Onkoleessa

Yihowa mannasi Gibitsete borojjimmanni fushshihu gedensaanni, xaadooshshu dunkaaniwa kakkalaano ikkite soqqantannore shoomino. Qullaawu dunkaani ledo xaadooshshe afiꞌrinoha wole looso loossanno gede Leewaawoota gaammoonni. Xaadooshshu dunkaanira soqqantannore woy dunkaanansa xaadooshshu dunkaani mule qasidhinore Yihowa wolootunni roorse towaatinoni? Ditowaatino! Isi dimallaadannoho. Kaampete giddo heeꞌrannohu mittu mittunku Israeelichi Yihowa ledo muli jaalooma kalaqiꞌra dandaanno. Lawishshaho, Yihowa xaadooshshu dunkaanira umoonni nooti gomichu heelliichonna giirate heellicho baalunku Israeelete mannira leeltanno gede assino. (Ful. 40:38) Gomichu haꞌra hanafanno woyite dunkaanansa xaadooshshu dunkaaniwiinni xeertiꞌre qasiꞌrino mannino laꞌꞌa dandaanno; hakkiinni insa uduunnensa gamba assiꞌra, dunkaanansa diiganna wolu Israeelete manni ledo taalo haꞌra dandiitanno. (Kir. 9:15-23) Hatteente gede, ninkeno xaa yannara heeꞌneemmo bayichi ikkihano ikkiro, Yihowa baxannonke, towaatannonke hattono agarannonke. w24.06 4 guf. 10-12

Daawiti heeshsho qarru giddo no. Beettisi Abeseloomi gashshootesi adhate murciꞌrino. (2 Sam. 15:12, 13) Daawiti hakkawoyintenni Yerusaalametenni agure xooqa hasiissinosi! Soqqamaanosi hadhanni heedheenna Daawiti Yerusaalamete gate Abeseloomi assara hedinore kulannosi manchi hasiisannota wodanchino. Hakko daafira isi Saadooqinna wole kakkalaano agurte katama higge qottanno gede soyino. (2 Sam. 15:27-29) Insa lowo geeshsha qoropha hasiissannonsa. Daawiti ammanantino jaallasi Saadooqinna Kuusi kaaꞌlitannosi gede xaꞌmiꞌrino. (2 Sam. 15:32-37) Kuusi Daawiti kuꞌlino garinni Abeseloomi kaaꞌlinoha lawe Daawiti gawajja dandaanno gara amaalinosi; tini Daawiti qixxaawanno yanna afiꞌranno gede assitinosi. Hakkiinni Kuusi Saadooqiranna Abiyaataarira assara hedinore kulinonsa. (2 Sam. 17:8-16) Kuri lamunku manni Daawitira sokka sokkino. Hatti sokka Daawiti heeshsho gatisate lowore kaaꞌlitino.—2 Sam. 17:21, 22. w24.07 4-5 guf. 9-10

Mite Yihowa soqqamaano cuuantara albaanni woy cuuantu gedensaanni loossino soꞌrora quwa saꞌe insaneeto busha assitanno. Kayinni Yihowa lowo geeshsha baxannonke daafira wodo qixxeessinonketa qaaga hasiissannonke. Isi tenne eltosi maahoyye yine adhinammora hasiꞌrannoti dihuluullissannote. Yihowa isi ledo ‘mala hanse’ maaro eꞌnummohu gedensaanni, alba loonsoommo soꞌrora galagale xaꞌmannonkekkita buuxisinonke. Yihowa albi soꞌronke qaaga hoogasi lowo geeshsha hagiirsiissannote! Ikkirono isi assinoommoha dancha coye horo dihawanno. (Far. 103:9, 12; Ibi. 6:10) Alba loosootto soꞌro gaabbissanni waaddinoheha ikkiro, albi soꞌrokki agurte xaa yannaranna albillitte assatto coye illachishate sharrami. Alba ikkinore soorra didandaatto. Kayinni xa Yihowa ayirranno gede assanna isi uyinota dhagge ikkitannota albillittete hexxo illachisha dandaatto. w24.10 8 guf. 8-9

Qullaawa Maxaafa nabbawatto woyitenna giddosi noo amaale loosu aana hosiisatto faro hasiꞌratto woyite mito woyite hexxo mudhattoha ikkara dandaanno. Hanni tenne hedi: Techote Qullaawu Maxaafi niwaawekki giddo manna mallaandeemmokki gede kultanno amaale no. (Yai. 2:1-8) Wolootu ledo noohe aante woyyeessiꞌra hasiissannoheta huwatootto daafira mito coye biddi assiꞌrate murciꞌritto. Gaꞌa nabbawattote Qullaawu Maxaafi niwaawekki giddo qolte, coyiꞌrattore eemadha hasiissannoheta kultanno amaale no. (Yai. 3:1-12) Hakkiinni gara ikkinokkire coyiꞌrootto yanna noota wodanchitto. Hakko daafira albinni roore jawaachishannorenna dhaawannore coyiꞌrate murciꞌritto. Hakkiinni aane noo barra nabbawatto niwaawekki giddo tenne alame jaalla ikkineemmokki gede kulanno qorowishshi no. (Yai. 4:4-12) Hakko daafira boohaarsha albinni roore qorophite doodha hasiissannoheta wodanchitto. Kuri coyibba baala biddi assiꞌra hasiissannoheta afootto daafira shoolki barra hexxo mudhattoha ikkara dandaanno. Hexxo mudhitooti. “Haaro mannimma” uddiꞌra mitte hinge assine gundannire ikkitinokkita qaagi. w24.09 5-6 guf. 11-12

