Yihowa Anjeꞌyanni Kayse Qajeelsinoe

Hanni xa xaggeꞌya hanafotenni kayse odeesseemmoꞌne. Ilamoommohu Kanaadaho Kalgaari yinanniwa Layinkihu Alamete Oli yannaraati. 1940 balla Doonaald Fireezer yinannihu mittu wedellichu suwisaanchi soqqamanni mininkera day; hakkiinni amaꞌya Qullaawa Maxaafa xiinxallate sumuu yitu. Ise rossino halaale lowo geeshsha baxxino; ikkirono buuto dhiwannose daafira ganyite gambooshshe haꞌra didandiitino. Ikkollana ayyaanaamittetenni jawaatte 1950 cuuantino. Hige ma assinanni ise cuuantunkunni lame diro ikkitannokki yanna giddo mannu aalo ikkitino. Hatte yannara anniꞌya Yihowa Farciꞌraasincho ikka hoogirono, roduuwu madaarshu lallawo shiqishshara maahoyye yiino.

Madaarshu saihunni boodu barri gedensaanni, Aliise yinanniti buurantinoti jawa rodoo gambooshsheho koyissue. Tini rodoo amaꞌya hakkeeshsha dhiwannosekki waro ledose gambooshshe haꞌreemmo daafira affinoe. Hakkiinni annaꞌya ‘Gambooshshe haꞌro?’ yee xaꞌmummo. Isino maahoyye yee, amaꞌya madaarshira lallawo shiqishi rodoo galata hasiꞌrinohura “mitte hige” calla haꞌreemmo yiie. Hakko hashsha Tiokiraasennihu Soqqanshote Rosi Mininna Soqqanshote Gambooshshe assinoonni. Anniꞌya mite yee haꞌrinoha konne gambooshshe lowo geeshsha baxino. Isi mannu albaanni coyiꞌnanni gara qajeelino daafira, gambooshshunniwa macciishshino lallawo lowo geeshsha dhagge assiꞌrino. Hakkiinni konne gambooshshe lamalate kiiro haꞌrate murciꞌrino. Sunu sununni isi wole gambooshsheno haꞌra hanafi.

Hatte yannara Tiokiraasenniha Soqqanshote Rosi Mine massaganno rodii gambooshshu hanafara albaanni, kifile shiqishshara borreessantino roduuwi suꞌma nabbawanno; hakkiinni insa suꞌmansa woshshinanni woyte “Noommo” yitanno. Mitto hashsha, aananno gambooshshira ane suꞌmano woshshinara kuꞌlummo. Roduu lowo geeshsha galatinoeha ikkirono, maa maa assinanniro afoommoronna teꞌee dixaꞌminoe.

Gambooshshunniwa kifile shiqisheemmo yee kaoommota ada diafoommo; ani suꞌmaꞌya woshshinara calla hasiꞌroommo! Aantanno lamalara suꞌmaꞌya woshshinita fenjeejjoommohu mitu “Noommo” yuummo. Hakkiinni gambooshshu gedensaanni roduuwu galattue. Boode lamala gedensaanni hanafote kulummoꞌnente gede, gambooshshunniwa kifile shiqishammora woraqata uynie.

Waajje qece yoommo! Hatte yannara rosaano lallawo qixxaabbe lewunni settu daqiiqi geeshsha shiqisha hasiissannonsa. Hakkawaro Qullaawa Maxaafa calla nabbambe dirrinanni kifile dino. Anniꞌya lallawo qixxaaweemmo gedenna shiqishammora albaanni 20 hige rosiisiꞌreemmo gede kaaꞌlinoe. Kifile shiqishummohu gedensaanni gambooshshe massaganno rodii dancha gede amaalinoe. Yihowa lowo diro anniꞌya, gikki yitino roduuwinna dirijjitesi widoonni qajeelsinoe.

