Maganu Ninke Daafira Hedannota Afanke Kaaꞌlitannonke Gara
Maganu bisinke isi isonooto dhaawanno gede asse kalaqino. Bisonke mituri madiissanno woyite, “mada shiimano jawano ikkituro bisinke dhaawannohu raqaxamino gari no.” (Jooni Hoppikinsi Hikkiminna) Bisinke, mundee rakke uurritanno gede assanno, madate gaga gananno, hattono gawajjamino bayicho kaajjishanno.
HANNI HEDI: Maganu bisonke mada hursanno gede asse kalaqinoha ikkina, isi wodaninke mada hurseemmo yee eino qaale wonshannota addaxxa dihasiissannonke? Maganu “Wodana hiiqqantinore dhaawannonsa; madansarano gaga gananno.” (Faarso 147:3) Heeshshokki giddo dadillisanno coyi iillinoheha ikkiro, Yihowa xaano ikko albillitte madakki hursannota addaxxa dandaattohu mayiraati?
QULLAAWU MAXAAFI MAGANU BAXILLI DAAFIRA MAYYAANNO?
Maganu togo yee qaale einonke: “Ani ledokki noommona waajjitooti; ani Maganokkiitina hexxo mudhitooti. Ani jawaachisheemmohe, kaaꞌleemmohe.” (Isayaasi 41:10) Yihowa baxannosita afino manchi surrete keere afiꞌranno, hattono babbaxxino qarra qeelate kaaꞌlitanno jawaante heedhannosi. Phaawuloosi togooti giddiidi harshammo “Mannu hedora aleenni ikkinoha Maganu keere” ikkinota coyiꞌrino; qoleno isi “Wolqa aannoehunni Kiristoosinni [“Maganunni,” NW] baalankare assa dandeemmo” yiino.—Filiphisiyusi Sokka 4:4-7, 9, 13.
Qullaawu Maxaafi Maganu mannu oosora eino qaale wonshannota addaxxineemmo gede kaaꞌlannonke. Lawishshaho Yohaannisi Ajuuja 21:4, 5 Maganu albillitte maa assannoronna isi eino qaale wonshannota addaxxa dandiineemmohu mayiraatiro xawissanno.
Maganu “hindiiddo baala” mannu illenni feyanno. Yihowa qarranna yaachishannonkere baala hunanno; wole agurina isi wolootu hakkeeshshi geeshsha wodanchitinokki qarra nafa hunanno.
Iima “ayirradu barcimira ofollinohu” Woꞌmanka Dandaannohu kalaqamu baalu Mootichi qarra baala hunatenna hasiisannonkere wonshate wolqasi horoonsiꞌranno.
Yihowa eino qaali “hawaqiꞌnannihanna halaale” ikkinota coyiꞌrino. Yihowa eino qaale wonshannota buuxisate halaalaancho Magano ikkinota xawisino.
“Hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno. . . . Ayirradu barcimira ofollinohu, ‘Kune, ani baalanka coye haaro asseemmo’ yii. Ledeno, ‘Kuni qaali hawaqiꞌnannihonna halaalehona borreessi!’ yiie.”—Yohaannisi Ajuuja 21:4, 5.
Illete leeltannoti kalqete alamenna Qullaawu Maxaafi iimi Anninke akatta xawissanno. Kalaqamu Maganu jaallasi ikkinammora shiqishinonke koyishsha leellishanno; Qullaawu Maxaafi qole “Maganunniwa shiqqi yiiyye; isino kiꞌnewa shiqqi yaanno” yee koyisannonke. (Yaiqoobi 4:8) Soqqamaasinete Looso 17:27 “Isi ninkewiinni dixeertiꞌrino” yitanno.
Maganu daafira rossanni haꞌritto kiiro, isi ate daafira hedannota roore buuxatto. (1 Pheexiroosi 5:7) Ikkina konni garinni Yihowa addaxxa maaho kaaꞌlitanno?
Hanni Jaappaanete heeꞌrannohu Tooru lawishsha laꞌno. Amasi Kiristaanchote; ikkirono isi yakuuza yinannite Jaappaanennite finqilaasinete gaamo giddora eino. Isi togo yiino: “Maganu giwannoeha lawannoe; ledoꞌya heeꞌranno manni, roorenkanni baxeemmo manni reyansa, Maganu qorochishanni nooe yee hedeemmo gede assitinoe.” Tooru finqilaasinete gaamo miila ikkasinna busha hedosi, “kaajjadonna mararro noosikkiha” ikkanno gede assitinosita coyiꞌrino. Isi “Wedellichu heeꞌre anenni roore maccaha ikkino mancho shee maccaha ikkummo gedensaanni reya hasiꞌroommo” yee coyiꞌrino.
Ikkollana Toorunna minaamasi Haanna Qullaawa Maxaafa xiinxallita, Tooru heeshshosinna hedosi biddi assiꞌrino. Haanna togo yitino: “Isi ani laꞌꞌanna soorrame biddi yiino.” Xa Tooru togo yiino: “Mitti mittinke daafira hedanno Magani no. Isi reyinammora dihasiꞌranno; qoleno soꞌro loosse giddonsanni maaro eꞌannorira gatona yaannonsa. Isi woleho kuꞌla dandiineemmokkirenna wolootu wodancha dandiitannokkire hasaaphineemmo woyite macciishshannonke. Muli yannara Yihowa qarranna yaaddo baala hunanno. Xa nafa isi hendoommokki garinni kaaꞌlannonke. Isi baxannonke hattono, hexxo mudhineemmo woyite irkisannonke.”—Faarso 136:23.
Tooru lawishshi leellishannonte gede, Maganu muli yannara qarra baala hunannotanna mannu hindiiddo feyannota afanke albillittete dancha hexxo heedhannonke gede assitannonke; hattono xa nafa hagiirru noo heeshsho heeꞌrate kaaꞌlitannonke. Ee, heeꞌnoommo alame qarru woꞌminota ikkiturono Maganu towaatannonke.