‘Halaalu Magani’ Woꞌmanka Woyte Hedinore Wonshanno

1. Sheexaanu kaphinni gata dandiineemmo yineemmohu mayraati? (Faarso 31:2-5)

HEEꞌNOOMMOHU Sheexaanu gashshe noo alameraati. Konnira batinyu manni kaphanno, awaawuranno hattono mimmito kaadanno. Ammaꞌninanni manna afiꞌra qarraho. Batinye daddalaano haqaqqaaltanno; duucha woyte egensiishsha loossannori egensiisidhannore hidhanno manna dogganno. Qoleno mito woyte muli jaalla mimmitoho eꞌino qaale diigganno. Ikkirono, Yihowa woꞌmanka woyte addaxxa dandiineemmota afanke lowo geeshsha jawaachishshanno! Isi ‘halaalu Maganooti.’ (Faarso 31:2-5 nabbawi.) Yihowa horo dikaphanno; tini ayimmasiiti. Isi coyiꞌrannorinna assannori baalu addaxxinanniho.

2. Konni birxichira maa ronseemmo?

² Konni birxichira, balanxe Yihowa woꞌmu wodaninkenni addaxxineemmo gede assannonkeha mito korkaata ronseemmo. Hakkiinni halaalu Magani tenne Daawuloosita busha alame hunannohu hiittoonniitironna hedinore wonshate xaa yannara ma assanni nooro xiinxallineemmo. Tenne xiinxallanke worbuulle Yihowa Farciꞌraasine ikkineemmo gede kaaꞌlitannonke.

HALAALU MAGANO ADDAXXINEEMMOHU MAYRAATI?

3. Yihowa woꞌmunni woꞌma addaxxineemmohu mayraati?

³ Yihowa addaxxineemmohu isi Kalaqaanchonke ikkino daafiraati. Gordonna baatto hattono heeshsho afiꞌrinore baala kalaqinohu isooti. (Kal. 1:1; Fa. 36:9; Aju. 4:11) Qoleno isi baatto heeshshote hasiisannonkere baalare uytannonke gede assa kalaqino. Isi kalqete alamera ikkannore baalare illaallisa dandaanno. Konnira heeshshonke hayyosiranna wolqasira taalle nookki Kalaqaanchira eeggo uyra dandiineemmo.

4. Yihowa baxannonketa mayinni anfeemmo?

⁴ Yihowa addaxxineemmohu baxannonke daafiraati. Yihowa mannu ooso kalaqinohu heeshshote heedhe isi gede hagiirraamma ikkitara hasiꞌrinohuraati. Yihowa hedinore kulanni togo yiino: “Manna daninkenninna suudinkenni kalanqo.” (Kal. 1:26) Isi doodhate qoosso uynonke. Baatto biifado qae asse uynonke. (Fa. 115:16) Qoleno Addaamiranna Heewanira hatte qae gannate assanno gede shaaꞌꞌa ikkinokki looso oye maassiꞌrinonsa. (Kal. 1:28; 2:15) Isi addi addi sagale, muꞌro, saadanna wole batinye coye uynonsa. Addanko tini, Yihowahu ‘bagamannokki baxilli hegereha’ ikkinota leellishshanno.—Fa. 103:17.

5. (a) Sheexaanu Yihowa hedinore wonshannokki gede assate woꞌnaalinoha ikkirono, Yihowa coyiꞌrinore wonshinohu hiittoonniiti? (b) Yihowa coyiꞌre wonshinohu mitu coy hiikkonneeti? (“Maganu Woꞌmanka Woyte Halaale Coyiꞌranno” yitanno saaxine lai.)

⁵ Yihowa addaxxineemmohu woꞌmanka woyte eino qaale wonshannohuraati. Yihowa baatto “kalaqinosehu fano heedhara ikkikkinni, mannu heeꞌranno gedeeti.” (Isa. 45:18, 19) Addaaminna Heewani finqiltuta reyote yoo yinoonninsa. Hakko daafira Maganu hedinori woꞌmikkinni gatinoha lawara dandaanno. Ikkollana Yihowa eino qaale baala wonshanno. (Isa. 46:10, 11) Isi keeraano uulla woꞌmitanno yee eino qaale disoorrino. Yihowa Addaaminna Heewani ooso iltara fajjinohu iseraati. Qoleno Yihowa Addaami sircho gatisatenna insara dhagge ikkitannota hegere heeshsho hexxo aate mitto Beettosi wodo asse uyno.—Yoh. 3:16.