YIHOWA QAJEELSA DIAGURINOE

Aleenni qummi assummoti Aliise soqqansho hanafummota qajeelsitinoe. Hatte yannara hasaawinseemmo manchira sase qummeeshsha nabbambe maxaafa uyneemmo gede jawaachinshanninke. Ane bado iillitanno woyte, Aliise keere haadhe hasaawa hanaffe umi qummeeshsha nabbaweemmo gede koyissannoe. Hakkiinni hasaawu sufanno gede asse layinkinna sayikki qummeeshsha nabbawe borro eleemmo. Gedensoonni, umiꞌyanni hasaawa hanafa dandiinanni gara rosoommo. Anniꞌya 1954 jeefora cuuamihu gedensaanni, soqqanshote qajeelsa hanafie. Amaꞌya lubbote nookkiha ikkirono, anniꞌya ane Yihowa baxeemmo gede asse lossate dandiire baala assino. Isi horo ayyaanaamittete coye lawashshi diassanno. Hakko daafira gambooshshe horo dihonseemmo; hattono Qidaamenna Sambata soqqansho fulleemmo.

Hakkeeshsha worba rosaancho diꞌꞌikkoommo; ikkirono rosu mine 12 diro rosoommo rosi heeshshoꞌya diro baala lowo geeshsha kaaꞌlinoe. Lawishshaho shallagonna Ingilizete qaalita afuu jirte lowo geeshsha rosoommo. Ingilizete qaalenna xagge borreessinanni gara rosaꞌya xa looseemmohu Borrote Goli loosira baasa kaaꞌlitinoe.

Duucha woyte mannu muuziiqa baxeemmohu mayraatiro xaꞌmannoe. Anniꞌyanna amaꞌyano muuziiqa lowo geeshsha baxanno. Lamalu dirihu heeꞌre boode yanna massaara gannanni gara rosoommo; rosiisaanchoꞌya kayinni hakkeeshsha worba ikkoommokkita kultinoe. Hakko daafira ise anniꞌyara konne roso agurummoro woyyannota kultu. Hakkawoyte gari hasatto nooekkihura ise garalla yitino.

Boodu agani gedensaanni, anniꞌya wole rosiisaancho rosiissannoe gede assi. Tenne yannara massaara gannanni garanna faarsinanni gara rosoommo; konne lamenka roso lowo geeshsha baxoommo. Anje noommo waro dancha huuro nooe daafira mite heewora qeeloommo. Muuziiqa rosoommohu, rosiisaancho ikke woꞌma yanna soqqansho soqqameemmo woyte kaaꞌlannoe looso afiꞌrateeti. Ikkirono muuziiqu daafira xiinxallanninna fonqoloho qixxaawanni lowo yanna gudanni noommota wodanchummo. Konnira roso agure 1963 woꞌma yanna suwisaancho ikkummo.

SUWISAANCHO IKKE SOQQAMAꞌYA HAGIIRRE UYTINOE

Mitto diro suwisaancho ikke soqqamummohu gedensaanni, Ontariyo Kapuskasingi yinanniwa baxxino suwisaancho ikke soqqameemmo gede gaammie. Ledoꞌya suwisaancho ikke soqqamannohu Daanieeli Iskiiner lowo diro bayiꞌrannoe. Isi songo qinaabbino gara kulinoe. Songonnite Soqqanshote Komite giddo soqqameemmo gede shoommoonniehu 20 dirihu heeꞌreenna ikkinohura lowore rosa hasiissinoe. Yihowa dirijjite wedella labballo roduuwa qajeelsa hasiissannota luphi assite kultuta lowo geeshsha hagiidhoommo. Insalla maahoyye yituro Yihowa anje heedheenna horoonsiꞌrannonsa!

Kapuskasingi heeꞌra shota diꞌꞌikkitino. Hawado mito woyte qorru batiꞌranno. Daaninna ani duucha woyte addi addi baycho haꞌneemmo. Ikkirono, Yihowara soqqamummo woyte lowo atoote afiꞌroommo; hakko atooti giddo mitte Lindaati; gedensoonni ise minaamaꞌya ikkitino.