Yesuusi beebba assiꞌnanni heeꞌnoonnisita Yihowa laꞌꞌanni noota afino. Isi, Yihowa yannasira baalanka coye taashshannota addaxxino. Miincanninke woyite coyiꞌneemmore eemadhine Yesuusi lawishsha harunsa dandiineemmo. Mitu coyi hakkeya xissiisa hooginkero sammi yine agura dandiineemmo. Woy coyi roore bushanno gede assineemmokki gede sammi yaa doodhineemmoha ikkara dandaanno. (Ros. 3:7; Yai. 1:19, 20) Mito woyite kayinni gara ikkinokkire laꞌneemmo woyite woy halaaleho gaarama hasiissannonke woyite coyiꞌra hasiissannonkeha ikkara dandaanno. (Soq. 6:1, 2) Coyiꞌneemmoha ikkiro, wodanaaꞌminenna ayirrinyunni coyiꞌrate sharrama hasiissannonke. ‘Heeshshonke halaale coyiꞌranno Maganira eeggo uyiꞌneno’ Yesuusi lawishsha harunsa dandiineemmo.—1 Ph. 2:23. w24.11 5-6 guf. 10-12

Cubbo loosino manchi maaro eiro lowo geeshsha hagiidhineemmo! (Luq. 15:7) Togoo woyite galatu hasiisannohu ayeraati? Songote cimeeyyeraati? Soqqamaasinchu Phaawuloosi cubbo loossinori daafira togo yiino: ‘Miteekke Maganu aagintaabbe higganno gede yanna aansara dandaanno.’ (2 Xim. 2:25) Konni qummeeshshira qixxeessinoonniti xiinxallote kaaꞌlitanno borro togo yitanno: “Doogo soꞌrinohu kuni manchi, hedosinna akatasi biddi assiꞌre higino daafira galata hasiissannohu kaaꞌlinosi Maganooti ikkinnina mancho diꞌꞌikkino. Phaawuloosi maaro ea abbitannoha dancha guma lede kulino: Cubbo loosinohu halaalunnita gara ikkitino egenno lede afiꞌranno gede assitanno, wodanisi raga higanno gede assitanno hattono Sheexaanu woshshaadonni gate fulanno gede assitanno.—2 Xim. 2:26.” Cubbo loosino manchi maaro eanno woyite, cimeeyyete komite iso towaatate qixxaawo assitanno; tini Sheexaanu woshshaado giddonni gate fulanno gedenna lekkasira suwashsho doogo seekkiꞌranno gede kaaꞌlitannosi.—Ibi. 12:12,13. w24.08 23 guf. 14-15

Yesuusi itisino manni maalaamittete hasattonsa illachishino. Hiittoonni? Layinki barra kuni manni Yesuusinna soqqamaasinesi hadhinota afi. Hakko daafira Xibiriyaadoosinni daggino yowolla gidde Yesuusa hasanni Qifirinaahoomi haꞌrino. (Yoh. 6:22-24) Insa tenne assitinohu Maganu Gashshooti daafira macciishsha hasidheetini? Deeꞌni. Insa roore heddanni noohu maalaamittete hasiissannonsa daabbo daafiraati. Tenne mayinni anfeemmo? Mannu Qifirinaahoomi mule Yesuusinni xaadi woyite mayi ikkinoro wodanchi. Yesuusi insa isiwa dagginohu maalaamittete sagale hasidhino daafira calla ikkinota xawise coyiꞌrino. Yesuusi insa ‘daabbo itte duubbinoha’ ikkirono hatti sagale baꞌannota ikkitinota kulinonsa. Isi ‘hegere heeshsho afiꞌnanni gede assitanno sagalera’ loosidhanno gede jawaachishinonsa. (Yoh. 6:26, 27) Yesuusi Annisi tenne sagale aannonsata kulinonsa. w24.12 5 guf. 8-9

Rosiisate dandookki woyyeessiꞌrate, rosiisatto rosinna amaalatto amaale Qullaawu Maxaafi aana xintantinota ikkitanno gede assi. Qullaawa Maxaafanna borruwanke seekkite xiinxalli. (Law. 15:28) Xiinxallatto woyite qummeeshshu hedo loosu aana hosiisa dandaatto gede borruwanke giddo ma garinni xawinsoonniro seekkite wodanchi. Rosiisatto woyite mannu wodanira coanno garinni rosiisate sharrami. Woꞌnaalshu noonsa cimeeyye amaaꞌlite kultannohe hedo loosu aana hosiisittoro rosiisate dandookki woyyeessiꞌratto. (1 Xim. 5:17) Songote cimeeyye ammanate roduuwansa rosiissannore woy jawaachishshannore ikka hasiissannonsa; ikkirono insa mito woyite amaala woy seejjano hasiissannonsa. Songote cimeeyye tenne assitanno woyite woꞌmanka woyite shaqqillunni assa hasiissannonsa. Shaqqadonna baxillaancho ikkittoro hattono rosiisatto rosi Maganu Qaali aana xintaminoha ikkiro, Bayiru Rosiisaanchi Yesuusi lawishsha harunsatto daafira worba rosiisaancho ikkatto.—Mat. 11:28-30; 2 Xim. 2:24. w24.11 24 guf. 16

