo gara ikkinokkire diassanno woy bushu coyinni dijifannonke. (Yaq. 1:13) Ikkirono Moote Selemooni ‘qarru daanno yanna Maganu assinore’ ikkitinota coyiꞌrino. (Rosiisaancho 7:13, 14 nabbawi.) Kowiicho Selemooni bushu coy ikkanno gede assinohu Yihowaati yaanni nooha diꞌꞌikkino; hatteentenni bushu coy ikkannohu Yihowa fajjino daafira ikkinota kulanni no. Selemooni konni qummeeshshira, iillannonke qarrira gara ikkitino lao heedhannonke gede kaaꞌlitannonketa kaajja amaale kulino. Tenne Sheexaanu alamera hagiidhineemmo woy dadillineemmo barri noota dea dihasiissannonke. Hagiidhineemmo yannara Maganu danchumma naandeemmota leellishanna hattenne yanna isi uynonke elto gede assine laꞌꞌa dandiineemmo. Selemooni ‘albillitte ikkannore afinohu nookkita’ yaano barru hagiirre woy dadille abbannoro anfoommokkita coyiꞌrino. Hedeweelchu qarri keeraanono keeraano ikkitinokkireno amadanno.

6. Yihowa qarru iillankera fajjannohu mayra ikkara dandaanno? (Ibiraawoota 12:7, 11)

⁶ Iillannonke qarrira gara ikkitino lao heedhunkero Yihowa ninkeneeto ikkikkinni iso addaxxineemmo gede rosiisanni noonketa huwanteemmo. Yihowa iillannonke qarra afanno hattono ninke daafira hedanno. Isi “reyo lawanno tunsichi giddoonni” hinge haꞌnammora fajjannoha ikkirono, woꞌmanka woyte massagannonke, baxannonketa buuxisannonke hattono dandiine saꞌneemmo gede hasiissannonke jawaante aannonke. (Fa. 23:4) Qoleno iillannonke qarri laanfenke bande anfeemmo gedenna Maganu kaaꞌlonni akatanke woyyeessiꞌneemmo gede kaaꞌlannonke. (Ibiraawoota 12:7, 11 nabbawi.) Lawishshaho Iyyoobi albinni roore umo heeshshi assa rosino. Hige isira qarra abbinosihu Yihowa diꞌꞌikkino; ikkirono Yihowa qarru iillasira fajjino hattono tenne faro horoonsiꞌre Iyyoobira kaajja roso rosiisino. (Iyo. 42:1-6) Iillannonke qarri ikkihano ikkiro Yihowa hegerera gawajjannonkeri iillankera fajjannokkita anfoommo. Qarru iillinkerono ammanamme heeꞌnummoro “woꞌmunni woꞌma qeelle saꞌneemmo.”—Rom. 8:35-39.

7. Ammanakkinni kainohunni dartu iilliherono hagiirraamo ikka dandaattohu mayraati?

⁷ Dartu iillinkerono hagiirraamma ikka dandiineemmo. Ammanakkinni kainohunni dartu iillanni nooheha ikkiro Yihowa dadillisoommo yite heddooti. Isinni tini Yihowa hagiirsiisoottota leellishshanno. (Mat. 5:10-12) Dartu iillannohe woyte gara ikkitino lao heedhuhero, hundi soqqamaasine gede hagiirraamonna mitte giddoha ikka dandaatto. (Soq. 5:40-42) Qoleno Yihowa Farciꞌraasine ikkitinokkiri halaale rossanno gedenna ‘Magano ayirrissanno’ gede kaaꞌlattora dandaatto. (1 Ph. 2:12) Yooseefi gede qarru giddo heedheenna nafa qinaannohe.—Kal. 39:3, 23.

8. Iillannonke qarra dandiine heeꞌneemmo gede assannonkeri woluri maati?

⁸ Qarrinke mulenni hoꞌlanno. Iyyoobi xagge qarrinke mulenni hoꞌlannota leellishshanno. “Kaaliiqi Iyyoobita goofimarchu heeshsho albitenni roorse [maassiꞌrino].” (Iyo. 42:12) Hatteente gede Yihowa tenne qarru woꞌminote harancho heeshshonni roorse hegerera heeꞌneemmota “goofimarchu heeshsho” maassiꞌrannota kule qaale eino. Tini ninke mittu mittunku goofimarchu geeshsha kaajjine uurrineemmo gede assitannonkete kaajja hedooti!—Mat. 24:13.

GARA IKKITINOKKI LAO GAWAJJITANNONKEHU HIITTOONNIITI?