HALAALU MAGANI HEDINORE WONSHANNO

6. Edenete finqille kaꞌuhu gedensaanni Yihowa mayyee masaalino?

⁶ Addaaminna Heewani Maganoho finqiltanno gede assinohu ‘Daawuloosinna Sheexaane yinanniho biꞌre hundi hamashshooti.’a (Aju. 12:9; Kal. 3:4, 5; Yoh. 8:44) Yihowa jeefote Sheexaane hunannota coyiꞌrino. (Kal. 3:15) Kuni ikkara albaanni batinyu manni Sheexaanu faale haꞌre busha coye assanno. Ikkollana mitu manni Yihowara ammaname heeꞌranno.

7. Daawuloosi faale hadhannori ayeooti? Insa ma ikkitanno?

⁷ Sheexaanu Daawuloosi faale hadhanni noori finqila sokkaasineetinna busha mannaati. Insa Maganoho badhe wodhitino daafira, Sheexaanu sirchi wido ikkitino. Ikkollana Maganu murino yannara Sheexaanunna isi faale hadhannori baalu baꞌanno.—Dan. 2:44; Rom. 16:20.

8. Yesuusi 1914 maa assino? (Misillano lai.)

⁸ Yihowa Sheexaanenna isi faale hadhannore hunannota kule eino qaale wonshannota addaxxineemmo gede assannonkeri maati? Yesuusi 1914 Sheexaanu Daawuloosinna durriissate ledo olame insa uullara qole olino. (Aju. 12:7-9) Olu kainohu iima ikkirono, uullate aana nooreno kuni oli abbinori gawajjino. Qullaawu Maxaafi togo yaanno: “Baattotenna baaraho kayinni aanneꞌe; korkaatuno, Daawuloosi shiima yanna calla gattinosita afe lowo hanqinni kiꞌnewa dirrino.” (Aju. 12:12) Sheexaanu 1914 kayse illachasi baattote widira qole tugino; konninni kainohunni alame albinni roore anganni fulte baꞌino. ‘Baattote aanneꞌe’ yaa garankolla! Ikkollana Yesuusi muli yannara ‘qeellesi umo fushshanno’ hattono Sheexaanunna halesi baala baꞌanno. (Aju. 6:2) Yesuusi Yihowa suꞌmi hegerera minshe nookkiha ikke heeꞌranno gede assanno. (Fa. 45:4-6) Baalunku Yihowa halaalu Magano ikkinota affanno!—Hiz. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

HALAALU MAGANI HALAALE BAXXANNORE BAALA GAMBA ASSANNO

9. Yihowa xaa yannara ayeoo gamba assanni no?

⁹ Hakka geeshsha kayinni Yihowa, “baalanka coye yaano gordoho noo coyeno baattote noo coyeno Kiristoosinni mitteenni gamba [assanni]” no. (Efe. 1:10) ‘Gordoho noo coye’ yiniri Yihowa iima Kiristoosi ledo moohara doorinoho buuramino Kiristaanaati. ‘Baattote noo coye’ yiniri kayinni Gannate ikkitino baattora hegerera heedhannoreeti. Tini lamenti gaamo Sheexaanu kapho xawo fushshatenna suwashshu wodani noonsari halaale affanno gede kaaꞌlate dandiiture baala assitanni no.

10. Yihowa manna kaphu ammaꞌno giddonni wolassanni noohu hiittoonniiti? (Ajuuja 14:6, 7)

¹⁰ Yihowa halaale baxxannore sabbakate loosi widoonni gamba assanni no; konne sabbakate looso xaa geeshsha loonse egenninoonnikki garinni halaꞌladunni loonsanni heeꞌnoonni. (Ajuuja 14:6, 7 nabbawi.) Yihowa wolootaho dancha duduwo kulanni noohu manna kaxxe ikkirono, sokkaasineno suwashshu wodani noonsa manni halaalu minira daanno gede kaaꞌlitanni no. Daawuloosi Yihowa daafira kapho tareessate lowo diro Batiꞌra Baabiloone yaano alamete doychota kaphu ammaꞌno horoonsiꞌranni keeshshino; sabbakate loosi qole konne kaphu roso xawo fushshanni no. (Aju. 18:2, 4) Muli yannara kaphu ammaꞌno baalanti woꞌmunni woꞌma baꞌanno; hattono halaalu Magano baxxannori baalu isira hasiisanno ayirrinye uytanno.—Aju. 17:16.

11. Yihowa halaalunni magansidhannore bande afa dandiineemmohu hiittoonniiti?

¹¹ Halaale baxxannori addi addi gaꞌrenni dagginoreeti; qoleno budinsanna heeshshonsa gari babbaxxanno. (Aju. 7:9, 10) Insa “dancha duduwo” macciishshitu woyte, rossinori halaale ikkinota wodanchituti Yihowa manni wido ikkitino. (Maq. 13:10) Galte hosse, Magano isi hasiꞌranno garinni magansidhanni noori ayeootiro xabbe leeltino. Masaalaanchu Milkiyaasi togo yee masaalino: “Hatte yannara anera soqqamannoehura danchu manchira assinannisi danchummanna soqqamannoekkihura bushu manchira iillannosi qarra manniꞌya laꞌꞌanno.” (Mil. 3:18) Yihowa Farciꞌraasine amanyootinsanninna sabbakate loosinni halaalu Magano magansidhanni noota leellishshanni no.