Yihowa daafira coyiꞌneemmo coyinni isira ayirrinye aa dandiineemmo. Yihowa manni isira ‘faarsanno gede, iso galatanno gede, gatisaanchimmasi duduwanno gedenna dagate ayirrinyesi lallawanno’ gede kulloonni. (Fa. 96:1-3) Tenne baalante doogganni iimi Anninkera ayirrinye aa dandiineemmo. (Soq. 4:29) Miinjinkennino Yihowa ayirranno gede assa dandiineemmo. Hundinni hanaffe Yihowa halaalunni magansidhinori konni garinni isira ayirrinye uyitino. (Law. 3:9) Lawishshaho, Israeele qullaawa mine minatenna gatamarate woxe fushshitino. (2 Mot. 12:4, 5; 1 Dud. 29:3-9) Mannaho heddannori Kiristoosi rosaano “woxinsanni” isiranna soqqamaasinesira soqqantino. (Luq. 8:1-3) Umi xibbi diro heeꞌrino Kiristaanino ammanate roduuwansa kaaꞌlate woxe fushshino. (Soq. 11:27-29) Ninkeno xaa yannara uminke fajjonni woxe fushshine Yihowara ayirrinye aa dandiineemmo. w25.01 4 guf. 8; 5 guf. 11

Qornelewoosi cuuamanno gede kaaꞌlinosiri maati? Qullaawu Maxaafi “Isi minisi manni baalu ledo . . . Magano waajjanno” mancho ikkinota kulanno. Qoleno woꞌmanka woyite Magano eeggifate huucciꞌranno. (Soq. 10:2) Pheexiroosi Qornelewoosira dancha duduwo kulita, isinna maatesi Kiristoosa ammante adhite bayichonkonni cuuantino. (Soq. 10:47, 48) Qornelewoosi maatesi ledo Yihowa magansiꞌrate biddi assiꞌra hasiissannosiha aye coyeno biddi assiꞌrate maahoyye yiinoti dihuluullissannote. (Iya. 24:15; Soq. 10:24, 33) Qornelewoosira noosi silxaane Kiristaancho ikkannokki gede guficho ikkitasira dandiitanno. Kayinni isi, silxaane Kiristaancho ikkannokki gede assitasira diwodhino. Halaale macciishshootto daafira heeshshokki giddo lowore biddi assiꞌra hasiissinohe? Hatto ikkiro Yihowa kaaꞌlannohe. Isi Qullaawu Maxaafihu xintu seeri ledo sumuu yaanno garinni isira soqqamate assattore maassiꞌrannohe. w25.03 5 guf. 12-13

Yihowa dirijjitenna albisa ikkite soqqantanno roduuwi daafira gara ikkinokkire macciishshittoro, Maganu diinna umi xibbi diro Yesuusanna rosaanosi assitinore qaagi. Qullaawu Maxaafi balaxe kulinonte gede, xaa yannara Yihowa manna daramanno gede assinanni heeꞌnoonni; hattono insa daafira kapho tareessinanni. (Mat. 5:11, 12) Kapho tareessanni noohu ayetiro anfummoronna bayichonkonni gimbeemmoha ikkiro, kuni kaphi didogannonke. Kapho qorophate maa assa hasiissannonke? Kaphu mashalaqqe qorophe. Kaphu mashalaqqe macciishshineemmo woyite maa assa hasiissannonkero soqqamaasinchu Phaawuloosi xawise kulinonke. Isi Ximootewoosira mitootu ‘maattonna Maganittennire afiꞌrinokki hasaawa’ qorophitanno gede hajajara kulinosi. (1 Xim. 1:3, 4) Kapho tareessannohu ayetiro anfoommo daafira ninkeno kaphu mashalaqqe qorophineemmo. ‘Hawaqiꞌnanniha’ halaalu qaale calla macciishshineemmo.—2 Xim. 1:13. w24.04 11 guf. 16; 13 guf. 17