9. Qarru iillannonke woyte gara ikkitinokki lao gawajjitannonkehu hiittoonniiti?

⁹ Qarru iillannonke woyte gara ikkitinokki lao heedhunkero, coy roore bushanni haꞌranno gede assiꞌnammora dandiineemmo. Lawishshaho, qarra abbinonkehu Yihowaati yine hendammora dandiineemmo. Iyyoobi qarra abbinosihu Yihowa ikkinohu gede asse hedino woyti no; tini qolte “Maganunni roore umosi keeraancho” assate woꞌnaalanno gede assitinosi. (Iyo. 32:2) Naoomino qarru iilliseta umi qara Yihowa busha assitino. (Rut. 1:13, 20, 21) Iyyoobinna Naoomi hakko garinni calla heddanni heedhoommero, Yihowa ledo noonsa jaaloomi bae hoogino. (Law. 19:3) Ikkirono Yihowa hedonsa biddi assidhanno gede kaaꞌlinonsa hattono ammanantinohura maassiꞌrinonsa.

10. Qarru iillannonke woyte mayne huluullammammora dandiineemmo?

¹⁰ Qarra abbannonkehu Yihowa ikkinokkita anfoommoha ikkirono, isi ninkera hedannota huluullama hananfammora dandiineemmo. Togooti gara ikkitinokki hedo wolqa baꞌneemmo gede assitankera dandiitanno. (Law. 24:10) Moote Daawitinna masaalaanchu Imbaaqoomi kaaꞌlo afiꞌrate raartanno raare Yihowa macciishshinota huluullantino yanna no. (Fa. 10:1; Imb. 1:2) Ikkollana huuccatto assiꞌra diagurtino. Yihowa kuri ammanantino labballira kaaꞌlannonsata buuxisinonsa; isi ateno kaaꞌlannohe.—Fa. 10:17.

11. Qarru iillannonke woyte gara ikkitino lao hooggunkero hiitto ikkinammora dandiineemmo?

¹¹ Qarru iillannonke woyte gara ikkitino lao hooggunkero, wosinchu coy iillanni noonkehu gede assine hende dhagge assiꞌnammora dandiineemmo. (1 Ph. 4:12) Yesuusi rosaanora, mannu iso buuto waadannositanna shaannosita ammane adha qarra ikkitinonsa. (Luq. 18:33, 34) Yesuusi albillitte iillannosire xawise kulinoha ikkirono, soqqamaasinchu Pheexiroosi isira togoo qarri diꞌꞌiillannosi yee hedino. Yesuusi togoo hedo Yihowa fajjo assannokki gede guficho ikkitannosita afino daafira Pheexiroosi ufino. (Maq. 8:31-33) Yesuusi reyhu gedensaanni nafa rosaanosi isi reya hasiissinosihu mayraatiro baychonkonni dihuwattino. Ikkirono Yesuusi hexxo mudhe insa kaaꞌla diagurino. Yesuusi reyotenni kaihu gedensaanni insara ‘Qullaawa Borro xawise kule’ qarra adha hasiissinosihu mayraatiro huwattanno gede kaaꞌlinonsa. (Luq. 24:25-27, 32, 44-48) Yesuusi rosiisinonsare hiincansa insa albillitte iillannonsa dartira qixxaabbanno gede kaaꞌlitannonsa. Ninkeno Qullaawa Borro halaale xiinxallanke iillannonke qarrira qixxaambeemmo gede kaaꞌlitannonke.

12. Iillinonke qarrira gara ikkitino lao hooggunkero may kalaqamara dandaanno?

¹² Iillinonke qarrira gara ikkitino lao hooggunkero, qarrinke ikkinokki geeshsha assinammora dandiineemmo. Yesuusi woynete irshira qaxarante loossuri daafira coyiꞌrino lawishshi togoori ikkara dandaannota leellishanno. Mite loosaasine gari woxe dibaantoonninke yite gunguntino; ikkirono woynete irshi anni insa giddonni mitto “Jaala, baddaloommoheri mitturino dino” yiino. (Mat. 20:10-13) Loosaasine gunguntinohu gari woxe baantoonninsakki daafira ikkikkinni coy insa heddino gede ikka hooginohuraati. Xaa yannarano mitu Kiristaani baxannota soqqanshote qoosso afiꞌrikkinni gatanno woyte woy noonsa qoosso hooganno woyte togoori macciishshamansara dandaanno. Ikkina qarru iillannonke woyte gara ikkitino lao heedhannonke gede assiꞌrate maa assa dandiineemmo?

QARRU AMADANNONKE WOYTE ASSA DANDIINEEMMORE

13. Qarru amadannonke woyte may kalaqamara dandaanno?

¹³ Qullaawu Maxaafi qarru daafira mayyaannoro afoottoha ikkara dandaanno. Qoleno Qullaawa Maxaafa horoonsidhe qarru iillinonsare kaaꞌloottoha ikkara dandaanno. Ikkirono qarru atera iillihero gara ikkitino lao heedhannohe gede assiꞌra ayirritahera dandiitanno. Lawishshaho, Yihowa qorichishanni noohehu gede woy huuccattokki macciishshannokkihu gede assite hedattora dandaatto. Ikkina gara ikkitino lao heedhannohe gede maa maa assa dandaatto?

