Qullaawa Maxaafa Nabbawummoro Sheshifachishannore Afiꞌreemmo?
Qullaawu Maxaafi mayyaanno?
Ee afiꞌratto. (Roomu Sokka 15:4) Hanni qarru amadeenna yaadinohanna dadillinoha batinye manna sheshifachishshinota mite Qullaawu Maxaafi qummeeshshuwa laꞌno.
Konni birxichira
Buutote qarra
Faarso 23:4: “Reyo lawanno tunsichi giddoonni hige haꞌrummoro nafa, ati ledoꞌya nootto daafira diwaajjeemmo.”
Tiro: Magano huucciꞌrattohanna Qaalisi Qullaawu Maxaafi giddonni biddishshasi hasiꞌrattoha ikkiro, qarru yannara worbanna sigiiga ikka dandaatto.
Isayaasi 40:29: “Isi daafurtinorira jawaante aanno; dhukiweeltinorira wolqa ledanno.”
Tiro: Maganu aye qarrano qeelte saꞌꞌatto gede jawaante aahera dandaanno.
Shiiꞌro
Rosiisaancho 9:10: “Reyittohu gedensaanni marattowa loosu, hedo, egennonna hayyo dino.”
Tiro: Reyino manni diqarrame no; qoleno insa ninke gawajja didandiitanno. Mittoreno diaffanno.
Soqqamaasinete Looso 24:15: “Maganu cubbaataammanna keeraano reyotenni kayisanno.”
Tiro: Maganu shiiꞌnoommo manna reyotenni kayisa dandaanno.
Quwa sae gaabba
Faarso 86:5: “Ati [Yihowa]a shaqqadohonna cubbono agurattohona, woshshidhannoherira baalaho bagamannokkiha baxillekki leellishattonsa.”
Tiro: Loossino cubbira addinta gaabbitannorenna wirro hattee soꞌro loossannokki gede qorophitannore Maganu maaranno.
Faarso 103:12: “Soojjaati galchimiwiinni fafinohu geeshsha, Kaaliiqi ninkewiinni cubbonke fafisanno.”
Tiro: Maganu gatona yaannonke woyite, cubbonke ninke heda dandiineemmohunni sae ninkewiinni fafisanno. Loonsoommo cubbo xaa xaa kulanni dikassasannonke woy diqorichishannonke.
Dadille
Faarso 31:7: “Qarraꞌya afootto, shettoꞌyano laootto.”
Tiro: Maganu iillannohe qarra baala seekke afino. Wodanikki xisso mannaho leella hoogguro nafa isira leeltannosi.
Faarso 34:18: “Kaaliiqi dadillunni hiiqqantinorira mule noonsa; hexxo hoogginore gatisannonsa.”
Tiro: Maganu dadillu amadannohe woyite kaaꞌlahera qaale eino. Xissokki dandiite heeꞌratto gede kaaꞌlitannohe jawaante aahera dandaanno.
Dhibba
Faarso 41:3: “Kaaliiqi dhiwame goxinowa heeꞌreenna kaaꞌlannosi.”
Tiro: Buutote dhibbi amadannohe woyite Maganu giddiidi keere oye kaaꞌlahera dandaanno; qoleno danchare doodhatto gede jawaante, cincanna hayyo aannohe.
Isayaasi 33:24: “Tsiyooni heeꞌranno manni giddo, ‘Dhiwamoommo’ yaannoha dianfanni.”
Tiro: Maganu mannu baalunku guuta ordu keere afiꞌre hagiidhanno yanna abbara hexxo uyino.
Yaaddo
Faarso 94:19: “Yaaddonna dadillu amadie yannara, sheshifachishshe, hagiirsiisoottoe.”
Tiro: Yaaddo amaddannonke woyite Magano huucciꞌneemmoha ikkiro, isi wodanaaꞌmineemmo gede kaaꞌlannonke.
1 Pheexiroosi 5:7: “Kiꞌnere malannohu isootina, qarrisannoꞌnere baala isi aana tuqqe.”
Tiro: Maganu qarrammeemmo woyite dadillanno. Isi qarranke hasaaphinammosira hasiꞌranno.
Olanna gaance
Faarso 46:9: “Baattote qacce geeshsha nooha ola uurrisanno.”
Tiro: Muli yannara Maganu Gashshooti olanna gaance baala hunanno.
Faarso 37:11, 29: “Shaqqaddu kayinni baatto ragidhanno; atootenna keere afidhe hagiidhitanno. . . . Keeraano baatto ragidhanno; ise aanano hegerera heedhanno.”
Tiro: Danchu manni keere afiꞌre baattote aana hegerera hagiidhanni heeꞌranno.
Gaꞌara yaada
Ermiyaasi 29:11: “Kiꞌnera hedeemmore ani egennoommo; hedoꞌyano hexxonna albillittete ikkitannoꞌne gede, keerunnite ikkinnina bunshennita diꞌꞌikkitino.”
Tiro: Maganu mannisi albillitte dancha heeshsho heeꞌrannota kule hexxo uyino.
Yohaannisi Ajuuja 21:4: “Hindiiddo baala illensanni feyanno; albi ikkito saꞌino daafira, reyo woy dadillu woy wiꞌla woy shetto kunni kaꞌa diheedhanno.”
Tiro: Maganu, xaa yannara alamete aana nooha busha coye baala huneemmo yee hexxo uyinonke.
a Yihowa Maganu suꞌmaati. (Faarso 83:18) “Yihowa Ayeti?” yaanno birxicho lai.