Yihowara ammanantinoriwa gamba yitine heedhe. Maganu ammanate roduuwinke ledo mittimmatenni magansiꞌnammosira hasiꞌranno. Halaale seekkine cuꞌmiꞌneemmoha ikkiro mittimmanke agadhine heeꞌneemmo. Halaale agurtannori songote giddo babbadooshshu kalaqamanno gede assitanno daafira, Maganu “insawiinni xooqqe” yee qorowisiisinonke. Hatto assa hoongummoro ninke uminke halaale agurre fullammora dandiineemmo. (Rom. 16:17) Halaale bande anfummoronna seekkine cuꞌmiꞌnummoro, Yihowawa gamba yinenna ammanatenni kaajjine heeꞌneemmo. (Efe. 4:15, 16) Sheexaanunnihu kaphu rosinninna totainni didogammeemmo; hattono quuxxote qarri yannara Yihowa agarooshshe afiꞌneemmo. Woꞌmanka woyite halaale seekkitine cuꞌmidhinanniha ikkiro, “keeru Magani ledoꞌne heeꞌranno.”—Fil. 4:8, 9. w24.07 13 guf. 16-17

Yesuusi roorenkanni cubbu duhu gede ayirrinonsare illachishino; hattono harunsaanosi ikkitanno gede koyisinonsa. Isi mannu qarrira kaimu cubbo ikkinota afino. Hakko daafira isi cubbinsanni kainohunni qarramino meentonna labballo kaaꞌlino. Yesuusi lawishsha horoonsiꞌre togo yiino: “Xagisaanchu hasiisannohu dhiwantinoriraati ikkinnina fayyu mannira diꞌꞌikkino.” Isi lede, “Ani dayommohu keeraano ikkikkinni cubbaataamma woshshammoraati” yiino. (Mat. 9:12, 13) Yesuusi coyiꞌrinore assino. Isi hindiiddosenni lekkasi hayishshitino mancho cubbo shaqqillunni gatona yiino. (Luq. 7:37-50) Yesuusi Samaariyu mancho amanyoote baꞌino heeshsho heedhannota afinoha ikkirono, lowo geeshsha hasiisanno halaale rosiisinose. (Yoh. 4:7, 17-19, 25, 26) Yihowa Yesuusira cubbu abbino guma yaano reyo nafa hunanno gede wolqa uyinosi. Hiittoonni? Yesuusi meentono labballono hattono qaaqquulleno jajjabbano reyotenni kayisino.—Mat. 11:5. w24.08 4 guf. 9-10

Yihowa muli yannara suꞌmisi ayirranno gede assannohu hiittoonniiti? Yoosi widoonniiti. Muli yannara suꞌmisi mishamanno gede assitinota Batiꞌra Baabiloone hunanno. (Aju. 17:5, 16; 19:1, 2) Batiꞌra Baabiloone baꞌanna laꞌꞌannohu mitu manni ninke ledo Yihowa magansiꞌra hanafara dandaanno. Jeefote Yihowa Armagedooni olinni Sheexaanu alame woꞌma hunanno; iso gibbannorenna suꞌmisi mishamanno gede assitannore baala coꞌo asse hunanno; iso baxxannore, isira hajajantannorenna isira ayirrinye uyitannore baala kayinni gatisanno. (Maq. 8:38; 2 Tes. 1:6-10) Kiristoosihu Kumu Diri Gashshooti gedensaanni heeꞌrannohu jeefote fonqoli gedensaanni Yihowa suꞌmasi woꞌmunni woꞌma keereensanno. (Aju. 20:7-10) Hatte yannara, “Wayi baaraho woꞌminohu gede, Kaaliiqi ayirrinye afano baatto woꞌmitanno.” (Imb. 2:14) Baalunku manni Yihowara malino ayirrinye aanno yanna lowo geeshsha hagiirsiissannota ikkitanno! w25.01 7 guf. 15-16

Ibiraawootu Kiristaani gimbanninsata dandee saꞌꞌanno gede kaaꞌlannonsari maati? Soqqamaasinchu Phaawuloosi insa iillannonsa fonqolira gara ikkitino lao heedhannonsa gede assiꞌra hasiissannonsata afino. Hakko daafira isi Kiristaanu qajeelsha afiꞌranno gede, Maganu qarru iillansara fajjara dandaannota xawisino. Kuni qajeelshi mittu Kiristaanchira Yihowa baxanno akatta heedhannosi gede woy woyyeessiꞌranno gede kaaꞌlannosi. Togoo qajeelshi abbanno guma illachishe, Ibiraawootu Kiristaani qarra cince saꞌꞌa shota ikkitannonsa gede assiꞌra dandaanno. (Ibi. 12:11) Phaawuloosi Ibiraawootu Kiristaani fonqolu iillannonsa woyite cince saꞌꞌate worbuulle ikkanna hexxo mudha hasiissannonsakkita kule jawaachishinonsa. Phaawuloosi dartu iillanno woyite cincine saꞌꞌate daafira dancha amaale aa dandaanno. Isi hakkuyira albaanni Kiristaanu daramanno gede assannoha ikkino daafira hiittoo qarri iillinonsaro afino. Qoleno qarra cincine saꞌnanni gara afino. Hakkiino sae isira Kiristaancho ikkihu gedensaanni addi addi qarri iillinosi.—2 Qor. 11:23-25. w24.09 12-13 guf. 16-17

