Muli Yannara Maganu Qarra Baala Hunanno

“Ani qoonqoꞌya naggi asse wiꞌlanna macciishshattoekkihu mamooti geeshshaati? Assinanninke beebbanni gatisattonkekkihu mamooti geeshshaati?” (Imbaaqoomi 1:2, 3) Hatto yee coyiꞌrinohu Maganunniho ammanamino soqqamaancho Imbaaqoomiiti. Isi hatto yiinohu ammana ajjinosi daafiraatini? Deeꞌni. Maganu qarra baala murino yannara hunannota kule Imbaaqoomi sheshifachishinosi.—Imbaaqoomi 2:2, 3.

Atera woy baxatto manchira buutote qarri iillinoꞌneha ikkiro, Maganu keeshshinoha lawaheranna rahe qarra huna hasiissannosi yite hedattoha ikkara dandaanno. Qullaawu Maxaafi togo yaanno: “Mitu manni heddanno garinni ikkikkinni, Mootichu uyino hexxo wonshate dikeeshshanno. Ikkollana, baalunku aagintaawe higaranna ayino baꞌꞌara hasiꞌrannokki daafira, kiꞌnera yee cincino.”—2 Pheexiroosi 3:9.

MAGANU QARRA HUNANNOHU MAMAROOTI?

Maganu qarra hunanno yanna lowo geeshsha gambissino! Yesuusi ‘diru goofimarcho’ leellishshanno malaatta laꞌanno gaamo heedhannota coyiꞌrino. (Maatewoosi 24:3-42) Yesuusi coyiꞌrino masaalo woꞌmitanni noo gara hendiro, Maganu qarra baala hunano yanna rakkino.a

Maganu qarra baala hunannohu hiittoonniiti? Yesuusi uullate noo yannara, Maganu mannu oosora iillanno qarra baala hunate wolqa noosita leellishino. Hanni mito lawishsha laꞌno.

Kalaqamu Dano: Yesuusi soqqamaasinesi ledo Galiilu Baari aana haꞌranni heeꞌreenna, wolqaataamu dambali kaino daafira, yowolo itantara kaꞌino. Ikkollana Yesuusi kalaqamu wolqa isinna Annisi wolqara aleenni ikkitinokkita leellishino. (Qolasiyaasi Sokka 1:15, 16) Yesuusi dambala “Uurri! Gabbi yii!” yiino. Hakkiinni “Bubbe uurriteenna lowo geeshsha gaꞌlabbi yii.”—Maarqoosi 4:35-39.

Dhibba: Yesuusi duucha hige illiwelootu ille fanino, kottoota hursino, hattono hawwunaatu, dhiigunna wolu ordu qarri noonsare hursino. Isi ‘addi addi dhibbinni qarrantinore baala hursino.’—Maatewoosi 4:23, 24; 8:16; 11:2-5.

Sagalete Anje: Yesuusi Annisi uyinosi wolqa horoonsiꞌre shiima sagale atoottanno gede assino. Qullaawu Maxaafi, Yesuusi soqqanshosi yannara lame hige lowo kume ikkanno manna itisinota kulanno.—Maatewoosi 14:14-21; 15:32-38.

Reyo: Yesuusi Qullaawu Maxaafi giddo kulloonni garinni sase manna reyotenni kayisasi, Maganoho reyitinore kayisate wolqa noosita leellishshanno. Yesuusi kayisino manni giddo mittu reyinkunni shoole barra ikkinosiho.—Maarqoosi 5:35-42; Luqaasi 7:11-16; Yohaannisi 11:3-44.