12. Sabbakate loosi Yihowa hedinori woꞌmanno gede kaaꞌlannohu hiittoonniiti?

¹² “Maganu Gashshootiha dancha duduwo” dudumbeemmoha ikkiro, Yesuusi hajajo wonshinanninna masaalo woꞌmitanno gede assinanni heeꞌnoommo. (Mat. 24:14; 28:18-20) Sabbakate loosi alamete doychora noo manni baalu Kiristoosi rosaano ikkanno gedenna halaalu Magano hegerera magansiꞌrate faro afiꞌranno gede assanni no. Yihowa hedinori woꞌmanno gede kaaꞌlama ninkera lowo ayirrinyeeti!

ALBILLITTETE YANNA WOꞌMA GIDDONNI AGADHE

13. Sheexaanu roorenkanni ayeoo gawajja hasiꞌranno? Mayra?

¹³ Sheexaanu Daawuloosi alamesi baꞌꞌate ‘shiima yanna calla gattinota’ afinohura lowo geeshsha hanqino. (Aju. 12:12, 13) Isi roore anga buurantinore gawajja hasiꞌranno; insa ‘Maganu hajajo agadhitannoreeti hattono Yesuusi daafira farciꞌrate looso’ uynoonninsa. (Aju. 12:17; 14:12) Sheexaanu insa kaaꞌlitannore baalano gawajjanno.

14. Sheexaanu Maganu manna sianno woyte may ikkanno? (Misileno lai.)

¹⁴ Batiꞌra Baabiloone baꞌuhu gedensaanni, Sheexaanu hale Maganu manna baala gudate seedhite kaꞌanno. Hakkiinni Armagedooni oli kaꞌꞌanno. (Aju. 16:13, 14, 16) Yesuusinna iimi olanto Yihowa magansidhannore gatissanno; hattono Daawuloosi alamera noo coye baala coꞌo assite huntanno. (Aju. 19:19-21) Kaphannohunna gano ganannohu bushu manni horo diheeꞌranno. (Aju. 21:8) Maganu halaalaanchonna keeraancho ikkinoti xabbe leeltanno.

15. Albillittete yanna woꞌma giddonni agadhineemmohu mayraati? (Isayaasi 65:16, 17) (Misileno lai.)

¹⁵ Xaa yannara alame albinni roore bebbeehante biilla biinxa fultanni no. Ikkollana Yihowa kaaꞌlonni mannisi mittooꞌme no. Yihowa baalanka manna isiwa gamba assanni no. Yihowa mannasinna insa loossanno looso maassiꞌrannokki gede assannori mitturino dino. (Isayaasi 65:16, 17 nabbawi.) Konnira albillittete yanna woꞌma giddonni agadhineemmo. Korkaatuno Soqqamaasinchu Phaawuloosi Rooma 8:38, 39 togo yiino: “Reyono ikkituro, heeshshono ikkituro, sokkaasineno ikkituro, gashshooteno ikkiro, xa noo coyibbano ikkituro, albillitte dagganno coyibbano ikkituro, aye wolqano ikkituro, alillitteno ikkituro, wororritteno ikkituro woy wole aye kalaqamano ikkiro, Mootichinke Kiristoosi Yesuusi widoonni leellinohu Maganu baxilliwiinni badankera dandaannokkita seekke afoommo.”

16. Yihowa woꞌmu wodaninkenni addaxxineemmohu mayraati?

¹⁶ Halaalu Magano Yihowa addaxxineemmo gede assannonkehu ikkadu korkaati noonke. Isi Kalaqaanchonkeeti. Qoleno lubbora baxannonke. Addi addi gaꞌrenni fulino manni Yihowa magansiꞌranni noo daafira lowo daga kiiro lexxitanni no. (Isa. 60:22; Zak. 8:23) Yihowa woꞌmanka woyte hedinore wonshannotanna mulenni Sheexaanu baꞌꞌannohura kaphoho yinanniri heeꞌrannokkita anfoommo. Ninkeno Daawiti gede togo yine huucciꞌneemmo: ‘Callisi dhagge assannohu . . . Maganu Kaaliiqi galatamo. Galataminohu suꞌmisi hegere hegerera maassamo; galatisino baatto baala woꞌmo!’—Fa. 72:18, 19.