Hashshe soodi kiiro albinni roore wiinamme sabbaka hasiissannonke. Mayira? Korkaatuno yanna gooffanni no. Yesuusi goofimarchu yannara loonsannihu sabbakate loosi daafira Maarqoosi 13:10 yiinore wodanchi. Yesuusi Maatewoosi Wongeellira “goofimarchu” daara albaanni dancha duduwo uulla woꞌmate dudumbannita coyiꞌrino. (Mat. 24:14) Tini yaatto Sheexaanu alame woꞌmunni woꞌma baꞌannota leellishshanno. Yihowa muli yanna giddo tini alame baꞌanno ‘barranna saate’ murino. (Mat. 24:36; Soq. 1:7) Hashshe soodi kiiro tini yanna gambisse dagganni no. (Rom. 13:11) Goofimarchu daa geeshsha agurrummokkinni sabbaka hasiissannonke. Soqqanshonke daafira hendeemmo woyite ninkeneeto aante noota lowo geeshsha hasiissanno xaꞌmo xaꞌma hasiissannonke: Dancha duduwo dudumbeemmohu mayiraati? Dudumbeemmo gede assannonkehu baxilleho. Sabbakate looso loosanke, dancha duduwo banxeemmota, manna banxeemmota, wolu baalunkunni roore Yihowanna suꞌmasi banxeemmota leellishshanno. w24.05 14-15 guf. 2-3

Annuwanna amuuwa, oosoꞌne Yihowa kalaqinori daafira heddanno gede jawaachishshensa. Baadiyye hadhinanni woyite woy addi addi muꞌro towaaxxitinanni woyite, oosoꞌne dhagge ikkannoha kalaqamu aana noo akeeka illachishshanno gede kaaꞌlensa. Mayira? Kuni akeeki hayyichu Kalaqaanchi noota leellishannoho. Lawishshaho, batinyu kalaqami aana qunqumadu suudi no; sayinsete fullahaano lowo diro tenne daafira xiinxallitanni keeshshitino. Sayinsete fullahaanchi Nikoola Faameli kalaqamu aana nooha konne suude kiirriro mitu suudi mittu gariha ikkinota huwantannita coyiꞌrino. Tenne kiiro Fibonaachi sikuweensi yinanni. Togoohu qunqumadu suudi duuchu kalaqami aana lawishshaho, mite gaalaakisera, qerqeꞌnete ogorira, muꞌrote daroranna suufete aana no. w24.12 16 guf. 7

Muse, Daawitinna Yohaannisi lowo diri albaanni heedhinoreeti; qoleno insa heeshshonna ninke heeshsho gari babbaxxinoho. Kayinni mitto assannonkeri lowori no. Insa halaalaanchu Maganira soqqantino; ninkeno isira soqqammeemmo. Insante gede ninkeno Yihowa huucciꞌneemmo, iso addaxxineemmo hattono biddishshasi hasiꞌneemmo. Kuri hunda heedhino labballinte gede, ninkeno Yihowa hajajantannosire lowo geeshsha maassiꞌrannonsata dihuluullammeemmo. Hakko daafira Yihowa hajajo wonshine kuri geedhitino labballi uyitino amaale harunsino. Hatto ikkiro assineemmo coyi baalunku qinaannonke. Heeshsho afiꞌneemmo hattono ‘seeda diro heeꞌneemmo’; addanko, hegerera heeꞌneemmo! Qoleno baxillaancho iimi Annanke hagiirsiinse lowo hagiirre afiꞌneemmo; isi eino qaale baala ninke hendoommohunni roorse wonshanno.—Efe. 3:20. w24.11 13 guf. 20-21

Umi xibbi diro mito labballo songote soqqamaano assine shoommoonni. (1 Xim. 3:8) Soqqamaasinchu Phaawuloosi kulinoha ‘manna kaaꞌlanno’ looso loossinori insa ikkitukki digattino. Songote cimeeyye rosiisate loosonna roduuwa towaata illachishshanno gede, songote soqqamaano wole hasiisanno looso loosa kaaꞌlitinoha ikkara dandaanno. Lawishshaho, songote soqqamaano Qullaawa Borro galcha woy Qullaawa Borro galchate hasiisannore hira kaaꞌlitinoha ikkara dandaanno. Hanni songote soqqamaano songoꞌne giddo loossannoha mito kaaꞌlanno looso laꞌno. (1 Phe. 4:10) Insa songote woxe shallagganno gede woy soqqanshote qoqqowo qineessitanno gede, borrote kifilera soqqantanno gede, huurote kifilera loossanno gede, gambooshshunniwa soqqamaano ikkite loossanno gede woy Gambooshshu Addaraashe gatamara kaaꞌlitanno gede gaammansara dandiinanni. Songo qinaabbinota ikkitanno gede kuni baalunku loosi hasiisannoho.—1 Qo. 14:40. w24.10 19 guf. 4-5

