Yohaannisi Ajuuja
5 Zuufaanete ofollinohu lamenka widoonni* borreessinoonnitanna lamala sumuda sumunde seekkine cunfoonni xaaxo qiniiticho anganni amade nooha laummo. 2 Mittu jawaatu sokkaasinchi lowo huuronni, “Xaaxo fanatenna sumuda tirate malinohu ayeti?” yee lallawanna laummo. 3 Ikkollana gordohono baattoteno woy baattote woroonnino xaaxo fana woy giddose noore laꞌꞌa dandiinohu mittuno dino. 4 Xaaxo fanate woy giddose noore laꞌꞌate malinohu mittuno nookki daafira hururame wiꞌlummo. 5 Geerru giddonni mittu kayinni togo yiie: “Wiꞌlitooti. Kuneeti Yihudu gaꞌre ikkino Doobbiichi, Daawiti rumushshi qeelle adhino daafira, xaaxo fananna lamalanka sumuda tira dandaanno.”
6 Zuufaanete mereero, shoolunku heeshshote kalaqami mereeronna geerru mereero gorraminoha lawanno geꞌrechi uurre nooha laummo; konni geꞌrechira lamala buuddanna lamala illuwa noosi; illuwa, uulla woꞌmate sonkoonnite lamalante Maganu ayyaannara lawishshaho. 7 Isino hakkawoyintenni alba hige daye, zuufaanete ofolle noohu qiniiticho anganni amadino xaaxo adhi. 8 Xaaxo adhita, shoolunku heeshshote kalaqaminna 24 geerri Geꞌrechu albaanni kumbuultu; mittu mittunkura gingilaatunna* hixaana wonshinoonniti culkunni seekkinoonni sayinna noonsa. (Hixaanu qullaawootu huuccattora lawishshaho.) 9 Insa togo yitanni haaro faarso faarsitu: “Xaaxo adhatenna sumuda tirate maloottohu ateeti; korkaatuno gorramootto; qoleno gaꞌre baalantenni, afuu* baalunkunni, gosa baalantenninna daga baalantenni manna mundeekkinni Maganoho wodootto; 10 hattono Maganinkera gashshootenna kakkalaasine assootto; insano mootoolla ikkite baatto gashshitanno.”
11 Laummo woyite, zuufaanete, heeshshote kalaqaminna geerru gaangaawira lowo sokkaasine huuro macciishshummo; kiironsano tunsote tunsootinna* kumu kumeeti; 12 insano qoonqonsa naggi assite, “Gorramino Geꞌrechi wolqa, jiro, hayyo, jawaante, ayirrinye, guweenyanna atoote adha maltinosiho” yitu.
13 Qoleno gordoho, baattote, baattote woroonninna baaraho noo kalaqami baalu, ee giddonsa noori baalu, “Zuufaanete ofollinohuranna Geꞌrechoho atootu, ayirrinyu, guweenyunna wolqa hegere hegerera ikkito” yitanna macciishshummo. 14 Shoolunku heeshshote kalaqamino, “Hamiiꞌni!” yitu. Geerruno kumbuulte magansidhu.