Linda soqqansho lowo geeshsha baxxannohura galagalte hasaawissannohu lowo manni noose. Ise shaqqadote, faasiiqate hattono manna baxxannote. Amase Goold ammanantino rodooti. Umi qara annise Aleeni Yihowa Farciꞌraasine dibaxanno. Aleeni baxannokkiha ikkirono, Goold ganyite Linda hattono roduuwase Jooninna Gordoni gambooshshe haadhe hadhanno qoleno soqqanshote qajeelsitanno. Goold, Linda, Jooninna Gordoni suwisaano ikke soqqamino. Lowo diri gedensaanni Aleeni Yihowa Farciꞌraasincho ikke diinaggaawe soqqama hanafino.

Hakkiinni 1965 Kanaadaho noo Beetelera Mangistete Soqqansho Rosi Mine qajeelammora koyinsie; kuni qajeelshi mittu agani geeshsha keeshshanno. Hakko rosanni heeꞌreenna Giliyaadi rosi mine rosate forme wonsheemmo gede kullie. Misiyoone ikke soqqamate ikkado diꞌꞌikkoommo yee hedoommoha ikkirono forme wonshoommo. Hakkiinni Giliyaadi rosi mine 42^ki kifile roseemmo gede koyinsie. Rosiisaanonke assinanni heeꞌnoommo millimillo leellishshanno rippoorte ganyite kultannonke. Rosiisaanoꞌya dirijjitete daafira baalankare afate danduummore baala asseemmo gede jawaachishshinoe. Hakkawaro 21 diro calla ikke nooe daafira, tini amaale lowo geeshsha hasiissannoete.

Giliyaadi rosi mine raadoonetenna televizhiinete xaawira loossannori ledo hattono gaazeexa qixxeessitannori ledo hasaawa dandiinanni gara ronsoommo. Konne roso baxoommo gari addiiti. Konne roso rosaꞌya mageeshshi geeshsha kaaꞌlitinoero hakkawoytira diwodanchoommo; hatto yoommohu mayraatiro gedensaanni kuleemmoꞌnena.

SENEGAALI SONKIE

Maassammummohunni shiimu barri gedensaanni, anenna Mikaeeli Huulo misiyoone assine Afiriku gobba Senegaali sonkinke. Hatte yannara hatte gobbara mite 100 ikkitanno halashshaano no.

Lowo agana soqqamummohu gedensaanni, lamalate giddo mitto barra Senegaalete sinu biirora soqqamammora koyinsie. Hakkawaro sinu biiro looso loonsannihu misiyoonete mine noote mitte kifileraati. Sinu biiro soqqamaanchi Emaanueeli Paterakisi tini kifile shiima ikkiturono, hatte gobbara Yihowa dirijjite riqibbannota qaagiissinoe. Mitte yannara Roduu Paterakisi misiyoone jawaachishate borrote sokka borreessino yiie. Hakkawaro lowota borrote sokka qixxeessate lowo woxi hasiisanno; konnira mitte mittenta borrote sokka tayippiraytere yinanni maashinenni borreessinanni; togoo maashinenni borreessa shota diꞌꞌikkitino. Korkaatuno borreessinanni soꞌniro biddi assinanni gari dino!

Hakko barra hawarro minira harammora kae heeꞌreenna Roduu Paterakis poosta uyie. Isi, “Deevid, kuni dirijjite uytinohe poostaati” yiie. Poosta fanummoti, uynoeti ani borreessoommo sokka ikkitinota huwatummo! Tennenni mitte gobbati sinu biiro ikkitu geeshshitano ikkituro Yihowa dirijjite ayirrisa hasiissannoeta rosoommo.