Yihowa heeshshonniha ikkinotanna woꞌmanka woyite kaaꞌlannonketa qaangeemmoha ikkiro, iillannonke fonqoli shiima woy jawano ikkiro qeelle saꞌꞌa dandiineemmo. Isi Woꞌmanka Dandaannoha ikkino daafira dandiine saꞌneemmo wolqa aannonke. Hakko daafira iillannonke fonqolo waajjineemmokki gede assannohu ikkadu korkaati noonke. Yihowa shiimu fonqoli iillinonke yannara kaaꞌlinonketa qaaganke jawu fonqoli iillannonke woyiteno kaaꞌlannonketa addaxxineemmo gede assitannonke. Hanni Moote Daawiti albinni roore Yihowa addaxxanno gede assinosiha lame iillinosi coye laꞌno. Isi wedellichu heeꞌre geꞌreewo allaalanni noo yannara dibi yinanni moyichinna doobbiichu annisita mitte mitte geꞌrecho adhite hadhino. Lamente yannara Daawiti worbimmatenni konne moyicho shorrino hattono geꞌreewo gatisino. Kayinni isi qeelle afiꞌrinohu umisinni ikkinohu gede asse dihedino. Kaaꞌlinosihu Yihowa ikkinota afino. (1 Sam. 17:34-37) Daawiti tenne hiincasi heeshshote Magani albillitteno jawaante aannosita addaxxanno gede assitinosi. w24.06 21 guf. 5-6

Hanni mannu gamba yee boohaarannowa koyinsoonnihe yine hendo. Konni koyishshira haꞌra hasiissannohe? Koyisinohe mancho egennoottokkiha woy hakko maa qixxeessinanniro afoottokkiha ikkiro, iso aante noo xaꞌmuwa xaꞌma hasiissannohe: “Gamba yinannihu mamaatinna mamooteeti? Mageeshshi manni gamba yaanno? Konne koyishsha qineessannohu ayeti? Gamba yitannori ayeooti? Hakko maa maa assinanni? Agu heeꞌranno?” Kuri xaꞌmuwara dawaro afiꞌrakki dancha doorsha doodhatto gede kaaꞌlitannohe. Woꞌma mashalaqqe afiꞌrittohu gedensaanni baalanka coye huwatate seekkite hedi. Lawishshaho, gamba yaanno manni giddo mitu Qullaawu Maxaafiha xintu seera ayirrisannokkiha ikkinota woy mannu ago quwa sayise agannota hoollannikkitalla afitto? Hakkiicho mannu akkimale gede ikkara dandaannota hedootto? (1 Phe. 4:3) Baalanka coye seekkite hedattoha ikkiro dancha doorsha doodha dandaatto. w25.01 15 guf. 4-5

Yihowa maaro eꞌannori cubbo wodote kakkalo widoonni hayishshe hoolanno gara huwanteemmo gede kaaꞌlate lawishsha horoonsiꞌrino. Uddanote aaninni duumo xiille ikkinore hayishshe kayisa lowo geeshsha qarrissanno. Ikkirono Yihowa konne lawishsha horoonsiꞌre cubbonke gudise hayishshannotanna horonta leellannokki gede asse hoolannota buuxisinonke. Cubbu ‘asalu’ gedeeti. (Mat. 6:12; Luq. 11:4) Hakko daafira cubbo loonsummo kiiro asalinke lexxanni lexxanni haꞌranno. Yihowara baanteemmohu lowo asali heeꞌrannonke! Yihowa gatona yaannonke woyite kayinni baata hasiissannonke asale aguranni noonkehu gedeeti. Isi gatona yiinonke cubbira galagale dixaꞌmannonke. Kuni Yihowa cubbonke gatona yaanno woyite fooliishsho afiꞌneemmo gede kaaꞌlannonkeho kaajja lawishshaati! w25.02 9-10 guf. 9-10

Annuwunna amuuwu geedhitanno yannara oosonsa kaaꞌlo hasiissannonsati egennantinote; batinye oosono insa hagiirrunni kaaꞌlitanno. (1 Xim. 5:4) Ikkollana Kiristaana ikkitino annuwinna amuuwi lowo hagiirre afidhannohu ooso albillitte kaaꞌlitannonke yite lossidhuro ikkikkinni Yihowa soqqamaano ikkitanno gede assite lossidhuro ikkinota affino. (3 Yoh. 4) Oosoꞌne albillitte umonsa dandiitanno gede qajeelsitinanni woyite Yihowa addaxxitanno gede lawishsha ikkitine kaaꞌlensa. Anjensanni hanaffine diinaggaambe loosa afidhino waaga affanno gede assensa. (Law. 29:21; Efe. 4:28) Lophitanni hadhanno woyite, rosoho worbuulle ikkitanno gede kaaꞌlensa. Annuwunna amuuwu oosonsa hiittoo roso rossannoro hayyotenni doodhitanno gede kaaꞌlate, Qullaawu Maxaafiha xintu seera xiinxalla dandiitanno. Tini oosonsa umonsa dandiitanno gedenna Yihowara albinni roore soqqamate yanna afidhanno gede kaaꞌlitannonsa. w25.03 30-31 guf. 15-16