14. Qarru amadannohe woyte may daafira huucciꞌra dandaatto? (Filiphisiyusi 4:13)

¹⁴ Kaaꞌlannohe gede Yihowa huucciꞌri. Iillanni noohe qarranna kuni qarri gawajjinohe gara Yihowara kuꞌli. Yihowa magarinni kaaꞌlahera hasiꞌrattoro badde kulte huucciꞌra dandaatto. Qoleno qullaawa ayyaanasi aannohe gede huucciꞌri; kuni ayyaani qarra dandiite saꞌꞌate jawaantenna hayyo afiꞌratto gede kaaꞌlannohe. Ikkirono Yihowa huuccattokkira dawaro ati hedoottokki garinni qolara dandaannota qaagi. (Efe. 3:20) Qoleno isi sokkaasine woy ammanate roduuwakki horoonsiꞌre kaaꞌlahera dandaanno. (Fa. 34:7) Hakko daafira isi kaaꞌlannohe doogo ikkitutano ikkituro adha gibbooti. Isi iillannohe qarra dandiite saꞌꞌatto gede hasiisannoheha qullaawa ayyaana aannoheta addaxxa dandaatto.—Filiphisiyusi 4:13 nabbawi.

15. Iillannohe qarra dandiite heeꞌratto gede may kaaꞌlannohe? (Misileno lai.)

¹⁵ Ganyite ayyaanaamittete coye assi. Alba assatto geeshshire assa hoogittoro nafa ganyite ayyaanaamittete coye assate sharrami. “Qarrunna yaaddo” amaddannohe woyte Yihowate gedee lao heedhannohe gede assiꞌra hasiissannohe. (Fa. 119:143) Woꞌmanka woyte Qullaawa Maxaafa nabbawi, xiinxalli hattono nabbawoottore hiinci. Mannaho dancha duduwo kulate, gambooshshe haꞌratenna dawaro qolate dandiittore baala assi. Mito woyte baxisa hoogihero nafa ammanate roduuwikkiwa gambo gibbooti.—Law. 18:1.

16. Qarru iillannohe woyte may huluullisahera dandaanno? Tenne qeeꞌlatto gede may kaaꞌlannohe? (2 Qorontoosi 10:4, 5)

¹⁶ Huluullokki qeeꞌli. Qarru amadannohe yannara ateneeti woy Yihowa daafira gara ikkinokkire hedattora dandaatto; togoo hedo ‘qiishote’ gede kaajjado ikkitara dandiitanno. (2 Qorontoosi 10:4, 5 nabbawi.) Qullaawu Maxaafinna dirijjite qixxeessitino borro giddo nooti “Maganu egenno” togoo huluullo qeeꞌlatto gede kaaꞌlitannohe. Lawishshaho Yihowa atenni hagiidhannota huluullamattohalla ikki? Hatto ikkiro soqqamaasinchu Phaawuloosi xagge xiinxalli. Isi soqqamanni heeꞌreenna buutote qarri iillinosi; ikkirono iillinosi qarri Kiristoosi soqqamaancho ikkinota roore buuxanno gedella assinosi. (2 Qo. 11:23-27) Alba loosootto soꞌrora Yihowa gatona yiinoheta huluullamatto? Hatto ikkiro, Yihowa cubbo gatona yaannota kultanno qummeeshshuwa borreessiꞌri. (Isa. 43:25) Hakkiinni kuri qummeeshshuwa nabbabbe hiinci. (Fa. 119:97) Iillinohehu buutote qarri Maganu ammanantino soqqamaanosi agarannota huluullamatto gede assinohe? Maganu qarru heeꞌrara fajjinohu mayraatironna iillannonke qarri ikkihano ikkiro isi ayyaanaamittenke gawajjannorinni agarannonkehu hiittoonniitiro kulanno birxicho xiinxalli. (Fa. 91:9-12) Hattono iillinonsaha buutote qarra dandiite saꞌino roduuwi xagge nabbawi.a

17. Qarru amadannonke woyte maa assa hasiissannonke?

¹⁷ Xaa yannara buutote qarri iillanni nooheha ikka hoogara dandaanno. Hatto ikkiro afiꞌroottohu danchu coyra Yihowa galati. (Ros. 7:14) Qarru iillihero kayinni gara ikkitino lao heedhannohe gede assiꞌri hattono albinni roore Yihowa addaxxi. Hatto assittoro, Yihowa ‘fonqolu iillannohe woyite kaajjite saꞌꞌa dandaatto gede fulatto furcho qixxeessannohe.’ (1 Qo. 10:13) Ikkina ammanate roduuwinkera qarru iillannonsa woyte kaaꞌla dandiineemmohu hiittoonniiti? Aananno birxichira tenne daafira xiinxallineemmo.