Songote noote batinye halashshaano ledo jaalla ikkinoommo; roore yanna Qidaame hawarro yanna sayinseemmohu insa ledooti. Hatti yanna lowo geeshsha hagiirsiissanno! Xaano saꞌne saꞌne insa ledo xaandeemmo. Qoleno Faransayete afoo rosoommo; tini alamete doychora noota sinu biiro towaatummo woyte kaaꞌlitinoe.

Hakkiinni 1968 aninna Linda adhamate sumuu yinummo. Hakkunni gedensaanni lowo agani geeshsha, aninna Linda Senegaali gobbara suwisaano ikkine soqqammeemmo woytira kaaꞌlannonkeha darate barra loonsanni looso hasiꞌrummo; ikkollana loosiisaano loosoho qaxartannohu hatte gobba manna callaati. Jeefote Kanaada higummohu gedensaanni, Linda ledo adhammeenna baxxitino suwisaano assine gaamminke; gaammoonninkehu Edmendsten, Niyu Birunsiwiki yinannihu Kiwubeeki qoqqowi qaccera noohu shiimu katamiraati.

NIYU BIRUNSIWIKINNA KIWUBEEKI SUWISAANO IKKE SOQQAMA

Edmendsten katamira halashshaano dino; ikkollana boode Qullaawu Maxaafi rosaano no. Kaatolikete ammaꞌno baalanka manna sakaalte amaddino yaa dandiinanni. Roore minnara “Yihowa Farciꞌraasine ea didandiitanno” yine gannoonni malaati no. Hakkawaro coy xaa yanna gede ikkinokkihura malaatu heeꞌrono hoogono baalanka mine haꞌneemmo. Lamalate kiiro Kaatolikete ammaꞌno, “Yihowa Farciꞌraasine ugaanxe amando” yite gaazeexaho fushshitanno. Hakko katamira heeꞌnoommori Viktoorinna Velda Norbergi hattono Lindanna aneeti; hakko daafira “ugaanxe amando” yiniri ninkeetilla!

Woradu aliidi laꞌꞌaanchi mite yee towaatinke yanna horo dihaweemmo. Isi mitte lamala ninke ledo keeshshihu gedensaanni togo yiino: “Kowiicho loosa hasiissannoꞌne loosi giddo mittu mannu Yihowa Farciꞌraasine daafira noonsa lao biddi assiꞌranno gede kaaꞌlate.” Hatte yannanni kayinse tenne assate mixiꞌnoommo; qoleno qiniinonke! Gale hose mannu jooguullu Yihowa Farciꞌraasinenna naaxxaleeyye Kaatolikete ammaꞌno massagaano mereero noo badooshshe huwati. Xa hakko katamira shiima songo no.

Hakko katamira mittu diri geeshsha soqqammummohu gedensaanni, Kiwubeeki Katamira noota jawa songo kaaꞌlinammora sonkinke. Hakko wosina adha baxxanno roduuwinke ledo lee hagiirsiisanno agana keeshshinoommo; hakkiinni woradu loosira koyinsoonninke.

Aane nooha 14 diro Kiwubeeki qoqqowira noohu addi addi woradira soqqammoommo. Hatti lowo geeshsha hagiirsiissanno yannaati! Kiwubeeki loonsannihu sabbakate loosi dancha guma abbino; batinye maate Qullaawa Maxaafa xiinxallite cuuamate sharrantanno!

DIINAGGAABBE SOQQANTANNO RODUUWA DIHAMBEEMMO

Kanaadaho heedhannori Faransayete afoo coydhanno roduuwi banxe diagurroonnireeti. Insa giddonsata dimaaxidhannoreeti, hagiirraammaho laalaatte soqqantannoreeti. Ikkirono halaalu minira daa shota diꞌꞌikkitannonsa; korkaatuno maatensa feexidhe gibbannonsa. Mite aja ooso annuwinsanna amuuwinsa, “Yihowa Farciꞌraasine ikkatenna mininni fule haꞌrate giddo mitte doodhe!” yitannonsa. Insa kayinni tennera anga diuytino. Yihowa insanni lowo geeshsha hagiidhino!