Isayyaasi fooliishsho 65, Yihowa ayyaanaamittete gannatera heeꞌranno manni hiittoo heeshsho heeꞌrannoro kulino. Tini masaalo umo woꞌmitinohu 537 K.A. Hatte yannara maaro einohu Yihudu manni Baabiloonete qafadonni fule gobbansa higino. Yihowa mannasi maassiꞌrino; hattono diigaminoha Yerusaalamete katama galagale biifisanno gedenna Yihowa magansiꞌnanniha qullaawa mine galagale minanno gede kaaꞌlinonsa. (Isa. 51:11; Zak. 8:3) Isayaasi kulino masaalo layinkimeeshsho woꞌma hanaffinohu 1919 M.D. Hatte yannara, yannankera noohu Yihowa magansiꞌranno manni Batiꞌra Baabiloone qafadonni fulino. Hakkiinni ayyaanaamittete gannate uulla woꞌmate halaꞌla hanaffino. Diinaggaawe Maganu Gashshoote duduwanno manni batinye songo xintino; hattono ayyaanaamittete akatta lossiꞌrino. Finqilunna amanyoote bainore assannohu batinyu manni, “Magano lawate kalaqantinota . . . haaro mannimma” uddiꞌrino. w24.04 20-21 guf. 3-4

Mite gobbuwara, mine kalaqidhinokkirira galte doortannori annansanna amansaati woy anja egemminoho wole mannaati. Wole gobbara kayinni, mittu manchira minisi manni woy jaallasi galte ikkannoha hassannosi; hakkiinni beettunna beetto xaade baxillu jaalooma amada hasiꞌrannoronna teꞌee hasaawanno gede assitanno. Mittu beettinna beetto baxillu jaalooma amadanno gede woy adhamanno gede qineessattora kullihero insa lamunku hasiꞌrannorenna hasiisannonsare seekkite hedi. Galte ikkitanno beetto afittoro ise ayimma, akattasenna ayyaanaamittese seekkite buuxi. Mittu manchira Yihowa ledo noosihu muli jaaloomi woxunni, rosunni woy maccaha ikkatenni lowo geeshsha rooranno. Ikkirono jeefote adhamannoronna teꞌee doodhannori insa ikkinota qaagi. w24.05 23 guf. 11

Coyiꞌra hasiissannonkere coyiꞌne woy coyiꞌra hasiissannonkekkire qorophine baxillu jaalooma amaddinore kaaꞌla dandiineemmo. Mito woyite ninkeneeto eemadha hasiissannonkeha ikkara dandaanno. (Law. 12:18) Lawishshaho, insa baxillu jaalooma amaddinota wolootaho kulate quqquxammeemmoha ikkara dandaanno; kayinni tenne wolootaho kula insa uminsa hasidhannoha ikkara dandaanno. Baxillu jaalooma amaddinore heꞌma woy uminsa hajo kayinse insa misha dihasiissannonke. (Law. 20:19; Rom. 14:10; 1 Tes. 4:11) Qoleno insa adhantanno gede woy agurtanno gede xixxiiwannore coyiꞌneemmota woy tenne hajo daafira kayinse xaꞌmineemmonsata baxa hooggara dandiitanno. Baxillu jaalooma amaddinori jaaloomansa aguralla doodhitu? Uminsa hajora ea woy mittu widira halama dihasiissannonke. (1 Phe. 4:15) Baxillu jaalooma amaddinori jaaloomansa agurtanno woyite insa gara ikkinokkire doodhitinohu gede assine heda dihasiissannonke. Baxillu jaalooma amadansa insa woyyinore doodhitanno gede kaaꞌlitinonsa. Ikkirono doodhitino doorshi xissiisidhanno gede assansara dandaanno. Hakko daafira insa kaaꞌlineemmo faro hasiꞌra dandiineemmo. w24.05 31 guf. 15-16

Maatenke miili woy muli jaalinke halaalu mininni agure fulanno woyite lowo geeshsha xissiisiꞌneemmo. (Far. 78:40) Konni manchi ledo noonke aante lowo geeshsha kaajjado ikkituro isinni tenne ammane adha lowo geeshsha qarra ikkitankera dandiitanno. Togoohu xissiisanno coyi iillinoheha ikkiro, Saadooqi ammanamino gara kultanno xagge jawaachishshannohe. Muli jaalisi Abiyaataari Yihowara ammanama hooga doodhita, Saadooqi Yihowara ammaname heeꞌrino. Kuni coyi ikkinohu Moote Daawiti reyara kae noo yannaraati. Beettisi Adooniyaasi Yihowa Selemoonira aara qaale eino zuufaane adhara woꞌnaalino. (1 Dud. 22:9, 10) Abiyaataari Adooniyaasira halama doodhino. (1 Mo. 1:5-8) Abiyaataari hatto assino daafira Daawitiranna Saadooqira calla ikkikkinni Yihowarano ammanamikki gatino! Saadooqi lowo diro Abiyaataari ledo kakkalaancho ikke soqqamino.—2 Sam. 8:17; 15:29; 19:11-14. w24.07 6 guf. 14-15

Jifamate giddora eꞌneemmokki gede woꞌmanka woyite qorophine heeꞌra gaabbissannota ikkitinokkita addaxxa dandiineemmo. ‘Cubbo loonsiro yannate geeshshi hagiirre’ afiꞌnanniha ikkara dandaanno; Yihowa biddishshi garinni heeꞌne afiꞌnanni hagiirri kayinni lowo geeshsha rooranno. (Ibi. 11:25; Far. 19:8) Korkaatuno kalaqammoommohu isi biddishshi garinni heeꞌnammoraati. (Kal. 1:27) Yihowa hagiirsiisanno garinni heeꞌnummoro keeraanchu tiiꞌꞌi heeꞌrannonke hattono albillitte hegere heeshsho afiꞌneemmo. (1 Xim. 6:12; 2 Xim. 1:3; Yih. 20, 21) ‘Maalu daafuraamo’ ikkinoti egennantinote. (Mat. 26:41) Kayinni togo yaa laanfenke qeeꞌlate assa dandiineemmori dino yaa diꞌꞌikkitino. Yihowa hasiissannonke wolqa oye ninke kaaꞌlate qixxaawaho. (2 Qor. 4:7) Ikkirono Maganu aannonketi mannu wolqara aleenni ikkitino wolqa ikkinota wodanche. Kayinni umo fonqolu giddora eꞌneemmokki gede ninke assa dandiineemmore baala assa hasiissannonke. Yihowa hasiissanno yannara lede jawaante oyenke huuccattonkera dawaro qolannota addaxxa dandiineemmo. (1 Qor. 10:13) Addanko Yihowa kaaꞌlonni jifamate giddora eꞌneemmokki gede woꞌmanka woyite qoropha dandiineemmo. w24.07 19 guf. 19-21

Soqqamaasinchu Phaawuloosi ledosi cimeessa ikke soqqamannohura Ximootewoosira techohu barru qummeeshshira noo hedo borreessinohu, ‘cubbo loosa roso’ assidhinore ma assa hasiissannoro kulateeti. Isi hatto yiinohu mayyaateeti? Isi “mannu baalu albaanni” yiinohu songo woꞌma kulate ikka hoogara dandaanno. Hatteentenni isi, kuni manchi loosino cubbo afinoha mito manna kulanni no. Insa kuni manchi cubbo loosi woyite laꞌinoha woy isi umisi kulinonsaha ikkara dandaanno. Songote cimeeyye insara, hattenne hajo laꞌnoonnitanna cubbo loosino mancho seejjinoonnita hayyotenni kultansara dandiitanno. Mito woyite songote giddo noori batinyu roduuwi, mittu manchi jawa cubbo loosinota affinoha ikkara woy afansa gattannokkiha ikkara dandaanno. Togoo woyite, “mannu baalu albaanni” yaa songo woꞌma kultannote. Hakko daafira mittu cimeessi hakkonne cubbo loosino mancho seejjinoonnita songote egensiisanno. Mayira? Phaawuloosi kulinonte gede, cubbo loossannokki gede woloota ‘jiilchate’ woy qorowisiisateeti. w24.08 23-24 guf. 16-17

Goofimarchu daa geeshsha Yihowara diinaggaambe soqqammanni heeꞌra hasiissannonke. Yesuusi iimi baraarshira ‘haarannonsa’ gede buurantinori baqqi yite heeꞌra hasiissannonsa. (Mat. 24:40) Insa iima Yesuusi ledo heeꞌrate ‘gamba yitanno’ yanna quqquxante agadhitanno. Insa Armagedooni oli gedensaanni Geꞌrechu sargera Yesuusi idayicho ikkitanno. (2 Tes. 2:1) Yoote yanna rakke dagganni nooha ikkirono waajjineemmo gede assannonkeri dino. Ammanamme heeꞌneemmoha ikkiro baxillaanchu iimi Anninke “manchi Beetti albaanni uurra [dandiineemmo gede]” “jawa wolqa” aannonke. (2 Qor. 4:7; Luq. 21:36) Hexxonke iimira haꞌra woy uullate aana heeꞌrano ikkituro, Yesuusi lawishshunni kulino qorowishsha macciishshineemmoha ikkiro Annanke Yihowa hagiirsiinseemmo. Yihowa shaqqado ikkino daafira ‘suꞌmanke heeshshote maxaafi’ giddonni dihunanno.—Dan. 12:1; Aju. 3:5. w24.09 24-25 guf. 19-20

Maganu Qaali giddoyidi keere afiꞌratto gede kaaꞌlannohe. Hiittoonni? Xa noohe coye lawishshaho, Yihowara soqqante afiꞌratto atoote Yihowara soqqantannokkiri tenne alamewiinni afidhanno coyi ledo heewisiisi. Insara albillittete hexxo noonsakki daafira woꞌmunni woꞌma illachishshannohu xa heedhannota qawaaxxaame heeshsho callaati. Kayinni Yihowa atera hedoottohunni aleenni lowo atoote aahera qaale eino. (Far. 145:16) Hanni tenneno hedi: Yihowara soqqama doodha hoongoommoro xa heeshshonke hiittoota ikkitannoro afa dandiineemmo? Huluullammeemmokkihu mittu coyi no: Mitto coye doodhineemmohu Maganonna manna banxeemmo daafira ikkiro, horontanni dancha coye dihoongeemmo. w24.10 27 guf. 12-13