Hatte yannara Kiwubeeki ammanante soqqantannore woꞌma yanna suwisaanonna baxxitino suwisaano daafira kulummokkinni saummoro hilo ikkannoe. Insa giddo rooru dagginohu Kanaadunni addi addi baychinniiti. Insa Faransayete qaale hattono hatte gobba budenna mannu hedanno gara rosa hasiissannonsa; Kaatoolikete ammaꞌno manna sakaalte amaddinohura hatto assa qole shota diꞌꞌikkitanno.

Baxxitino suwisaano duucha woyte halashshaano nookkiwa fafowa gaammanni. Hakko heeꞌranno manni Yihowa Farciꞌraasine mulla kae giwanno daafira, gallanniwanna darate barra loonsanni looso afiꞌra qarraho. Adhantinori nafa minu kira kaaꞌlante baatate shoole, lee, hattono sette ikkite galtanno. Hatto ikka hoogiro insa heeshshote hasiisannonsare afiꞌra didandiitanno. Kuri ammanantino suwisaano chaachaarootaho. Insa mannaho Qullaawa Maxaafa xiinxallissanno woyte insaneeto diqooffattanno. Xaate Kiwubeeki gobbara kaaꞌlo hasiissannokki daafira, hakko heedhannore batinye suwisaano kaaꞌlo roore hasiissannowa sonkoonni.

Woradu looso loonsanni songuwa towaanteemmo yannara, duucha woyte Qidaamete soodo aja dume ledo soqqammeemmo. Tini qarra ikkannonsari maatiro anfeemmo gede assitinonke. Mitteenni soqqammummo wedelli giddo mitu xaa yannara misiyoone ikkite woy wolu gari soqqansho soqqantanni no.

Hatte yannara mite songo anga assitannonsakkihura hodhishshaho hasiisanno woxe diuytannonke; konnira mito woyte aganu jeefora woxu anganni taꞌꞌannonke. Heeꞌnoommo gara afinohu Yihowa calla ikkino daafira woꞌmunni woꞌma iso addaxxa hasiissinonke. Isi horo tuge diagurinonke. Hakko daafira ikkinummota ikkine songuwa towaatate haꞌneemmo.

AMMANANTINO RODUUWIWIINNI ROSOOMMO ROSO

Aleenni kulummoꞌnente gede, Giliyaadi rosi mine miidiyaho loossannori ledo hasaawa dandiinanni gara rosaꞌya lowo geeshsha kaaꞌlitinoe. Hakkawaro Kiwubeeki soqqammeemmo yannara, raadoonetenna televizhiinete hattono gaazeexu widoonni farciꞌrate faro afiꞌnoommo. Duucha woyte, ledonke woradu looso loosannohu Leyons Kirapo ledo gaammannie; isi miidiyaho loossannori ledo hasaawa dandiinanni gara seekke afino. Isi lowo egenno noonsari miidiyaho loossannori ledo hasaawanno woyte, lowore afinota leellishate woꞌnaalantenni togo yaanno: “Moote, aninna jaaliꞌya soqqamaanotella. Miidiyaho manna magarinni hasaawinsanniro hakkeeshsha dianfoommo. Ikkollana mannaho Yihowa Farciꞌraasine assidhannohu jawu gambooshshi daafira egensiinsammora gaammoonninke. Kaaꞌlitininkero tashshi yaannonke.” Isi joongillunni hasaawisino daafira miidiyaho loossannori kaaꞌlitinonke.

Gedensoonni sinu biiro, shota ikkitinokkite miidiyu hajo lainohunni ayyaayyamaancho ikke loosannohu Roduu Gileen Hawu ledo loonsammora gaantue. Giliyaadi afiꞌroommo qajeelshinna Leyons ledo loosaꞌya lowore kaaꞌlitinoe. Roduu Hawu ledo loosa anera lowo ayirrinyeeti. Isi higgete ledo xaadooshshe afiꞌrino looso loosanno woyte bashshi diassanno; qoleno Yihowa lubbora baxannoho.

Hakkiinni 1985 anniꞌya heeꞌrannohu galchimi Kanaadira noo woradira soqqammammora gaamminke; hakko heeꞌne iso towaata dandiineemmo. Hige masseemmosi sasu agani gedensaanni mannu aalo ikkino. Galchimi Kanaadira noohu addi addi woradira 1989 geeshsha soqqammummo; hakkiinni Yunayitidi Isteetisete Beetelera soqqammammora koyinsinketa dhagge assiꞌnoommo. Mitu 19 diri geeshsha woradu looso loonsoommo. Konni baalunku diri giddo lowo xibbe ikkanno mine galloommo; hattono wosina adha baxxannori lowo kume ikkitanno roduuwi wosinsidhinonke. Minensa gashshite dancha gede wosinsidhunke roduuwa baala godowinta galanteemmonsa!

YUNAYITIDI ISTEETISETE BEETELERA SOQQAMA

Birukiliini noo Beetele iillinummota, Soqqanshote Golira soqqamammora gaammie. Hakkiicho qajeelsitinoe roduuwa lowo geeshsha galateemmonsa. Mittu coy daafira balaxe woꞌma taje afiꞌra hasiissannoeta rosoommo. Hakkiinni 1998 Borrote Golira soqqamammora gaammie; xaano ikkiro hakko lowore rosanni noommo. Lowo diro, Borrote Komite qineessaancho ikke soqqaminoha Rodoo Jooni Baari kaaꞌlate qoosso afiꞌroommo. Isi qajeelsinoe daafiranna ledosi loosoommohura tashshi yiinoe. Isira baxissannoti kaajja akatta noosi.

Borrote Golira soqqantannori umonsa heeshshi assitanno roduuwi ledo loosa baasa hagiirsiissanno. Insa loosonsa loossanno woyte kaaꞌlannonsa gede Yihowa huuccidhanno; hattono dancha gede loosa dandiitannohu uminsa dandoonni ikkikkinni Yihowa ayyaaninni ikkinota seekkite affino.

Qoleno aninna Linda 110 gobbuwara heedhannore ammanate roduuwanke towaatate qoosso afiꞌnoommo. Misiyoonootu, Sinu Biiro Komite miillanna wole woꞌma yanna soqqamaano baxille illenkenni laꞌnoommo. Hatte gobbara heedhanno halashshaano, olu, angate anjenna dartu heeꞌrirono Maganu Gashshoote balaxisiissanna laꞌꞌa lowo geeshsha hagiirsiissannote. Yihowa insa godowinta baxanno!

Linda lowo diro uynoonnie looso loosummo woyte badhete miqicho ikkitinoe. Ise manna lubbora baxxanno hattono kaaꞌla hasidhanno. Ise hasaawa hanafate lowo geeshsha worbate. Linda lowo manni halaalu minira daanno gede kaaꞌlitino; hattono Yihowara soqqama agurtinori isiwa higganno gede kaaꞌlitino. Ise anera Yihowa uynoete! Xa akkalle amaddinonke daafira, addi addi doogganni kaaꞌlitannonkeri ammanate roduuwi noonkehura tashshi yaannonke.—Maq. 10:29, 30.

Saiha 80 diro badhe hige hedeemmo woyte, tashshi yaannoe. Anino faarsaanchu hedora sumuu yeemmo; isi togo yiino: “Maganoꞌya anjeꞌyanni kayisse rosiisoottoe; anino techo geeshsha dhaggenniha loosokki duduwanni noommo.” (Fa. 71:17) Anino lubbote noommo geeshsha hatto assa hasiꞌreemmo.